೧. ವಿಭಙ್ಗವಾರೋ

ಹೇತುಪಚ್ಚಯೋ

೧೦೬. ಸಞ್ಞೋಜನೋ ಚೇವ ಸಞ್ಞೋಜನಸಮ್ಪಯುತ್ತೋ ಚ ಧಮ್ಮೋ ಸಞ್ಞೋಜನಸ್ಸ ಚೇವ ಸಞ್ಞೋಜನಸಮ್ಪಯುತ್ತಸ್ಸ ಚ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ಕಾಮರಾಗಸಞ್ಞೋಜನೋ ದಿಟ್ಠಿಸಞ್ಞೋಜನಸ್ಸ ಅವಿಜ್ಜಾಸಞ್ಞೋಜನಸ್ಸ ಹೇತುಪಚ್ಚಯೇನ ಪಚ್ಚಯೋ (ಚಕ್ಕಂ). (೧)

ಸಞ್ಞೋಜನೋ ಚೇವ ಸಞ್ಞೋಜನಸಮ್ಪಯುತ್ತೋ ಚ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಚೇವ ನೋ ಚ ಸಞ್ಞೋಜನಸ್ಸ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ಸಞ್ಞೋಜನಾ ಚೇವ ಸಞ್ಞೋಜನಸಮ್ಪಯುತ್ತಾ ಚ ಹೇತೂ ಸಮ್ಪಯುತ್ತಕಾನಂ ಖನ್ಧಾನಂ ಹೇತುಪಚ್ಚಯೇನ ಪಚ್ಚಯೋ. (೨)

ಸಞ್ಞೋಜನೋ ಚೇವ ಸಞ್ಞೋಜನಸಮ್ಪಯುತ್ತೋ ಚ ಧಮ್ಮೋ ಸಞ್ಞೋಜನಸ್ಸ ಚೇವ ಸಞ್ಞೋಜನಸಮ್ಪಯುತ್ತಸ್ಸ ಚ ಸಞ್ಞೋಜನಸಮ್ಪಯುತ್ತಸ್ಸ ಚೇವ ನೋ ಚ ಸಞ್ಞೋಜನಸ್ಸ ಚ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ಕಾಮರಾಗಸಞ್ಞೋಜನೋ ದಿಟ್ಠಿಸಞ್ಞೋಜನಸ್ಸ ಅವಿಜ್ಜಾಸಞ್ಞೋಜನಸ್ಸ ಸಮ್ಪಯುತ್ತಕಾನಞ್ಚ ಖನ್ಧಾನಂ ಹೇತುಪಚ್ಚಯೇನ ಪಚ್ಚಯೋ (ಚಕ್ಕಂ). (೩)

ಆರಮ್ಮಣಪಚ್ಚಯೋ

೧೦೭. ಸಞ್ಞೋಜನೋ ಚೇವ ಸಞ್ಞೋಜನಸಮ್ಪಯುತ್ತೋ ಚ ಧಮ್ಮೋ ಸಞ್ಞೋಜನಸ್ಸ ಚೇವ ಸಞ್ಞೋಜನಸಮ್ಪಯುತ್ತಸ್ಸ ಚ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಸಞ್ಞೋಜನೇ ಆರಬ್ಭ ಸಞ್ಞೋಜನಾ ಉಪ್ಪಜ್ಜನ್ತಿ. (ಮೂಲಂ ಕಾತಬ್ಬಂ) ಸಞ್ಞೋಜನೇ ಆರಬ್ಭ ಸಞ್ಞೋಜನಸಮ್ಪಯುತ್ತಾ ಚೇವ ನೋ ಚ ಸಞ್ಞೋಜನಾ ಖನ್ಧಾ ಉಪ್ಪಜ್ಜನ್ತಿ. (ಮೂಲಂ ಕಾತಬ್ಬಂ) ಸಞ್ಞೋಜನೇ ಆರಬ್ಭ ಸಞ್ಞೋಜನಾ ಚ ಸಞ್ಞೋಜನಸಮ್ಪಯುತ್ತಕಾ ಚ ಖನ್ಧಾ ಉಪ್ಪಜ್ಜನ್ತಿ. (೧)

ಸಞ್ಞೋಜನಸಮ್ಪಯುತ್ತೋ ಚೇವ ನೋ ಚ ಸಞ್ಞೋಜನೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಚೇವ ನೋ ಚ ಸಞ್ಞೋಜನಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಸಞ್ಞೋಜನಸಮ್ಪಯುತ್ತೇ ಚೇವ ನೋ ಚ ಸಞ್ಞೋಜನೇ ಖನ್ಧೇ ಆರಬ್ಭ ಸಞ್ಞೋಜನಸಮ್ಪಯುತ್ತಾ ಚೇವ ನೋ ಚ ಸಞ್ಞೋಜನಾ ಖನ್ಧಾ ಉಪ್ಪಜ್ಜನ್ತಿ. (೧)

ಸಞ್ಞೋಜನಸಮ್ಪಯುತ್ತೋ ಚೇವ ನೋ ಚ ಸಞ್ಞೋಜನೋ ಧಮ್ಮೋ ಸಞ್ಞೋಜನಸ್ಸ ಚೇವ ಸಞ್ಞೋಜನಸಮ್ಪಯುತ್ತಸ್ಸ ಚ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಸಞ್ಞೋಜನಸಮ್ಪಯುತ್ತೇ ಚೇವ ನೋ ಚ ಸಞ್ಞೋಜನೇ ಖನ್ಧೇ ಆರಬ್ಭ ಸಞ್ಞೋಜನಾ ಉಪ್ಪಜ್ಜನ್ತಿ. (೨)

ಸಞ್ಞೋಜನಸಮ್ಪಯುತ್ತೋ ಚೇವ ನೋ ಚ ಸಞ್ಞೋಜನೋ ಧಮ್ಮೋ ಸಞ್ಞೋಜನಸ್ಸ ಚೇವ ಸಞ್ಞೋಜನಸಮ್ಪಯುತ್ತಸ್ಸ ಚ ಸಞ್ಞೋಜನಸಮ್ಪಯುತ್ತಸ್ಸ ಚೇವ ನೋ ಚ ಸಞ್ಞೋಜನಸ್ಸ ಚ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಸಞ್ಞೋಜನಸಮ್ಪಯುತ್ತೇ ಚೇವ ನೋ ಚ ಸಞ್ಞೋಜನೇ ಖನ್ಧೇ ಆರಬ್ಭ ಸಞ್ಞೋಜನಾ ಚ ಸಞ್ಞೋಜನಸಮ್ಪಯುತ್ತಕಾ ಚ ಖನ್ಧಾ ಉಪ್ಪಜ್ಜನ್ತಿ. (೩)

ಸಞ್ಞೋಜನೋ ಚೇವ ಸಞ್ಞೋಜನಸಮ್ಪಯುತ್ತೋ ಚ ಸಞ್ಞೋಜನಸಮ್ಪಯುತ್ತೋ ಚೇವ ನೋ ಚ ಸಞ್ಞೋಜನೋ ಚ ಧಮ್ಮಾ ಸಞ್ಞೋಜನಸ್ಸ ಚೇವ ಸಞ್ಞೋಜನಸಮ್ಪಯುತ್ತಸ್ಸ ಚ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ… ತೀಣಿ.

ಅಧಿಪತಿಪಚ್ಚಯೋ

೧೦೮. ಸಞ್ಞೋಜನೋ ಚೇವ ಸಞ್ಞೋಜನಸಮ್ಪಯುತ್ತೋ ಚ ಧಮ್ಮೋ ಸಞ್ಞೋಜನಸ್ಸ ಚೇವ ಸಞ್ಞೋಜನಸಮ್ಪಯುತ್ತಸ್ಸ ಚ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ – ಆರಮ್ಮಣಾಧಿಪತಿ… ತೀಣಿ.

ಸಞ್ಞೋಜನಸಮ್ಪಯುತ್ತೋ ಚೇವ ನೋ ಚ ಸಞ್ಞೋಜನೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಚೇವ ನೋ ಚ ಸಞ್ಞೋಜನಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ – ಆರಮ್ಮಣಾಧಿಪತಿ, ಸಹಜಾತಾಧಿಪತಿ… ತೀಣಿ (ಇಮಾಸು ತೀಸುಪಿ ಪಞ್ಹಾಸು ಆರಮ್ಮಣಾಧಿಪತಿಪಿ ಸಹಜಾತಾಧಿಪತಿಪಿ ಕಾತಬ್ಬಾ).

ಸಞ್ಞೋಜನೋ ಚೇವ ಸಞ್ಞೋಜನಸಮ್ಪಯುತ್ತೋ ಚ ಸಞ್ಞೋಜನಸಮ್ಪಯುತ್ತೋ ಚೇವ ನೋ ಚ ಸಞ್ಞೋಜನೋ ಚ ಧಮ್ಮಾ ಸಞ್ಞೋಜನಸ್ಸ ಚೇವ ಸಞ್ಞೋಜನಸಮ್ಪಯುತ್ತಸ್ಸ ಚ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ – ಆರಮ್ಮಣಾಧಿಪತಿ… ತೀಣಿ.

ಅನನ್ತರಪಚ್ಚಯಾದಿ

೧೦೯. ಸಞ್ಞೋಜನೋ ಚೇವ ಸಞ್ಞೋಜನಸಮ್ಪಯುತ್ತೋ ಚ ಧಮ್ಮೋ ಸಞ್ಞೋಜನಸ್ಸ ಚೇವ ಸಞ್ಞೋಜನಸಮ್ಪಯುತ್ತಸ್ಸ ಚ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ… ನವ (ನಿನ್ನಾನಾಕರಣಂ, ವಿಭಜನಾ ನತ್ಥಿ. ಆರಮ್ಮಣಸದಿಸಾ)… ಸಮನನ್ತರಪಚ್ಚಯೇನ ಪಚ್ಚಯೋ… ನವ… ಸಹಜಾತಪಚ್ಚಯೇನ ಪಚ್ಚಯೋ… ನವ… ಅಞ್ಞಮಞ್ಞಪಚ್ಚಯೇನ ಪಚ್ಚಯೋ… ನವ… ನಿಸ್ಸಯಪಚ್ಚಯೇನ ಪಚ್ಚಯೋ… ನವ… ಉಪನಿಸ್ಸಯಪಚ್ಚಯೇನ ಪಚ್ಚಯೋ… ನವ (ಆರಮ್ಮಣನಯೇನ ಕಾತಬ್ಬಾ)… ಆಸೇವನಪಚ್ಚಯೇನ ಪಚ್ಚಯೋ… ನವ.

ಕಮ್ಮಪಚ್ಚಯಾದಿ

೧೧೦. ಸಞ್ಞೋಜನಸಮ್ಪಯುತ್ತೋ ಚೇವ ನೋ ಚ ಸಞ್ಞೋಜನೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಚೇವ ನೋ ಚ ಸಞ್ಞೋಜನಸ್ಸ ಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ… ತೀಣಿ… ಆಹಾರಪಚ್ಚಯೇನ ಪಚ್ಚಯೋ… ತೀಣಿ… ಇನ್ದ್ರಿಯಪಚ್ಚಯೇನ ಪಚ್ಚಯೋ… ತೀಣಿ… ಝಾನಪಚ್ಚಯೇನ ಪಚ್ಚಯೋ… ತೀಣಿ… ಮಗ್ಗಪಚ್ಚಯೇನ ಪಚ್ಚಯೋ… ನವ … ಸಮ್ಪಯುತ್ತಪಚ್ಚಯೇನ ಪಚ್ಚಯೋ… ನವ… ಅತ್ಥಿಪಚ್ಚಯೇನ ಪಚ್ಚಯೋ … ನವ… ನತ್ಥಿಪಚ್ಚಯೇನ ಪಚ್ಚಯೋ… ನವ… ವಿಗತಪಚ್ಚಯೇನ ಪಚ್ಚಯೋ… ನವ… ಅವಿಗತಪಚ್ಚಯೇನ ಪಚ್ಚಯೋ… ನವ.