೯. ಚರಿಯಸುತ್ತವಣ್ಣನಾ

೯. ನವಮೇ ಲೋಕಂ ಪಾಲೇನ್ತೀತಿ ಲೋಕಂ ಸನ್ಧಾರೇನ್ತಿ ಠಪೇನ್ತಿ ರಕ್ಖನ್ತಿ. ನಯಿಧ ಪಞ್ಞಾಯೇಥ ಮಾತಾತಿ ಇಮಸ್ಮಿಂ ಲೋಕೇ ಜನಿಕಾ ಮಾತಾ ‘‘ಅಯಂ ಮೇ ಮಾತಾ’’ತಿ ಗರುಚಿತ್ತೀಕಾರವಸೇನ ನ ಪಞ್ಞಾಯೇಥ. ಸೇಸಪದೇಸುಪಿ ಏಸೇವ ನಯೋ. ಸಮ್ಭೇದನ್ತಿ ಸಙ್ಕರಂ ಮರಿಯಾದಭೇದಂ ವಾ. ಯಥಾ ಅಜೇಳಕಾತಿಆದೀಸು ಏತೇ ಹಿ ಸತ್ತಾ ‘‘ಅಯಂ ಮೇ ಮಾತಾ’’ತಿ ವಾ ‘‘ಮಾತುಚ್ಛಾ’’ತಿ ವಾ ಗರುಚಿತ್ತೀಕಾರವಸೇನ ನ ಜಾನನ್ತಿ. ಯಂ ವತ್ಥುಂ ನಿಸ್ಸಾಯ ಉಪ್ಪನ್ನಾ, ತತ್ಥೇವ ವಿಪ್ಪಟಿಪಜ್ಜನ್ತಿ. ತಸ್ಮಾ ಉಪಮಂ ಆಹರನ್ತೋ ‘‘ಯಥಾ ಅಜೇಳಕಾ’’ತಿಆದಿಮಾಹ. ನವಮಂ.