೧. ವಿಭಙ್ಗವಾರೋ

ಹೇತುಪಚ್ಚಯೋ

೧೦೪. ಗನ್ಥೋ ಚೇವ ಗನ್ಥನಿಯೋ ಚ ಧಮ್ಮೋ ಗನ್ಥಸ್ಸ ಚೇವ ಗನ್ಥನಿಯಸ್ಸ ಚ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ಗನ್ಥಾ ಹೇತೂ ಸಮ್ಪಯುತ್ತಕಾನಂ ಗನ್ಥಾನಂ ಹೇತುಪಚ್ಚಯೇನ ಪಚ್ಚಯೋ (ಏವಂ ನವ ಪಞ್ಹಾ ವಿತ್ಥಾರೇತಬ್ಬಾ).

ಆರಮ್ಮಣಪಚ್ಚಯೋ

೧೦೫. ಗನ್ಥೋ ಚೇವ ಗನ್ಥನಿಯೋ ಚ ಧಮ್ಮೋ ಗನ್ಥಸ್ಸ ಚೇವ ಗನ್ಥನಿಯಸ್ಸ ಚ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಗನ್ಥೇ ಆರಬ್ಭ ಗನ್ಥಾ ಉಪ್ಪಜ್ಜನ್ತಿ. (ಮೂಲಂ ಪುಚ್ಛಿತಬ್ಬಂ) ಗನ್ಥೇ ಆರಬ್ಭ ಗನ್ಥನಿಯಾ ಚೇವ ನೋ ಚ ಗನ್ಥಾ ಖನ್ಧಾ ಉಪ್ಪಜ್ಜನ್ತಿ. (ಮೂಲಂ ಪುಚ್ಛಿತಬ್ಬಂ) ಗನ್ಥೇ ಆರಬ್ಭ ಗನ್ಥಾ ಚ ಸಮ್ಪಯುತ್ತಕಾ ಚ ಖನ್ಧಾ ಉಪ್ಪಜ್ಜನ್ತಿ. (೩)

೧೦೬. ಗನ್ಥನಿಯೋ ಚೇವ ನೋ ಚ ಗನ್ಥೋ ಧಮ್ಮೋ ಗನ್ಥನಿಯಸ್ಸ ಚೇವ ನೋ ಚ ಗನ್ಥಸ್ಸ ಚ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ದಾನಂ…ಪೇ… ಸೀಲಂ…ಪೇ… ಉಪೋಸಥಕಮ್ಮಂ ಕತ್ವಾ ತಂ ಪಚ್ಚವೇಕ್ಖತಿ, ಪುಬ್ಬೇ ಸುಚಿಣ್ಣಾನಿ…ಪೇ… ಝಾನಾ…ಪೇ… ಅರಿಯಾ ಗೋತ್ರಭುಂ ಪಚ್ಚವೇಕ್ಖನ್ತಿ, ವೋದಾನಂ ಪಚ್ಚವೇಕ್ಖನ್ತಿ, ಪಹೀನೇ ಕಿಲೇಸೇ…ಪೇ… ವಿಕ್ಖಮ್ಭಿತೇ ಕಿಲೇಸೇ ಪಚ್ಚವೇಕ್ಖನ್ತಿ, ಪುಬ್ಬೇ ಸಮುದಾಚಿಣ್ಣೇ ಕಿಲೇಸೇ ಜಾನನ್ತಿ, ಚಕ್ಖುಂ…ಪೇ… ವತ್ಥುಂ ಗನ್ಥನಿಯೇ ಚೇವ ನೋ ಚ ಗನ್ಥೇ ಖನ್ಧೇ ಅನಿಚ್ಚತೋ…ಪೇ… ದೋಮನಸ್ಸಂ ಉಪ್ಪಜ್ಜತಿ; ದಿಬ್ಬೇನ ಚಕ್ಖುನಾ ರೂಪಂ ಪಸ್ಸತಿ, ದಿಬ್ಬಾಯ ಸೋತಧಾತುಯಾ ಸದ್ದಂ ಸುಣಾತಿ. (ಸಬ್ಬಂ ವಿತ್ಥಾರೇತಬ್ಬಂ) ಆವಜ್ಜನಾಯ ಆರಮ್ಮಣಪಚ್ಚಯೇನ ಪಚ್ಚಯೋ. (೧)

ಗನ್ಥನಿಯೋ ಚೇವ ನೋ ಚ ಗನ್ಥೋ ಧಮ್ಮೋ ಗನ್ಥಸ್ಸ ಚೇವ ಗನ್ಥನಿಯಸ್ಸ ಚ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ದಾನಂ…ಪೇ… ಸೀಲಂ…ಪೇ… ಉಪೋಸಥಕಮ್ಮಂ ಕತ್ವಾ ತಂ ಅಸ್ಸಾದೇತಿ ಅಭಿನನ್ದತಿ, ತಂ ಆರಬ್ಭ ರಾಗೋ ಉಪ್ಪಜ್ಜತಿ, ದಿಟ್ಠಿ…ಪೇ… ವಿಚಿಕಿಚ್ಛಾ…ಪೇ… ದೋಮನಸ್ಸಂ ಉಪ್ಪಜ್ಜತಿ; ಪುಬ್ಬೇ ಸುಚಿಣ್ಣಾನಿ…ಪೇ… ಝಾನಾ ವುಟ್ಠಹಿತ್ವಾ ಝಾನಂ…ಪೇ… ಚಕ್ಖುಂ…ಪೇ… ವತ್ಥುಂ ಗನ್ಥನಿಯೇ ಚೇವ ನೋ ಚ ಗನ್ಥೇ ಖನ್ಧೇ ಅಸ್ಸಾದೇತಿ ಅಭಿನನ್ದತಿ, ತಂ ಆರಬ್ಭ ರಾಗೋ ಉಪ್ಪಜ್ಜತಿ, ದಿಟ್ಠಿ…ಪೇ… ದೋಮನಸ್ಸಂ ಉಪ್ಪಜ್ಜತಿ. (೨)

ಗನ್ಥನಿಯೋ ಚೇವ ನೋ ಚ ಗನ್ಥೋ ಧಮ್ಮೋ ಗನ್ಥಸ್ಸ ಚೇವ ಗನ್ಥನಿಯಸ್ಸ ಚ ಗನ್ಥನಿಯಸ್ಸ ಚೇವ ನೋ ಚ ಗನ್ಥಸ್ಸ ಚ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ದಾನಂ…ಪೇ… ಸೀಲಂ…ಪೇ… ಉಪೋಸಥಕಮ್ಮಂ…ಪೇ… ಪುಬ್ಬೇ ಸುಚಿಣ್ಣಾನಿ…ಪೇ… ಝಾನಾ ವುಟ್ಠಹಿತ್ವಾ ಝಾನಂ…ಪೇ… ಚಕ್ಖುಂ…ಪೇ… ವತ್ಥುಂ ಗನ್ಥನಿಯೇ ಚೇವ ನೋ ಚ ಗನ್ಥೇ ಖನ್ಧೇ ಅಸ್ಸಾದೇತಿ ಅಭಿನನ್ದತಿ, ತಂ ಆರಬ್ಭ ಗನ್ಥಾ ಚ ಸಮ್ಪಯುತ್ತಕಾ ಚ ಖನ್ಧಾ ಉಪ್ಪಜ್ಜನ್ತಿ (ಏವಂ ಇತರೇಪಿ ತೀಣಿ ವಿತ್ಥಾರೇತಬ್ಬಾ). (೩)

(ಆರಬ್ಭ ಕಾತಬ್ಬಾ. ಇಮಸ್ಮಿಂ ದುಕೇ ಲೋಕುತ್ತರಂ ನತ್ಥಿ, ಗನ್ಥದುಕಸದಿಸಂ, ನಿನ್ನಾನಾಕರಣಂ. ‘‘ಗನ್ಥನಿಯ’’ನ್ತಿ ನಿಯಾಮೇತಬ್ಬಂ, ಮಗ್ಗೇ ನವ ಪಞ್ಹಾ ಕಾತಬ್ಬಾ.)

ಗನ್ಥಗನ್ಥನಿಯದುಕಂ ನಿಟ್ಠಿತಂ.