೧. ಕಮ್ಮಕಾರಣವಗ್ಗೋ

೧. ವಜ್ಜಸುತ್ತವಣ್ಣನಾ

೧. ದುಕನಿಪಾತಸ್ಸ ಪಠಮೇ ವಜ್ಜಾನೀತಿ ದೋಸಾ ಅಪರಾಧಾ. ದಿಟ್ಠಧಮ್ಮಿಕನ್ತಿ ದಿಟ್ಠೇವ ಧಮ್ಮೇ ಇಮಸ್ಮಿಂಯೇವ ಅತ್ತಭಾವೇ ಉಪ್ಪನ್ನಫಲಂ. ಸಮ್ಪರಾಯಿಕನ್ತಿ ಸಮ್ಪರಾಯೇ ಅನಾಗತೇ ಅತ್ತಭಾವೇ ಉಪ್ಪನ್ನಫಲಂ. ಆಗುಚಾರಿನ್ತಿ ಪಾಪಕಾರಿಂ ಅಪರಾಧಕಾರಕಂ. ರಾಜಾನೋ ಗಹೇತ್ವಾ ವಿವಿಧಾ ಕಮ್ಮಕಾರಣಾ ಕಾರೇನ್ತೇತಿ ಚೋರಂ ಗಹೇತ್ವಾ ವಿವಿಧಾ ಕಮ್ಮಕಾರಣಾ ರಾಜಪುರಿಸಾ ಕರೋನ್ತಿ, ರಾಜಾನೋ ಪನ ತಾ ಕಾರೇನ್ತಿ ನಾಮ. ತಂ ಚೋರಂ ಏವಂ ಕಮ್ಮಕಾರಣಾ ಕಾರಿಯಮಾನಂ ಏಸ ಪಸ್ಸತಿ. ತೇನ ವುತ್ತಂ – ‘‘ಪಸ್ಸತಿ ಚೋರಂ ಆಗುಚಾರಿಂ ರಾಜಾನೋ ಗಹೇತ್ವಾ ವಿವಿಧಾ ಕಮ್ಮಕಾರಣಾ ಕಾರೇನ್ತೇ’’ತಿ. ಅದ್ಧದಣ್ಡಕೇಹೀತಿ ಮುಗ್ಗರೇಹಿ, ಪಹಾರಸಾಧನತ್ಥಂ ವಾ ಚತುಹತ್ಥದಣ್ಡಂ ದ್ವೇಧಾ ಛೇತ್ವಾ ಗಹಿತದಣ್ಡಕೇಹಿ. ಬಿಲಙ್ಗಥಾಲಿಕನ್ತಿ ಕಞ್ಜಿಯಉಕ್ಖಲಿಕಕಮ್ಮಕಾರಣಂ. ತಂ ಕರೋನ್ತಾ ಸೀಸಕಟಾಹಂ ಉಪ್ಪಾಟೇತ್ವಾ ತತ್ತಂ ಅಯೋಗುಳಂ ಸಣ್ಡಾಸೇನ ಗಹೇತ್ವಾ ತತ್ಥ ಪಕ್ಖಿಪನ್ತಿ, ತೇನ ಮತ್ಥಲುಙ್ಗಂ ಪಕ್ಕುಥಿತ್ವಾ ಉತ್ತರತಿ. ಸಙ್ಖಮುಣ್ಡಿಕನ್ತಿ ಸಙ್ಖಮುಣ್ಡಕಮ್ಮಕಾರಣಂ. ತಂ ಕರೋನ್ತಾ ಉತ್ತರೋಟ್ಠಉಭತೋಕಣ್ಣಚೂಳಿಕಗಲವಾಟಕಪರಿಚ್ಛೇದೇನ ಚಮ್ಮಂ ಛಿನ್ದಿತ್ವಾ ಸಬ್ಬಕೇಸೇ ಏಕತೋ ಗಣ್ಠಿಂ ಕತ್ವಾ ದಣ್ಡಕೇನ ವೇಠೇತ್ವಾ ಉಪ್ಪಾಟೇನ್ತಿ, ಸಹ ಕೇಸೇಹಿ ಚಮ್ಮಂ ಉಟ್ಠಹತಿ. ತತೋ ಸೀಸಕಟಾಹಂ ಥೂಲಸಕ್ಖರಾಹಿ ಘಂಸಿತ್ವಾ ಧೋವನ್ತಾ ಸಙ್ಖವಣ್ಣಂ ಕರೋನ್ತಿ. ರಾಹುಮುಖನ್ತಿ ರಾಹುಮುಖಕಮ್ಮಕಾರಣಂ. ತಂ ಕರೋನ್ತಾ ಸಙ್ಕುನಾ ಮುಖಂ ವಿವರಿತ್ವಾ ಅನ್ತೋಮುಖೇ ದೀಪಂ ಜಾಲೇನ್ತಿ, ಕಣ್ಣಚೂಳಿಕಾಹಿ ವಾ ಪಟ್ಠಾಯ ಮುಖಂ ನಿಖಾದನೇನ ಖನನ್ತಿ, ಲೋಹಿತಂ ಪಗ್ಘರಿತ್ವಾ ಮುಖಂ ಪೂರೇತಿ.

ಜೋತಿಮಾಲಿಕನ್ತಿ ಸಕಲಸರೀರಂ ತೇಲಪಿಲೋತಿಕಾಯ ವೇಠೇತ್ವಾ ಆಲಿಮ್ಪೇನ್ತಿ. ಹತ್ಥಪಜ್ಜೋತಿಕನ್ತಿ ಹತ್ಥೇ ತೇಲಪಿಲೋತಿಕಾಯ ವೇಠೇತ್ವಾ ದೀಪಂ ವಿಯ ಪಜ್ಜಾಲೇನ್ತಿ. ಏರಕವತ್ತಿಕನ್ತಿ ಏರಕವತ್ತಕಮ್ಮಕಾರಣಂ. ತಂ ಕರೋನ್ತಾ ಹೇಟ್ಠಾಗೀವತೋ ಪಟ್ಠಾಯ ಚಮ್ಮವಟ್ಟೇ ಕನ್ತಿತ್ವಾ ಗೋಪ್ಫಕೇ ಠಪೇನ್ತಿ, ಅಥ ನಂ ಯೋತ್ತೇಹಿ ಬನ್ಧಿತ್ವಾ ಕಡ್ಢನ್ತಿ. ಸೋ ಅತ್ತನೋ ಚಮ್ಮವಟ್ಟೇ ಅಕ್ಕಮಿತ್ವಾ ಅಕ್ಕಮಿತ್ವಾ ಪತತಿ. ಚೀರಕವಾಸಿಕನ್ತಿ ಚೀರಕವಾಸಿಕಕಮ್ಮಕಾರಣಂ. ತಂ ಕರೋನ್ತಾ ತಥೇವ ಚಮ್ಮವಟ್ಟೇ ಕನ್ತಿತ್ವಾ ಕಟಿಯಂ ಠಪೇನ್ತಿ, ಕಟಿತೋ ಪಟ್ಠಾಯ ಕನ್ತಿತ್ವಾ ಗೋಪ್ಫಕೇಸು ಠಪೇನ್ತಿ, ಉಪರಿಮೇಹಿ ಹೇಟ್ಠಿಮಸರೀರಂ ಚೀರಕನಿವಾಸನನಿವತ್ಥಂ ವಿಯ ಹೋತಿ. ಏಣೇಯ್ಯಕನ್ತಿ ಏಣೇಯ್ಯಕಕಮ್ಮಕಾರಣಂ. ತಂ ಕರೋನ್ತಾ ಉಭೋಸು ಕಪ್ಪರೇಸು ಚ ಉಭೋಸು ಜಾಣುಕೇಸು ಚ ಅಯವಲಯಾನಿ ದತ್ವಾ ಅಯಸೂಲಾನಿ ಕೋಟ್ಟೇನ್ತಿ. ಸೋ ಚತೂಹಿ ಅಯಸೂಲೇಹಿ ಭೂಮಿಯಂ ಪತಿಟ್ಠಹತಿ. ಅಥ ನಂ ಪರಿವಾರೇತ್ವಾ ಅಗ್ಗಿಂ ಕರೋನ್ತಿ. ‘‘ಏಣೇಯ್ಯಕೋ ಜೋತಿಪರಿಗ್ಗಹೋ ಯಥಾ’’ತಿ ಆಗತಟ್ಠಾನೇಪಿ ಇದಮೇವ ವುತ್ತಂ. ತಂ ಕಾಲೇನ ಕಾಲಂ ಸೂಲಾನಿ ಅಪನೇತ್ವಾ ಚತೂಹಿ ಅಟ್ಠಿಕೋಟೀಹಿಯೇವ ಠಪೇನ್ತಿ. ಏವರೂಪಾ ಕಮ್ಮಕಾರಣಾ ನಾಮ ನತ್ಥಿ.

ಬಳಿಸಮಂಸಿಕನ್ತಿ ಉಭತೋಮುಖೇಹಿ ಬಳಿಸೇಹಿ ಪಹರಿತ್ವಾ ಚಮ್ಮಮಂಸನ್ಹಾರೂನಿ ಉಪ್ಪಾಟೇನ್ತಿ. ಕಹಾಪಣಿಕನ್ತಿ ಸಕಲಸರೀರಂ ತಿಣ್ಹಾಹಿ ವಾಸೀಹಿ ಕೋಟಿತೋ ಪಟ್ಠಾಯ ಕಹಾಪಣಮತ್ತಂ, ಕಹಾಪಣಮತ್ತಂ ಪಾತೇನ್ತಾ ಕೋಟ್ಟೇನ್ತಿ. ಖಾರಾಪತಚ್ಛಿಕನ್ತಿ ಸರೀರಂ ತತ್ಥ ತತ್ಥ ಆವುಧೇಹಿ ಪಹರಿತ್ವಾ ಕೋಚ್ಛೇಹಿ ಖಾರಂ ಘಂಸನ್ತಿ, ಚಮ್ಮಮಂಸನ್ಹಾರೂನಿ ಪಗ್ಘರಿತ್ವಾ ಅಟ್ಠಿಕಸಙ್ಖಲಿಕಾವ ತಿಟ್ಠತಿ. ಪಲಿಘಪರಿವತ್ತಿಕನ್ತಿ ಏಕೇನ ಪಸ್ಸೇನ ನಿಪಜ್ಜಾಪೇತ್ವಾ ಕಣ್ಣಚ್ಛಿದ್ದೇನ ಅಯಸೂಲಂ ಕೋಟ್ಟೇತ್ವಾ ಪಥವಿಯಾ ಏಕಾಬದ್ಧಂ ಕರೋನ್ತಿ. ಅಥ ನಂ ಪಾದೇ ಗಹೇತ್ವಾ ಆವಿಞ್ಛನ್ತಿ. ಪಲಾಲಪೀಠಕನ್ತಿ ಛೇಕೋ ಕಾರಣಿಕೋ ಛವಿಚಮ್ಮಂ ಅಚ್ಛಿನ್ದಿತ್ವಾ ನಿಸದಪೋತೇಹಿ ಅಟ್ಠೀನಿ ಭಿನ್ದಿತ್ವಾ ಕೇಸೇಸು ಗಹೇತ್ವಾ ಉಕ್ಖಿಪತಿ, ಮಂಸರಾಸಿಯೇವ ಹೋತಿ. ಅಥ ನಂ ಕೇಸೇಹೇವ ಪರಿಯೋನನ್ಧಿತ್ವಾ ಗಣ್ಹನ್ತಿ, ಪಲಾಲವಟ್ಟಿಂ ವಿಯ ಕತ್ವಾ ಪುನ ವೇಠೇನ್ತಿ. ಸುನಖೇಹಿಪೀತಿ ಕತಿಪಯಾನಿ ದಿವಸಾನಿ ಆಹಾರಂ ಅದತ್ವಾ ಛಾತಕಸುನಖೇಹಿ ಖಾದಾಪೇನ್ತಿ. ತೇ ಮುಹುತ್ತೇನ ಅಟ್ಠಿಕಸಙ್ಖಲಿಕಮೇವ ಕರೋನ್ತಿ. ಸೂಲೇ ಉತ್ತಾಸೇನ್ತೇತಿ ಸೂಲೇ ಆರೋಪೇನ್ತೇ.

ನ ಪರೇಸಂ ಪಾಭತಂ ವಿಲುಮ್ಪನ್ತೋ ಚರತೀತಿ ಪರೇಸಂ ಸನ್ತಕಂ ಭಣ್ಡಂ ಪರಮ್ಮುಖಂ ಆಭತಂ ಅನ್ತಮಸೋ ಅನ್ತರವೀಥಿಯಂ ಪತಿತಂ ಸಹಸ್ಸಭಣ್ಡಿಕಮ್ಪಿ ದಿಸ್ವಾ ‘‘ಇಮಿನಾ ಜೀವಿಸ್ಸಾಮೀ’’ತಿ ವಿಲುಮ್ಪನ್ತೋ ನ ವಿಚರತಿ, ಕೋ ಇಮಿನಾ ಅತ್ಥೋತಿ ಪಿಟ್ಠಿಪಾದೇನ ವಾ ಪವಟ್ಟೇತ್ವಾ ಗಚ್ಛತಿ.

ಪಾಪಕೋತಿ ಲಾಮಕೋ. ದುಕ್ಖೋತಿ ಅನಿಟ್ಠೋ. ಕಿಞ್ಚ ತನ್ತಿ ಕಿಂ ನಾಮ ತಂ ಕಾರಣಂ ಭವೇಯ್ಯ. ಯಾಹನ್ತಿ ಯೇನ ಅಹಂ. ಕಾಯದುಚ್ಚರಿತನ್ತಿ ಪಾಣಾತಿಪಾತಾದಿ ತಿವಿಧಂ ಅಕುಸಲಂ ಕಾಯಕಮ್ಮಂ. ಕಾಯಸುಚರಿತನ್ತಿ ತಸ್ಸ ಪಟಿಪಕ್ಖಭೂತಂ ತಿವಿಧಂ ಕುಸಲಕಮ್ಮಂ. ವಚೀದುಚ್ಚರಿತನ್ತಿ ಮುಸಾವಾದಾದಿ ಚತುಬ್ಬಿಧಂ ಅಕುಸಲಂ ವಚೀಕಮ್ಮಂ. ವಚೀಸುಚರಿತನ್ತಿ ತಸ್ಸ ಪಟಿಪಕ್ಖಭೂತಂ ಚತುಬ್ಬಿಧಂ ಕುಸಲಕಮ್ಮಂ. ಮನೋದುಚ್ಚರಿತನ್ತಿ ಅಭಿಜ್ಝಾದಿ ತಿವಿಧಂ ಅಕುಸಲಕಮ್ಮಂ. ಮನೋಸುಚರಿತನ್ತಿ ತಸ್ಸ ಪಟಿಪಕ್ಖಭೂತಂ ತಿವಿಧಂ ಕುಸಲಕಮ್ಮಂ. ಸುದ್ಧಂ ಅತ್ತಾನಂ ಪರಿಹರತೀತಿ ಏತ್ಥ ದುವಿಧಾ ಸುದ್ಧಿ – ಪರಿಯಾಯತೋ ಚ ನಿಪ್ಪರಿಯಾಯತೋ ಚ. ಸರಣಗಮನೇನ ಹಿ ಪರಿಯಾಯೇನ ಸುದ್ಧಂ ಅತ್ತಾನಂ ಪರಿಹರತಿ ನಾಮ. ತಥಾ ಪಞ್ಚಹಿ ಸೀಲೇಹಿ, ದಸಹಿ ಸೀಲೇಹಿ – ಚತುಪಾರಿಸುದ್ಧಿಸೀಲೇನ, ಪಠಮಜ್ಝಾನೇನ…ಪೇ… ನೇವಸಞ್ಞಾನಾಸಞ್ಞಾಯತನೇನ, ಸೋತಾಪತ್ತಿಮಗ್ಗೇನ, ಸೋತಾಪತ್ತಿಫಲೇನ…ಪೇ… ಅರಹತ್ತಮಗ್ಗೇನ ಪರಿಯಾಯೇನ ಸುದ್ಧಂ ಅತ್ತಾನಂ ಪರಿಹರತಿ ನಾಮ. ಅರಹತ್ತಫಲೇ ಪತಿಟ್ಠಿತೋ ಪನ ಖೀಣಾಸವೋ ಛಿನ್ನಮೂಲಕೇ ಪಞ್ಚಕ್ಖನ್ಧೇ ನ್ಹಾಪೇನ್ತೋಪಿ ಖಾದಾಪೇನ್ತೋಪಿ ಭುಞ್ಜಾಪೇನ್ತೋಪಿ ನಿಸೀದಾಪೇನ್ತೋಪಿ ನಿಪಜ್ಜಾಪೇನ್ತೋಪಿ ನಿಪ್ಪರಿಯಾಯೇನೇವ ಸುದ್ಧಂ ನಿಮ್ಮಲಂ ಅತ್ತಾನಂ ಪರಿಹರತಿ ಪಟಿಜಗ್ಗತೀತಿ ವೇದಿತಬ್ಬೋ.

ತಸ್ಮಾತಿ ಯಸ್ಮಾ ಇಮಾನಿ ದ್ವೇ ವಜ್ಜಾನೇವ, ನೋ ನ ವಜ್ಜಾನಿ, ತಸ್ಮಾ. ವಜ್ಜಭೀರುನೋತಿ ವಜ್ಜಭೀರುಕಾ. ವಜ್ಜಭಯದಸ್ಸಾವಿನೋತಿ ವಜ್ಜಾನಿ ಭಯತೋ ದಸ್ಸನಸೀಲಾ. ಏತಂ ಪಾಟಿಕಙ್ಖನ್ತಿ ಏತಂ ಇಚ್ಛಿತಬ್ಬಂ, ಏತಂ ಅವಸ್ಸಂಭಾವೀತಿ ಅತ್ಥೋ. ಯನ್ತಿ ನಿಪಾತಮತ್ತಂ, ಕಾರಣವಚನಂ ವಾ ಯೇನ ಕಾರಣೇನ ಪರಿಮುಚ್ಚಿಸ್ಸತಿ ಸಬ್ಬವಜ್ಜೇಹಿ. ಕೇನ ಪನ ಕಾರಣೇನ ಪರಿಮುಚ್ಚಿಸ್ಸತೀತಿ? ಚತುತ್ಥಮಗ್ಗೇನ ಚೇವ ಚತುತ್ಥಫಲೇನ ಚ. ಮಗ್ಗೇನ ಹಿ ಪರಿಮುಚ್ಚತಿ ನಾಮ, ಫಲಂ ಪತ್ತೋ ಪರಿಮುತ್ತೋ ನಾಮ ಹೋತೀತಿ. ಕಿಂ ಪನ ಖೀಣಾಸವಸ್ಸ ಅಕುಸಲಂ ನ ವಿಪಚ್ಚತೀತಿ? ವಿಪಚ್ಚತಿ, ತಂ ಪನ ಖೀಣಾಸವಭಾವತೋ ಪುಬ್ಬೇ ಕತಂ. ತಞ್ಚ ಖೋ ಇಮಸ್ಮಿಂಯೇವ ಅತ್ತಭಾವೇ, ಸಮ್ಪರಾಯೇ ಪನಸ್ಸ ಕಮ್ಮಫಲಂ ನಾಮ ನತ್ಥೀತಿ. ಪಠಮಂ.

೨. ಪಧಾನಸುತ್ತವಣ್ಣನಾ

೨. ದುತಿಯೇ ಪಧಾನಾನೀತಿ ವೀರಿಯಾನಿ. ವೀರಿಯಞ್ಹಿ ಪದಹಿತಬ್ಬತೋ ಪಧಾನಭಾವಕರಣತೋ ವಾ ಪಧಾನನ್ತಿ ವುಚ್ಚತಿ. ದುರಭಿಸಮ್ಭವಾನೀತಿ ದುಸ್ಸಹಾನಿ ದುಪ್ಪೂರಿಯಾನಿ, ದುಕ್ಕರಾನೀತಿ ಅತ್ಥೋ. ಅಗಾರಂ ಅಜ್ಝಾವಸತನ್ತಿ ಅಗಾರೇ ವಸನ್ತಾನಂ. ಚೀವರಪಿಣ್ಡಪಾತಸೇನಾಸನಗಿಲಾನಪಚ್ಚಯಭೇಸಜ್ಜಪರಿಕ್ಖಾರಾನುಪ್ಪದಾನತ್ಥಂ ಪಧಾನನ್ತಿ ಏತೇಸಂ ಚೀವರಾದೀನಂ ಚತುನ್ನಂ ಪಚ್ಚಯಾನಂ ಅನುಪ್ಪದಾನತ್ಥಾಯ ಪಧಾನಂ ನಾಮ ದುರಭಿಸಮ್ಭವನ್ತಿ ದಸ್ಸೇತಿ. ಚತುರತನಿಕಮ್ಪಿ ಹಿ ಪಿಲೋತಿಕಂ, ಪಸತತಣ್ಡುಲಮತ್ತಂ ವಾ ಭತ್ತಂ, ಚತುರತನಿಕಂ ವಾ ಪಣ್ಣಸಾಲಂ, ತೇಲಸಪ್ಪಿನವನೀತಾದೀಸು ವಾ ಅಪ್ಪಮತ್ತಕಮ್ಪಿ ಭೇಸಜ್ಜಂ ಪರೇಸಂ ದೇಥಾತಿ ವತ್ತುಮ್ಪಿ ನೀಹರಿತ್ವಾ ದಾತುಮ್ಪಿ ದುಕ್ಕರಂ ಉಭತೋಬ್ಯೂಳ್ಹಸಙ್ಗಾಮಪ್ಪವೇಸನಸದಿಸಂ. ತೇನಾಹ ಭಗವಾ –

‘‘ದಾನಞ್ಚ ಯುದ್ಧಞ್ಚ ಸಮಾನಮಾಹು,

ಅಪ್ಪಾಪಿ ಸನ್ತಾ ಬಹುಕೇ ಜಿನನ್ತಿ;

ಅಪ್ಪಮ್ಪಿ ಚೇ ಸದ್ದಹಾನೋ ದದಾತಿ,

ತೇನೇವ ಸೋ ಹೋತಿ ಸುಖೀ ಪರತ್ಥಾ’’ತಿ. (ಜಾ. ೧.೮.೭೨; ಸಂ. ನಿ. ೧.೩೩);

ಅಗಾರಸ್ಮಾ ಅನಗಾರಿಯಂ ಪಬ್ಬಜಿತಾನನ್ತಿ ಗೇಹತೋ ನಿಕ್ಖಮಿತ್ವಾ ಅಗಾರಸ್ಸ ಘರಾವಾಸಸ್ಸ ಹಿತಾವಹೇಹಿ ಕಸಿಗೋರಕ್ಖಾದೀಹಿ ವಿರಹಿತಂ ಅನಗಾರಿಯಂ ಪಬ್ಬಜ್ಜಂ ಉಪಗತಾನಂ. ಸಬ್ಬೂಪಧಿಪಟಿನಿಸ್ಸಗ್ಗತ್ಥಾಯ ಪಧಾನನ್ತಿ ಸಬ್ಬೇಸಂ ಖನ್ಧೂಪಧಿಕಿಲೇಸೂಪಧಿಅಭಿಸಙ್ಖಾರೂಪಧಿಸಙ್ಖಾತಾನಂ ಉಪಧೀನಂ ಪಟಿನಿಸ್ಸಗ್ಗಸಙ್ಖಾತಸ್ಸ ನಿಬ್ಬಾನಸ್ಸ ಅತ್ಥಾಯ ವಿಪಸ್ಸನಾಯ ಚೇವ ಮಗ್ಗೇನ ಚ ಸಹಜಾತವೀರಿಯಂ. ತಸ್ಮಾತಿ ಯಸ್ಮಾ ಇಮಾನಿ ದ್ವೇ ಪಧಾನಾನಿ ದುರಭಿಸಮ್ಭವಾನಿ, ತಸ್ಮಾ. ದುತಿಯಂ.

೩. ತಪನೀಯಸುತ್ತವಣ್ಣನಾ

೩. ತತಿಯೇ ತಪನೀಯಾತಿ ಇಧ ಚೇವ ಸಮ್ಪರಾಯೇ ಚ ತಪನ್ತೀತಿ ತಪನೀಯಾ. ತಪ್ಪತೀತಿ ಚಿತ್ತಸನ್ತಾಪೇನ ತಪ್ಪತಿ ಅನುಸೋಚತಿ ಕಾಯದುಚ್ಚರಿತಂ ಕತ್ವಾ ನನ್ದಯಕ್ಖೋ ವಿಯ ನನ್ದಮಾಣವೋ ವಿಯ ನನ್ದಗೋಘಾತಕೋ ವಿಯ ದೇವದತ್ತೋ ವಿಯ ದ್ವೇಭಾತಿಕಾ ವಿಯ ಚ. ತೇ ಕಿರ ಗಾವಂ ವಧಿತ್ವಾ ಮಂಸಂ ದ್ವೇ ಕೋಟ್ಠಾಸೇ ಅಕಂಸು. ತತೋ ಕನಿಟ್ಠೋ ಜೇಟ್ಠಕಂ ಆಹ – ‘‘ಮಯ್ಹಂ ದಾರಕಾ ಬಹೂ, ಇಮಾನಿ ಮೇ ಅನ್ತಾನಿ ದೇಹೀ’’ತಿ. ಅಥ ನಂ ಸೋ ‘‘ಸಬ್ಬಂ ಮಂಸಂ ದ್ವೇಧಾ ವಿಭತ್ತಂ, ಪುನ ಕಿಂ ಮಗ್ಗಸೀ’’ತಿ ಪಹರಿತ್ವಾ ಜೀವಿತಕ್ಖಯಂ ಪಾಪೇಸಿ. ನಿವತ್ತಿತ್ವಾ ಚ ನಂ ಓಲೋಕೇನ್ತೋ ಮತಂ ದಿಸ್ವಾ ‘‘ಭಾರಿಯಂ ಮೇ ಕಮ್ಮಂ ಕತ’’ನ್ತಿ ಚಿತ್ತಂ ಉಪ್ಪಾದೇಸಿ. ಅಥಸ್ಸ ಬಲವಸೋಕೋ ಉಪ್ಪಜ್ಜಿ. ಸೋ ಠಿತಟ್ಠಾನೇಪಿ ನಿಸಿನ್ನಟ್ಠಾನೇಪಿ ತದೇವ ಕಮ್ಮಂ ಆವಜ್ಜೇತಿ, ಚಿತ್ತಸ್ಸಾದಂ ನ ಲಭತಿ. ಅಸಿತಪೀತಖಾಯಿತಸಾಯಿತಮ್ಪಿಸ್ಸ ಸರೀರೇ ಓಜಂ ನ ಫರತಿ, ಅಟ್ಠಿಚಮ್ಮಮತ್ತಮೇವ ಅಹೋಸಿ. ಅಥ ನಂ ಏಕೋ ಥೇರೋ ದಿಸ್ವಾ – ‘‘ಉಪಾಸಕ, ತ್ವಂ ಪಹೂತಅನ್ನಪಾನೋ, ಅಟ್ಠಿಚಮ್ಮಮತ್ತಮೇವ ತೇ ಅವಸಿಟ್ಠಂ, ಅತ್ಥಿ ನು ಖೋ ತೇ ಕಿಞ್ಚಿ ತಪನೀಯಕಮ್ಮ’’ನ್ತಿ? ಸೋ ‘‘ಆಮ, ಭನ್ತೇ’’ತಿ ಸಬ್ಬಂ ಆರೋಚೇಸಿ. ಅಥ ನಂ ಥೇರೋ ‘‘ಭಾರಿಯಂ ತೇ ಉಪಾಸಕ ಕಮ್ಮಂ ಕತಂ, ಅನಪರಾಧಟ್ಠಾನೇ ಅಪರದ್ಧ’’ನ್ತಿ ಆಹ. ಸೋ ತೇನೇವ ಕಮ್ಮೇನ ಕಾಲಂ ಕತ್ವಾ ನಿರಯೇ ನಿಬ್ಬತ್ತೋ. ವಚೀದುಚ್ಚರಿತೇನ ಸುಪ್ಪಬುದ್ಧಸಕ್ಕಕೋಕಾಲಿಕಚಿಞ್ಚಮಾಣವಿಕಾದಯೋ ವಿಯ ತಪ್ಪತಿ. ಸೇಸಮೇತ್ಥ ಚತುತ್ಥೇ ಚ ಉತ್ತಾನತ್ಥಮೇವ. ತತಿಯಂ.

೫. ಉಪಞ್ಞಾತಸುತ್ತವಣ್ಣನಾ

೫. ಪಞ್ಚಮೇ ದ್ವಿನ್ನಾಹನ್ತಿ ದ್ವಿನ್ನಂ ಅಹಂ. ಉಪಞ್ಞಾಸಿನ್ತಿ ಉಪಗನ್ತ್ವಾ ಗುಣಂ ಅಞ್ಞಾಸಿಂ, ಜಾನಿಂ ಪಟಿವಿಜ್ಝಿನ್ತಿ ಅತ್ಥೋ. ಇದಾನಿ ತೇ ಧಮ್ಮೇ ದಸ್ಸೇನ್ತೋ ಯಾ ಚ ಅಸನ್ತುಟ್ಠಿತಾತಿಆದಿಮಾಹ. ಇಮಞ್ಹಿ ಧಮ್ಮದ್ವಯಂ ನಿಸ್ಸಾಯ ಸತ್ಥಾ ಸಬ್ಬಞ್ಞುತಂ ಪತ್ತೋ, ತಸ್ಮಾ ತಸ್ಸಾನುಭಾವಂ ದಸ್ಸೇನ್ತೋ ಏವಮಾಹ. ತತ್ಥ ಅಸನ್ತುಟ್ಠಿತಾ ಕುಸಲೇಸು ಧಮ್ಮೇಸೂತಿ ಇಮಿನಾ ಇಮಂ ದೀಪೇತಿ – ‘‘ಅಹಂ ಝಾನಮತ್ತಕೇನ ವಾ ಓಭಾಸನಿಮಿತ್ತಮತ್ತಕೇನ ವಾ ಅಸನ್ತುಟ್ಠೋ ಹುತ್ವಾ ಅರಹತ್ತಮಗ್ಗಮೇವ ಉಪ್ಪಾದೇಸಿಂ. ಯಾವ ಸೋ ನ ಉಪ್ಪಜ್ಜಿ, ನ ತಾವಾಹಂ ಸನ್ತುಟ್ಠೋ ಅಹೋಸಿಂ. ಪಧಾನಸ್ಮಿಂ ಚ ಅನುಕ್ಕಣ್ಠಿತೋ ಹುತ್ವಾ ಅನೋಸಕ್ಕನಾಯ ಠತ್ವಾಯೇವ ಪಧಾನಕಿರಿಯಂ ಅಕಾಸಿ’’ನ್ತಿ ಇಮಮತ್ಥಂ ದಸ್ಸೇನ್ತೋ ಯಾ ಚ ಅಪ್ಪಟಿವಾನಿತಾತಿಆದಿಮಾಹ. ತತ್ಥ ಅಪ್ಪಟಿವಾನಿತಾತಿ ಅಪ್ಪಟಿಕ್ಕಮನಾ ಅನೋಸಕ್ಕನಾ. ಅಪ್ಪಟಿವಾನೀ ಸುದಾಹಂ, ಭಿಕ್ಖವೇ, ಪದಹಾಮೀತಿ ಏತ್ಥ ಸುದನ್ತಿ ನಿಪಾತಮತ್ತಂ. ಅಹಂ, ಭಿಕ್ಖವೇ, ಅನೋಸಕ್ಕನಾಯಂ ಠಿತೋ ಬೋಧಿಸತ್ತಕಾಲೇ ಸಬ್ಬಞ್ಞುತಂ ಪತ್ಥೇನ್ತೋ ಪಧಾನಮಕಾಸಿನ್ತಿ ಅಯಮೇತ್ಥ ಅತ್ಥೋ.

ಇದಾನಿ ಯಥಾ ತೇನ ತಂ ಪಧಾನಂ ಕತಂ, ತಂ ದಸ್ಸೇನ್ತೋ ಕಾಮಂ ತಚೋ ಚಾತಿಆದಿಮಾಹ. ತತ್ಥ ಪತ್ತಬ್ಬನ್ತಿ ಇಮಿನಾ ಪತ್ತಬ್ಬಂ ಗುಣಜಾತಂ ದಸ್ಸೇತಿ. ಪುರಿಸಥಾಮೇನಾತಿಆದಿನಾ ಪುರಿಸಸ್ಸ ಞಾಣಥಾಮೋ ಞಾಣವೀರಿಯಂ ಞಾಣಪರಕ್ಕಮೋ ಚ ಕಥಿತೋ. ಸಣ್ಠಾನನ್ತಿ ಠಪನಾ ಅಪ್ಪವತ್ತನಾ ಓಸಕ್ಕನಾ, ಪಟಿಪ್ಪಸ್ಸದ್ಧೀತಿ ಅತ್ಥೋ. ಏತ್ತಾವತಾ ತೇನ ಚತುರಙ್ಗಸಮನ್ನಾಗತಂ ವೀರಿಯಾಧಿಟ್ಠಾನಂ ನಾಮ ಕಥಿತಂ. ಏತ್ಥ ಹಿ ಕಾಮಂ ತಚೋ ಚಾತಿ ಏಕಂ ಅಙ್ಗಂ, ನ್ಹಾರು ಚಾತಿ ಏಕಂ, ಅಟ್ಠಿ ಚಾತಿ ಏಕಂ, ಮಂಸಲೋಹಿತನ್ತಿ ಏಕಂ, ಇಮಾನಿ ಚತ್ತಾರಿ ಅಙ್ಗಾನಿ. ಪುರಿಸಥಾಮೇನಾತಿಆದೀನಿ ಅಧಿಮತ್ತವೀರಿಯಾಧಿವಚನಾನಿ. ಇತಿ ಪುರಿಮೇಹಿ ಚತೂಹಿ ಅಙ್ಗೇಹಿ ಸಮನ್ನಾಗತೇನ ಹುತ್ವಾ ಏವಂ ಅಧಿಟ್ಠಿತಂ ವೀರಿಯಂ ಚತುರಙ್ಗಸಮನ್ನಾಗತಂ ವೀರಿಯಾಧಿಟ್ಠಾನಂ ನಾಮಾತಿ ವೇದಿತಬ್ಬಂ. ಏತ್ತಾವತಾ ತೇನ ಬೋಧಿಪಲ್ಲಙ್ಕೇ ಅತ್ತನೋ ಆಗಮನೀಯಪಟಿಪದಾ ಕಥಿತಾ.

ಇದಾನಿ ತಾಯ ಪಟಿಪದಾಯ ಪಟಿಲದ್ಧಗುಣಂ ಕಥೇತುಂ ತಸ್ಸ ಮಯ್ಹಂ, ಭಿಕ್ಖವೇತಿಆದಿಮಾಹ. ತತ್ಥ ಅಪ್ಪಮಾದಾಧಿಗತಾತಿ ಸತಿಅವಿಪ್ಪವಾಸಸಙ್ಖಾತೇನ ಅಪ್ಪಮಾದೇನ ಅಧಿಗತಾ, ನ ಸುತ್ತಪ್ಪಮತ್ತೇನ ಲದ್ಧಾ. ಸಮ್ಬೋಧೀತಿ ಚತುಮಗ್ಗಞಾಣಞ್ಚೇವ ಸಬ್ಬಞ್ಞುತಞ್ಞಾಣಞ್ಚ. ನ ಹಿ ಸಕ್ಕಾ ಏತಂ ಸುತ್ತಪ್ಪಮತ್ತೇನ ಅಧಿಗನ್ತುನ್ತಿ. ತೇನಾಹ – ‘‘ಅಪ್ಪಮಾದಾಧಿಗತಾ ಸಮ್ಬೋಧೀ’’ತಿ. ಅನುತ್ತರೋ ಯೋಗಕ್ಖೇಮೋತಿ ನ ಕೇವಲಂ ಬೋಧಿಯೇವ, ಅರಹತ್ತಫಲನಿಬ್ಬಾನಸಙ್ಖಾತೋ ಅನುತ್ತರೋ ಯೋಗಕ್ಖೇಮೋಪಿ ಅಪ್ಪಮಾದಾಧಿಗತೋವ.

ಇದಾನಿ ಅತ್ತನಾ ಪಟಿಲದ್ಧಗುಣೇಸು ಭಿಕ್ಖುಸಙ್ಘಂ ಸಮಾದಪೇನ್ತೋ ತುಮ್ಹೇ ಚೇಪಿ ಭಿಕ್ಖವೇತಿಆದಿಮಾಹ. ತತ್ಥ ಯಸ್ಸತ್ಥಾಯಾತಿ ಯಸ್ಸ ಅತ್ಥಾಯ, ಯಂ ಉಪಸಮ್ಪಜ್ಜ ವಿಹರಿತುಕಾಮಾ ಹುತ್ವಾತಿ ಅತ್ಥೋ. ತದನುತ್ತರನ್ತಿ ತಂ ಅನುತ್ತರಂ. ಬ್ರಹ್ಮಚರಿಯಪರಿಯೋಸಾನನ್ತಿ ಮಗ್ಗಬ್ರಹ್ಮಚರಿಯಸ್ಸ ಪರಿಯೋಸಾನಭೂತಂ ಅರಿಯಫಲಂ. ಅಭಿಞ್ಞಾ ಸಚ್ಛಿಕತ್ವಾತಿ ಅಭಿಞ್ಞಾಯ ಉತ್ತಮಪಞ್ಞಾಯ ಪಚ್ಚಕ್ಖಂ ಕತ್ವಾ. ಉಪಸಮ್ಪಜ್ಜ ವಿಹರಿಸ್ಸಥಾತಿ ಪಟಿಲಭಿತ್ವಾ ಪಾಪುಣಿತ್ವಾ ವಿಹರಿಸ್ಸಥ. ತಸ್ಮಾತಿ ಯಸ್ಮಾ ಅಪ್ಪಟಿವಾನಪಧಾನಂ ನಾಮೇತಂ ಬಹೂಪಕಾರಂ ಉತ್ತಮತ್ಥಸಾಧಕಂ, ತಸ್ಮಾ. ಪಞ್ಚಮಂ.

೬. ಸಂಯೋಜನಸುತ್ತವಣ್ಣನಾ

೬. ಛಟ್ಠೇ ಸಂಯೋಜನಿಯೇಸು ಧಮ್ಮೇಸೂತಿ ದಸನ್ನಂ ಸಂಯೋಜನಾನಂ ಪಚ್ಚಯಭೂತೇಸು ತೇಭೂಮಕಧಮ್ಮೇಸು. ಅಸ್ಸಾದಾನುಪಸ್ಸಿತಾತಿ ಅಸ್ಸಾದತೋ ಪಸ್ಸಿತಾ ಪಸ್ಸನಭಾವೋತಿ ಅತ್ಥೋ. ನಿಬ್ಬಿದಾನುಪಸ್ಸಿತಾತಿ ನಿಬ್ಬಿದಾವಸೇನ ಉಕ್ಕಣ್ಠನವಸೇನ ಪಸ್ಸನಭಾವೋ. ಜಾತಿಯಾತಿ ಖನ್ಧನಿಬ್ಬತ್ತಿತೋ. ಜರಾಯಾತಿ ಖನ್ಧಪರಿಪಾಕತೋ. ಮರಣೇನಾತಿ ಖನ್ಧಭೇದತೋ. ಸೋಕೇಹೀತಿ ಅನ್ತೋನಿಜ್ಝಾಯನಲಕ್ಖಣೇಹಿ ಸೋಕೇಹಿ. ಪರಿದೇವೇಹೀತಿ ತನ್ನಿಸ್ಸಿತಲಾಲಪ್ಪಿತಲಕ್ಖಣೇಹಿ ಪರಿದೇವೇಹಿ. ದುಕ್ಖೇಹೀತಿ ಕಾಯಪಟಿಪೀಳನದುಕ್ಖೇಹಿ. ದೋಮನಸ್ಸೇಹೀತಿ ಮನೋವಿಘಾತದೋಮನಸ್ಸೇಹಿ. ಉಪಾಯಾಸೇಹೀತಿ ಅಧಿಮತ್ತಾಯಾಸಲಕ್ಖಣಉಪಾಯಾಸೇಹಿ. ದುಕ್ಖಸ್ಮಾತಿ ಸಕಲವಟ್ಟದುಕ್ಖತೋ. ಪಜಹತೀತಿ ಮಗ್ಗೇನ ಪಜಹತಿ. ಪಹಾಯಾತಿ ಏತ್ಥ ಪನ ಫಲಕ್ಖಣೋ ಕಥಿತೋ. ಇಮಸ್ಮಿಂ ಸುತ್ತೇ ವಟ್ಟವಿವಟ್ಟಂ ಕಥಿತಂ. ಛಟ್ಠಂ.

೭. ಕಣ್ಹಸುತ್ತವಣ್ಣನಾ

೭. ಸತ್ತಮೇ ಕಣ್ಹಾತಿ ನ ಕಾಳವಣ್ಣತಾಯ ಕಣ್ಹಾ, ಕಣ್ಹತಾಯ ಪನ ಉಪನೇನ್ತೀತಿ ನಿಪ್ಫತ್ತಿಕಾಳತಾಯ ಕಣ್ಹಾ. ಸರಸೇನಾಪಿ ವಾ ಸಬ್ಬಾಕುಸಲಧಮ್ಮಾ ಕಣ್ಹಾ ಏವ. ನ ಹಿ ತೇಸಂ ಉಪ್ಪತ್ತಿಯಾ ಚಿತ್ತಂ ಪಭಸ್ಸರಂ ಹೋತಿ. ಅಹಿರಿಕನ್ತಿ ಅಹಿರಿಕಭಾವೋ. ಅನೋತ್ತಪ್ಪನ್ತಿ ಅನೋತ್ತಾಪಿಭಾವೋ. ಸತ್ತಮಂ.

೮. ಸುಕ್ಕಸುತ್ತವಣ್ಣನಾ

೮. ಅಟ್ಠಮೇ ಸುಕ್ಕಾತಿ ನ ವಣ್ಣಸುಕ್ಕತಾಯ ಸುಕ್ಕಾ, ಸುಕ್ಕತಾಯ ಪನ ಉಪನೇನ್ತೀತಿ ನಿಪ್ಫತ್ತಿಸುಕ್ಕತಾಯ ಸುಕ್ಕಾ. ಸರಸೇನಾಪಿ ವಾ ಸಬ್ಬಕುಸಲಧಮ್ಮಾ ಸುಕ್ಕಾ ಏವ. ತೇಸಂ ಹಿ ಉಪ್ಪತ್ತಿಯಾ ಚಿತ್ತಂ ಪಭಸ್ಸರಂ ಹೋತಿ. ಹಿರೀ ಚ ಓತ್ತಪ್ಪಞ್ಚಾತಿ ಏತ್ಥ ಪಾಪತೋ ಜಿಗುಚ್ಛನಲಕ್ಖಣಾ ಹಿರೀ, ಭಾಯನಲಕ್ಖಣಂ ಓತ್ತಪ್ಪಂ. ಯಂ ಪನೇತ್ಥ ವಿತ್ಥಾರತೋ ವತ್ತಬ್ಬಂ ಸಿಯಾ, ತಂ ವಿಸುದ್ಧಿಮಗ್ಗೇ ವುತ್ತಮೇವ. ಅಟ್ಠಮಂ.

೯. ಚರಿಯಸುತ್ತವಣ್ಣನಾ

೯. ನವಮೇ ಲೋಕಂ ಪಾಲೇನ್ತೀತಿ ಲೋಕಂ ಸನ್ಧಾರೇನ್ತಿ ಠಪೇನ್ತಿ ರಕ್ಖನ್ತಿ. ನಯಿಧ ಪಞ್ಞಾಯೇಥ ಮಾತಾತಿ ಇಮಸ್ಮಿಂ ಲೋಕೇ ಜನಿಕಾ ಮಾತಾ ‘‘ಅಯಂ ಮೇ ಮಾತಾ’’ತಿ ಗರುಚಿತ್ತೀಕಾರವಸೇನ ನ ಪಞ್ಞಾಯೇಥ. ಸೇಸಪದೇಸುಪಿ ಏಸೇವ ನಯೋ. ಸಮ್ಭೇದನ್ತಿ ಸಙ್ಕರಂ ಮರಿಯಾದಭೇದಂ ವಾ. ಯಥಾ ಅಜೇಳಕಾತಿಆದೀಸು ಏತೇ ಹಿ ಸತ್ತಾ ‘‘ಅಯಂ ಮೇ ಮಾತಾ’’ತಿ ವಾ ‘‘ಮಾತುಚ್ಛಾ’’ತಿ ವಾ ಗರುಚಿತ್ತೀಕಾರವಸೇನ ನ ಜಾನನ್ತಿ. ಯಂ ವತ್ಥುಂ ನಿಸ್ಸಾಯ ಉಪ್ಪನ್ನಾ, ತತ್ಥೇವ ವಿಪ್ಪಟಿಪಜ್ಜನ್ತಿ. ತಸ್ಮಾ ಉಪಮಂ ಆಹರನ್ತೋ ‘‘ಯಥಾ ಅಜೇಳಕಾ’’ತಿಆದಿಮಾಹ. ನವಮಂ.

೧೦. ವಸ್ಸೂಪನಾಯಿಕಸುತ್ತವಣ್ಣನಾ

೧೦. ದಸಮಂ ಅಟ್ಠುಪ್ಪತ್ತಿಯಂ ವುತ್ತಂ. ಕತರಅಟ್ಠುಪ್ಪತ್ತಿಯಂ? ಮನುಸ್ಸಾನಂ ಉಜ್ಝಾಯನೇ. ಭಗವತಾ ಹಿ ಪಠಮಬೋಧಿಯಂ ವೀಸತಿ ವಸ್ಸಾನಿ ವಸ್ಸೂಪನಾಯಿಕಾ ಅಪ್ಪಞ್ಞತ್ತಾ ಅಹೋಸಿ. ಭಿಕ್ಖೂ ಅನಿಬದ್ಧವಾಸಾ ವಸ್ಸೇಪಿ ಉತುವಸ್ಸೇಪಿ ಯಥಾಸುಖಂ ವಿಚರಿಂಸು. ತೇ ದಿಸ್ವಾ ಮನುಸ್ಸಾ ‘‘ಕಥಞ್ಹಿ ನಾಮ ಸಮಣಾ ಸಕ್ಯಪುತ್ತಿಯಾ ಹೇಮನ್ತಮ್ಪಿ ಗಿಮ್ಹಮ್ಪಿ ವಸ್ಸಮ್ಪಿ ಚಾರಿಕಂ ಚರಿಸ್ಸನ್ತಿ ಹರಿತಾನಿ ತಿಣಾನಿ ಸಮ್ಮದ್ದನ್ತಾ ಏಕಿನ್ದ್ರಿಯಂ ಜೀವಂ ವಿಹೇಠೇನ್ತಾ ಬಹೂ ಖುದ್ದಕೇ ಪಾಣೇ ಸಙ್ಘಾತಂ ಆಪಾದೇನ್ತಾ. ಇಮೇ ಹಿ ನಾಮ ಅಞ್ಞತಿತ್ಥಿಯಾ ದುರಕ್ಖಾತಧಮ್ಮಾ ವಸ್ಸಾವಾಸಂ ಅಲ್ಲೀಯಿಸ್ಸನ್ತಿ ಸಂಕಸಾಯಿಸ್ಸನ್ತಿ, ಇಮೇ ನಾಮ ಸಕುಣಾ ರುಕ್ಖಗ್ಗೇಸು ಕುಲಾವಕಾನಿ ಕತ್ವಾ ವಸ್ಸಾವಾಸಂ ಅಲ್ಲೀಯಿಸ್ಸನ್ತಿ ಸಂಕಸಾಯಿಸ್ಸನ್ತೀ’’ತಿಆದೀನಿ ವತ್ವಾ ಉಜ್ಝಾಯಿಂಸು. ತಮತ್ಥಂ ಭಿಕ್ಖೂ ಭಗವತೋ ಆರೋಚೇಸುಂ. ಭಗವಾ ತಂ ಅಟ್ಠುಪ್ಪತ್ತಿಂ ಕತ್ವಾ ಇಮಂ ಸುತ್ತಂ ದೇಸೇನ್ತೋ ಪಠಮಂ ತಾವ ‘‘ಅನುಜಾನಾಮಿ, ಭಿಕ್ಖವೇ, ವಸ್ಸಂ ಉಪಗನ್ತು’’ನ್ತಿ (ಮಹಾವ. ೧೮೪) ಏತ್ತಕಮೇವಾಹ. ಅಥ ಭಿಕ್ಖೂನಂ ‘‘ಕದಾ ನು ಖೋ ವಸ್ಸಂ ಉಪಗನ್ತಬ್ಬ’’ನ್ತಿ ಉಪ್ಪನ್ನಂ ವಿತಕ್ಕಂ ಸುತ್ವಾ ‘‘ಅನುಜಾನಾಮಿ, ಭಿಕ್ಖವೇ, ವಸ್ಸಾನೇ ವಸ್ಸಂ ಉಪಗನ್ತು’’ನ್ತಿ ಆಹ. ಅಥ ಖೋ ಭಿಕ್ಖೂನಂ ಏತದಹೋಸಿ – ‘‘ಕತಿ ನು ಖೋ ವಸ್ಸೂಪನಾಯಿಕಾ’’ತಿ. ಭಗವತೋ ಏತಮತ್ಥಂ ಆರೋಚೇಸುಂ. ತಂ ಸುತ್ವಾ ಸಕಲಮ್ಪಿ ಇದಂ ಸುತ್ತಂ ದೇಸೇನ್ತೋ ದ್ವೇಮಾ, ಭಿಕ್ಖವೇತಿಆದಿಮಾಹ. ತತ್ಥ ವಸ್ಸೂಪನಾಯಿಕಾತಿ ವಸ್ಸೂಪಗಮನಾನಿ. ಪುರಿಮಿಕಾತಿ ಅಪರಜ್ಜುಗತಾಯ ಆಸಾಳ್ಹಿಯಾ ಉಪಗನ್ತಬ್ಬಾ ಪುರಿಮಕತ್ತಿಕಪುಣ್ಣಮಿಪರಿಯೋಸಾನಾ ಪಠಮಾ ತೇಮಾಸೀ. ಪಚ್ಛಿಮಿಕಾತಿ ಮಾಸಗತಾಯ ಆಸಾಳ್ಹಿಯಾ ಉಪಗನ್ತಬ್ಬಾ ಪಚ್ಛಿಮಕತ್ತಿಕಪರಿಯೋಸಾನಾ ಪಚ್ಛಿಮಾ ತೇಮಾಸೀತಿ. ದಸಮಂ.

ಕಮ್ಮಕಾರಣವಗ್ಗೋ ಪಠಮೋ.