೬. ಸಂಸಪ್ಪನೀಯಸುತ್ತವಣ್ಣನಾ

೨೧೬. ಛಟ್ಠೇ ಸಂಸಪ್ಪನೀಯಪರಿಯಾಯಂ ವೋ, ಭಿಕ್ಖವೇ, ಧಮ್ಮಪರಿಯಾಯನ್ತಿ ಸಂಸಪ್ಪನಸ್ಸ ಕಾರಣಂ ದೇಸನಾಸಙ್ಖಾತಂ ಧಮ್ಮದೇಸನಂ. ಸಂಸಪ್ಪತೀತಿ ತಂ ಕಮ್ಮಂ ಕರೋನ್ತೋ ಆಸಪ್ಪತಿ ಪರಿಸಪ್ಪತಿ ವಿಪ್ಫನ್ದತಿ. ಜಿಮ್ಹಾ ಗತೀತಿ ತೇನ ಕಮ್ಮೇನ ಯಂ ಗತಿಂ ಗಮಿಸ್ಸತಿ, ಸಾ ಜಿಮ್ಹಾ ಹೋತಿ. ಜಿಮ್ಹುಪಪತ್ತೀತಿ ತಸ್ಸ ಯಂ ಗತಿಂ ಉಪಪಜ್ಜಿಸ್ಸತಿ, ಸಾಪಿ ಜಿಮ್ಹಾವ ಹೋತಿ. ಸಂಸಪ್ಪಜಾತಿಕಾತಿ ಸಂಸಪ್ಪನಸಭಾವಾ. ಭೂತಾ ಭೂತಸ್ಸ ಉಪಪತ್ತಿ ಹೋತೀತಿ ಭೂತಸ್ಮಾ ಸಭಾವತೋ ವಿಜ್ಜಮಾನಕಮ್ಮಾ ಸತ್ತಸ್ಸ ನಿಬ್ಬತ್ತಿ ಹೋತಿ. ಫಸ್ಸಾ ಫುಸನ್ತೀತಿ ವಿಪಾಕಫಸ್ಸಾ ಫುಸನ್ತಿ.