೨೨-೧. ಸನಿದಸ್ಸನತ್ತಿಕ-ಕುಸಲತ್ತಿಕಂ

೬೩. ನಸನಿದಸ್ಸನಸಪ್ಪಟಿಘಂ ನಕುಸಲಂ ಧಮ್ಮಂ ಪಟಿಚ್ಚ ನಸನಿದಸ್ಸನಸಪ್ಪಟಿಘೋ ನಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ನಸನಿದಸ್ಸನಸಪ್ಪಟಿಘಂ ನಕುಸಲಂ ಧಮ್ಮಂ ಪಟಿಚ್ಚ ನಅನಿದಸ್ಸನಸಪ್ಪಟಿಘೋ ನಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ನಸನಿದಸ್ಸನಸಪ್ಪಟಿಘಂ ನಕುಸಲಂ ಧಮ್ಮಂ ಪಟಿಚ್ಚ ನಅನಿದಸ್ಸನಅಪ್ಪಟಿಘೋ ನಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ…ಪೇ… ಛ.

ನಅನಿದಸ್ಸನಸಪ್ಪಟಿಘಂ ನಕುಸಲಂ ಧಮ್ಮಂ ಪಟಿಚ್ಚ ನಅನಿದಸ್ಸನಸಪ್ಪಟಿಘೋ ನಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ನಅನಿದಸ್ಸನಸಪ್ಪಟಿಘಂ ನಕುಸಲಂ ಧಮ್ಮಂ ಪಟಿಚ್ಚ ನಸನಿದಸ್ಸನಸಪ್ಪಟಿಘೋ ನಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ನಅನಿದಸ್ಸನಸಪ್ಪಟಿಘಂ ನಕುಸಲಂ ಧಮ್ಮಂ ಪಟಿಚ್ಚ ನಅನಿದಸ್ಸನಅಪ್ಪಟಿಘೋ ನಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ…ಪೇ… ಛ.

ನಅನಿದಸ್ಸನಅಪ್ಪಟಿಘಂ ನಕುಸಲಂ ಧಮ್ಮಂ ಪಟಿಚ್ಚ ನಅನಿದಸ್ಸನಅಪ್ಪಟಿಘೋ ನಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಛ.

ನಸನಿದಸ್ಸನಸಪ್ಪಟಿಘಂ ನಕುಸಲಞ್ಚ ನಅನಿದಸ್ಸನಅಪ್ಪಟಿಘಂ ನಕುಸಲಞ್ಚ ಧಮ್ಮಂ ಪಟಿಚ್ಚ ನಸನಿದಸ್ಸನಸಪ್ಪಟಿಘೋ ನಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಛ.

ನಅನಿದಸ್ಸನಸಪ್ಪಟಿಘಂ ನಕುಸಲಞ್ಚ ನಅನಿದಸ್ಸನಅಪ್ಪಟಿಘಂ ನಕುಸಲಞ್ಚ ಧಮ್ಮಂ ಪಟಿಚ್ಚ ನಸನಿದಸ್ಸನಸಪ್ಪಟಿಘೋ ನಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ… ಛ (ಸಂಖಿತ್ತಂ). ಹೇತುಯಾ ತಿಂಸ, ಆರಮ್ಮಣೇ ನವ…ಪೇ… ಅವಿಗತೇ ತಿಂಸ. (ಸಬ್ಬತ್ಥ ವಿತ್ಥಾರೋ.)

೬೪. ನಸನಿದಸ್ಸನಸಪ್ಪಟಿಘಂ ನಅಕುಸಲಂ ಧಮ್ಮಂ ಪಟಿಚ್ಚ ನಸನಿದಸ್ಸನಸಪ್ಪಟಿಘೋ ನಅಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ. ಹೇತುಯಾ ತಿಂಸ, ಆರಮ್ಮಣೇ ನವ…ಪೇ… ಅವಿಗತೇ ತಿಂಸ. (ಸಬ್ಬತ್ಥ ವಿತ್ಥಾರೋ.)

೬೫. ನಸನಿದಸ್ಸನಸಪ್ಪಟಿಘಂ ನಅಬ್ಯಾಕತಂ ಧಮ್ಮಂ ಪಟಿಚ್ಚ ನಸನಿದಸ್ಸನಸಪ್ಪಟಿಘೋ ನಅಬ್ಯಾಕತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ.

ಹೇತುಯಾ. ನವ (ಸಬ್ಬತ್ಥ ನವ.)