೧೧. ಜಾಣುಸ್ಸೋಣಿಸುತ್ತವಣ್ಣನಾ

೧೭೭. ಏಕಾದಸಮೇ ಉಪಕಪ್ಪತೂತಿ ಪಾಪುಣಾತು. ಠಾನೇತಿ ಓಕಾಸೇ. ನೋ ಅಟ್ಠಾನೇತಿ ನೋ ಅನೋಕಾಸೇ. ನೇರಯಿಕಾನಂ ಆಹಾರೋ ನಾಮ ತತ್ಥ ನಿಬ್ಬತ್ತನಕಮ್ಮಮೇವ. ತೇನೇವ ಹಿ ತೇ ತತ್ಥ ಯಾಪೇನ್ತಿ. ತಿರಚ್ಛಾನಯೋನಿಕಾನಂ ಪನ ತಿಣಪಣ್ಣಾದಿವಸೇನ ಆಹಾರೋ ವೇದಿತಬ್ಬೋ. ಮನುಸ್ಸಾನಂ ಓದನಕುಮ್ಮಾಸಾದಿವಸೇನ, ದೇವಾನಂ ಸುಧಾಭೋಜನಾದಿವಸೇನ, ಪೇತ್ತಿವೇಸಯಿಕಾನಂ ಖೇಳಸಿಙ್ಘಾಣಿಕಾದಿವಸೇನ. ಯಂ ವಾ ಪನಸ್ಸ ಇತೋ ಅನುಪ್ಪವೇಚ್ಛನ್ತೀತಿ ಯಂ ತಸ್ಸ ಮಿತ್ತಾದಯೋ ಇತೋ ದದನ್ತಾ ಅನುಪವೇಸೇನ್ತಿ. ಪೇತ್ತಿವೇಸಯಿಕಾ ಏವ ಹಿ ಪರದತ್ತೂಪಜೀವಿನೋ ಹೋನ್ತಿ, ನ ಅಞ್ಞೇಸಂ ಪರೇಹಿ ದಿನ್ನಂ ಉಪಕಪ್ಪತಿ. ದಾಯಕೋಪಿ ಅನಿಪ್ಫಲೋತಿ ಯಂ ಸನ್ಧಾಯ ತಂ ದಾನಂ ದಿನ್ನಂ, ತಸ್ಸ ಉಪಕಪ್ಪತು ವಾ ಮಾ ವಾ, ದಾಯಕೇನ ಪನ ನ ಸಕ್ಕಾ ನಿಪ್ಫಲೇನ ಭವಿತುಂ, ದಾಯಕೋ ತಸ್ಸ ದಾನಸ್ಸ ವಿಪಾಕಂ ಲಭತಿಯೇವ.

ಅಟ್ಠಾನೇಪಿ ಭವಂ ಗೋತಮೋ ಪರಿಕಪ್ಪಂ ವದತೀತಿ ಅನೋಕಾಸೇ ಉಪ್ಪನ್ನೇಪಿ ತಸ್ಮಿಂ ಞಾತಕೇ ಭವಂ ಗೋತಮೋ ದಾನಸ್ಸ ಫಲಂ ಪರಿಕಪ್ಪೇತಿಯೇವ ಪಞ್ಞಾಪೇತಿಯೇವಾತಿ ಪುಚ್ಛತಿ. ಬ್ರಾಹ್ಮಣಸ್ಸ ಹಿ ‘‘ಏವಂ ದಿನ್ನಸ್ಸ ದಾನಸ್ಸ ಫಲಂ ದಾಯಕೋ ನ ಲಭತೀ’’ತಿ ಲದ್ಧಿ. ಅಥಸ್ಸ ಭಗವಾ ಪಞ್ಹಂ ಪಟಿಜಾನಿತ್ವಾ ‘‘ದಾಯಕೋ ನಾಮ ಯತ್ಥ ಕತ್ಥಚಿ ಪುಞ್ಞಫಲೂಪಜೀವಿಟ್ಠಾನೇ ನಿಬ್ಬತ್ತೋ ದಾನಸ್ಸ ಫಲಂ ಲಭತಿಯೇವಾ’’ತಿ ದಸ್ಸೇತುಂ ಇಧ ಬ್ರಾಹ್ಮಣಾತಿಆದಿಮಾಹ. ಸೋ ತತ್ಥ ಲಾಭೀ ಹೋತೀತಿ ಸೋ ತತ್ಥ ಹತ್ಥಿಯೋನಿಯಂ ನಿಬ್ಬತ್ತೋಪಿ ಮಙ್ಗಲಹತ್ಥಿಟ್ಠಾನಂ ಪತ್ವಾ ಲಾಭೀ ಹೋತಿ. ಅಸ್ಸಾದೀಸುಪಿ ಏಸೇವ ನಯೋ. ಸಾಧುವಗ್ಗೋ ಉತ್ತಾನತ್ಥೋಯೇವಾತಿ.

ಜಾಣುಸ್ಸೋಣಿವಗ್ಗೋ ದುತಿಯೋ.

ಚತುತ್ಥಪಣ್ಣಾಸಕಂ ನಿಟ್ಠಿತಂ.

(೨೧) ೧. ಕರಜಕಾಯವಗ್ಗೋ

೨೧೧. ಪಞ್ಚಮಸ್ಸ ಪಠಮಾದೀನಿ ಉತ್ತಾನತ್ಥಾನೇವ.