೧೧. ಏಕಾದಸಮವಗ್ಗೋ

(೧೦೬-೧೦೮) ೧-೩. ತಿಸ್ಸೋಪಿ ಅನುಸಯಕಥಾ

೬೦೫. ಅನುಸಯಾ ಅಬ್ಯಾಕತಾತಿ? ಆಮನ್ತಾ. ವಿಪಾಕಾಬ್ಯಾಕತಾ ಕಿರಿಯಾಬ್ಯಾಕತಾ ರೂಪಂ ನಿಬ್ಬಾನಂ ಚಕ್ಖಾಯತನಂ…ಪೇ… ಫೋಟ್ಠಬ್ಬಾಯತನನ್ತಿ? ನ ಹೇವಂ ವತ್ತಬ್ಬೇ…ಪೇ….

ಕಾಮರಾಗಾನುಸಯೋ ಅಬ್ಯಾಕತೋತಿ? ಆಮನ್ತಾ. ಕಾಮರಾಗೋ ಕಾಮರಾಗಪರಿಯುಟ್ಠಾನಂ ಕಾಮರಾಗಸಂಯೋಜನಂ ಕಾಮೋಘೋ ಕಾಮಯೋಗೋ ಕಾಮಚ್ಛನ್ದನೀವರಣಂ ಅಬ್ಯಾಕತನ್ತಿ? ನ ಹೇವಂ ವತ್ತಬ್ಬೇ…ಪೇ… ಕಾಮರಾಗೋ ಕಾಮರಾಗಪರಿಯುಟ್ಠಾನಂ…ಪೇ… ಕಾಮಚ್ಛನ್ದನೀವರಣಂ ಅಕುಸಲನ್ತಿ? ಆಮನ್ತಾ. ಕಾಮರಾಗಾನುಸಯೋ ಅಕುಸಲೋತಿ? ನ ಹೇವಂ ವತ್ತಬ್ಬೇ…ಪೇ….

ಪಟಿಘಾನುಸಯೋ ಅಬ್ಯಾಕತೋತಿ? ಆಮನ್ತಾ. ಪಟಿಘಂ ಪಟಿಘಪರಿಯುಟ್ಠಾನಂ ಪಟಿಘಸಂಯೋಜನಂ ಅಬ್ಯಾಕತನ್ತಿ? ನ ಹೇವಂ ವತ್ತಬ್ಬೇ…ಪೇ… ಪಟಿಘಂ ಪಟಿಘಪರಿಯುಟ್ಠಾನಂ ಪಟಿಘಸಂಯೋಜನಂ ಅಕುಸಲನ್ತಿ? ಆಮನ್ತಾ. ಪಟಿಘಾನುಸಯೋ ಅಕುಸಲೋತಿ? ನ ಹೇವಂ ವತ್ತಬ್ಬೇ…ಪೇ….

ಮಾನಾನುಸಯೋ ಅಬ್ಯಾಕತೋತಿ? ಆಮನ್ತಾ. ಮಾನೋ ಮಾನಪರಿಯುಟ್ಠಾನಂ ಮಾನಸಂಯೋಜನಂ ಅಬ್ಯಾಕತನ್ತಿ? ನ ಹೇವಂ ವತ್ತಬ್ಬೇ …ಪೇ… ಮಾನೋ ಮಾನಪರಿಯುಟ್ಠಾನಂ ಮಾನಸಂಯೋಜನಂ ಅಕುಸಲನ್ತಿ? ಆಮನ್ತಾ. ಮಾನಾನುಸಯೋ ಅಕುಸಲೋತಿ? ನ ಹೇವಂ ವತ್ತಬ್ಬೇ …ಪೇ….

ದಿಟ್ಠಾನುಸಯೋ ಅಬ್ಯಾಕತೋತಿ? ಆಮನ್ತಾ. ದಿಟ್ಠಿ ದಿಟ್ಠೋಘೋ ದಿಟ್ಠಿಯೋಗೋ ದಿಟ್ಠಿಪರಿಯುಟ್ಠಾನಂ ದಿಟ್ಠಿಸಂಯೋಜನಂ ಅಬ್ಯಾಕತನ್ತಿ? ನ ಹೇವಂ ವತ್ತಬ್ಬೇ…ಪೇ… ದಿಟ್ಠಿ ದಿಟ್ಠೋಘೋ ದಿಟ್ಠಿಯೋಗೋ ದಿಟ್ಠಿಪರಿಯುಟ್ಠಾನಂ ದಿಟ್ಠಿಸಂಯೋಜನಂ ಅಕುಸಲನ್ತಿ? ಆಮನ್ತಾ. ದಿಟ್ಠಾನುಸಯೋ ಅಕುಸಲೋತಿ? ನ ಹೇವಂ ವತ್ತಬ್ಬೇ…ಪೇ….

ವಿಚಿಕಿಚ್ಛಾನುಸಯೋ ಅಬ್ಯಾಕತೋತಿ? ಆಮನ್ತಾ. ವಿಚಿಕಿಚ್ಛಾ ವಿಚಿಕಿಚ್ಛಾಪರಿಯುಟ್ಠಾನಂ ವಿಚಿಕಿಚ್ಛಾಸಂಯೋಜನಂ ವಿಚಿಕಿಚ್ಛಾನೀವರಣಂ ಅಬ್ಯಾಕತನ್ತಿ? ನ ಹೇವಂ ವತ್ತಬ್ಬೇ…ಪೇ… ವಿಚಿಕಿಚ್ಛಾ ವಿಚಿಕಿಚ್ಛಾಪರಿಯುಟ್ಠಾನಂ ವಿಚಿಕಿಚ್ಛಾಸಂಯೋಜನಂ ವಿಚಿಕಿಚ್ಛಾನೀವರಣಂ ಅಕುಸಲನ್ತಿ? ಆಮನ್ತಾ. ವಿಚಿಕಿಚ್ಛಾನುಸಯೋ ಅಕುಸಲೋತಿ? ನ ಹೇವಂ ವತ್ತಬ್ಬೇ…ಪೇ….

ಭವರಾಗಾನುಸಯೋ ಅಬ್ಯಾಕತೋತಿ? ಆಮನ್ತಾ. ಭವರಾಗೋ ಭವರಾಗಪರಿಯುಟ್ಠಾನಂ ಭವರಾಗಸಂಯೋಜನಂ ಅಬ್ಯಾಕತನ್ತಿ? ನ ಹೇವಂ ವತ್ತಬ್ಬೇ…ಪೇ… ಭವರಾಗೋ ಭವರಾಗಪರಿಯುಟ್ಠಾನಂ ಭವರಾಗಸಂಯೋಜನಂ ಅಕುಸಲನ್ತಿ? ಆಮನ್ತಾ. ಭವರಾಗಾನುಸಯೋ ಅಕುಸಲೋತಿ? ನ ಹೇವಂ ವತ್ತಬ್ಬೇ…ಪೇ….

ಅವಿಜ್ಜಾನುಸಯೋ ಅಬ್ಯಾಕತೋತಿ? ಆಮನ್ತಾ. ಅವಿಜ್ಜಾ ಅವಿಜ್ಜೋಘೋ ಅವಿಜ್ಜಾಯೋಗೋ ಅವಿಜ್ಜಾಪರಿಯುಟ್ಠಾನಂ ಅವಿಜ್ಜಾಸಂಯೋಜನಂ ಅವಿಜ್ಜಾನೀವರಣಂ ಅಬ್ಯಾಕತನ್ತಿ? ನ ಹೇವಂ ವತ್ತಬ್ಬೇ…ಪೇ… ಅವಿಜ್ಜಾ ಅವಿಜ್ಜೋಘೋ ಅವಿಜ್ಜಾಯೋಗೋ ಅವಿಜ್ಜಾಪರಿಯುಟ್ಠಾನಂ ಅವಿಜ್ಜಾಸಂಯೋಜನಂ ಅವಿಜ್ಜಾನೀವರಣಂ ಅಕುಸಲನ್ತಿ? ಆಮನ್ತಾ. ಅವಿಜ್ಜಾನುಸಯೋ ಅಕುಸಲೋತಿ? ನ ಹೇವಂ ವತ್ತಬ್ಬೇ…ಪೇ….

೬೦೬. ನ ವತ್ತಬ್ಬಂ – ‘‘ಅನುಸಯಾ ಅಬ್ಯಾಕತಾ’’ತಿ? ಆಮನ್ತಾ. ಪುಥುಜ್ಜನೋ ಕುಸಲಾಬ್ಯಾಕತೇ ಚಿತ್ತೇ ವತ್ತಮಾನೇ ‘‘ಸಾನುಸಯೋ’’ತಿ ವತ್ತಬ್ಬೋತಿ? ಆಮನ್ತಾ. ಕುಸಲಾಕುಸಲಾ ಧಮ್ಮಾ ಸಮ್ಮುಖೀಭಾವಂ ಆಗಚ್ಛನ್ತೀತಿ? ನ ಹೇವಂ ವತ್ತಬ್ಬೇ…ಪೇ… ತೇನ ಹಿ ಅನುಸಯಾ ಅಬ್ಯಾಕತಾತಿ. ಪುಥುಜ್ಜನೋ ಕುಸಲಾಬ್ಯಾಕತೇ ಚಿತ್ತೇ ವತ್ತಮಾನೇ ‘‘ಸರಾಗೋ’’ತಿ ವತ್ತಬ್ಬೋತಿ? ಆಮನ್ತಾ. ಕುಸಲಾಕುಸಲಾ ಧಮ್ಮಾ ಸಮ್ಮುಖೀಭಾವಂ ಆಗಚ್ಛನ್ತೀತಿ? ನ ಹೇವಂ ವತ್ತಬ್ಬೇ…ಪೇ… ತೇನ ಹಿ ರಾಗೋ ಅಬ್ಯಾಕತೋತಿ.

೬೦೭. ಅನುಸಯಾ ಅಹೇತುಕಾತಿ? ಆಮನ್ತಾ. ರೂಪಂ ನಿಬ್ಬಾನಂ ಚಕ್ಖಾಯತನಂ…ಪೇ… ಫೋಟ್ಠಬ್ಬಾಯತನನ್ತಿ? ನ ಹೇವಂ ವತ್ತಬ್ಬೇ…ಪೇ….

ಕಾಮರಾಗಾನುಸಯೋ ಅಹೇತುಕೋತಿ? ಆಮನ್ತಾ. ಕಾಮರಾಗೋ ಕಾಮರಾಗಪರಿಯುಟ್ಠಾನಂ ಕಾಮರಾಗಸಂಯೋಜನಂ ಕಾಮಚ್ಛನ್ದನೀವರಣಂ ಅಹೇತುಕನ್ತಿ? ನ ಹೇವಂ ವತ್ತಬ್ಬೇ…ಪೇ… ಕಾಮರಾಗೋ ಕಾಮರಾಗಪರಿಯುಟ್ಠಾನಂ…ಪೇ… ಕಾಮಚ್ಛನ್ದನೀವರಣಂ ಸಹೇತುಕನ್ತಿ? ಆಮನ್ತಾ. ಕಾಮರಾಗಾನುಸಯೋ ಸಹೇತುಕೋತಿ? ನ ಹೇವಂ ವತ್ತಬ್ಬೇ…ಪೇ… ಪಟಿಘಾನುಸಯೋ…ಪೇ… ಮಾನಾನುಸಯೋ… ದಿಟ್ಠಾನುಸಯೋ… ವಿಚಿಕಿಚ್ಛಾನುಸಯೋ… ಭವರಾಗಾನುಸಯೋ… ಅವಿಜ್ಜಾನುಸಯೋ ಅಹೇತುಕೋತಿ? ಆಮನ್ತಾ. ಅವಿಜ್ಜಾ ಅವಿಜ್ಜೋಘೋ ಅವಿಜ್ಜಾಯೋಗೋ ಅವಿಜ್ಜಾಪರಿಯುಟ್ಠಾನಂ ಅವಿಜ್ಜಾಸಂಯೋಜನಂ ಅವಿಜ್ಜಾನೀವರಣಂ ಅಹೇತುಕನ್ತಿ? ನ ಹೇವಂ ವತ್ತಬ್ಬೇ …ಪೇ… ಅವಿಜ್ಜಾ ಅವಿಜ್ಜೋಘೋ…ಪೇ… ಅವಿಜ್ಜಾನೀವರಣಂ ಸಹೇತುಕನ್ತಿ? ಆಮನ್ತಾ. ಅವಿಜ್ಜಾನುಸಯೋ ಸಹೇತುಕೋತಿ? ನ ಹೇವಂ ವತ್ತಬ್ಬೇ…ಪೇ….

೬೦೮. ನ ವತ್ತಬ್ಬಂ – ‘‘ಅನುಸಯಾ ಅಹೇತುಕಾ’’ತಿ? ಆಮನ್ತಾ. ಪುಥುಜ್ಜನೋ ಕುಸಲಾಬ್ಯಾಕತೇ ಚಿತ್ತೇ ವತ್ತಮಾನೇ ‘‘ಸಾನುಸಯೋ’’ತಿ ವತ್ತಬ್ಬೋತಿ? ಆಮನ್ತಾ. ಅನುಸಯಾ ತೇನ ಹೇತುನಾ ಸಹೇತುಕಾತಿ? ನ ಹೇವಂ ವತ್ತಬ್ಬೇ…ಪೇ… ತೇನ ಹಿ ಅನುಸಯಾ ಅಹೇತುಕಾತಿ. ಪುಥುಜ್ಜನೋ ಕುಸಲಾಬ್ಯಾಕತೇ ಚಿತ್ತೇ ವತ್ತಮಾನೇ ‘‘ಸರಾಗೋ’’ತಿ ವತ್ತಬ್ಬೋತಿ? ಆಮನ್ತಾ. ರಾಗೋ ತೇನ ಹೇತುನಾ ಸಹೇತುಕೋತಿ? ನ ಹೇವಂ ವತ್ತಬ್ಬೇ…ಪೇ… ತೇನ ಹಿ ರಾಗೋ ಅಹೇತುಕೋತಿ.

೬೦೯. ಅನುಸಯಾ ಚಿತ್ತವಿಪ್ಪಯುತ್ತಾತಿ? ಆಮನ್ತಾ. ರೂಪಂ ನಿಬ್ಬಾನಂ ಚಕ್ಖಾಯತನಂ…ಪೇ… ಫೋಟ್ಠಬ್ಬಾಯತನನ್ತಿ? ನ ಹೇವಂ ವತ್ತಬ್ಬೇ…ಪೇ….

ಕಾಮರಾಗಾನುಸಯೋ ಚಿತ್ತವಿಪ್ಪಯುತ್ತೋತಿ? ಆಮನ್ತಾ. ಕಾಮರಾಗೋ ಕಾಮರಾಗಪರಿಯುಟ್ಠಾನಂ ಕಾಮರಾಗಸಂಯೋಜನಂ ಕಾಮೋಘೋ ಕಾಮಯೋಗೋ ಕಾಮಚ್ಛನ್ದನೀವರಣಂ ಚಿತ್ತವಿಪ್ಪಯುತ್ತನ್ತಿ? ನ ಹೇವಂ ವತ್ತಬ್ಬೇ…ಪೇ… ಕಾಮರಾಗೋ ಕಾಮರಾಗಪರಿಯುಟ್ಠಾನಂ…ಪೇ… ಕಾಮಚ್ಛನ್ದನೀವರಣಂ ಚಿತ್ತಸಮ್ಪಯುತ್ತನ್ತಿ? ಆಮನ್ತಾ. ಕಾಮರಾಗಾನುಸಯೋ ಚಿತ್ತಸಮ್ಪಯುತ್ತೋತಿ? ನ ಹೇವಂ ವತ್ತಬ್ಬೇ…ಪೇ….

೬೧೦. ಕಾಮರಾಗಾನುಸಯೋ ಚಿತ್ತವಿಪ್ಪಯುತ್ತೋತಿ? ಆಮನ್ತಾ. ಕತಮಕ್ಖನ್ಧಪರಿಯಾಪನ್ನೋತಿ? ಸಙ್ಖಾರಕ್ಖನ್ಧಪರಿಯಾಪನ್ನೋತಿ. ಸಙ್ಖಾರಕ್ಖನ್ಧೋ ಚಿತ್ತವಿಪ್ಪಯುತ್ತೋತಿ? ನ ಹೇವಂ ವತ್ತಬ್ಬೇ. ಸಙ್ಖಾರಕ್ಖನ್ಧೋ ಚಿತ್ತವಿಪ್ಪಯುತ್ತೋತಿ? ಆಮನ್ತಾ. ವೇದನಾಕ್ಖನ್ಧೋ ಸಞ್ಞಾಕ್ಖನ್ಧೋ ಚಿತ್ತವಿಪ್ಪಯುತ್ತೋತಿ? ನ ಹೇವಂ ವತ್ತಬ್ಬೇ…ಪೇ….

ಕಾಮರಾಗಾನುಸಯೋ ಸಙ್ಖಾರಕ್ಖನ್ಧಪರಿಯಾಪನ್ನೋ ಚಿತ್ತವಿಪ್ಪಯುತ್ತೋತಿ? ಆಮನ್ತಾ. ಕಾಮರಾಗೋ ಸಙ್ಖಾರಕ್ಖನ್ಧಪರಿಯಾಪನ್ನೋ ಚಿತ್ತವಿಪ್ಪಯುತ್ತೋತಿ? ನ ಹೇವಂ ವತ್ತಬ್ಬೇ…ಪೇ… ಕಾಮರಾಗೋ ಸಙ್ಖಾರಕ್ಖನ್ಧಪರಿಯಾಪನ್ನೋ ಚಿತ್ತಸಮ್ಪಯುತ್ತೋತಿ? ಆಮನ್ತಾ. ಕಾಮರಾಗಾನುಸಯೋ ಸಙ್ಖಾರಕ್ಖನ್ಧಪರಿಯಾಪನ್ನೋ ಚಿತ್ತಸಮ್ಪಯುತ್ತೋತಿ? ನ ಹೇವಂ ವತ್ತಬ್ಬೇ…ಪೇ….

ಕಾಮರಾಗಾನುಸಯೋ ಸಙ್ಖಾರಕ್ಖನ್ಧಪರಿಯಾಪನ್ನೋ ಚಿತ್ತವಿಪ್ಪಯುತ್ತೋ, ಕಾಮರಾಗೋ ಸಙ್ಖಾರಕ್ಖನ್ಧಪರಿಯಾಪನ್ನೋ ಚಿತ್ತಸಮ್ಪಯುತ್ತೋತಿ? ಆಮನ್ತಾ. ಸಙ್ಖಾರಕ್ಖನ್ಧೋ ಏಕದೇಸೋ ಚಿತ್ತಸಮ್ಪಯುತ್ತೋ ಏಕದೇಸೋ ಚಿತ್ತವಿಪ್ಪಯುತ್ತೋತಿ? ನ ಹೇವಂ ವತ್ತಬ್ಬೇ…ಪೇ….

ಸಙ್ಖಾರಕ್ಖನ್ಧೋ ಏಕದೇಸೋ ಚಿತ್ತಸಮ್ಪಯುತ್ತೋ ಏಕದೇಸೋ ಚಿತ್ತವಿಪ್ಪಯುತ್ತೋತಿ? ಆಮನ್ತಾ. ವೇದನಾಕ್ಖನ್ಧೋ ಸಞ್ಞಾಕ್ಖನ್ಧೋ ಏಕದೇಸೋ ಚಿತ್ತಸಮ್ಪಯುತ್ತೋ ಏಕದೇಸೋ ಚಿತ್ತವಿಪ್ಪಯುತ್ತೋತಿ? ನ ಹೇವಂ ವತ್ತಬ್ಬೇ…ಪೇ….

೬೧೧. ಪಟಿಘಾನುಸಯೋ ಮಾನಾನುಸಯೋ ದಿಟ್ಠಾನುಸಯೋ ವಿಚಿಕಿಚ್ಛಾನುಸಯೋ ಭವರಾಗಾನುಸಯೋ ಅವಿಜ್ಜಾನುಸಯೋ ಚಿತ್ತವಿಪ್ಪಯುತ್ತೋತಿ? ಆಮನ್ತಾ. ಅವಿಜ್ಜಾ ಅವಿಜ್ಜೋಘೋ ಅವಿಜ್ಜಾಯೋಗೋ ಅವಿಜ್ಜಾನೀವರಣಂ ಚಿತ್ತವಿಪ್ಪಯುತ್ತನ್ತಿ? ನ ಹೇವಂ ವತ್ತಬ್ಬೇ…ಪೇ… ಅವಿಜ್ಜಾ ಅವಿಜ್ಜೋಘೋ ಅವಿಜ್ಜಾಯೋಗೋ ಅವಿಜ್ಜಾನೀವರಣಂ ಚಿತ್ತಸಮ್ಪಯುತ್ತನ್ತಿ? ಆಮನ್ತಾ. ಅವಿಜ್ಜಾನುಸಯೋ ಚಿತ್ತಸಮ್ಪಯುತ್ತೋತಿ? ನ ಹೇವಂ ವತ್ತಬ್ಬೇ…ಪೇ….

೬೧೨. ಅವಿಜ್ಜಾನುಸಯೋ ಚಿತ್ತವಿಪ್ಪಯುತ್ತೋತಿ? ಆಮನ್ತಾ. ಕತಮಕ್ಖನ್ಧಪರಿಯಾಪನ್ನೋತಿ? ಸಙ್ಖಾರಕ್ಖನ್ಧಪರಿಯಾಪನ್ನೋತಿ. ಸಙ್ಖಾರಕ್ಖನ್ಧೋ ಚಿತ್ತವಿಪ್ಪಯುತ್ತೋತಿ? ನ ಹೇವಂ ವತ್ತಬ್ಬೇ. ಸಙ್ಖಾರಕ್ಖನ್ಧೋ ಚಿತ್ತವಿಪ್ಪಯುತ್ತೋತಿ? ಆಮನ್ತಾ. ವೇದನಾಕ್ಖನ್ಧೋ ಸಞ್ಞಾಕ್ಖನ್ಧೋ ಚಿತ್ತವಿಪ್ಪಯುತ್ತೋತಿ? ನ ಹೇವಂ ವತ್ತಬ್ಬೇ…ಪೇ….

ಅವಿಜ್ಜಾನುಸಯೋ ಸಙ್ಖಾರಕ್ಖನ್ಧಪರಿಯಾಪನ್ನೋ ಚಿತ್ತವಿಪ್ಪಯುತ್ತೋತಿ? ಆಮನ್ತಾ. ಅವಿಜ್ಜಾ ಸಙ್ಖಾರಕ್ಖನ್ಧಪರಿಯಾಪನ್ನಾ ಚಿತ್ತವಿಪ್ಪಯುತ್ತಾತಿ? ನ ಹೇವಂ ವತ್ತಬ್ಬೇ…ಪೇ… ಅವಿಜ್ಜಾ ಸಙ್ಖಾರಕ್ಖನ್ಧಪರಿಯಾಪನ್ನಾ ಚಿತ್ತಸಮ್ಪಯುತ್ತಾತಿ? ಆಮನ್ತಾ. ಅವಿಜ್ಜಾನುಸಯೋ ಸಙ್ಖಾರಕ್ಖನ್ಧಪರಿಯಾಪನ್ನೋ ಚಿತ್ತಸಮ್ಪಯುತ್ತೋತಿ? ನ ಹೇವಂ ವತ್ತಬ್ಬೇ…ಪೇ….

ಅವಿಜ್ಜಾನುಸಯೋ ಸಙ್ಖಾರಕ್ಖನ್ಧಪರಿಯಾಪನ್ನೋ ಚಿತ್ತವಿಪ್ಪಯುತ್ತೋ, ಅವಿಜ್ಜಾಸಙ್ಖಾರಕ್ಖನ್ಧಪರಿಯಾಪನ್ನಾ ಚಿತ್ತಸಮ್ಪಯುತ್ತಾತಿ? ಆಮನ್ತಾ. ಸಙ್ಖಾರಕ್ಖನ್ಧೋ ಏಕದೇಸೋ ಚಿತ್ತಸಮ್ಪಯುತ್ತೋ ಏಕದೇಸೋ ಚಿತ್ತವಿಪ್ಪಯುತ್ತೋತಿ? ನ ಹೇವಂ ವತ್ತಬ್ಬೇ.

೬೧೩. ನ ವತ್ತಬ್ಬಂ – ‘‘ಅನುಸಯಾ ಚಿತ್ತವಿಪ್ಪಯುತ್ತಾ’’ತಿ? ಆಮನ್ತಾ. ಪುಥುಜ್ಜನೋ ಕುಸಲಾಬ್ಯಾಕತೇ ಚಿತ್ತೇ ವತ್ತಮಾನೇ ‘‘ಸಾನುಸಯೋ’’ತಿ ವತ್ತಬ್ಬೋತಿ? ಆಮನ್ತಾ. ಅನುಸಯಾ ತೇನ ಚಿತ್ತೇನ ಸಮ್ಪಯುತ್ತಾತಿ? ನ ಹೇವಂ ವತ್ತಬ್ಬೇ. ತೇನ ಹಿ ಅನುಸಯಾ ಚಿತ್ತವಿಪ್ಪಯುತ್ತಾತಿ. ಪುಥುಜ್ಜನೋ ಕುಸಲಾಬ್ಯಾಕತೇ ಚಿತ್ತೇ ವತ್ತಮಾನೇ ‘‘ಸರಾಗೋ’’ತಿ ವತ್ತಬ್ಬೋತಿ? ಆಮನ್ತಾ. ರಾಗೋ ತೇನ ಚಿತ್ತೇನ ಸಮ್ಪಯುತ್ತೋತಿ? ನ ಹೇವಂ ವತ್ತಬ್ಬೇ. ತೇನ ಹಿ ರಾಗೋ ಚಿತ್ತವಿಪ್ಪಯುತ್ತೋತಿ.

ತಿಸ್ಸೋಪಿ ಅನುಸಯಕಥಾ ನಿಟ್ಠಿತಾ.

೧೧. ಏಕಾದಸಮವಗ್ಗೋ

(೧೦೯) ೪. ಞಾಣಕಥಾ

೬೧೪. ಅಞ್ಞಾಣೇ ವಿಗತೇ ಞಾಣವಿಪ್ಪಯುತ್ತೇ ಚಿತ್ತೇ ವತ್ತಮಾನೇ ನ ವತ್ತಬ್ಬಂ – ‘‘ಞಾಣೀ’’ತಿ? ಆಮನ್ತಾ. ರಾಗೇ ವಿಗತೇ ನ ವತ್ತಬ್ಬಂ – ‘‘ವೀತರಾಗೋ’’ತಿ? ನ ಹೇವಂ ವತ್ತಬ್ಬೇ…ಪೇ… ಅಞ್ಞಾಣೇ ವಿಗತೇ ಞಾಣವಿಪ್ಪಯುತ್ತೇ ಚಿತ್ತೇ ವತ್ತಮಾನೇ ನ ವತ್ತಬ್ಬಂ – ‘‘ಞಾಣೀ’’ತಿ? ಆಮನ್ತಾ. ದೋಸೇ ವಿಗತೇ… ಮೋಹೇ ವಿಗತೇ… ಕಿಲೇಸೇ ವಿಗತೇ ನ ವತ್ತಬ್ಬಂ – ‘‘ನಿಕ್ಕಿಲೇಸೋ’’ತಿ? ನ ಹೇವಂ ವತ್ತಬ್ಬೇ…ಪೇ….

ರಾಗೇ ವಿಗತೇ ವತ್ತಬ್ಬಂ – ‘‘ವೀತರಾಗೋ’’ತಿ? ಆಮನ್ತಾ. ಅಞ್ಞಾಣೇ ವಿಗತೇ ಞಾಣವಿಪ್ಪಯುತ್ತೇ ಚಿತ್ತೇ ವತ್ತಮಾನೇ ವತ್ತಬ್ಬಂ – ‘‘ಞಾಣೀ’’ತಿ? ನ ಹೇವಂ ವತ್ತಬ್ಬೇ…ಪೇ… ದೋಸೇ ವಿಗತೇ… ಮೋಹೇ ವಿಗತೇ… ಕಿಲೇಸೇ ವಿಗತೇ ವತ್ತಬ್ಬಂ – ‘‘ನಿಕ್ಕಿಲೇಸೋ’’ತಿ? ಆಮನ್ತಾ. ಅಞ್ಞಾಣೇ ವಿಗತೇ ಞಾಣವಿಪ್ಪಯುತ್ತೇ ಚಿತ್ತೇ ವತ್ತಮಾನೇ ವತ್ತಬ್ಬಂ – ‘‘ಞಾಣೀ’’ತಿ? ನ ಹೇವಂ ವತ್ತಬ್ಬೇ…ಪೇ….

೬೧೫. ಅಞ್ಞಾಣೇ ವಿಗತೇ ಞಾಣವಿಪ್ಪಯುತ್ತೇ ಚಿತ್ತೇ ವತ್ತಮಾನೇ ವತ್ತಬ್ಬಂ – ‘‘ಞಾಣೀ’’ತಿ? ಆಮನ್ತಾ. ಅತೀತೇನ ಞಾಣೇನ ಞಾಣೀ ನಿರುದ್ಧೇನ ವಿಗತೇನ ಪಟಿಪಸ್ಸದ್ಧೇನ ಞಾಣೇನ ಞಾಣೀತಿ? ನ ಹೇವಂ ವತ್ತಬ್ಬೇ…ಪೇ….

ಞಾಣಕಥಾ ನಿಟ್ಠಿತಾ.

೧೧. ಏಕಾದಸಮವಗ್ಗೋ

(೧೧೦) ೫. ಞಾಣಂ ಚಿತ್ತವಿಪ್ಪಯುತ್ತನ್ತಿಕಥಾ

೬೧೬. ಞಾಣಂ ಚಿತ್ತವಿಪ್ಪಯುತ್ತನ್ತಿ? ಆಮನ್ತಾ. ರೂಪಂ ನಿಬ್ಬಾನಂ ಚಕ್ಖಾಯತನಂ…ಪೇ… ಫೋಟ್ಠಬ್ಬಾಯತನನ್ತಿ? ನ ಹೇವಂ ವತ್ತಬ್ಬೇ…ಪೇ… ಞಾಣಂ ಚಿತ್ತವಿಪ್ಪಯುತ್ತನ್ತಿ? ಆಮನ್ತಾ. ಪಞ್ಞಾ ಪಞ್ಞಿನ್ದ್ರಿಯಂ ಪಞ್ಞಾಬಲಂ ಸಮ್ಮಾದಿಟ್ಠಿ ಧಮ್ಮವಿಚಯಸಮ್ಬೋಜ್ಝಙ್ಗೋ ಚಿತ್ತವಿಪ್ಪಯುತ್ತೋತಿ? ನ ಹೇವಂ ವತ್ತಬ್ಬೇ…ಪೇ… ಪಞ್ಞಾ ಪಞ್ಞಿನ್ದ್ರಿಯಂ ಪಞ್ಞಾಬಲಂ ಸಮ್ಮಾದಿಟ್ಠಿ ಧಮ್ಮವಿಚಯಸಮ್ಬೋಜ್ಝಙ್ಗೋ ಚಿತ್ತಸಮ್ಪಯುತ್ತೋತಿ? ಆಮನ್ತಾ. ಞಾಣಂ ಚಿತ್ತಸಮ್ಪಯುತ್ತನ್ತಿ? ನ ಹೇವಂ ವತ್ತಬ್ಬೇ…ಪೇ….

ಞಾಣಂ ಚಿತ್ತವಿಪ್ಪಯುತ್ತನ್ತಿ? ಆಮನ್ತಾ. ಕತಮಕ್ಖನ್ಧಪರಿಯಾಪನ್ನನ್ತಿ? ಸಙ್ಖಾರಕ್ಖನ್ಧಪರಿಯಾಪನ್ನನ್ತಿ. ಸಙ್ಖಾರಕ್ಖನ್ಧೋ ಚಿತ್ತವಿಪ್ಪಯುತ್ತೋತಿ? ನ ಹೇವಂ ವತ್ತಬ್ಬೇ…ಪೇ… ಸಙ್ಖಾರಕ್ಖನ್ಧೋ ಚಿತ್ತವಿಪ್ಪಯುತ್ತೋತಿ? ಆಮನ್ತಾ. ವೇದನಾಕ್ಖನ್ಧೋ ಸಞ್ಞಾಕ್ಖನ್ಧೋ ಚಿತ್ತವಿಪ್ಪಯುತ್ತೋತಿ? ನ ಹೇವಂ ವತ್ತಬ್ಬೇ…ಪೇ… ಞಾಣಂ ಸಙ್ಖಾರಕ್ಖನ್ಧಪರಿಯಾಪನ್ನಂ ಚಿತ್ತವಿಪ್ಪಯುತ್ತನ್ತಿ? ಆಮನ್ತಾ. ಪಞ್ಞಾ ಸಙ್ಖಾರಕ್ಖನ್ಧಪರಿಯಾಪನ್ನಾ ಚಿತ್ತವಿಪ್ಪಯುತ್ತಾತಿ? ನ ಹೇವಂ ವತ್ತಬ್ಬೇ…ಪೇ… ಪಞ್ಞಾ ಸಙ್ಖಾರಕ್ಖನ್ಧಪರಿಯಾಪನ್ನಾ ಚಿತ್ತಸಮ್ಪಯುತ್ತಾತಿ? ಆಮನ್ತಾ. ಞಾಣಂ ಸಙ್ಖಾರಕ್ಖನ್ಧಪರಿಯಾಪನ್ನಂ ಚಿತ್ತಸಮ್ಪಯುತ್ತನ್ತಿ? ನ ಹೇವಂ ವತ್ತಬ್ಬೇ…ಪೇ… ಞಾಣಂ ಸಙ್ಖಾರಕ್ಖನ್ಧಪರಿಯಾಪನ್ನಂ ಚಿತ್ತವಿಪ್ಪಯುತ್ತಂ, ಪಞ್ಞಾ ಸಙ್ಖಾರಕ್ಖನ್ಧಪರಿಯಾಪನ್ನಾ ಚಿತ್ತಸಮ್ಪಯುತ್ತಾತಿ? ಆಮನ್ತಾ. ಸಙ್ಖಾರಕ್ಖನ್ಧೋ ಏಕದೇಸೋ ಚಿತ್ತಸಮ್ಪಯುತ್ತೋ ಏಕದೇಸೋ ಚಿತ್ತವಿಪ್ಪಯುತ್ತೋತಿ? ನ ಹೇವಂ ವತ್ತಬ್ಬೇ…ಪೇ… ಸಙ್ಖಾರಕ್ಖನ್ಧೋ ಏಕದೇಸೋ ಚಿತ್ತಸಮ್ಪಯುತ್ತೋ ಏಕದೇಸೋ ಚಿತ್ತವಿಪ್ಪಯುತ್ತೋತಿ? ಆಮನ್ತಾ. ವೇದನಾಕ್ಖನ್ಧೋ ಸಞ್ಞಾಕ್ಖನ್ಧೋ ಏಕದೇಸೋ ಚಿತ್ತಸಮ್ಪಯುತ್ತೋ ಏಕದೇಸೋ ಚಿತ್ತವಿಪ್ಪಯುತ್ತೋತಿ? ನ ಹೇವಂ ವತ್ತಬ್ಬೇ…ಪೇ….

೬೧೭. ನ ವತ್ತಬ್ಬಂ – ‘‘ಞಾಣಂ ಚಿತ್ತವಿಪ್ಪಯುತ್ತ’’ನ್ತಿ? ಆಮನ್ತಾ. ಅರಹಾ ಚಕ್ಖುವಿಞ್ಞಾಣಸಮಙ್ಗೀ ‘‘ಞಾಣೀ’’ತಿ ವತ್ತಬ್ಬೋತಿ? ಆಮನ್ತಾ. ಞಾಣಂ ತೇನ ಚಿತ್ತೇನ ಸಮ್ಪಯುತ್ತನ್ತಿ? ನ ಹೇವಂ ವತ್ತಬ್ಬೇ. ತೇನ ಹಿ ಞಾಣಂ ಚಿತ್ತವಿಪ್ಪಯುತ್ತನ್ತಿ.

ಅರಹಾ ಚಕ್ಖುವಿಞ್ಞಾಣಸಮಙ್ಗೀ ‘‘ಪಞ್ಞವಾ’’ತಿ ವತ್ತಬ್ಬೋತಿ [ಸಕವಾದೀಪುಚ್ಛಾ ವಿಯ ದಿಸ್ಸತಿ]? ಆಮನ್ತಾ. ಪಞ್ಞಾ ತೇನ ಚಿತ್ತೇನ ಸಮ್ಪಯುತ್ತಾತಿ? ನ ಹೇವಂ ವತ್ತಬ್ಬೇ. ತೇನ ಹಿ ಪಞ್ಞಾ ಚಿತ್ತವಿಪ್ಪಯುತ್ತಾತಿ.

ಞಾಣಂ ಚಿತ್ತವಿಪ್ಪಯುತ್ತನ್ತಿಕಥಾ ನಿಟ್ಠಿತಾ.

೧೧. ಏಕಾದಸಮವಗ್ಗೋ

(೧೧೧) ೬. ಇದಂ ದುಕ್ಖನ್ತಿಕಥಾ

೬೧೮. ‘‘ಇದಂ ದುಕ್ಖ’’ನ್ತಿ ವಾಚಂ ಭಾಸತೋ ‘‘ಇದಂ ದುಕ್ಖ’’ನ್ತಿ ಞಾಣಂ ಪವತ್ತತೀತಿ? ಆಮನ್ತಾ. ‘‘ಅಯಂ ದುಕ್ಖಸಮುದಯೋ’’ತಿ ವಾಚಂ ಭಾಸತೋ ‘‘ಅಯಂ ದುಕ್ಖಸಮುದಯೋ’’ತಿ ಞಾಣಂ ಪವತ್ತತೀತಿ? ನ ಹೇವಂ ವತ್ತಬ್ಬೇ…ಪೇ… ‘‘ಇದಂ ದುಕ್ಖ’’ನ್ತಿ ವಾಚಂ ಭಾಸತೋ ‘‘ಇದಂ ದುಕ್ಖ’’ನ್ತಿ ಞಾಣಂ ಪವತ್ತತೀತಿ? ಆಮನ್ತಾ. ‘‘ಅಯಂ ದುಕ್ಖನಿರೋಧೋ’’ತಿ ವಾಚಂ ಭಾಸತೋ ‘‘ಅಯಂ ದುಕ್ಖನಿರೋಧೋ’’ತಿ ಞಾಣಂ ಪವತ್ತತೀತಿ? ನ ಹೇವಂ ವತ್ತಬ್ಬೇ…ಪೇ… ‘‘ಇದಂ ದುಕ್ಖ’’ನ್ತಿ ವಾಚಂ ಭಾಸತೋ ‘‘ಇದಂ ದುಕ್ಖ’’ನ್ತಿ ಞಾಣಂ ಪವತ್ತತೀತಿ? ಆಮನ್ತಾ. ‘‘ಅಯಂ ಮಗ್ಗೋ’’ತಿ ವಾಚಂ ಭಾಸತೋ ‘‘ಅಯಂ ಮಗ್ಗೋ’’ತಿ ಞಾಣಂ ಪವತ್ತತೀತಿ? ನ ಹೇವಂ ವತ್ತಬ್ಬೇ…ಪೇ….

‘‘ಅಯಂ ಸಮುದಯೋ’’ತಿ ವಾಚಂ ಭಾಸತೋ ನ ಚ ‘‘ಅಯಂ ಸಮುದಯೋ’’ತಿ ಞಾಣಂ ಪವತ್ತತೀತಿ? ಆಮನ್ತಾ. ‘‘ಇದಂ ದುಕ್ಖ’’ನ್ತಿ ವಾಚಂ ಭಾಸತೋ ನ ಚ ‘‘ಇದಂ ದುಕ್ಖ’’ನ್ತಿ ಞಾಣಂ ಪವತ್ತತೀತಿ? ನ ಹೇವಂ ವತ್ತಬ್ಬೇ…ಪೇ… ‘‘ಅಯಂ ನಿರೋಧೋ’’ತಿ… ‘‘ಅಯಂ ಮಗ್ಗೋ’’ತಿ ವಾಚಂ ಭಾಸತೋ ನ ಚ ‘‘ಅಯಂ ಮಗ್ಗೋ’’ತಿ ಞಾಣಂ ಪವತ್ತತೀತಿ? ಆಮನ್ತಾ. ‘‘ಇದಂ ದುಕ್ಖ’’ನ್ತಿ ವಾಚಂ ಭಾಸತೋ ನ ಚ ‘‘ಇದಂ ದುಕ್ಖ’’ನ್ತಿ ಞಾಣಂ ಪವತ್ತತೀತಿ? ನ ಹೇವಂ ವತ್ತಬ್ಬೇ…ಪೇ….

೬೧೯. ‘‘ಇದಂ ದುಕ್ಖ’’ನ್ತಿ ವಾಚಂ ಭಾಸತೋ ‘‘ಇದಂ ದುಕ್ಖ’’ನ್ತಿ ಞಾಣಂ ಪವತ್ತತೀತಿ? ಆಮನ್ತಾ. ‘‘ರೂಪಂ ಅನಿಚ್ಚ’’ನ್ತಿ ವಾಚಂ ಭಾಸತೋ ‘‘ರೂಪಂ ಅನಿಚ್ಚ’’ನ್ತಿ ಞಾಣಂ ಪವತ್ತತೀತಿ? ನ ಹೇವಂ ವತ್ತಬ್ಬೇ…ಪೇ… ‘‘ಇದಂ ದುಕ್ಖ’’ನ್ತಿ ವಾಚಂ ಭಾಸತೋ ‘‘ಇದಂ ದುಕ್ಖ’’ನ್ತಿ ಞಾಣಂ ಪವತ್ತತೀತಿ? ಆಮನ್ತಾ. ವೇದನಾ… ಸಞ್ಞಾ… ಸಙ್ಖಾರಾ… ‘‘ವಿಞ್ಞಾಣಂ ಅನಿಚ್ಚ’’ನ್ತಿ ವಾಚಂ ಭಾಸತೋ ‘‘ವಿಞ್ಞಾಣಂ ಅನಿಚ್ಚ’’ನ್ತಿ ಞಾಣಂ ಪವತ್ತತೀತಿ? ನ ಹೇವಂ ವತ್ತಬ್ಬೇ…ಪೇ….

‘‘ಇದಂ ದುಕ್ಖ’’ನ್ತಿ ವಾಚಂ ಭಾಸತೋ ‘‘ಇದಂ ದುಕ್ಖ’’ನ್ತಿ ಞಾಣಂ ಪವತ್ತತೀತಿ? ಆಮನ್ತಾ. ‘‘ರೂಪಂ ಅನತ್ತಾ’’ತಿ ವಾಚಂ ಭಾಸತೋ ‘‘ರೂಪಂ ಅನತ್ತಾ’’ತಿ ಞಾಣಂ ಪವತ್ತತೀತಿ? ನ ಹೇವಂ ವತ್ತಬ್ಬೇ…ಪೇ… ‘‘ಇದಂ ದುಕ್ಖ’’ನ್ತಿ ವಾಚಂ ಭಾಸತೋ ‘‘ಇದಂ ದುಕ್ಖ’’ನ್ತಿ ಞಾಣಂ ಪವತ್ತತೀತಿ? ಆಮನ್ತಾ. ವೇದನಾ … ಸಞ್ಞಾ… ಸಙ್ಖಾರಾ… ‘‘ವಿಞ್ಞಾಣಂ ಅನತ್ತಾ’’ತಿ ವಾಚಂ ಭಾಸತೋ ‘‘ವಿಞ್ಞಾಣಂ ಅನತ್ತಾ’’ತಿ ಞಾಣಂ ಪವತ್ತತೀತಿ? ನ ಹೇವಂ ವತ್ತಬ್ಬೇ…ಪೇ….

‘‘ರೂಪಂ ಅನಿಚ್ಚ’’ನ್ತಿ ವಾಚಂ ಭಾಸತೋ ನ ಚ ‘‘ರೂಪಂ ಅನಿಚ್ಚ’’ನ್ತಿ ಞಾಣಂ ಪವತ್ತತೀತಿ? ಆಮನ್ತಾ. ‘‘ಇದಂ ದುಕ್ಖ’’ನ್ತಿ ವಾಚಂ ಭಾಸತೋ ನ ಚ ‘‘ಇದಂ ದುಕ್ಖ’’ನ್ತಿ ಞಾಣಂ ಪವತ್ತತೀತಿ? ನ ಹೇವಂ ವತ್ತಬ್ಬೇ…ಪೇ… ವೇದನಾ… ಸಞ್ಞಾ… ಸಙ್ಖಾರಾ… ‘‘ವಿಞ್ಞಾಣಂ ಅನಿಚ್ಚ’’ನ್ತಿ ವಾಚಂ ಭಾಸತೋ ನ ಚ ‘‘ವಿಞ್ಞಾಣಂ ಅನಿಚ್ಚ’’ನ್ತಿ ಞಾಣಂ ಪವತ್ತತೀತಿ? ಆಮನ್ತಾ. ‘‘ಇದಂ ದುಕ್ಖ’’ನ್ತಿ ವಾಚಂ ಭಾಸತೋ ನ ಚ ‘‘ಇದಂ ದುಕ್ಖ’’ನ್ತಿ ಞಾಣಂ ಪವತ್ತತೀತಿ? ನ ಹೇವಂ ವತ್ತಬ್ಬೇ…ಪೇ….

‘‘ರೂಪಂ ಅನತ್ತಾ’’ತಿ ವಾಚಂ ಭಾಸತೋ ನ ಚ ‘‘ರೂಪಂ ಅನತ್ತಾ’’ತಿ ಞಾಣಂ ಪವತ್ತತೀತಿ? ಆಮನ್ತಾ. ‘‘ಇದಂ ದುಕ್ಖ’’ನ್ತಿ ವಾಚಂ ಭಾಸತೋ ನ ಚ ‘‘ಇದಂ ದುಕ್ಖ’’ನ್ತಿ ಞಾಣಂ ಪವತ್ತತೀತಿ? ನ ಹೇವಂ ವತ್ತಬ್ಬೇ …ಪೇ… ವೇದನಾ… ಸಞ್ಞಾ… ಸಙ್ಖಾರಾ… ‘‘ವಿಞ್ಞಾಣಂ ಅನತ್ತಾ’’ತಿ ವಾಚಂ ಭಾಸತೋ ನ ಚ ‘‘ವಿಞ್ಞಾಣಂ ಅನತ್ತಾ’’ತಿ ಞಾಣಂ ಪವತ್ತತೀತಿ? ಆಮನ್ತಾ. ‘‘ಇದಂ ದುಕ್ಖ’’ನ್ತಿ ವಾಚಂ ಭಾಸತೋ ನ ಚ ‘‘ದುಕ್ಖ’’ನ್ತಿ ಞಾಣಂ ಪವತ್ತತೀತಿ? ನ ಹೇವಂ ವತ್ತಬ್ಬೇ…ಪೇ….

೬೨೦. ‘‘ಇದಂ ದುಕ್ಖ’’ನ್ತಿ ವಾಚಂ ಭಾಸತೋ ‘‘ಇದಂ ದುಕ್ಖ’’ನ್ತಿ ಞಾಣಂ ಪವತ್ತತೀತಿ? ಆಮನ್ತಾ. ‘‘ಇ’’ತಿ [ಈತಿ (ಸ್ಯಾ. ಪೀ.)] ಚ ‘‘ದ’’ನ್ತಿ ಚ ‘‘ದು’’ತಿ [ದೂತಿ (ಸ್ಯಾ. ಪೀ.)] ಚ ‘‘ಖ’’ನ್ತಿ ಚ ಞಾಣಂ ಪವತ್ತತೀತಿ? ನ ಹೇವಂ ವತ್ತಬ್ಬೇ…ಪೇ….

ಇದಂ ದುಕ್ಖನ್ತಿಕಥಾ ನಿಟ್ಠಿತಾ.

೧೧. ಏಕಾದಸಮವಗ್ಗೋ

(೧೧೨) ೭. ಇದ್ಧಿಬಲಕಥಾ

೬೨೧. ಇದ್ಧಿಬಲೇನ ಸಮನ್ನಾಗತೋ ಕಪ್ಪಂ ತಿಟ್ಠೇಯ್ಯಾತಿ? ಆಮನ್ತಾ. ಇದ್ಧಿಮಯಿಕೋ ಸೋ ಆಯು, ಇದ್ಧಿಮಯಿಕಾ ಸಾ ಗತಿ, ಇದ್ಧಿಮಯಿಕೋ ಸೋ ಅತ್ತಭಾವಪ್ಪಟಿಲಾಭೋತಿ? ನ ಹೇವಂ ವತ್ತಬ್ಬೇ…ಪೇ….

ಇದ್ಧಿಬಲೇನ ಸಮನ್ನಾಗತೋ ಕಪ್ಪಂ ತಿಟ್ಠೇಯ್ಯಾತಿ? ಆಮನ್ತಾ. ಅತೀತಂ ಕಪ್ಪಂ ತಿಟ್ಠೇಯ್ಯ, ಅನಾಗತಂ ಕಪ್ಪಂ ತಿಟ್ಠೇಯ್ಯಾತಿ? ನ ಹೇವಂ ವತ್ತಬ್ಬೇ…ಪೇ… ಇದ್ಧಿಬಲೇನ ಸಮನ್ನಾಗತೋ ಕಪ್ಪಂ ತಿಟ್ಠೇಯ್ಯಾತಿ? ಆಮನ್ತಾ. ದ್ವೇ ಕಪ್ಪೇ ತಿಟ್ಠೇಯ್ಯ, ತಯೋ ಕಪ್ಪೇ ತಿಟ್ಠೇಯ್ಯ, ಚತ್ತಾರೋ ಕಪ್ಪೇ ತಿಟ್ಠೇಯ್ಯಾತಿ? ನ ಹೇವಂ ವತ್ತಬ್ಬೇ…ಪೇ… ಇದ್ಧಿಬಲೇನ ಸಮನ್ನಾಗತೋ ಕಪ್ಪಂ ತಿಟ್ಠೇಯ್ಯಾತಿ? ಆಮನ್ತಾ. ಸತಿ ಜೀವಿತೇ ಜೀವಿತಾವಸೇಸೇ ತಿಟ್ಠೇಯ್ಯ, ಅಸತಿ ಜೀವಿತೇ ಜೀವಿತಾವಸೇಸೇ ತಿಟ್ಠೇಯ್ಯಾತಿ? ಸತಿ ಜೀವಿತೇ ಜೀವಿತಾವಸೇಸೇ ತಿಟ್ಠೇಯ್ಯಾತಿ. ಹಞ್ಚಿ ಸತಿ ಜೀವಿತೇ ಜೀವಿತಾವಸೇಸೇ ತಿಟ್ಠೇಯ್ಯ, ನೋ ಚ ವತ ರೇ ವತ್ತಬ್ಬೇ – ‘‘ಇದ್ಧಿಬಲೇನ ಸಮನ್ನಾಗತೋ ಕಪ್ಪಂ ತಿಟ್ಠೇಯ್ಯಾ’’ತಿ. ಅಸತಿ ಜೀವಿತೇ ಜೀವಿತಾವಸೇಸೇ ತಿಟ್ಠೇಯ್ಯಾತಿ, ಮತೋ ತಿಟ್ಠೇಯ್ಯ, ಕಾಲಙ್ಕತೋ ತಿಟ್ಠೇಯ್ಯಾತಿ? ನ ಹೇವಂ ವತ್ತಬ್ಬೇ…ಪೇ….

೬೨೨. ಇದ್ಧಿಬಲೇನ ಸಮನ್ನಾಗತೋ ಕಪ್ಪಂ ತಿಟ್ಠೇಯ್ಯಾತಿ? ಆಮನ್ತಾ. ಉಪ್ಪನ್ನೋ ಫಸ್ಸೋ ಮಾ ನಿರುಜ್ಝೀತಿ ಲಬ್ಭಾ ಇದ್ಧಿಯಾ ಪಗ್ಗಹೇತುನ್ತಿ? ನ ಹೇವಂ ವತ್ತಬ್ಬೇ…ಪೇ… ಉಪ್ಪನ್ನಾ ವೇದನಾ…ಪೇ… ಉಪ್ಪನ್ನಾ ಸಞ್ಞಾ …ಪೇ… ಉಪ್ಪನ್ನಾ ಚೇತನಾ…ಪೇ… ಉಪ್ಪನ್ನಂ ಚಿತ್ತಂ… ಉಪ್ಪನ್ನಾ ಸದ್ಧಾ… ಉಪ್ಪನ್ನಂ ವೀರಿಯಂ… ಉಪ್ಪನ್ನಾ ಸತಿ… ಉಪ್ಪನ್ನೋ ಸಮಾಧಿ …ಪೇ… ಉಪ್ಪನ್ನಾ ಪಞ್ಞಾ ಮಾ ನಿರುಜ್ಝೀತಿ ಲಬ್ಭಾ ಇದ್ಧಿಯಾ ಪಗ್ಗಹೇತುನ್ತಿ? ನ ಹೇವಂ ವತ್ತಬ್ಬೇ…ಪೇ….

ಇದ್ಧಿಬಲೇನ ಸಮನ್ನಾಗತೋ ಕಪ್ಪಂ ತಿಟ್ಠೇಯ್ಯಾತಿ? ಆಮನ್ತಾ. ರೂಪಂ ನಿಚ್ಚಂ ಹೋತೂತಿ ಲಬ್ಭಾ ಇದ್ಧಿಯಾ ಪಗ್ಗಹೇತುನ್ತಿ? ನ ಹೇವಂ ವತ್ತಬ್ಬೇ…ಪೇ… ವೇದನಾ…ಪೇ… ಸಞ್ಞಾ… ಸಙ್ಖಾರಾ… ವಿಞ್ಞಾಣಂ ನಿಚ್ಚಂ ಹೋತೂತಿ ಲಬ್ಭಾ ಇದ್ಧಿಯಾ ಪಗ್ಗಹೇತುನ್ತಿ? ನ ಹೇವಂ ವತ್ತಬ್ಬೇ…ಪೇ….

ಇದ್ಧಿಬಲೇನ ಸಮನ್ನಾಗತೋ ಕಪ್ಪಂ ತಿಟ್ಠೇಯ್ಯಾತಿ? ಆಮನ್ತಾ. ಜಾತಿಧಮ್ಮಾ ಸತ್ತಾ ಮಾ ಜಾಯಿಂಸೂತಿ ಲಬ್ಭಾ ಇದ್ಧಿಯಾ ಪಗ್ಗಹೇತುನ್ತಿ? ನ ಹೇವಂ ವತ್ತಬ್ಬೇ…ಪೇ… ಜರಾಧಮ್ಮಾ ಸತ್ತಾ ಮಾ ಜೀರಿಂಸೂತಿ…ಪೇ… ಬ್ಯಾಧಿಧಮ್ಮಾ ಸತ್ತಾ ಮಾ ಬ್ಯಾಧಿಯಿಂಸೂತಿ…ಪೇ… ಮರಣಧಮ್ಮಾ ಸತ್ತಾ ಮಾ ಮೀಯಿಂಸೂತಿ ಲಬ್ಭಾ ಇದ್ಧಿಯಾ ಪಗ್ಗಹೇತುನ್ತಿ? ನ ಹೇವಂ ವತ್ತಬ್ಬೇ…ಪೇ….

೬೨೩. ನ ವತ್ತಬ್ಬಂ – ‘‘ಇದ್ಧಿಬಲೇನ ಸಮನ್ನಾಗತೋ ಕಪ್ಪಂ ತಿಟ್ಠೇಯ್ಯಾ’’ತಿ? ಆಮನ್ತಾ. ನನು ವುತ್ತಂ ಭಗವತಾ – ‘‘ಯಸ್ಸ ಕಸ್ಸಚಿ, ಆನನ್ದ, ಚತ್ತಾರೋ ಇದ್ಧಿಪಾದಾ ಭಾವಿತಾ ಬಹುಲೀಕತಾ ಯಾನೀಕತಾ ವತ್ಥುಕತಾ ಅನುಟ್ಠಿತಾ ಪರಿಚಿತಾ ಸುಸಮಾರದ್ಧಾ, ಸೋ ಆಕಙ್ಖಮಾನೋ ಕಪ್ಪಂ ವಾ ತಿಟ್ಠೇಯ್ಯ ಕಪ್ಪಾವಸೇಸಂ ವಾ’’ತಿ [ದೀ. ನಿ. ೨.೧೬೬; ಸಂ. ನಿ. ೫.೮೨೨; ಉದಾ. ೫೧]! ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ಇದ್ಧಿಬಲೇನ ಸಮನ್ನಾಗತೋ ಕಪ್ಪಂ ತಿಟ್ಠೇಯ್ಯಾತಿ.

೬೨೪. ಇದ್ಧಿಬಲೇನ ಸಮನ್ನಾಗತೋ ಕಪ್ಪಂ ತಿಟ್ಠೇಯ್ಯಾತಿ? ಆಮನ್ತಾ. ನನು ವುತ್ತಂ ಭಗವತಾ – ‘‘ಚತುನ್ನಂ, ಭಿಕ್ಖವೇ, ಧಮ್ಮಾನಂ ನತ್ಥಿ ಕೋಚಿ ಪಾಟಿಭೋಗೋ ಸಮಣೋ ವಾ ಬ್ರಾಹ್ಮಣೋ ವಾ ದೇವೋ ವಾ ಮಾರೋ ವಾ ಬ್ರಹ್ಮಾ ವಾ ಕೋಚಿ ವಾ ಲೋಕಸ್ಮಿಂ! ಕತಮೇಸಂ ಚತುನ್ನಂ? ಜರಾಧಮ್ಮೋ ‘‘ಮಾ ಜೀರೀ’’ತಿ ನತ್ಥಿ ಕೋಚಿ ಪಾಟಿಭೋಗೋ ಸಮಣೋ ವಾ ಬ್ರಾಹ್ಮಣೋ ವಾ ದೇವೋ ವಾ ಮಾರೋ ವಾ ಬ್ರಹ್ಮಾ ವಾ ಕೋಚಿ ವಾ ಲೋಕಸ್ಮಿಂ. ಬ್ಯಾಧಿಧಮ್ಮೋ ‘‘ಮಾ ಬ್ಯಾಧಿಯೀ’’ತಿ…ಪೇ… ಮರಣಧಮ್ಮೋ ‘‘ಮಾ ಮೀಯೀ’’ತಿ…ಪೇ… ಯಾನಿ ಖೋ ಪನ ತಾನಿ ಪುಬ್ಬೇ ಕತಾನಿ ಪಾಪಕಾನಿ ಕಮ್ಮಾನಿ ಸಂಕಿಲೇಸಿಕಾನಿ ಪೋನೋಬ್ಭವಿಕಾನಿ [ಪೋನೋಭವಿಕಾನಿ (ಸೀ. ಪೀ.)] ಸದರಾನಿ [ನಿಸ್ಸಾರಾನಿ (ಸೀ. ಪೀ. ಕ.), ದುಕ್ಖುದ್ರಯಾನಿ (ಸ್ಯಾ.)] ದುಕ್ಖವಿಪಾಕಾನಿ ಆಯತಿಂ ಜಾತಿಜರಾಮರಣಿಯಾನಿ ತೇಸಂ ವಿಪಾಕೋ ‘‘ಮಾ ನಿಬ್ಬತ್ತೀ’’ತಿ ನತ್ಥಿ ಕೋಚಿ ಪಾಟಿಭೋಗೋ ಸಮಣೋ ವಾ ಬ್ರಾಹ್ಮಣೋ ವಾ ದೇವೋ ವಾ ಮಾರೋ ವಾ ಬ್ರಹ್ಮಾ ವಾ ಕೋಚಿ ವಾ ಲೋಕಸ್ಮಿಂ. ಇಮೇಸಂ ಖೋ, ಭಿಕ್ಖವೇ, ಚತುನ್ನಂ ಧಮ್ಮಾನಂ ನತ್ಥಿ ಕೋಚಿ ಪಾಟಿಭೋಗೋ ಸಮಣೋ ವಾ ಬ್ರಾಹ್ಮಣೋ ವಾ ದೇವೋ ವಾ ಮಾರೋ ವಾ ಬ್ರಹ್ಮಾ ವಾ ಕೋಚಿ ವಾ ಲೋಕಸ್ಮಿ’’ನ್ತಿ [ಅ. ನಿ. ೪.೧೮೨]. ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ನ ವತ್ತಬ್ಬಂ – ‘‘ಇದ್ಧಿಬಲೇನ ಸಮನ್ನಾಗತೋ ಕಪ್ಪಂ ತಿಟ್ಠೇಯ್ಯಾ’’ತಿ.

ಇದ್ಧಿಬಲಕಥಾ ನಿಟ್ಠಿತಾ.

೧೧. ಏಕಾದಸಮವಗ್ಗೋ

(೧೧೩) ೮. ಸಮಾಧಿಕಥಾ

೬೨೫. ಚಿತ್ತಸನ್ತತಿ ಸಮಾಧೀತಿ? ಆಮನ್ತಾ. ಅತೀತಾ ಚಿತ್ತಸನ್ತತಿ ಸಮಾಧೀತಿ? ನ ಹೇವಂ ವತ್ತಬ್ಬೇ …ಪೇ… ಚಿತ್ತಸನ್ತತಿ ಸಮಾಧೀತಿ? ಆಮನ್ತಾ. ಅನಾಗತಾ ಚಿತ್ತಸನ್ತತಿ ಸಮಾಧೀತಿ? ನ ಹೇವಂ ವತ್ತಬ್ಬೇ…ಪೇ… ಚಿತ್ತಸನ್ತತಿ ಸಮಾಧೀತಿ? ಆಮನ್ತಾ. ನನು ಅತೀತಂ ನಿರುದ್ಧಂ ಅನಾಗತಂ ಅಜಾತನ್ತಿ? ಆಮನ್ತಾ. ಹಞ್ಚಿ ಅತೀತಂ ನಿರುದ್ಧಂ ಅನಾಗತಂ ಅಜಾತಂ, ನೋ ಚ ವತ ರೇ ವತ್ತಬ್ಬೇ – ‘‘ಚಿತ್ತಸನ್ತತಿ ಸಮಾಧೀ’’ತಿ.

೬೨೬. ಏಕಚಿತ್ತಕ್ಖಣಿಕೋ ಸಮಾಧೀತಿ? ಆಮನ್ತಾ. ಚಕ್ಖುವಿಞ್ಞಾಣಸಮಙ್ಗೀ ಸಮಾಪನ್ನೋತಿ? ನ ಹೇವಂ ವತ್ತಬ್ಬೇ…ಪೇ… ಸೋತವಿಞ್ಞಾಣಸಮಙ್ಗೀ…ಪೇ… ಘಾನವಿಞ್ಞಾಣಸಮಙ್ಗೀ… ಜಿವ್ಹಾವಿಞ್ಞಾಣಸಮಙ್ಗೀ… ಕಾಯವಿಞ್ಞಾಣಸಮಙ್ಗೀ…ಪೇ… ಅಕುಸಲಚಿತ್ತಸಮಙ್ಗೀ …ಪೇ… ರಾಗಸಹಗತಚಿತ್ತಸಮಙ್ಗೀ…ಪೇ… ದೋಸಸಹಗತಚಿತ್ತಸಮಙ್ಗೀ…ಪೇ… ಮೋಹಸಹಗತಚಿತ್ತಸಮಙ್ಗೀ…ಪೇ… ಅನೋತ್ತಪ್ಪಸಹಗತಚಿತ್ತಸಮಙ್ಗೀ ಸಮಾಪನ್ನೋತಿ? ನ ಹೇವಂ ವತ್ತಬ್ಬೇ…ಪೇ….

ಚಿತ್ತಸನ್ತತಿ ಸಮಾಧೀತಿ? ಆಮನ್ತಾ. ಅಕುಸಲಚಿತ್ತಸನ್ತತಿ ಸಮಾಧೀತಿ? ನ ಹೇವಂ ವತ್ತಬ್ಬೇ…ಪೇ… ರಾಗಸಹಗತಾ…ಪೇ… ದೋಸಸಹಗತಾ…ಪೇ… ಮೋಹಸಹಗತಾ…ಪೇ… ಅನೋತ್ತಪ್ಪಸಹಗತಾ ಚಿತ್ತಸನ್ತತಿ ಸಮಾಧೀತಿ? ನ ಹೇವಂ ವತ್ತಬ್ಬೇ…ಪೇ….

ನ ವತ್ತಬ್ಬಂ – ‘‘ಚಿತ್ತಸನ್ತತಿ ಸಮಾಧೀ’’ತಿ? ಆಮನ್ತಾ. ನನು ವುತ್ತಂ ಭಗವತಾ – ‘‘ಅಹಂ ಖೋ, ಆವುಸೋ ನಿಗಣ್ಠಾ, ಪಹೋಮಿ ಅನಿಞ್ಜಮಾನೋ ಕಾಯೇನ, ಅಭಾಸಮಾನೋ ವಾಚಂ, ಸತ್ತ ರತ್ತಿನ್ದಿವಾನಿ [ರತ್ತಿದಿವಾನಿ (ಕ.)] ಏಕನ್ತಸುಖಂ ಪಟಿಸಂವೇದೀ ವಿಹರಿತು’’ನ್ತಿ [ಮ. ನಿ. ೧.೧೮೦]! ಅತ್ಥೇವ ಸುತ್ತನ್ತೋತಿ? ಆಮನ್ತಾ. ತೇನ ಹಿ ಚಿತ್ತಸನ್ತತಿ ಸಮಾಧೀತಿ.

ಸಮಾಧಿಕಥಾ ನಿಟ್ಠಿತಾ.

೧೧. ಏಕಾದಸಮವಗ್ಗೋ

(೧೧೪) ೯. ಧಮ್ಮಟ್ಠಿತತಾಕಥಾ

೬೨೭. ಧಮ್ಮಟ್ಠಿತತಾ ಪರಿನಿಪ್ಫನ್ನಾತಿ? ಆಮನ್ತಾ. ತಾಯ ಠಿತತಾ ಪರಿನಿಪ್ಫನ್ನಾತಿ? ನ ಹೇವಂ ವತ್ತಬ್ಬೇ…ಪೇ… ತಾಯ ಠಿತತಾ ಪರಿನಿಪ್ಫನ್ನಾತಿ? ಆಮನ್ತಾ. ತಾಯ ತಾಯೇವ ನತ್ಥಿ ದುಕ್ಖಸ್ಸನ್ತಕಿರಿಯಾ, ನತ್ಥಿ ವಟ್ಟುಪಚ್ಛೇದೋ, ನತ್ಥಿ ಅನುಪಾದಾಪರಿನಿಬ್ಬಾನನ್ತಿ? ನ ಹೇವಂ ವತ್ತಬ್ಬೇ…ಪೇ….

ರೂಪಸ್ಸ ಠಿತತಾ ಪರಿನಿಪ್ಫನ್ನಾತಿ? ಆಮನ್ತಾ. ತಾಯ ಠಿತತಾ ಪರಿನಿಪ್ಫನ್ನಾತಿ? ನ ಹೇವಂ ವತ್ತಬ್ಬೇ…ಪೇ… ತಾಯ ಠಿತತಾ ಪರಿನಿಪ್ಫನ್ನಾತಿ? ಆಮನ್ತಾ. ತಾಯ ತಾಯೇವ ನತ್ಥಿ ದುಕ್ಖಸ್ಸನ್ತಕಿರಿಯಾ, ನತ್ಥಿ ವಟ್ಟುಪಚ್ಛೇದೋ, ನತ್ಥಿ ಅನುಪಾದಾಪರಿನಿಬ್ಬಾನನ್ತಿ? ನ ಹೇವಂ ವತ್ತಬ್ಬೇ…ಪೇ….

ವೇದನಾಯ ಠಿತತಾ…ಪೇ… ಸಞ್ಞಾಯ ಠಿತತಾ…ಪೇ… ಸಙ್ಖಾರಾನಂ ಠಿತತಾ…ಪೇ… ವಿಞ್ಞಾಣಸ್ಸ ಠಿತತಾ ಪರಿನಿಪ್ಫನ್ನಾತಿ? ಆಮನ್ತಾ. ತಾಯ ಠಿತತಾ ಪರಿನಿಪ್ಫನ್ನಾತಿ? ನ ಹೇವಂ ವತ್ತಬ್ಬೇ…ಪೇ… ತಾಯ ಠಿತತಾ ಪರಿನಿಪ್ಫನ್ನಾತಿ? ಆಮನ್ತಾ. ತಾಯ ತಾಯೇವ ನತ್ಥಿ ದುಕ್ಖಸ್ಸನ್ತಕಿರಿಯಾ, ನತ್ಥಿ ವಟ್ಟುಪಚ್ಛೇದೋ, ನತ್ಥಿ ಅನುಪಾದಾಪರಿನಿಬ್ಬಾನನ್ತಿ? ನ ಹೇವಂ ವತ್ತಬ್ಬೇ…ಪೇ….

ಧಮ್ಮಟ್ಠಿತತಾಕಥಾ ನಿಟ್ಠಿತಾ.

೧೧. ಏಕಾದಸಮವಗ್ಗೋ

(೧೧೫) ೧೦. ಅನಿಚ್ಚತಾಕಥಾ

೬೨೮. ಅನಿಚ್ಚತಾ ಪರಿನಿಪ್ಫನ್ನಾತಿ? ಆಮನ್ತಾ. ತಾಯ ಅನಿಚ್ಚತಾಯ ಅನಿಚ್ಚತಾ ಪರಿನಿಪ್ಫನ್ನಾತಿ? ನ ಹೇವಂ ವತ್ತಬ್ಬೇ…ಪೇ… ತಾಯ ಅನಿಚ್ಚತಾಯ ಅನಿಚ್ಚತಾ ಪರಿನಿಪ್ಫನ್ನಾತಿ? ಆಮನ್ತಾ. ತಾಯ ತಾಯೇವ ನತ್ಥಿ ದುಕ್ಖಸ್ಸನ್ತಕಿರಿಯಾ, ನತ್ಥಿ ವಟ್ಟುಪಚ್ಛೇದೋ, ನತ್ಥಿ ಅನುಪಾದಾಪರಿನಿಬ್ಬಾನನ್ತಿ? ನ ಹೇವಂ ವತ್ತಬ್ಬೇ.

ಜರಾ ಪರಿನಿಪ್ಫನ್ನಾತಿ? ಆಮನ್ತಾ. ತಾಯ ಜರಾಯ ಜರಾ ಪರಿನಿಪ್ಫನ್ನಾತಿ? ನ ಹೇವಂ ವತ್ತಬ್ಬೇ…ಪೇ… ತಾಯ ಜರಾಯ ಜರಾ ಪರಿನಿಪ್ಫನ್ನಾತಿ? ಆಮನ್ತಾ. ತಾಯ ತಾಯೇವ ನತ್ಥಿ ದುಕ್ಖಸ್ಸನ್ತಕಿರಿಯಾ, ನತ್ಥಿ ವಟ್ಟುಪಚ್ಛೇದೋ, ನತ್ಥಿ ಅನುಪಾದಾಪರಿನಿಬ್ಬಾನನ್ತಿ? ನ ಹೇವಂ ವತ್ತಬ್ಬೇ…ಪೇ….

ಮರಣಂ ಪರಿನಿಪ್ಫನ್ನನ್ತಿ? ಆಮನ್ತಾ. ತಸ್ಸ ಮರಣಸ್ಸ ಮರಣಂ ಪರಿನಿಪ್ಫನ್ನನ್ತಿ? ನ ಹೇವಂ ವತ್ತಬ್ಬೇ. ತಸ್ಸ ಮರಣಸ್ಸ ಮರಣಂ ಪರಿನಿಪ್ಫನ್ನನ್ತಿ? ಆಮನ್ತಾ. ತಸ್ಸ ತಸ್ಸೇವ ನತ್ಥಿ ದುಕ್ಖಸ್ಸನ್ತಕಿರಿಯಾ, ನತ್ಥಿ ವಟ್ಟುಪಚ್ಛೇದೋ, ನತ್ಥಿ ಅನುಪಾದಾಪರಿನಿಬ್ಬಾನನ್ತಿ? ನ ಹೇವಂ ವತ್ತಬ್ಬೇ…ಪೇ….

೬೨೯. ರೂಪಂ ಪರಿನಿಪ್ಫನ್ನಂ, ರೂಪಸ್ಸ ಅನಿಚ್ಚತಾ ಅತ್ಥೀತಿ? ಆಮನ್ತಾ. ಅನಿಚ್ಚತಾ ಪರಿನಿಪ್ಫನ್ನಾ, ಅನಿಚ್ಚತಾಯ ಅನಿಚ್ಚತಾ ಅತ್ಥೀತಿ? ನ ಹೇವಂ ವತ್ತಬ್ಬೇ…ಪೇ… ರೂಪಂ ಪರಿನಿಪ್ಫನ್ನಂ, ರೂಪಸ್ಸ ಜರಾ ಅತ್ಥೀತಿ? ಆಮನ್ತಾ. ಜರಾ ಪರಿನಿಪ್ಫನ್ನಾ, ಜರಾಯ ಜರಾ ಅತ್ಥೀತಿ? ನ ಹೇವಂ ವತ್ತಬ್ಬೇ…ಪೇ….

ರೂಪಂ ಪರಿನಿಪ್ಫನ್ನಂ, ರೂಪಸ್ಸ ಭೇದೋ ಅತ್ಥಿ, ಅನ್ತರಧಾನಂ ಅತ್ಥೀತಿ? ಆಮನ್ತಾ. ಮರಣಂ ಪರಿನಿಪ್ಫನ್ನಂ, ಮರಣಸ್ಸ ಭೇದೋ ಅತ್ಥಿ, ಅನ್ತರಧಾನಂ ಅತ್ಥೀತಿ? ನ ಹೇವಂ ವತ್ತಬ್ಬೇ…ಪೇ….

ವೇದನಾ …ಪೇ… ಸಞ್ಞಾ… ಸಙ್ಖಾರಾ…ಪೇ… ವಿಞ್ಞಾಣಂ ಪರಿನಿಪ್ಫನ್ನಂ, ವಿಞ್ಞಾಣಸ್ಸ ಅನಿಚ್ಚತಾ ಅತ್ಥೀತಿ? ಆಮನ್ತಾ. ಅನಿಚ್ಚತಾ ಪರಿನಿಪ್ಫನ್ನಾ, ಅನಿಚ್ಚತಾಯ ಅನಿಚ್ಚತಾ ಅತ್ಥೀತಿ? ನ ಹೇವಂ ವತ್ತಬ್ಬೇ …ಪೇ… ವಿಞ್ಞಾಣಂ ಪರಿನಿಪ್ಫನ್ನಂ, ವಿಞ್ಞಾಣಸ್ಸ ಜರಾ ಅತ್ಥೀತಿ? ಆಮನ್ತಾ. ಜರಾ ಪರಿನಿಪ್ಫನ್ನಾ, ಜರಾಯ ಜರಾ ಅತ್ಥೀತಿ? ನ ಹೇವಂ ವತ್ತಬ್ಬೇ…ಪೇ….

ವಿಞ್ಞಾಣಂ ಪರಿನಿಪ್ಫನ್ನಂ, ವಿಞ್ಞಾಣಸ್ಸ ಭೇದೋ ಅತ್ಥಿ, ಅನ್ತರಧಾನಂ ಅತ್ಥೀತಿ? ಆಮನ್ತಾ. ಮರಣಂ ಪರಿನಿಪ್ಫನ್ನಂ, ಮರಣಸ್ಸ ಭೇದೋ ಅತ್ಥಿ, ಅನ್ತರಧಾನಂ ಅತ್ಥೀತಿ? ನ ಹೇವಂ ವತ್ತಬ್ಬೇ…ಪೇ….

ಅನಿಚ್ಚತಾಕಥಾ ನಿಟ್ಠಿತಾ.

ಏಕಾದಸಮವಗ್ಗೋ.

ತಸ್ಸುದ್ದಾನಂ –

ಅನುಸಯಾ ಅಬ್ಯಾಕತಾ, ಅಹೇತುಕಾ, ಚಿತ್ತವಿಪ್ಪಯುತ್ತಾ, ಅಞ್ಞಾಣೇ ವಿಗತೇ ಞಾಣೀ, ಞಾಣಂ ಚಿತ್ತವಿಪ್ಪಯುತ್ತಂ, ಯತ್ಥ ಸದ್ದೇ [ಯತ್ಥ ಸದ್ದೋ (ಸೀ.), ಯಥಾಸದ್ದಂ (?)] ಞಾಣಂ ಪವತ್ತತಿ, ಇದ್ಧಿಬಲೇನ ಸಮನ್ನಾಗತೋ ಕಪ್ಪಂ ತಿಟ್ಠೇಯ್ಯ, ಚಿತ್ತಸನ್ತತಿ ಸಮಾಧಿ, ಧಮ್ಮಟ್ಠಿತತಾ, ಅನಿಚ್ಚತಾತಿ.