೫. ರಾಜನ್ತೇಪುರಪ್ಪವೇಸನಸುತ್ತವಣ್ಣನಾ

೪೫. ಪಞ್ಚಮೇ ಕತಂ ವಾ ಕರಿಸ್ಸನ್ತಿ ವಾತಿ ಮೇಥುನವೀತಿಕ್ಕಮಂ ಕರಿಂಸು ವಾ ಕರಿಸ್ಸನ್ತಿ ವಾ. ರತನನ್ತಿ ಮಣಿರತನಾದೀಸು ಯಂಕಿಞ್ಚಿ. ಪತ್ಥೇತೀತಿ ಮಾರೇತುಂ ಇಚ್ಛತಿ. ಹತ್ಥಿಸಮ್ಬಾಧನ್ತಿ ಹತ್ಥೀಹಿ ಸಮ್ಬಾಧಂ. ಹತ್ಥಿಸಮ್ಮದ್ದನ್ತಿ ವಾ ಪಾಠೋ, ತಸ್ಸತ್ಥೋ – ಹತ್ಥೀಹಿ ಸಮ್ಮದ್ದೋ ಏತ್ಥಾತಿ ಹತ್ಥಿಸಮ್ಮದ್ದಂ. ಸೇಸೇಸುಪಿ ಏಸೇವ ನಯೋ. ರಜನೀಯಾನಿ ರೂಪಸದ್ದಗನ್ಧರಸಫೋಟ್ಠಬ್ಬಾನೀತಿ ಏತಾನಿ ರಾಗಜನಕಾನಿ ರೂಪಾದೀನಿ ತತ್ಥ ಪರಿಪೂರಾನಿ ಹೋನ್ತಿ.