೬. ಸಕ್ಕಸುತ್ತವಣ್ಣನಾ

೪೬. ಛಟ್ಠೇ ಸೋಕಸಭಯೇತಿ ಸೋಕೇನ ಸಭಯೇ. ಸೋಕಭಯೇತಿ ವಾ ಪಾಠೋ, ಅಯಮೇವತ್ಥೋ. ದುತಿಯಪದೇಪಿ ಏಸೇವ ನಯೋ. ಯೇನ ಕೇನಚಿ ಕಮ್ಮಟ್ಠಾನೇನಾತಿ ಕಸಿವಣಿಜ್ಜಾದಿಕಮ್ಮೇಸು ಯೇನ ಕೇನಚಿ ಕಮ್ಮೇನ. ಅನಾಪಜ್ಜ ಅಕುಸಲನ್ತಿ ಕಿಞ್ಚಿ ಅಕುಸಲಂ ಅನಾಪಜ್ಜಿತ್ವಾ. ನಿಬ್ಬಿಸೇಯ್ಯಾತಿ ಉಪ್ಪಾದೇಯ್ಯ ಆಚಿನೇಯ್ಯ. ದಕ್ಖೋತಿ ಛೇಕೋ. ಉಟ್ಠಾನಸಮ್ಪನ್ನೋತಿ ಉಟ್ಠಾನವೀರಿಯೇನ ಸಮನ್ನಾಗತೋ. ಅಲಂ ವಚನಾಯಾತಿ ಯುತ್ತೋ ವಚನಾಯ. ಏಕನ್ತಸುಖಪ್ಪಟಿಸಂವೇದೀ ವಿಹರೇಯ್ಯಾತಿ ಏಕನ್ತಮೇವ ಕಾಯಿಕಚೇತಸಿಕಸುಖಂ ಞಾಣೇನ ಪಟಿಸಂವೇದೇನ್ತೋ ವಿಹರೇಯ್ಯ. ಅನಿಚ್ಚಾತಿ ಹುತ್ವಾ ಅಭಾವತೋ. ತುಚ್ಛಾತಿ ಸಾರರಹಿತಾ. ಮುಸಾತಿ ನಿಚ್ಚಸುಭಸುಖಾ ವಿಯ ಖಾಯಮಾನಾಪಿ ತಥಾ ನ ಹೋನ್ತೀತಿ ಮುಸಾ. ಮೋಸಧಮ್ಮಾತಿ ನಸ್ಸನಸಭಾವಾ. ತಸ್ಮಾ ತೇ ಪಟಿಚ್ಚ ದುಕ್ಖಂ ಉಪ್ಪಜ್ಜತೀತಿ ಸನ್ದಸ್ಸೇತಿ. ಇಧ ಪನ ವೋತಿ ಏತ್ಥ ವೋ ತಿ ನಿಪಾತಮತ್ತಂ. ಅಪಣ್ಣಕಂ ವಾ ಸೋತಾಪನ್ನೋತಿ ಅವಿರಾಧಿತಂ ಏಕಂಸೇನ ಸೋತಾಪನ್ನೋ ವಾ ಹೋತಿ. ಸೋಪಿ ಝಾನಂ ನಿಬ್ಬತ್ತೇತಿ, ಬ್ರಹ್ಮಲೋಕಂ ವಾ ಗನ್ತ್ವಾ ಛಸು ವಾ ಕಾಮಸಗ್ಗೇಸು ಏಕನ್ತಸುಖಪ್ಪಟಿಸಂವೇದೀ ಹುತ್ವಾ ವಿಹರೇಯ್ಯ. ಇಮಸ್ಮಿಂ ಸುತ್ತೇ ಸತ್ಥಾ ಅಟ್ಠಙ್ಗುಪೋಸಥಸ್ಸ ಗುಣಂ ಕಥೇಸಿ.