(೧೦೫) ೧೧. ಅವಿಞ್ಞತ್ತಿ ದುಸ್ಸಿಲ್ಯನ್ತಿಕಥಾ

೬೦೩. ಅವಿಞ್ಞತ್ತಿ ದುಸ್ಸಿಲ್ಯನ್ತಿ? ಆಮನ್ತಾ. ಪಾಣಾತಿಪಾತೋತಿ? ನ ಹೇವಂ ವತ್ತಬ್ಬೇ…ಪೇ… ಅದಿನ್ನಾದಾನನ್ತಿ? ನ ಹೇವಂ ವತ್ತಬ್ಬೇ…ಪೇ… ಕಾಮೇಸುಮಿಚ್ಛಾಚಾರೋತಿ? ನ ಹೇವಂ ವತ್ತಬ್ಬೇ…ಪೇ… ಮುಸಾವಾದೋತಿ? ನ ಹೇವಂ ವತ್ತಬ್ಬೇ…ಪೇ… ಸುರಾಮೇರಯಮಜ್ಜಪಮಾದಟ್ಠಾನನ್ತಿ? ನ ಹೇವಂ ವತ್ತಬ್ಬೇ…ಪೇ….

ಪಾಪಕಮ್ಮಂ ಸಮಾದಿಯಿತ್ವಾ ದಾನಂ ದದನ್ತಸ್ಸ ಪುಞ್ಞಞ್ಚ ಅಪುಞ್ಞಞ್ಚ ಉಭೋ ವಡ್ಢನ್ತೀತಿ? ನ ಹೇವಂ ವತ್ತಬ್ಬೇ…ಪೇ… ಪುಞ್ಞಞ್ಚ ಅಪುಞ್ಞಞ್ಚ ಉಭೋ ವಡ್ಢನ್ತೀತಿ? ಆಮನ್ತಾ. ದ್ವಿನ್ನಂ ಫಸ್ಸಾನಂ…ಪೇ… ದ್ವಿನ್ನಂ ಚಿತ್ತಾನಂ ಸಮೋಧಾನಂ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ… ದ್ವಿನ್ನಂ ಫಸ್ಸಾನಂ…ಪೇ… ದ್ವಿನ್ನಂ ಚಿತ್ತಾನಂ ಸಮೋಧಾನಂ ಹೋತೀತಿ? ಆಮನ್ತಾ. ಕುಸಲಾಕುಸಲಾ ಸಾವಜ್ಜಾನವಜ್ಜಾ ಹೀನಪಣೀತಾ ಕಣ್ಹಸುಕ್ಕಸಪ್ಪಟಿಭಾಗಾ ಧಮ್ಮಾ ಸಮ್ಮುಖೀಭಾವಂ ಆಗಚ್ಛನ್ತೀತಿ? ನ ಹೇವಂ ವತ್ತಬ್ಬೇ…ಪೇ….

ಕುಸಲಾಕುಸಲಾ ಸಾವಜ್ಜಾನವಜ್ಜಾ ಹೀನಪಣೀತಾ ಕಣ್ಹಸುಕ್ಕಸಪ್ಪಟಿಭಾಗಾ ಧಮ್ಮಾ ಸಮ್ಮುಖೀಭಾವಂ ಆಗಚ್ಛನ್ತೀತಿ? ಆಮನ್ತಾ. ನನು ವುತ್ತಂ ಭಗವತಾ – ‘‘ಚತ್ತಾರಿಮಾನಿ, ಭಿಕ್ಖವೇ, ಸುವಿದೂರವಿದೂರಾನಿ! ಕತಮಾನಿ ಚತ್ತಾರಿ? ನಭಞ್ಚ, ಭಿಕ್ಖವೇ, ಪಥವೀ ಚ – ಇದಂ ಪಠಮಂ ಸುವಿದೂರವಿದೂರಂ…ಪೇ… ತಸ್ಮಾ ಸತಂ ಧಮ್ಮೋ ಅಸಬ್ಭಿ ಆರಕಾ’’ತಿ. ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ನ ವತ್ತಬ್ಬಂ – ‘‘ಕುಸಲಾಕುಸಲಾ ಸಾವಜ್ಜಾನವಜ್ಜಾ ಹೀನಪಣೀತಾ ಕಣ್ಹಸುಕ್ಕಸಪ್ಪಟಿಭಾಗಾ ಧಮ್ಮಾ ಸಮ್ಮುಖೀಭಾವಂ ಆಗಚ್ಛನ್ತೀ’’ತಿ.

೬೦೪. ನ ವತ್ತಬ್ಬಂ – ‘‘ಅವಿಞ್ಞತ್ತಿ ದುಸ್ಸಿಲ್ಯ’’ನ್ತಿ? ಆಮನ್ತಾ. ನನು ಪಾಪಕಮ್ಮಂ ಸಮಾದಿನ್ನೋ ಆಸೀತಿ? ಆಮನ್ತಾ. ಹಞ್ಚಿ ಪಾಪಕಮ್ಮಂ ಸಮಾದಿನ್ನೋ ಆಸಿ, ತೇನ ವತ ರೇ ವತ್ತಬ್ಬೇ – ‘‘ಅವಿಞ್ಞತ್ತಿ ದುಸ್ಸಿಲ್ಯ’’ನ್ತಿ.

ಅವಿಞ್ಞತ್ತಿ ದುಸ್ಸಿಲ್ಯನ್ತಿಕಥಾ ನಿಟ್ಠಿತಾ.

ದಸಮವಗ್ಗೋ.

ತಸ್ಸುದ್ದಾನಂ –

ಉಪಪತ್ತೇಸಿಯೇ ಪಞ್ಚಕ್ಖನ್ಧೇ ಅನಿರುದ್ಧೇ ಕಿರಿಯಾ ಪಞ್ಚಕ್ಖನ್ಧಾ ಉಪ್ಪಜ್ಜನ್ತಿ, ಮಗ್ಗಸಮಙ್ಗಿಸ್ಸ ರೂಪಂ ಮಗ್ಗೋ, ಪಞ್ಚವಿಞ್ಞಾಣಸಮಙ್ಗಿಸ್ಸ ಅತ್ಥಿ ಮಗ್ಗಭಾವನಾ, ಪಞ್ಚವಿಞ್ಞಾಣಾ ಕುಸಲಾಪಿ ಅಕುಸಲಾಪಿ, ಪಞ್ಚವಿಞ್ಞಾಣಾ ಸಾಭೋಗಾ, ಮಗ್ಗಸಮಙ್ಗೀ ದ್ವೀಹಿ ಸೀಲೇಹಿ ಸಮನ್ನಾಗತೋ, ಸೀಲಂ ಅಚೇತಸಿಕಂ, ಸೀಲಂ ನ ಚಿತ್ತಾನುಪರಿವತ್ತಿ, ಸಮಾದಾನಹೇತುಕಂ ಸೀಲಂ ವಡ್ಢತೀತಿ, ವಿಞ್ಞತ್ತಿಸೀಲಂ ಅವಿಞ್ಞತ್ತಿ ದುಸ್ಸಿಲ್ಯನ್ತಿ.

ದುತಿಯೋ ಪಣ್ಣಾಸಕೋ.

ತಸ್ಸುದ್ದಾನಂ –

ನಿಯಾಮಸಙ್ಗಹಗತಾನಿಸಂಸತಾ ಚ ನಿರೋಧೋತಿ [ನಿಯಾಮ ಸಙ್ಗಹಗತಾನಿಸಂಸತಾ ಅತ್ಥಿ ಪಞ್ಚವೋಕಾರಭವೋ ನಿರೋಧೋ ಮಗ್ಗಸಮಙ್ಗಿಸ್ಸ ಪಞ್ಚವೋಕಾರಭವೋತಿ (ಸೀ. ಸ್ಯಾ. ಕ.), ನಿಯಾಮ ಸಙ್ಗಹ ಗತಾನಿಸಂಸತಾ ಅತ್ಥಿ ಪಞ್ಚವೋಕಾರಭವೋ ಮಗ್ಗಸಮಙ್ಗಿಸ್ಸ ನೋ ಪಞ್ಚವೋಕಾರಭವೋ (ಪೀ.)].