೭-೮. ಸಞ್ಚೇತನಿಕಸುತ್ತದ್ವಯವಣ್ಣನಾ

೨೧೭-೨೧೮. ಸತ್ತಮೇ ಸಞ್ಚೇತನಿಕಾನನ್ತಿ ಚೇತೇತ್ವಾ ಪಕಪ್ಪೇತ್ವಾ ಕತಾನಂ. ಉಪಚಿತಾನನ್ತಿ ಚಿತಾನಂ ವಡ್ಢಿತಾನಂ. ಅಪ್ಪಟಿಸಂವೇದಿತ್ವಾತಿ ತೇಸಂ ಕಮ್ಮಾನಂ ವಿಪಾಕಂ ಅವೇದಿಯಿತ್ವಾ. ಬ್ಯನ್ತೀಭಾವನ್ತಿ ವಿಗತನ್ತಭಾವಂ ತೇಸಂ ಕಮ್ಮಾನಂ ಪರಿಚ್ಛೇದಪರಿವಟುಮತಾಕರಣಂ. ತಞ್ಚ ಖೋ ದಿಟ್ಠೇವ ಧಮ್ಮೇತಿ ತಞ್ಚ ಖೋ ವಿಪಾಕಂ ದಿಟ್ಠಧಮ್ಮವೇದನೀಯಂ ದಿಟ್ಠೇವ ಧಮ್ಮೇ. ಉಪಪಜ್ಜನ್ತಿ ಉಪಪಜ್ಜವೇದನೀಯಂ ಅನನ್ತರೇ ಅತ್ತಭಾವೇ. ಅಪರೇ ವಾ ಪರಿಯಾಯೇತಿ ಅಪರಪರಿಯಾಯವೇದನೀಯಂ ಪನ ಸಂಸಾರಪ್ಪವತ್ತೇ ಸತಿ ಸಹಸ್ಸಿಮೇಪಿ ಅತ್ತಭಾವೇತಿ. ಇಮಿನಾ ಇದಂ ದಸ್ಸೇತಿ ‘‘ಸಂಸಾರಪ್ಪವತ್ತೇ ಪಟಿಲದ್ಧವಿಪಾಕಾರಹಕಮ್ಮೇ ನ ವಿಜ್ಜತಿ ಸೋ ಜಗತಿಪ್ಪದೇಸೋ, ಯತ್ಥ ಠಿತೋ ಮುಚ್ಚೇಯ್ಯ ಪಾಪಕಮ್ಮಾ’’ತಿ. ತಿವಿಧಾತಿ ತಿಪ್ಪಕಾರಾ. ಕಾಯಕಮ್ಮನ್ತಸನ್ದೋಸಬ್ಯಾಪತ್ತೀತಿ ಕಾಯಕಮ್ಮನ್ತಸಙ್ಖಾತಾ ವಿಪತ್ತಿ. ಇಮಿನಾ ನಯೇನ ಸಬ್ಬಪದಾನಿ ವೇದಿತಬ್ಬಾನಿ. ಅಟ್ಠಮೇ ಅಪಣ್ಣಕೋ ಮಣೀತಿ ಸಮನ್ತತೋ ಚತುರಸ್ಸೋ ಪಾಸಕೋ.