(೩೪) ೨. ಉಪಪತ್ತಿಕಥಾ

೩೮೮. ಸಹ ಉಪಪತ್ತಿಯಾ ಅರಹಾತಿ? ಆಮನ್ತಾ. ಸಹ ಉಪಪತ್ತಿಯಾ ಸೋತಾಪನ್ನೋ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

ಸಹ ಉಪಪತ್ತಿಯಾ ಅರಹಾತಿ? ಆಮನ್ತಾ. ಸಹ ಉಪಪತ್ತಿಯಾ ಸಕದಾಗಾಮೀ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

ಸಹ ಉಪಪತ್ತಿಯಾ ಅರಹಾತಿ? ಆಮನ್ತಾ. ಸಹ ಉಪಪತ್ತಿಯಾ ಅನಾಗಾಮೀ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

ಸಹ ಉಪಪತ್ತಿಯಾ ಸೋತಾಪನ್ನೋ ನ ಹೋತೀತಿ? ಆಮನ್ತಾ. ಹಞ್ಚಿ ಸಹ ಉಪಪತ್ತಿಯಾ ಸೋತಾಪನ್ನೋ ನ ಹೋತಿ, ನೋ ಚ ವತ ರೇ ವತ್ತಬ್ಬೇ – ‘‘ಸಹ ಉಪಪತ್ತಿಯಾ ಅರಹಾ’’ತಿ.

ಸಹ ಉಪಪತ್ತಿಯಾ ಸಕದಾಗಾಮೀ ನ ಹೋತೀತಿ? ಆಮನ್ತಾ. ಹಞ್ಚಿ ಸಹ ಉಪಪತ್ತಿಯಾ ಸಕದಾಗಾಮೀ ನ ಹೋತಿ, ನೋ ಚ ವತ ರೇ ವತ್ತಬ್ಬೇ – ‘‘ಸಹ ಉಪಪತ್ತಿಯಾ ಅರಹಾ’’ತಿ.

ಸಹ ಉಪಪತ್ತಿಯಾ ಅನಾಗಾಮೀ ನ ಹೋತೀತಿ? ಆಮನ್ತಾ. ಹಞ್ಚಿ ಸಹ ಉಪಪತ್ತಿಯಾ ಅನಾಗಾಮೀ ನ ಹೋತಿ, ನೋ ಚ ವತ ರೇ ವತ್ತಬ್ಬೇ – ‘‘ಸಹ ಉಪಪತ್ತಿಯಾ ಅರಹಾ’’ತಿ.

೩೮೯. ಸಹ ಉಪಪತ್ತಿಯಾ ಅರಹಾತಿ? ಆಮನ್ತಾ. ಸಾರಿಪುತ್ತೋ ಥೇರೋ ಸಹ ಉಪಪತ್ತಿಯಾ ಅರಹಾತಿ? ನ ಹೇವಂ ವತ್ತಬ್ಬೇ. ಮಹಾಮೋಗ್ಗಲ್ಲಾನೋ ಥೇರೋ …ಪೇ… ಮಹಾಕಸ್ಸಪೋ ಥೇರೋ…ಪೇ… ಮಹಾಕಚ್ಚಾನೋ ಥೇರೋ…ಪೇ… ಮಹಾಕೋಟ್ಠಿಕೋ ಥೇರೋ…ಪೇ… ಮಹಾಪನ್ಥಕೋ ಥೇರೋ ಸಹ ಉಪಪತ್ತಿಯಾ ಅರಹಾತಿ? ನ ಹೇವಂ ವತ್ತಬ್ಬೇ…ಪೇ….

ಸಾರಿಪುತ್ತೋ ಥೇರೋ ನ ಸಹ ಉಪಪತ್ತಿಯಾ ಅರಹಾತಿ? ಆಮನ್ತಾ. ಹಞ್ಚಿ ಸಾರಿಪುತ್ತೋ ಥೇರೋ ನ ಸಹ ಉಪಪತ್ತಿಯಾ ಅರಹಾ, ನೋ ಚ ವತ ರೇ ವತ್ತಬ್ಬೇ – ‘‘ಸಹ ಉಪಪತ್ತಿಯಾ ಅರಹಾ’’ತಿ.

ಮಹಾಮೋಗ್ಗಲ್ಲಾನೋ ಥೇರೋ…ಪೇ… ಮಹಾಕಸ್ಸಪೋ ಥೇರೋ…ಪೇ… ಮಹಾಕಚ್ಚಾನೋ ಥೇರೋ…ಪೇ… ಮಹಾಕೋಟ್ಠಿಕೋ ಥೇರೋ…ಪೇ… ಮಹಾಪನ್ಥಕೋ ಥೇರೋ ನ ಸಹ ಉಪಪತ್ತಿಯಾ ಅರಹಾತಿ? ಆಮನ್ತಾ. ಹಞ್ಚಿ ಮಹಾಪನ್ಥಕೋ ಥೇರೋ ನ ಸಹ ಉಪಪತ್ತಿಯಾ ಅರಹಾ, ನೋ ಚ ವತ ರೇ ವತ್ತಬ್ಬೇ – ‘‘ಸಹ ಉಪಪತ್ತಿಯಾ ಅರಹಾ’’ತಿ.

೩೯೦. ಸಹ ಉಪಪತ್ತಿಯಾ ಅರಹಾತಿ? ಆಮನ್ತಾ. ಉಪಪತ್ತೇಸಿಯೇನ ಚಿತ್ತೇನ ಅರಹತ್ತಂ ಸಚ್ಛಿಕರೋತಿ ಲೋಕಿಯೇನ ಸಾಸವೇನ…ಪೇ… ಸಂಕಿಲೇಸಿಯೇನಾತಿ? ನ ಹೇವಂ ವತ್ತಬ್ಬೇ…ಪೇ….

ಸಹ ಉಪಪತ್ತಿಯಾ ಅರಹಾತಿ? ಆಮನ್ತಾ. ಉಪಪತ್ತೇಸಿಯಂ ಚಿತ್ತಂ ನಿಯ್ಯಾನಿಕಂ ಖಯಗಾಮೀ ಬೋಧಗಾಮೀ ಅಪಚಯಗಾಮೀ ಅನಾಸವಂ…ಪೇ… ಅಸಂಕಿಲೇಸಿಯನ್ತಿ? ನ ಹೇವಂ ವತ್ತಬ್ಬೇ…ಪೇ….

ನನು ಉಪಪತ್ತೇಸಿಯಂ ಚಿತ್ತಂ ಅನಿಯ್ಯಾನಿಕಂ ನ ಖಯಗಾಮಿ ನ ಬೋಧಗಾಮಿ ನ ಅಪಚಯಗಾಮಿ ಸಾಸವಂ…ಪೇ… ಸಂಕಿಲೇಸಿಯನ್ತಿ? ಆಮನ್ತಾ. ಹಞ್ಚಿ ಉಪಪತ್ತೇಸಿಯಂ ಚಿತ್ತಂ ಅನಿಯ್ಯಾನಿಕಂ ನ ಖಯಗಾಮಿ ನ ಬೋಧಗಾಮಿ ನ ಅಪಚಯಗಾಮಿ ಸಾಸವಂ…ಪೇ… ಸಂಕಿಲೇಸಿಯಂ, ನೋ ಚ ವತ ರೇ ವತ್ತಬ್ಬೇ – ‘‘ಸಹ ಉಪಪತ್ತಿಯಾ ಅರಹಾ’’ತಿ.

ಸಹ ಉಪಪತ್ತಿಯಾ ಅರಹಾತಿ? ಆಮನ್ತಾ. ಉಪಪತ್ತೇಸಿಯೇನ ಚಿತ್ತೇನ ರಾಗಂ ಪಜಹತಿ, ದೋಸಂ ಪಜಹತಿ, ಮೋಹಂ ಪಜಹತಿ, ಅನೋತ್ತಪ್ಪಂ ಪಜಹತೀತಿ? ನ ಹೇವಂ ವತ್ತಬ್ಬೇ…ಪೇ….

ಸಹ ಉಪಪತ್ತಿಯಾ ಅರಹಾತಿ? ಆಮನ್ತಾ. ಉಪಪತ್ತೇಸಿಯಂ ಚಿತ್ತಂ ಮಗ್ಗೋ… ಸತಿಪಟ್ಠಾನಂ…ಪೇ… ಸಮ್ಮಪ್ಪಧಾನಂ… ಇದ್ಧಿಪಾದೋ… ಇನ್ದ್ರಿಯಂ… ಬಲಂ… ಬೋಜ್ಝಙ್ಗೋತಿ? ನ ಹೇವಂ ವತ್ತಬ್ಬೇ…ಪೇ….

ಸಹ ಉಪಪತ್ತಿಯಾ ಅರಹಾತಿ? ಆಮನ್ತಾ. ಉಪಪತ್ತೇಸಿಯೇನ ಚಿತ್ತೇನ ದುಕ್ಖಂ ಪರಿಜಾನಾತಿ, ಸಮುದಯಂ ಪಜಹತಿ, ನಿರೋಧಂ ಸಚ್ಛಿಕರೋತಿ, ಮಗ್ಗಂ ಭಾವೇತೀತಿ? ನ ಹೇವಂ ವತ್ತಬ್ಬೇ …ಪೇ… ಸಹ ಉಪಪತ್ತಿಯಾ ಅರಹಾತಿ? ಆಮನ್ತಾ. ಚುತಿಚಿತ್ತಂ ಮಗ್ಗಚಿತ್ತಂ ಉಪಪತ್ತೇಸಿಯಂ ಚಿತ್ತಂ ಫಲಚಿತ್ತನ್ತಿ? ನ ಹೇವಂ ವತ್ತಬ್ಬೇ…ಪೇ….

ಉಪಪತ್ತಿಕಥಾ ನಿಟ್ಠಿತಾ.