೧. ವಿಭಙ್ಗವಾರೋ

ಹೇತುಪಚ್ಚಯೋ

೬೬. ಸಞ್ಞೋಜನಸಮ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ಸಞ್ಞೋಜನಸಮ್ಪಯುತ್ತಾ ಹೇತೂ ಸಮ್ಪಯುತ್ತಕಾನಂ ಖನ್ಧಾನಂ ಹೇತುಪಚ್ಚಯೇನ ಪಚ್ಚಯೋ. (೧)

ಸಞ್ಞೋಜನಸಮ್ಪಯುತ್ತೋ ಧಮ್ಮೋ ಸಞ್ಞೋಜನವಿಪ್ಪಯುತ್ತಸ್ಸ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ಸಞ್ಞೋಜನಸಮ್ಪಯುತ್ತಾ ಹೇತೂ ಚಿತ್ತಸಮುಟ್ಠಾನಾನಂ ರೂಪಾನಂ ಹೇತುಪಚ್ಚಯೇನ ಪಚ್ಚಯೋ. (೨)

ಸಞ್ಞೋಜನಸಮ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಚ ಸಞ್ಞೋಜನವಿಪ್ಪಯುತ್ತಸ್ಸ ಚ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ಸಞ್ಞೋಜನಸಮ್ಪಯುತ್ತಾ ಹೇತೂ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಹೇತುಪಚ್ಚಯೇನ ಪಚ್ಚಯೋ. (೩)

೬೭. ಸಞ್ಞೋಜನವಿಪ್ಪಯುತ್ತೋ ಧಮ್ಮೋ ಸಞ್ಞೋಜನವಿಪ್ಪಯುತ್ತಸ್ಸ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ಸಞ್ಞೋಜನವಿಪ್ಪಯುತ್ತಾ ಹೇತೂ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಹೇತುಪಚ್ಚಯೇನ ಪಚ್ಚಯೋ, ಉದ್ಧಚ್ಚಸಹಗತೋ ಮೋಹೋ ಚಿತ್ತಸಮುಟ್ಠಾನಾನಂ ರೂಪಾನಂ ಹೇತುಪಚ್ಚಯೇನ ಪಚ್ಚಯೋ; ಪಟಿಸನ್ಧಿಕ್ಖಣೇ…ಪೇ…. (೧)

ಸಞ್ಞೋಜನವಿಪ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ಉದ್ಧಚ್ಚಸಹಗತೋ ಮೋಹೋ ಸಮ್ಪಯುತ್ತಕಾನಂ ಖನ್ಧಾನಂ ಹೇತುಪಚ್ಚಯೇನ ಪಚ್ಚಯೋ. (೨)

ಸಞ್ಞೋಜನವಿಪ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಚ ಸಞ್ಞೋಜನವಿಪ್ಪಯುತ್ತಸ್ಸ ಚ ಧಮ್ಮಸ್ಸ ಹೇತುಪಚ್ಚಯೇನ ಪಚ್ಚಯೋ – ಉದ್ಧಚ್ಚಸಹಗತೋ ಮೋಹೋ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಹೇತುಪಚ್ಚಯೇನ ಪಚ್ಚಯೋ. (೩)

ಆರಮ್ಮಣಪಚ್ಚಯೋ

೬೮. ಸಞ್ಞೋಜನಸಮ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಸಞ್ಞೋಜನಸಮ್ಪಯುತ್ತೇ ಖನ್ಧೇ ಆರಬ್ಭ ಸಞ್ಞೋಜನಸಮ್ಪಯುತ್ತಕಾ ಖನ್ಧಾ ಉಪ್ಪಜ್ಜನ್ತಿ. (ಮೂಲಂ ಕಾತಬ್ಬಂ) ಸಞ್ಞೋಜನಸಮ್ಪಯುತ್ತೇ ಖನ್ಧೇ ಆರಬ್ಭ ಸಞ್ಞೋಜನವಿಪ್ಪಯುತ್ತಾ ಖನ್ಧಾ ಚ ಮೋಹೋ ಚ ಉಪ್ಪಜ್ಜನ್ತಿ. (ಮೂಲಂ ಕಾತಬ್ಬಂ) ಸಞ್ಞೋಜನಸಮ್ಪಯುತ್ತೇ ಖನ್ಧೇ ಆರಬ್ಭ ಉದ್ಧಚ್ಚಸಹಗತಾ ಖನ್ಧಾ ಚ ಮೋಹೋ ಚ ಉಪ್ಪಜ್ಜನ್ತಿ. (೩)

೬೯. ಸಞ್ಞೋಜನವಿಪ್ಪಯುತ್ತೋ ಧಮ್ಮೋ ಸಞ್ಞೋಜನವಿಪ್ಪಯುತ್ತಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ದಾನಂ ದತ್ವಾ ಸೀಲಂ…ಪೇ… ಉಪೋಸಥಕಮ್ಮಂ ಕತ್ವಾ ತಂ ಪಚ್ಚವೇಕ್ಖತಿ, ಪುಬ್ಬೇ ಸುಚಿಣ್ಣಾನಿ…ಪೇ… ಝಾನಾ…ಪೇ… ಅರಿಯಾ ಮಗ್ಗಾ ವುಟ್ಠಹಿತ್ವಾ ಮಗ್ಗಂ ಪಚ್ಚವೇಕ್ಖನ್ತಿ, ಫಲಂ ಪಚ್ಚವೇಕ್ಖನ್ತಿ, ನಿಬ್ಬಾನಂ ಪಚ್ಚವೇಕ್ಖನ್ತಿ, ನಿಬ್ಬಾನಂ ಗೋತ್ರಭುಸ್ಸ, ವೋದಾನಸ್ಸ, ಮಗ್ಗಸ್ಸ, ಫಲಸ್ಸ, ಆವಜ್ಜನಾಯ ಆರಮ್ಮಣಪಚ್ಚಯೇನ ಪಚ್ಚಯೋ; ಅರಿಯಾ ಸಞ್ಞೋಜನವಿಪ್ಪಯುತ್ತೇ ಪಹೀನೇ ಕಿಲೇಸೇ ಪಚ್ಚವೇಕ್ಖನ್ತಿ, ವಿಕ್ಖಮ್ಭಿತೇ ಕಿಲೇಸೇ ಪಚ್ಚವೇಕ್ಖನ್ತಿ, ಪುಬ್ಬೇ ಸಮುದಾಚಿಣ್ಣೇ ಕಿಲೇಸೇ ಜಾನನ್ತಿ, ಚಕ್ಖುಂ…ಪೇ… ವತ್ಥುಂ ಸಞ್ಞೋಜನವಿಪ್ಪಯುತ್ತೇ ಖನ್ಧೇ ಚ ಮೋಹಞ್ಚ ಅನಿಚ್ಚತೋ…ಪೇ… ವಿಪಸ್ಸತಿ…ಪೇ… ದಿಬ್ಬೇನ ಚಕ್ಖುನಾ ರೂಪಂ ಪಸ್ಸತಿ, ದಿಬ್ಬಾಯ ಸೋತಧಾತುಯಾ ಸದ್ದಂ ಸುಣಾತಿ, ಚೇತೋಪರಿಯಞಾಣೇನ ಸಞ್ಞೋಜನವಿಪ್ಪಯುತ್ತಚಿತ್ತಸಮಙ್ಗಿಸ್ಸ ಚಿತ್ತಂ ಜಾನಾತಿ, ಆಕಾಸಾನಞ್ಚಾಯತನಂ ವಿಞ್ಞಾಣಞ್ಚಾಯತನಸ್ಸ…ಪೇ… ರೂಪಾಯತನಂ…ಪೇ… ಫೋಟ್ಠಬ್ಬಾಯತನಂ…ಪೇ… ಸಞ್ಞೋಜನವಿಪ್ಪಯುತ್ತಾ ಖನ್ಧಾ ಇದ್ಧಿವಿಧಞಾಣಸ್ಸ, ಚೇತೋಪರಿಯಞಾಣಸ್ಸ, ಪುಬ್ಬೇನಿವಾಸಾನುಸ್ಸತಿಞಾಣಸ್ಸ, ಯಥಾಕಮ್ಮೂಪಗಞಾಣಸ್ಸ, ಅನಾಗತಂಸಞಾಣಸ್ಸ, ಆವಜ್ಜನಾಯ ಮೋಹಸ್ಸ ಚ ಆರಮ್ಮಣಪಚ್ಚಯೇನ ಪಚ್ಚಯೋ. (೧)

ಸಞ್ಞೋಜನವಿಪ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ದಾನಂ ದತ್ವಾ ಸೀಲಂ…ಪೇ… ಉಪೋಸಥಕಮ್ಮಂ…ಪೇ… ಪುಬ್ಬೇ ಸುಚಿಣ್ಣಾನಿ…ಪೇ… ಝಾನಾ ವುಟ್ಠಹಿತ್ವಾ ಝಾನಂ…ಪೇ… ಚಕ್ಖುಂ…ಪೇ… ವತ್ಥುಂ ಸಞ್ಞೋಜನವಿಪ್ಪಯುತ್ತೇ ಖನ್ಧೇ ಚ ಮೋಹಞ್ಚ ಅಸ್ಸಾದೇತಿ ಅಭಿನನ್ದತಿ, ತಂ ಆರಬ್ಭ ರಾಗೋ ಉಪ್ಪಜ್ಜತಿ…ಪೇ… ದೋಮನಸ್ಸಂ ಉಪ್ಪಜ್ಜತಿ. (೨)

ಸಞ್ಞೋಜನವಿಪ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಚ ಸಞ್ಞೋಜನವಿಪ್ಪಯುತ್ತಸ್ಸ ಚ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಚಕ್ಖುಂ…ಪೇ… ವತ್ಥುಂ ಸಞ್ಞೋಜನವಿಪ್ಪಯುತ್ತೇ ಖನ್ಧೇ ಚ ಮೋಹಞ್ಚ ಆರಬ್ಭ ಉದ್ಧಚ್ಚಸಹಗತಾ ಖನ್ಧಾ ಚ ಮೋಹೋ ಚ ಉಪ್ಪಜ್ಜನ್ತಿ. (೩)

೭೦. ಸಞ್ಞೋಜನಸಮ್ಪಯುತ್ತೋ ಚ ಸಞ್ಞೋಜನವಿಪ್ಪಯುತ್ತೋ ಚ ಧಮ್ಮಾ ಸಞ್ಞೋಜನಸಮ್ಪಯುತ್ತಸ್ಸ ಧಮ್ಮಸ್ಸ ಆರಮ್ಮಣಪಚ್ಚಯೇನ ಪಚ್ಚಯೋ – ಉದ್ಧಚ್ಚಸಹಗತೇ ಖನ್ಧೇ ಚ ಮೋಹಞ್ಚ ಆರಬ್ಭ ಸಞ್ಞೋಜನಸಮ್ಪಯುತ್ತಕಾ ಖನ್ಧಾ ಉಪ್ಪಜ್ಜನ್ತಿ. (ಮೂಲಂ ಕಾತಬ್ಬಂ) ಉದ್ಧಚ್ಚಸಹಗತೇ ಖನ್ಧೇ ಚ ಮೋಹಞ್ಚ ಆರಬ್ಭ ಸಞ್ಞೋಜನವಿಪ್ಪಯುತ್ತಾ ಖನ್ಧಾ ಚ ಮೋಹೋ ಚ ಉಪ್ಪಜ್ಜನ್ತಿ. (ಮೂಲಂ ಕಾತಬ್ಬಂ) ಉದ್ಧಚ್ಚಸಹಗತೇ ಖನ್ಧೇ ಚ ಮೋಹಞ್ಚ ಆರಬ್ಭ ಉದ್ಧಚ್ಚಸಹಗತಾ ಖನ್ಧಾ ಚ ಮೋಹೋ ಚ ಉಪ್ಪಜ್ಜನ್ತಿ. (೩)

ಅಧಿಪತಿಪಚ್ಚಯೋ

೭೧. ಸಞ್ಞೋಜನಸಮ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ – ಆರಮ್ಮಣಾಧಿಪತಿ, ಸಹಜಾತಾಧಿಪತಿ. ಆರಮ್ಮಣಾಧಿಪತಿ – ರಾಗಂ…ಪೇ… ದಿಟ್ಠಿಂ ಗರುಂ ಕತ್ವಾ ಅಸ್ಸಾದೇತಿ ಅಭಿನನ್ದತಿ, ತಂ ಗರುಂ ಕತ್ವಾ ರಾಗೋ ಉಪ್ಪಜ್ಜತಿ, ದಿಟ್ಠಿ ಉಪ್ಪಜ್ಜತಿ. ಸಹಜಾತಾಧಿಪತಿ – ಸಞ್ಞೋಜನಸಮ್ಪಯುತ್ತಾಧಿಪತಿ ಸಮ್ಪಯುತ್ತಕಾನಂ ಖನ್ಧಾನಂ ಅಧಿಪತಿಪಚ್ಚಯೇನ ಪಚ್ಚಯೋ. (೧)

ಸಞ್ಞೋಜನಸಮ್ಪಯುತ್ತೋ ಧಮ್ಮೋ ಸಞ್ಞೋಜನವಿಪ್ಪಯುತ್ತಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. ಸಹಜಾತಾಧಿಪತಿ – ಸಞ್ಞೋಜನಸಮ್ಪಯುತ್ತಾಧಿಪತಿ ಚಿತ್ತಸಮುಟ್ಠಾನಾನಂ ರೂಪಾನಂ ಅಧಿಪತಿಪಚ್ಚಯೇನ ಪಚ್ಚಯೋ. (೨)

ಸಞ್ಞೋಜನಸಮ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಚ ಸಞ್ಞೋಜನವಿಪ್ಪಯುತ್ತಸ್ಸ ಚ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. ಸಹಜಾತಾಧಿಪತಿ – ಸಞ್ಞೋಜನಸಮ್ಪಯುತ್ತಾಧಿಪತಿ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅಧಿಪತಿಪಚ್ಚಯೇನ ಪಚ್ಚಯೋ. (೩)

೭೨. ಸಞ್ಞೋಜನವಿಪ್ಪಯುತ್ತೋ ಧಮ್ಮೋ ಸಞ್ಞೋಜನವಿಪ್ಪಯುತ್ತಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ – ಆರಮ್ಮಣಾಧಿಪತಿ, ಸಹಜಾತಾಧಿಪತಿ. ಆರಮ್ಮಣಾಧಿಪತಿ – ದಾನಂ ದತ್ವಾ ಸೀಲಂ…ಪೇ… ಉಪೋಸಥಕಮ್ಮಂ ಕತ್ವಾ ತಂ ಗರುಂ ಕತ್ವಾ ಪಚ್ಚವೇಕ್ಖತಿ, ಪುಬ್ಬೇ ಸುಚಿಣ್ಣಾನಿ…ಪೇ… ಝಾನಾ…ಪೇ… ಅರಿಯಾ ಮಗ್ಗಾ…ಪೇ… ಫಲಂ…ಪೇ… ನಿಬ್ಬಾನಂ…ಪೇ… ನಿಬ್ಬಾನಂ ಗೋತ್ರಭುಸ್ಸ, ವೋದಾನಸ್ಸ, ಮಗ್ಗಸ್ಸ, ಫಲಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. ಸಹಜಾತಾಧಿಪತಿ – ಸಞ್ಞೋಜನವಿಪ್ಪಯುತ್ತಾಧಿಪತಿ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅಧಿಪತಿಪಚ್ಚಯೇನ ಪಚ್ಚಯೋ. (೧)

ಸಞ್ಞೋಜನವಿಪ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಧಮ್ಮಸ್ಸ ಅಧಿಪತಿಪಚ್ಚಯೇನ ಪಚ್ಚಯೋ. ಆರಮ್ಮಣಾಧಿಪತಿ – ದಾನಂ ದತ್ವಾ ಸೀಲಂ…ಪೇ… ಉಪೋಸಥಕಮ್ಮಂ ಕತ್ವಾ ತಂ ಗರುಂ ಕತ್ವಾ ಅಸ್ಸಾದೇತಿ ಅಭಿನನ್ದತಿ, ತಂ ಗರುಂ ಕತ್ವಾ ರಾಗೋ ಉಪ್ಪಜ್ಜತಿ, ದಿಟ್ಠಿ ಉಪ್ಪಜ್ಜತಿ, ಪುಬ್ಬೇ ಸುಚಿಣ್ಣಾನಿ…ಪೇ… ಝಾನಾ…ಪೇ… ಚಕ್ಖುಂ…ಪೇ… ವತ್ಥುಂ ಸಞ್ಞೋಜನವಿಪ್ಪಯುತ್ತೇ ಖನ್ಧೇ ಗರುಂ ಕತ್ವಾ ಅಸ್ಸಾದೇತಿ ಅಭಿನನ್ದತಿ, ತಂ ಗರುಂ ಕತ್ವಾ ರಾಗೋ ಉಪ್ಪಜ್ಜತಿ, ದಿಟ್ಠಿ ಉಪ್ಪಜ್ಜತಿ. (೨)

ಅನನ್ತರಪಚ್ಚಯೋ

೭೩. ಸಞ್ಞೋಜನಸಮ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ ಸಞ್ಞೋಜನಸಮ್ಪಯುತ್ತಾ ಖನ್ಧಾ ಪಚ್ಛಿಮಾನಂ ಪಚ್ಛಿಮಾನಂ ಸಞ್ಞೋಜನಸಮ್ಪಯುತ್ತಕಾನಂ ಖನ್ಧಾನಂ ಅನನ್ತರಪಚ್ಚಯೇನ ಪಚ್ಚಯೋ. (೧)

ಸಞ್ಞೋಜನಸಮ್ಪಯುತ್ತೋ ಧಮ್ಮೋ ಸಞ್ಞೋಜನವಿಪ್ಪಯುತ್ತಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ ಉದ್ಧಚ್ಚಸಹಗತಾ ಖನ್ಧಾ ಪಚ್ಛಿಮಸ್ಸ ಪಚ್ಛಿಮಸ್ಸ ಉದ್ಧಚ್ಚಸಹಗತಸ್ಸ ಮೋಹಸ್ಸ ಅನನ್ತರಪಚ್ಚಯೇನ ಪಚ್ಚಯೋ; ಸಞ್ಞೋಜನಸಮ್ಪಯುತ್ತಾ ಖನ್ಧಾ ವುಟ್ಠಾನಸ್ಸ ಅನನ್ತರಪಚ್ಚಯೇನ ಪಚ್ಚಯೋ. (೨)

ಸಞ್ಞೋಜನಸಮ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಚ ಸಞ್ಞೋಜನವಿಪ್ಪಯುತ್ತಸ್ಸ ಚ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ ಉದ್ಧಚ್ಚಸಹಗತಾ ಖನ್ಧಾ ಪಚ್ಛಿಮಾನಂ ಪಚ್ಛಿಮಾನಂ ಉದ್ಧಚ್ಚಸಹಗತಾನಂ ಖನ್ಧಾನಂ ಮೋಹಸ್ಸ ಚ ಅನನ್ತರಪಚ್ಚಯೇನ ಪಚ್ಚಯೋ. (೩)

೭೪. ಸಞ್ಞೋಜನವಿಪ್ಪಯುತ್ತೋ ಧಮ್ಮೋ ಸಞ್ಞೋಜನವಿಪ್ಪಯುತ್ತಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮೋ ಪುರಿಮೋ ಉದ್ಧಚ್ಚಸಹಗತೋ ಮೋಹೋ ಪಚ್ಛಿಮಸ್ಸ ಪಚ್ಛಿಮಸ್ಸ ಉದ್ಧಚ್ಚಸಹಗತಸ್ಸ ಮೋಹಸ್ಸ ಅನನ್ತರಪಚ್ಚಯೇನ ಪಚ್ಚಯೋ; ಪುರಿಮಾ ಪುರಿಮಾ ಸಞ್ಞೋಜನವಿಪ್ಪಯುತ್ತಾ ಖನ್ಧಾ ಪಚ್ಛಿಮಾನಂ…ಪೇ… ಫಲಸಮಾಪತ್ತಿಯಾ ಅನನ್ತರಪಚ್ಚಯೇನ ಪಚ್ಚಯೋ. (೧)

ಸಞ್ಞೋಜನವಿಪ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮೋ ಪುರಿಮೋ ಉದ್ಧಚ್ಚಸಹಗತೋ ಮೋಹೋ ಪಚ್ಛಿಮಾನಂ ಪಚ್ಛಿಮಾನಂ ಉದ್ಧಚ್ಚಸಹಗತಾನಂ ಖನ್ಧಾನಂ ಅನನ್ತರಪಚ್ಚಯೇನ ಪಚ್ಚಯೋ; ಆವಜ್ಜನಾ ಸಞ್ಞೋಜನಸಮ್ಪಯುತ್ತಕಾನಂ ಖನ್ಧಾನಂ ಅನನ್ತರಪಚ್ಚಯೇನ ಪಚ್ಚಯೋ. (೨)

ಸಞ್ಞೋಜನವಿಪ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಚ ಸಞ್ಞೋಜನವಿಪ್ಪಯುತ್ತಸ್ಸ ಚ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮೋ ಪುರಿಮೋ ಉದ್ಧಚ್ಚಸಹಗತೋ ಮೋಹೋ ಪಚ್ಛಿಮಾನಂ ಪಚ್ಛಿಮಾನಂ ಉದ್ಧಚ್ಚಸಹಗತಾನಂ ಖನ್ಧಾನಂ ಮೋಹಸ್ಸ ಚ ಅನನ್ತರಪಚ್ಚಯೇನ ಪಚ್ಚಯೋ; ಆವಜ್ಜನಾ ಉದ್ಧಚ್ಚಸಹಗತಾನಂ ಖನ್ಧಾನಂ ಮೋಹಸ್ಸ ಚ ಅನನ್ತರಪಚ್ಚಯೇನ ಪಚ್ಚಯೋ. (೩)

೭೫. ಸಞ್ಞೋಜನಸಮ್ಪಯುತ್ತೋ ಚ ಸಞ್ಞೋಜನವಿಪ್ಪಯುತ್ತೋ ಚ ಧಮ್ಮಾ ಸಞ್ಞೋಜನಸಮ್ಪಯುತ್ತಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ ಉದ್ಧಚ್ಚಸಹಗತಾ ಖನ್ಧಾ ಚ ಮೋಹೋ ಚ ಪಚ್ಛಿಮಾನಂ ಪಚ್ಛಿಮಾನಂ ಉದ್ಧಚ್ಚಸಹಗತಾನಂ ಖನ್ಧಾನಂ ಅನನ್ತರಪಚ್ಚಯೇನ ಪಚ್ಚಯೋ. (೧)

ಸಞ್ಞೋಜನಸಮ್ಪಯುತ್ತೋ ಚ ಸಞ್ಞೋಜನವಿಪ್ಪಯುತ್ತೋ ಚ ಧಮ್ಮಾ ಸಞ್ಞೋಜನವಿಪ್ಪಯುತ್ತಸ್ಸ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ ಉದ್ಧಚ್ಚಸಹಗತಾ ಖನ್ಧಾ ಚ ಮೋಹೋ ಚ ಪಚ್ಛಿಮಸ್ಸ ಪಚ್ಛಿಮಸ್ಸ ಉದ್ಧಚ್ಚಸಹಗತಸ್ಸ ಮೋಹಸ್ಸ ಅನನ್ತರಪಚ್ಚಯೇನ ಪಚ್ಚಯೋ; ಉದ್ಧಚ್ಚಸಹಗತಾ ಖನ್ಧಾ ಚ ಮೋಹೋ ಚ ವುಟ್ಠಾನಸ್ಸ ಅನನ್ತರಪಚ್ಚಯೇನ ಪಚ್ಚಯೋ. (೨)

ಸಞ್ಞೋಜನಸಮ್ಪಯುತ್ತೋ ಚ ಸಞ್ಞೋಜನವಿಪ್ಪಯುತ್ತೋ ಚ ಧಮ್ಮಾ ಸಞ್ಞೋಜನಸಮ್ಪಯುತ್ತಸ್ಸ ಚ ಸಞ್ಞೋಜನವಿಪ್ಪಯುತ್ತಸ್ಸ ಚ ಧಮ್ಮಸ್ಸ ಅನನ್ತರಪಚ್ಚಯೇನ ಪಚ್ಚಯೋ – ಪುರಿಮಾ ಪುರಿಮಾ ಉದ್ಧಚ್ಚಸಹಗತಾ ಖನ್ಧಾ ಚ ಮೋಹೋ ಚ ಪಚ್ಛಿಮಾನಂ ಪಚ್ಛಿಮಾನಂ ಉದ್ಧಚ್ಚಸಹಗತಾನಂ ಖನ್ಧಾನಂ ಮೋಹಸ್ಸ ಚ ಅನನ್ತರಪಚ್ಚಯೇನ ಪಚ್ಚಯೋ. (೩)

ಸಮನನ್ತರಪಚ್ಚಯಾದಿ

೭೬. ಸಞ್ಞೋಜನಸಮ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಧಮ್ಮಸ್ಸ ಸಮನನ್ತರಪಚ್ಚಯೇನ ಪಚ್ಚಯೋ … ನವ… ಸಹಜಾತಪಚ್ಚಯೇನ ಪಚ್ಚಯೋ… ನವ… ಅಞ್ಞಮಞ್ಞಪಚ್ಚಯೇನ ಪಚ್ಚಯೋ… ಛ… ನಿಸ್ಸಯಪಚ್ಚಯೇನ ಪಚ್ಚಯೋ… ನವ.

ಉಪನಿಸ್ಸಯಪಚ್ಚಯೋ

೭೭. ಸಞ್ಞೋಜನಸಮ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಆರಮ್ಮಣೂಪನಿಸ್ಸಯೋ, ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಸಞ್ಞೋಜನಸಮ್ಪಯುತ್ತಾ ಖನ್ಧಾ ಸಞ್ಞೋಜನಸಮ್ಪಯುತ್ತಕಾನಂ ಖನ್ಧಾನಂ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೧)

ಸಞ್ಞೋಜನಸಮ್ಪಯುತ್ತೋ ಧಮ್ಮೋ ಸಞ್ಞೋಜನವಿಪ್ಪಯುತ್ತಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಸಞ್ಞೋಜನಸಮ್ಪಯುತ್ತಾ ಖನ್ಧಾ ಸಞ್ಞೋಜನವಿಪ್ಪಯುತ್ತಾನಂ ಖನ್ಧಾನಂ ಮೋಹಸ್ಸ ಚ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೨)

ಸಞ್ಞೋಜನಸಮ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಚ ಸಞ್ಞೋಜನವಿಪ್ಪಯುತ್ತಸ್ಸ ಚ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಸಞ್ಞೋಜನಸಮ್ಪಯುತ್ತಾ ಖನ್ಧಾ ಉದ್ಧಚ್ಚಸಹಗತಾನಂ ಖನ್ಧಾನಂ ಮೋಹಸ್ಸ ಚ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೩)

೭೮. ಸಞ್ಞೋಜನವಿಪ್ಪಯುತ್ತೋ ಧಮ್ಮೋ ಸಞ್ಞೋಜನವಿಪ್ಪಯುತ್ತಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಆರಮ್ಮಣೂಪನಿಸ್ಸಯೋ, ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಸದ್ಧಂ ಉಪನಿಸ್ಸಾಯ ದಾನಂ ದೇತಿ…ಪೇ… ಸಮಾಪತ್ತಿಂ ಉಪ್ಪಾದೇತಿ; ಸೀಲಂ…ಪೇ… ಪಞ್ಞಂ… ಕಾಯಿಕಂ ಸುಖಂ… ಕಾಯಿಕಂ ದುಕ್ಖಂ… ಉತುಂ… ಭೋಜನಂ… ಸೇನಾಸನಂ ಮೋಹಂ ಉಪನಿಸ್ಸಾಯ ದಾನಂ ದೇತಿ…ಪೇ… ಸಮಾಪತ್ತಿಂ ಉಪ್ಪಾದೇತಿ; ಸದ್ಧಾ…ಪೇ… ಸೇನಾಸನಂ ಮೋಹೋ ಚ ಸದ್ಧಾಯ…ಪೇ… ಫಲಸಮಾಪತ್ತಿಯಾ ಮೋಹಸ್ಸ ಚ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೧)

ಸಞ್ಞೋಜನವಿಪ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಆರಮ್ಮಣೂಪನಿಸ್ಸಯೋ, ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಸದ್ಧಂ ಉಪನಿಸ್ಸಾಯ ಮಾನಂ ಜಪ್ಪೇತಿ, ದಿಟ್ಠಿಂ ಗಣ್ಹಾತಿ; ಸೀಲಂ…ಪೇ… ಪಞ್ಞಂ… ಕಾಯಿಕಂ ಸುಖಂ… ಕಾಯಿಕಂ ದುಕ್ಖಂ… ಉತುಂ… ಭೋಜನಂ… ಸೇನಾಸನಂ ಮೋಹಂ ಉಪನಿಸ್ಸಾಯ ಪಾಣಂ ಹನತಿ…ಪೇ… ಸಙ್ಘಂ ಭಿನ್ದತಿ; ಸದ್ಧಾ…ಪೇ… ಸೇನಾಸನಂ ಮೋಹೋ ರಾಗಸ್ಸ…ಪೇ… ಪತ್ಥನಾಯ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೨)

ಸಞ್ಞೋಜನವಿಪ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಚ ಸಞ್ಞೋಜನವಿಪ್ಪಯುತ್ತಸ್ಸ ಚ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಸದ್ಧಾ…ಪೇ… ಪಞ್ಞಾ… ಕಾಯಿಕಂ ಸುಖಂ…ಪೇ… ಸೇನಾಸನಂ ಮೋಹೋ ಚ ಉದ್ಧಚ್ಚಸಹಗತಾನಂ ಖನ್ಧಾನಂ ಮೋಹಸ್ಸ ಚ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೩)

೭೯. ಸಞ್ಞೋಜನಸಮ್ಪಯುತ್ತೋ ಚ ಸಞ್ಞೋಜನವಿಪ್ಪಯುತ್ತೋ ಚ ಧಮ್ಮಾ ಸಞ್ಞೋಜನಸಮ್ಪಯುತ್ತಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಉದ್ಧಚ್ಚಸಹಗತಾ ಖನ್ಧಾ ಚ ಮೋಹೋ ಚ ಸಞ್ಞೋಜನಸಮ್ಪಯುತ್ತಕಾನಂ ಖನ್ಧಾನಂ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೧)

ಸಞ್ಞೋಜನಸಮ್ಪಯುತ್ತೋ ಚ ಸಞ್ಞೋಜನವಿಪ್ಪಯುತ್ತೋ ಚ ಧಮ್ಮಾ ಸಞ್ಞೋಜನವಿಪ್ಪಯುತ್ತಸ್ಸ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಉದ್ಧಚ್ಚಸಹಗತಾ ಖನ್ಧಾ ಚ ಮೋಹೋ ಚ ಸಞ್ಞೋಜನವಿಪ್ಪಯುತ್ತಾನಂ ಖನ್ಧಾನಂ ಮೋಹಸ್ಸ ಚ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೨)

ಸಞ್ಞೋಜನಸಮ್ಪಯುತ್ತೋ ಚ ಸಞ್ಞೋಜನವಿಪ್ಪಯುತ್ತೋ ಚ ಧಮ್ಮಾ ಸಞ್ಞೋಜನಸಮ್ಪಯುತ್ತಸ್ಸ ಚ ಸಞ್ಞೋಜನವಿಪ್ಪಯುತ್ತಸ್ಸ ಚ ಧಮ್ಮಸ್ಸ ಉಪನಿಸ್ಸಯಪಚ್ಚಯೇನ ಪಚ್ಚಯೋ – ಅನನ್ತರೂಪನಿಸ್ಸಯೋ, ಪಕತೂಪನಿಸ್ಸಯೋ…ಪೇ…. ಪಕತೂಪನಿಸ್ಸಯೋ – ಉದ್ಧಚ್ಚಸಹಗತಾ ಖನ್ಧಾ ಚ ಮೋಹೋ ಚ ಉದ್ಧಚ್ಚಸಹಗತಾನಂ ಖನ್ಧಾನಂ ಮೋಹಸ್ಸ ಚ ಉಪನಿಸ್ಸಯಪಚ್ಚಯೇನ ಪಚ್ಚಯೋ. (೩)

ಪುರೇಜಾತಪಚ್ಚಯೋ

೮೦. ಸಞ್ಞೋಜನವಿಪ್ಪಯುತ್ತೋ ಧಮ್ಮೋ ಸಞ್ಞೋಜನವಿಪ್ಪಯುತ್ತಸ್ಸ ಧಮ್ಮಸ್ಸ ಪುರೇಜಾತಪಚ್ಚಯೇನ ಪಚ್ಚಯೋ – ಆರಮ್ಮಣಪುರೇಜಾತಂ, ವತ್ಥುಪುರೇಜಾತಂ. ಆರಮ್ಮಣಪುರೇಜಾತಂ – ಚಕ್ಖುಂ…ಪೇ… ವತ್ಥುಂ ಅನಿಚ್ಚತೋ …ಪೇ… ವಿಪಸ್ಸತಿ, ದಿಬ್ಬೇನ ಚಕ್ಖುನಾ ರೂಪಂ ಪಸ್ಸತಿ, ದಿಬ್ಬಾಯ ಸೋತಧಾತುಯಾ ಸದ್ದಂ ಸುಣಾತಿ, ರೂಪಾಯತನಂ ಚಕ್ಖುವಿಞ್ಞಾಣಸ್ಸ…ಪೇ… ಫೋಟ್ಠಬ್ಬಾಯತನಂ ಕಾಯವಿಞ್ಞಾಣಸ್ಸ…ಪೇ…. ವತ್ಥುಪುರೇಜಾತಂ – ಚಕ್ಖಾಯತನಂ ಚಕ್ಖುವಿಞ್ಞಾಣಸ್ಸ…ಪೇ… ಕಾಯಾಯತನಂ ಕಾಯವಿಞ್ಞಾಣಸ್ಸ…ಪೇ… ವತ್ಥು ಸಞ್ಞೋಜನವಿಪ್ಪಯುತ್ತಾನಂ ಖನ್ಧಾನಂ ಮೋಹಸ್ಸ ಚ ಪುರೇಜಾತಪಚ್ಚಯೇನ ಪಚ್ಚಯೋ. (೧)

ಸಞ್ಞೋಜನವಿಪ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಧಮ್ಮಸ್ಸ ಪುರೇಜಾತಪಚ್ಚಯೇನ ಪಚ್ಚಯೋ – ಆರಮ್ಮಣಪುರೇಜಾತಂ, ವತ್ಥುಪುರೇಜಾತಂ. ಆರಮ್ಮಣಪುರೇಜಾತಂ – ಚಕ್ಖುಂ…ಪೇ… ವತ್ಥುಂ ಅಸ್ಸಾದೇತಿ ಅಭಿನನ್ದತಿ, ತಂ ಆರಬ್ಭ ರಾಗೋ ಉಪ್ಪಜ್ಜತಿ…ಪೇ… ದೋಮನಸ್ಸಂ ಉಪ್ಪಜ್ಜತಿ. ವತ್ಥುಪುರೇಜಾತಂ – ವತ್ಥು ಸಞ್ಞೋಜನಸಮ್ಪಯುತ್ತಕಾನಂ ಖನ್ಧಾನಂ ಪುರೇಜಾತಪಚ್ಚಯೇನ ಪಚ್ಚಯೋ. (೨)

ಸಞ್ಞೋಜನವಿಪ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಚ ಸಞ್ಞೋಜನವಿಪ್ಪಯುತ್ತಸ್ಸ ಚ ಧಮ್ಮಸ್ಸ ಪುರೇಜಾತಪಚ್ಚಯೇನ ಪಚ್ಚಯೋ – ಆರಮ್ಮಣಪುರೇಜಾತಂ, ವತ್ಥುಪುರೇಜಾತಂ. ಆರಮ್ಮಣಪುರೇಜಾತಂ – ಚಕ್ಖುಂ…ಪೇ… ವತ್ಥುಂ ಆರಬ್ಭ ಉದ್ಧಚ್ಚಸಹಗತಾ ಖನ್ಧಾ ಚ ಮೋಹೋ ಚ ಉಪ್ಪಜ್ಜನ್ತಿ. ವತ್ಥುಪುರೇಜಾತಂ – ವತ್ಥು ಉದ್ಧಚ್ಚಸಹಗತಾನಂ ಖನ್ಧಾನಂ ಮೋಹಸ್ಸ ಚ ಪುರೇಜಾತಪಚ್ಚಯೇನ ಪಚ್ಚಯೋ. (೩)

ಪಚ್ಛಾಜಾತಪಚ್ಚಯೋ

೮೧. ಸಞ್ಞೋಜನಸಮ್ಪಯುತ್ತೋ ಧಮ್ಮೋ ಸಞ್ಞೋಜನವಿಪ್ಪಯುತ್ತಸ್ಸ ಧಮ್ಮಸ್ಸ ಪಚ್ಛಾಜಾತಪಚ್ಚಯೇನ ಪಚ್ಚಯೋ – ಪಚ್ಛಾಜಾತಾ ಸಞ್ಞೋಜನಸಮ್ಪಯುತ್ತಾ ಖನ್ಧಾ ಪುರೇಜಾತಸ್ಸ ಇಮಸ್ಸ ಕಾಯಸ್ಸ ಪಚ್ಛಾಜಾತಪಚ್ಚಯೇನ ಪಚ್ಚಯೋ. (೧)

ಸಞ್ಞೋಜನವಿಪ್ಪಯುತ್ತೋ ಧಮ್ಮೋ ಸಞ್ಞೋಜನವಿಪ್ಪಯುತ್ತಸ್ಸ ಧಮ್ಮಸ್ಸ ಪಚ್ಛಾಜಾತಪಚ್ಚಯೇನ ಪಚ್ಚಯೋ – ಪಚ್ಛಾಜಾತಾ ಸಞ್ಞೋಜನವಿಪ್ಪಯುತ್ತಾ ಖನ್ಧಾ ಚ ಮೋಹೋ ಚ ಪುರೇಜಾತಸ್ಸ ಇಮಸ್ಸ ಕಾಯಸ್ಸ ಪಚ್ಛಾಜಾತಪಚ್ಚಯೇನ ಪಚ್ಚಯೋ. (೧)

ಸಞ್ಞೋಜನಸಮ್ಪಯುತ್ತೋ ಚ ಸಞ್ಞೋಜನವಿಪ್ಪಯುತ್ತೋ ಚ ಧಮ್ಮಾ ಸಞ್ಞೋಜನವಿಪ್ಪಯುತ್ತಸ್ಸ ಧಮ್ಮಸ್ಸ ಪಚ್ಛಾಜಾತಪಚ್ಚಯೇನ ಪಚ್ಚಯೋ – ಪಚ್ಛಾಜಾತಾ ಉದ್ಧಚ್ಚಸಹಗತಾ ಖನ್ಧಾ ಚ ಮೋಹೋ ಚ ಪುರೇಜಾತಸ್ಸ ಇಮಸ್ಸ ಕಾಯಸ್ಸ ಪಚ್ಛಾಜಾತಪಚ್ಚಯೇನ ಪಚ್ಚಯೋ. (೧)

ಆಸೇವನಪಚ್ಚಯೋ

೮೨. ಸಞ್ಞೋಜನಸಮ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಧಮ್ಮಸ್ಸ ಆಸೇವನಪಚ್ಚಯೇನ ಪಚ್ಚಯೋ… ನವ (ಆವಜ್ಜನಾಪಿ ವುಟ್ಠಾನಮ್ಪಿ ನತ್ಥಿ ).

ಕಮ್ಮಪಚ್ಚಯೋ

೮೩. ಸಞ್ಞೋಜನಸಮ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ – ಸಞ್ಞೋಜನಸಮ್ಪಯುತ್ತಾ ಚೇತನಾ ಸಞ್ಞೋಜನಸಮ್ಪಯುತ್ತಕಾನಂ ಖನ್ಧಾನಂ ಕಮ್ಮಪಚ್ಚಯೇನ ಪಚ್ಚಯೋ. (೧)

ಸಞ್ಞೋಜನಸಮ್ಪಯುತ್ತೋ ಧಮ್ಮೋ ಸಞ್ಞೋಜನವಿಪ್ಪಯುತ್ತಸ್ಸ ಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ – ಸಹಜಾತಾ, ನಾನಾಕ್ಖಣಿಕಾ. ಸಹಜಾತಾ – ಸಞ್ಞೋಜನಸಮ್ಪಯುತ್ತಾ ಚೇತನಾ ಚಿತ್ತಸಮುಟ್ಠಾನಾನಂ ರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ; ಉದ್ಧಚ್ಚಸಹಗತಾ ಚೇತನಾ ಮೋಹಸ್ಸ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ. ನಾನಾಕ್ಖಣಿಕಾ – ಸಞ್ಞೋಜನಸಮ್ಪಯುತ್ತಕಾ ಚೇತನಾ ವಿಪಾಕಾನಂ ಖನ್ಧಾನಂ ಕಟತ್ತಾ ಚ ರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ. (೨)

ಸಞ್ಞೋಜನಸಮ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಚ ಸಞ್ಞೋಜನವಿಪ್ಪಯುತ್ತಸ್ಸ ಚ ಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ – ಸಞ್ಞೋಜನಸಮ್ಪಯುತ್ತಾ ಚೇತನಾ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ; ಉದ್ಧಚ್ಚಸಹಗತಾ ಚೇತನಾ ಸಮ್ಪಯುತ್ತಕಾನಂ ಖನ್ಧಾನಂ ಮೋಹಸ್ಸ ಚ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ. (೩)

ಸಞ್ಞೋಜನವಿಪ್ಪಯುತ್ತೋ ಧಮ್ಮೋ ಸಞ್ಞೋಜನವಿಪ್ಪಯುತ್ತಸ್ಸ ಧಮ್ಮಸ್ಸ ಕಮ್ಮಪಚ್ಚಯೇನ ಪಚ್ಚಯೋ – ಸಹಜಾತಾ, ನಾನಾಕ್ಖಣಿಕಾ. ಸಹಜಾತಾ – ಸಞ್ಞೋಜನವಿಪ್ಪಯುತ್ತಾ ಚೇತನಾ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ; ಪಟಿಸನ್ಧಿಕ್ಖಣೇ…ಪೇ…. ನಾನಾಕ್ಖಣಿಕಾ – ಸಞ್ಞೋಜನವಿಪ್ಪಯುತ್ತಾ ಚೇತನಾ ವಿಪಾಕಾನಂ ಖನ್ಧಾನಂ ಕಟತ್ತಾ ಚ ರೂಪಾನಂ ಕಮ್ಮಪಚ್ಚಯೇನ ಪಚ್ಚಯೋ.

ವಿಪಾಕಪಚ್ಚಯೋ

೮೪. ಸಞ್ಞೋಜನವಿಪ್ಪಯುತ್ತೋ ಧಮ್ಮೋ ಸಞ್ಞೋಜನವಿಪ್ಪಯುತ್ತಸ್ಸ ಧಮ್ಮಸ್ಸ ವಿಪಾಕಪಚ್ಚಯೇನ ಪಚ್ಚಯೋ… ಏಕಂ.

ಆಹಾರಪಚ್ಚಯಾದಿ

೮೫. ಸಞ್ಞೋಜನಸಮ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಧಮ್ಮಸ್ಸ ಆಹಾರಪಚ್ಚಯೇನ ಪಚ್ಚಯೋ… ಚತ್ತಾರಿ… ಇನ್ದ್ರಿಯಪಚ್ಚಯೇನ ಪಚ್ಚಯೋ… ಚತ್ತಾರಿ… ಝಾನಪಚ್ಚಯೇನ ಪಚ್ಚಯೋ… ಚತ್ತಾರಿ… ಮಗ್ಗಪಚ್ಚಯೇನ ಪಚ್ಚಯೋ… ಚತ್ತಾರಿ… ಸಮ್ಪಯುತ್ತಪಚ್ಚಯೇನ ಪಚ್ಚಯೋ… ಛ.

ವಿಪ್ಪಯುತ್ತಪಚ್ಚಯೋ

೮೬. ಸಞ್ಞೋಜನಸಮ್ಪಯುತ್ತೋ ಧಮ್ಮೋ ಸಞ್ಞೋಜನವಿಪ್ಪಯುತ್ತಸ್ಸ ಧಮ್ಮಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ – ಸಹಜಾತಂ, ಪಚ್ಛಾಜಾತಂ (ಸಂಖಿತ್ತಂ). (೧)

ಸಞ್ಞೋಜನವಿಪ್ಪಯುತ್ತೋ ಧಮ್ಮೋ ಸಞ್ಞೋಜನವಿಪ್ಪಯುತ್ತಸ್ಸ ಧಮ್ಮಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ – ಸಹಜಾತಂ, ಪುರೇಜಾತಂ, ಪಚ್ಛಾಜಾತಂ (ಸಂಖಿತ್ತಂ). (೧)

ಸಞ್ಞೋಜನವಿಪ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಧಮ್ಮಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. ಪುರೇಜಾತಂ – ವತ್ಥು ಸಞ್ಞೋಜನಸಮ್ಪಯುತ್ತಕಾನಂ ಖನ್ಧಾನಂ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. (೨)

ಸಞ್ಞೋಜನವಿಪ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಚ ಸಞ್ಞೋಜನವಿಪ್ಪಯುತ್ತಸ್ಸ ಚ ಧಮ್ಮಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. ಪುರೇಜಾತಂ – ವತ್ಥು ಉದ್ಧಚ್ಚಸಹಗತಾನಂ ಖನ್ಧಾನಂ ಮೋಹಸ್ಸ ಚ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ. (೩)

ಸಞ್ಞೋಜನಸಮ್ಪಯುತ್ತೋ ಚ ಸಞ್ಞೋಜನವಿಪ್ಪಯುತ್ತೋ ಚ ಧಮ್ಮಾ ಸಞ್ಞೋಜನವಿಪ್ಪಯುತ್ತಸ್ಸ ಧಮ್ಮಸ್ಸ ವಿಪ್ಪಯುತ್ತಪಚ್ಚಯೇನ ಪಚ್ಚಯೋ – ಸಹಜಾತಂ, ಪಚ್ಛಾಜಾತಂ (ಸಂಖಿತ್ತಂ). (೧)

ಅತ್ಥಿಪಚ್ಚಯಾದಿ

೮೭. ಸಞ್ಞೋಜನಸಮ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ… ಏಕಂ (ಪಟಿಚ್ಚವಾರಸದಿಸಂ). (೧)

ಸಞ್ಞೋಜನಸಮ್ಪಯುತ್ತೋ ಧಮ್ಮೋ ಸಞ್ಞೋಜನವಿಪ್ಪಯುತ್ತಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪಚ್ಛಾಜಾತಂ. ಸಹಜಾತಾ – ಸಞ್ಞೋಜನಸಮ್ಪಯುತ್ತಾ ಖನ್ಧಾ ಚಿತ್ತಸಮುಟ್ಠಾನಾನಂ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ; ಉದ್ಧಚ್ಚಸಹಗತಾ ಖನ್ಧಾ ಮೋಹಸ್ಸ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ. ಪಚ್ಛಾಜಾತಾ – ಸಞ್ಞೋಜನಸಮ್ಪಯುತ್ತಾ ಖನ್ಧಾ ಪುರೇಜಾತಸ್ಸ ಇಮಸ್ಸ ಕಾಯಸ್ಸ ಅತ್ಥಿಪಚ್ಚಯೇನ ಪಚ್ಚಯೋ. (೨)

ಸಞ್ಞೋಜನಸಮ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಚ ಸಞ್ಞೋಜನವಿಪ್ಪಯುತ್ತಸ್ಸ ಚ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಞ್ಞೋಜನಸಮ್ಪಯುತ್ತೋ ಏಕೋ ಖನ್ಧೋ ತಿಣ್ಣನ್ನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ…ಪೇ… ದ್ವೇ ಖನ್ಧಾ…ಪೇ… ಉದ್ಧಚ್ಚಸಹಗತೋ ಏಕೋ ಖನ್ಧೋ ತಿಣ್ಣನ್ನಂ ಖನ್ಧಾನಂ ಮೋಹಸ್ಸ ಚ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ…ಪೇ…. (೩)

೮೮. ಸಞ್ಞೋಜನವಿಪ್ಪಯುತ್ತೋ ಧಮ್ಮೋ ಸಞ್ಞೋಜನವಿಪ್ಪಯುತ್ತಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪುರೇಜಾತಂ, ಪಚ್ಛಾಜಾತಂ, ಆಹಾರಂ, ಇನ್ದ್ರಿಯಂ (ಸಂಖಿತ್ತಂ. ವಿತ್ಥಾರೇತಬ್ಬಂ). (೧)

ಸಞ್ಞೋಜನವಿಪ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪುರೇಜಾತಂ. ಸಹಜಾತೋ – ಉದ್ಧಚ್ಚಸಹಗತೋ ಮೋಹೋ ಸಮ್ಪಯುತ್ತಕಾನಂ ಖನ್ಧಾನಂ ಅತ್ಥಿಪಚ್ಚಯೇನ ಪಚ್ಚಯೋ. ಪುರೇಜಾತಂ – ಚಕ್ಖುಂ…ಪೇ… ವತ್ಥುಂ ಅಸ್ಸಾದೇತಿ ಅಭಿನನ್ದತಿ, ತಂ ಆರಬ್ಭ ರಾಗೋ ಉಪ್ಪಜ್ಜತಿ…ಪೇ… ದೋಮನಸ್ಸಂ ಉಪ್ಪಜ್ಜತಿ, ವತ್ಥು ಸಞ್ಞೋಜನಸಮ್ಪಯುತ್ತಕಾನಂ ಖನ್ಧಾನಂ ಅತ್ಥಿಪಚ್ಚಯೇನ ಪಚ್ಚಯೋ. (೨)

ಸಞ್ಞೋಜನವಿಪ್ಪಯುತ್ತೋ ಧಮ್ಮೋ ಸಞ್ಞೋಜನಸಮ್ಪಯುತ್ತಸ್ಸ ಚ ಸಞ್ಞೋಜನವಿಪ್ಪಯುತ್ತಸ್ಸ ಚ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪುರೇಜಾತಂ. ಸಹಜಾತೋ – ಉದ್ಧಚ್ಚಸಹಗತೋ ಮೋಹೋ ಸಮ್ಪಯುತ್ತಕಾನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ. ಪುರೇಜಾತಂ – ಚಕ್ಖುಂ …ಪೇ… ವತ್ಥುಂ ಆರಬ್ಭ ಉದ್ಧಚ್ಚಸಹಗತಾ ಖನ್ಧಾ ಚ ಮೋಹೋ ಚ ಉಪ್ಪಜ್ಜನ್ತಿ, ವತ್ಥು ಉದ್ಧಚ್ಚಸಹಗತಾನಂ ಖನ್ಧಾನಂ ಮೋಹಸ್ಸ ಚ ಅತ್ಥಿಪಚ್ಚಯೇನ ಪಚ್ಚಯೋ. (೩)

೮೯. ಸಞ್ಞೋಜನಸಮ್ಪಯುತ್ತೋ ಚ ಸಞ್ಞೋಜನವಿಪ್ಪಯುತ್ತೋ ಚ ಧಮ್ಮಾ ಸಞ್ಞೋಜನಸಮ್ಪಯುತ್ತಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪುರೇಜಾತಂ. ಸಹಜಾತೋ – ಸಞ್ಞೋಜನಸಮ್ಪಯುತ್ತೋ ಏಕೋ ಖನ್ಧೋ ಚ ವತ್ಥು ಚ ತಿಣ್ಣನ್ನಂ ಖನ್ಧಾನಂ ಅತ್ಥಿಪಚ್ಚಯೇನ ಪಚ್ಚಯೋ…ಪೇ… ದ್ವೇ ಖನ್ಧಾ ಚ…ಪೇ… ಉದ್ಧಚ್ಚಸಹಗತೋ ಏಕೋ ಖನ್ಧೋ ಚ ಮೋಹೋ ಚ ತಿಣ್ಣನ್ನಂ ಖನ್ಧಾನಂ ಅತ್ಥಿಪಚ್ಚಯೇನ ಪಚ್ಚಯೋ…ಪೇ… ದ್ವೇ ಖನ್ಧಾ ಚ…ಪೇ…. (೧)

ಸಞ್ಞೋಜನಸಮ್ಪಯುತ್ತೋ ಚ ಸಞ್ಞೋಜನವಿಪ್ಪಯುತ್ತೋ ಚ ಧಮ್ಮಾ ಸಞ್ಞೋಜನವಿಪ್ಪಯುತ್ತಸ್ಸ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪುರೇಜಾತಂ, ಪಚ್ಛಾಜಾತಂ, ಆಹಾರಂ, ಇನ್ದ್ರಿಯಂ. ಸಹಜಾತಾ – ಸಞ್ಞೋಜನಸಮ್ಪಯುತ್ತಾ ಖನ್ಧಾ ಚ ಮೋಹೋ ಚ ಮಹಾಭೂತಾ ಚ ಚಿತ್ತಸಮುಟ್ಠಾನಾನಂ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ; ಉದ್ಧಚ್ಚಸಹಗತಾ ಖನ್ಧಾ ಚ ಮೋಹೋ ಚ ಚಿತ್ತಸಮುಟ್ಠಾನಾನಂ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ; ಉದ್ಧಚ್ಚಸಹಗತಾ ಖನ್ಧಾ ಚ ವತ್ಥು ಚ ಮೋಹಸ್ಸ ಅತ್ಥಿಪಚ್ಚಯೇನ ಪಚ್ಚಯೋ. ಪಚ್ಛಾಜಾತಾ – ಉದ್ಧಚ್ಚಸಹಗತಾ ಖನ್ಧಾ ಚ ಮೋಹೋ ಚ ಪುರೇಜಾತಸ್ಸ ಇಮಸ್ಸ ಕಾಯಸ್ಸ ಅತ್ಥಿಪಚ್ಚಯೇನ ಪಚ್ಚಯೋ. ಪಚ್ಛಾಜಾತಾ – ಸಞ್ಞೋಜನಸಮ್ಪಯುತ್ತಾ ಖನ್ಧಾ ಚ ಕಬಳೀಕಾರೋ ಆಹಾರೋ ಚ ಇಮಸ್ಸ ಕಾಯಸ್ಸ ಅತ್ಥಿಪಚ್ಚಯೇನ ಪಚ್ಚಯೋ. ಪಚ್ಛಾಜಾತಾ – ಸಞ್ಞೋಜನಸಮ್ಪಯುತ್ತಾ ಖನ್ಧಾ ಚ ರೂಪಜೀವಿತಿನ್ದ್ರಿಯಞ್ಚ ಕಟತ್ತಾರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ. (೨)

ಸಞ್ಞೋಜನಸಮ್ಪಯುತ್ತೋ ಚ ಸಞ್ಞೋಜನವಿಪ್ಪಯುತ್ತೋ ಚ ಧಮ್ಮಾ ಸಞ್ಞೋಜನಸಮ್ಪಯುತ್ತಸ್ಸ ಚ ಸಞ್ಞೋಜನವಿಪ್ಪಯುತ್ತಸ್ಸ ಚ ಧಮ್ಮಸ್ಸ ಅತ್ಥಿಪಚ್ಚಯೇನ ಪಚ್ಚಯೋ – ಸಹಜಾತಂ, ಪುರೇಜಾತಂ. ಸಹಜಾತೋ – ಉದ್ಧಚ್ಚಸಹಗತೋ ಏಕೋ ಖನ್ಧೋ ಚ ಮೋಹೋ ಚ ತಿಣ್ಣನ್ನಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ಅತ್ಥಿಪಚ್ಚಯೇನ ಪಚ್ಚಯೋ…ಪೇ… ದ್ವೇ ಖನ್ಧಾ ಚ…ಪೇ…. ಸಹಜಾತೋ – ಉದ್ಧಚ್ಚಸಹಗತೋ ಏಕೋ ಖನ್ಧೋ ಚ ವತ್ಥು ಚ ತಿಣ್ಣನ್ನಂ ಖನ್ಧಾನಂ ಮೋಹಸ್ಸ ಚ ಅತ್ಥಿಪಚ್ಚಯೇನ ಪಚ್ಚಯೋ…ಪೇ… ದ್ವೇ ಖನ್ಧಾ…ಪೇ…. (೩)

ನತ್ಥಿಪಚ್ಚಯೇನ ಪಚ್ಚಯೋ… ವಿಗತಪಚ್ಚಯೇನ ಪಚ್ಚಯೋ… ಅವಿಗತಪಚ್ಚಯೇನ ಪಚ್ಚಯೋ.