೬. ಸಂಯೋಜನಸುತ್ತವಣ್ಣನಾ

೬. ಛಟ್ಠೇ ಸಂಯೋಜನಿಯೇಸು ಧಮ್ಮೇಸೂತಿ ದಸನ್ನಂ ಸಂಯೋಜನಾನಂ ಪಚ್ಚಯಭೂತೇಸು ತೇಭೂಮಕಧಮ್ಮೇಸು. ಅಸ್ಸಾದಾನುಪಸ್ಸಿತಾತಿ ಅಸ್ಸಾದತೋ ಪಸ್ಸಿತಾ ಪಸ್ಸನಭಾವೋತಿ ಅತ್ಥೋ. ನಿಬ್ಬಿದಾನುಪಸ್ಸಿತಾತಿ ನಿಬ್ಬಿದಾವಸೇನ ಉಕ್ಕಣ್ಠನವಸೇನ ಪಸ್ಸನಭಾವೋ. ಜಾತಿಯಾತಿ ಖನ್ಧನಿಬ್ಬತ್ತಿತೋ. ಜರಾಯಾತಿ ಖನ್ಧಪರಿಪಾಕತೋ. ಮರಣೇನಾತಿ ಖನ್ಧಭೇದತೋ. ಸೋಕೇಹೀತಿ ಅನ್ತೋನಿಜ್ಝಾಯನಲಕ್ಖಣೇಹಿ ಸೋಕೇಹಿ. ಪರಿದೇವೇಹೀತಿ ತನ್ನಿಸ್ಸಿತಲಾಲಪ್ಪಿತಲಕ್ಖಣೇಹಿ ಪರಿದೇವೇಹಿ. ದುಕ್ಖೇಹೀತಿ ಕಾಯಪಟಿಪೀಳನದುಕ್ಖೇಹಿ. ದೋಮನಸ್ಸೇಹೀತಿ ಮನೋವಿಘಾತದೋಮನಸ್ಸೇಹಿ. ಉಪಾಯಾಸೇಹೀತಿ ಅಧಿಮತ್ತಾಯಾಸಲಕ್ಖಣಉಪಾಯಾಸೇಹಿ. ದುಕ್ಖಸ್ಮಾತಿ ಸಕಲವಟ್ಟದುಕ್ಖತೋ. ಪಜಹತೀತಿ ಮಗ್ಗೇನ ಪಜಹತಿ. ಪಹಾಯಾತಿ ಏತ್ಥ ಪನ ಫಲಕ್ಖಣೋ ಕಥಿತೋ. ಇಮಸ್ಮಿಂ ಸುತ್ತೇ ವಟ್ಟವಿವಟ್ಟಂ ಕಥಿತಂ. ಛಟ್ಠಂ.