೧. ವಿಭಙ್ಗವಾರೋ

ಹೇತುಪಚ್ಚಯೋ

೧೦೦. ಸಞ್ಞೋಜನಞ್ಚೇವ ಸಞ್ಞೋಜನಸಮ್ಪಯುತ್ತಞ್ಚ ಧಮ್ಮಂ ಪಟಿಚ್ಚ ಸಞ್ಞೋಜನೋ ಚೇವ ಸಞ್ಞೋಜನಸಮ್ಪಯುತ್ತೋ ಚ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಕಾಮರಾಗಸಞ್ಞೋಜನಂ ಪಟಿಚ್ಚ ದಿಟ್ಠಿಸಞ್ಞೋಜನಂ ಅವಿಜ್ಜಾಸಞ್ಞೋಜನಂ (ಚಕ್ಕಂ). (೧)

ಸಞ್ಞೋಜನಞ್ಚೇವ ಸಞ್ಞೋಜನಸಮ್ಪಯುತ್ತಞ್ಚ ಧಮ್ಮಂ ಪಟಿಚ್ಚ ಸಞ್ಞೋಜನಸಮ್ಪಯುತ್ತೋ ಚೇವ ನೋ ಚ ಸಞ್ಞೋಜನೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಸಞ್ಞೋಜನೇ ಪಟಿಚ್ಚ ಸಮ್ಪಯುತ್ತಕಾ ಖನ್ಧಾ. (೨)

ಸಞ್ಞೋಜನಞ್ಚೇವ ಸಞ್ಞೋಜನಸಮ್ಪಯುತ್ತಞ್ಚ ಧಮ್ಮಂ ಪಟಿಚ್ಚ ಸಞ್ಞೋಜನೋ ಚೇವ ಸಞ್ಞೋಜನಸಮ್ಪಯುತ್ತೋ ಚ ಸಞ್ಞೋಜನಸಮ್ಪಯುತ್ತೋ ಚೇವ ನೋ ಚ ಸಞ್ಞೋಜನೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ಕಾಮರಾಗಸಞ್ಞೋಜನಂ ಪಟಿಚ್ಚ ದಿಟ್ಠಿಸಞ್ಞೋಜನಂ ಅವಿಜ್ಜಾಸಞ್ಞೋಜನಂ ಸಮ್ಪಯುತ್ತಕಾ ಚ ಖನ್ಧಾ (ಚಕ್ಕಂ). (೩)

೧೦೧. ಸಞ್ಞೋಜನಸಮ್ಪಯುತ್ತಞ್ಚೇವ ನೋ ಚ ಸಞ್ಞೋಜನಂ ಧಮ್ಮಂ ಪಟಿಚ್ಚ ಸಞ್ಞೋಜನಸಮ್ಪಯುತ್ತೋ ಚೇವ ನೋ ಚ ಸಞ್ಞೋಜನೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಸಞ್ಞೋಜನಸಮ್ಪಯುತ್ತಞ್ಚೇವ ನೋ ಚ ಸಞ್ಞೋಜನಂ ಏಕಂ ಖನ್ಧಂ ಪಟಿಚ್ಚ ತಯೋ ಖನ್ಧಾ…ಪೇ… ದ್ವೇ ಖನ್ಧೇ…ಪೇ…. (೧)

ಸಞ್ಞೋಜನಸಮ್ಪಯುತ್ತಞ್ಚೇವ ನೋ ಚ ಸಞ್ಞೋಜನಂ ಧಮ್ಮಂ ಪಟಿಚ್ಚ ಸಞ್ಞೋಜನೋ ಚೇವ ಸಞ್ಞೋಜನಸಮ್ಪಯುತ್ತೋ ಚ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಸಞ್ಞೋಜನಸಮ್ಪಯುತ್ತೇ ಚೇವ ನೋ ಚ ಸಞ್ಞೋಜನೇ ಖನ್ಧೇ ಪಟಿಚ್ಚ ಸಞ್ಞೋಜನಾ (೨)

ಸಞ್ಞೋಜನಸಮ್ಪಯುತ್ತಞ್ಚೇವ ನೋ ಚ ಸಞ್ಞೋಜನಂ ಧಮ್ಮಂ ಪಟಿಚ್ಚ ಸಞ್ಞೋಜನೋ ಚೇವ ಸಞ್ಞೋಜನಸಮ್ಪಯುತ್ತೋ ಚ ಸಞ್ಞೋಜನಸಮ್ಪಯುತ್ತೋ ಚೇವ ನೋ ಚ ಸಞ್ಞೋಜನೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ಸಞ್ಞೋಜನಸಮ್ಪಯುತ್ತಞ್ಚೇವ ನೋ ಚ ಸಞ್ಞೋಜನಂ ಏಕಂ ಖನ್ಧಂ ಪಟಿಚ್ಚ ತಯೋ ಖನ್ಧಾ ಸಞ್ಞೋಜನಾ ಚ…ಪೇ… ದ್ವೇ ಖನ್ಧೇ…ಪೇ…. (೩)

೧೦೨. ಸಞ್ಞೋಜನಞ್ಚೇವ ಸಞ್ಞೋಜನಸಮ್ಪಯುತ್ತಞ್ಚ ಸಞ್ಞೋಜನಸಮ್ಪಯುತ್ತಞ್ಚೇವ ನೋ ಚ ಸಞ್ಞೋಜನಞ್ಚ ಧಮ್ಮಂ ಪಟಿಚ್ಚ ಸಞ್ಞೋಜನೋ ಚೇವ ಸಞ್ಞೋಜನಸಮ್ಪಯುತ್ತೋ ಚ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಕಾಮರಾಗಸಞ್ಞೋಜನಞ್ಚ ಸಮ್ಪಯುತ್ತಕೇ ಚ ಖನ್ಧೇ ಪಟಿಚ್ಚ ದಿಟ್ಠಿಸಞ್ಞೋಜನಂ ಅವಿಜ್ಜಾಸಞ್ಞೋಜನಂ (ಚಕ್ಕಂ). (೧)

ಸಞ್ಞೋಜನಞ್ಚೇವ ಸಞ್ಞೋಜನಸಮ್ಪಯುತ್ತಞ್ಚ ಸಞ್ಞೋಜನಸಮ್ಪಯುತ್ತಞ್ಚೇವ ನೋ ಚ ಸಞ್ಞೋಜನಞ್ಚ ಧಮ್ಮಂ ಪಟಿಚ್ಚ ಸಞ್ಞೋಜನಸಮ್ಪಯುತ್ತೋ ಚೇವ ನೋ ಚ ಸಞ್ಞೋಜನೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾ – ಸಞ್ಞೋಜನಸಮ್ಪಯುತ್ತಞ್ಚೇವ ನೋ ಚ ಸಞ್ಞೋಜನಂ ಏಕಂ ಖನ್ಧಞ್ಚ ಸಞ್ಞೋಜನೇ ಚ ಪಟಿಚ್ಚ ತಯೋ ಖನ್ಧಾ…ಪೇ… ದ್ವೇ ಖನ್ಧೇ ಚ…ಪೇ…. (೨)

ಸಞ್ಞೋಜನಞ್ಚೇವ ಸಞ್ಞೋಜನಸಮ್ಪಯುತ್ತಞ್ಚ ಸಞ್ಞೋಜನಸಮ್ಪಯುತ್ತಞ್ಚೇವ ನೋ ಚ ಸಞ್ಞೋಜನಞ್ಚ ಧಮ್ಮಂ ಪಟಿಚ್ಚ ಸಞ್ಞೋಜನೋ ಚೇವ ಸಞ್ಞೋಜನಸಮ್ಪಯುತ್ತೋ ಚ ಸಞ್ಞೋಜನಸಮ್ಪಯುತ್ತೋ ಚೇವ ನೋ ಚ ಸಞ್ಞೋಜನೋ ಚ ಧಮ್ಮಾ ಉಪ್ಪಜ್ಜನ್ತಿ ಹೇತುಪಚ್ಚಯಾ – ಸಞ್ಞೋಜನಸಮ್ಪಯುತ್ತಞ್ಚೇವ ನೋ ಚ ಸಞ್ಞೋಜನಂ ಏಕಂ ಖನ್ಧಞ್ಚ ಕಾಮರಾಗಸಞ್ಞೋಜನಞ್ಚ ಪಟಿಚ್ಚ ತಯೋ ಖನ್ಧಾ ದಿಟ್ಠಿಸಞ್ಞೋಜನಂ ಅವಿಜ್ಜಾಸಞ್ಞೋಜನಂ…ಪೇ… ದ್ವೇ ಖನ್ಧೇ ಚ…ಪೇ… (ಚಕ್ಕಂ). (೩)