೪. ಚತುತ್ಥವಗ್ಗೋ

(೩೫) ೩. ಅನಾಸವಕಥಾ

೩೯೧. ಅರಹತೋ ಸಬ್ಬೇ ಧಮ್ಮಾ ಅನಾಸವಾತಿ? ಆಮನ್ತಾ. ಮಗ್ಗೋ ಫಲಂ ನಿಬ್ಬಾನಂ, ಸೋತಾಪತ್ತಿಮಗ್ಗೋ ಸೋತಾಪತ್ತಿಫಲಂ, ಸಕದಾಗಾಮಿಮಗ್ಗೋ ಸಕದಾಗಾಮಿಫಲಂ, ಅನಾಗಾಮಿಮಗ್ಗೋ ಅನಾಗಾಮಿಫಲಂ, ಅರಹತ್ತಮಗ್ಗೋ ಅರಹತ್ತಫಲಂ, ಸತಿಪಟ್ಠಾನಂ ಸಮ್ಮಪ್ಪಧಾನಂ ಇದ್ಧಿಪಾದೋ ಇನ್ದ್ರಿಯಂ ಬಲಂ ಬೋಜ್ಝಙ್ಗೋತಿ? ನ ಹೇವಂ ವತ್ತಬ್ಬೇ…ಪೇ….

ಅರಹತೋ ಸಬ್ಬೇ ಧಮ್ಮಾ ಅನಾಸವಾತಿ? ಆಮನ್ತಾ. ಅರಹತೋ ಚಕ್ಖುಂ ಅನಾಸವನ್ತಿ? ನ ಹೇವಂ ವತ್ತಬ್ಬೇ…ಪೇ…. ಅರಹತೋ ಚಕ್ಖುಂ ಅನಾಸವನ್ತಿ? ಆಮನ್ತಾ. ಮಗ್ಗೋ ಫಲಂ ನಿಬ್ಬಾನಂ, ಸೋತಾಪತ್ತಿಮಗ್ಗೋ ಸೋತಾಪತ್ತಿಫಲಂ…ಪೇ… ಬೋಜ್ಝಙ್ಗೋತಿ? ನ ಹೇವಂ ವತ್ತಬ್ಬೇ…ಪೇ….

ಅರಹತೋ ಸೋತಂ…ಪೇ… ಅರಹತೋ ಘಾನಂ… ಅರಹತೋ ಜಿವ್ಹಾ… ಅರಹತೋ ಕಾಯೋ ಅನಾಸವೋತಿ? ನ ಹೇವಂ ವತ್ತಬ್ಬೇ …ಪೇ… ಅರಹತೋ ಕಾಯೋ ಅನಾಸವೋತಿ? ಆಮನ್ತಾ. ಮಗ್ಗೋ ಫಲಂ ನಿಬ್ಬಾನಂ, ಸೋತಾಪತ್ತಿಮಗ್ಗೋ ಸೋತಾಪತ್ತಿಫಲಂ…ಪೇ… ಬೋಜ್ಝಙ್ಗೋತಿ? ನ ಹೇವಂ ವತ್ತಬ್ಬೇ…ಪೇ….

ಅರಹತೋ ಕಾಯೋ ಅನಾಸವೋತಿ? ಆಮನ್ತಾ. ಅರಹತೋ ಕಾಯೋ ಪಗ್ಗಹನಿಗ್ಗಹುಪಗೋ ಛೇದನಭೇದನುಪಗೋ ಕಾಕೇಹಿ ಗಿಜ್ಝೇಹಿ ಕುಲಲೇಹಿ ಸಾಧಾರಣೋತಿ? ಆಮನ್ತಾ. ಅನಾಸವೋ ಧಮ್ಮೋ ಪಗ್ಗಹನಿಗ್ಗಹುಪಗೋ ಛೇದನಭೇದನುಪಗೋ ಕಾಕೇಹಿ ಗಿಜ್ಝೇಹಿ ಕುಲಲೇಹಿ ಸಾಧಾರಣೋತಿ? ನ ಹೇವಂ ವತ್ತಬ್ಬೇ …ಪೇ….

ಅರಹತೋ ಕಾಯೇ ವಿಸಂ ಕಮೇಯ್ಯ, ಸತ್ಥಂ ಕಮೇಯ್ಯ, ಅಗ್ಗಿ ಕಮೇಯ್ಯಾತಿ? ಆಮನ್ತಾ. ಅನಾಸವೇ ಧಮ್ಮೇ ವಿಸಂ ಕಮೇಯ್ಯ, ಸತ್ಥಂ ಕಮೇಯ್ಯ, ಅಗ್ಗಿ ಕಮೇಯ್ಯಾತಿ? ನ ಹೇವಂ ವತ್ತಬ್ಬೇ…ಪೇ….

ಲಬ್ಭಾ ಅರಹತೋ ಕಾಯೋ ಅದ್ದುಬನ್ಧನೇನ ಬನ್ಧಿತುಂ, ರಜ್ಜುಬನ್ಧನೇನ ಬನ್ಧಿತುಂ, ಸಙ್ಖಲಿಕಬನ್ಧನೇನ ಬನ್ಧಿತುಂ, ಗಾಮಬನ್ಧನೇನ ಬನ್ಧಿತುಂ, ನಿಗಮಬನ್ಧನೇನ ಬನ್ಧಿತುಂ, ನಗರಬನ್ಧನೇನ ಬನ್ಧಿತುಂ, ಜನಪದಬನ್ಧನೇನ ಬನ್ಧಿತುಂ, ಕಣ್ಠಪಞ್ಚಮೇಹಿ ಬನ್ಧನೇಹಿ ಬನ್ಧಿತುನ್ತಿ? ಆಮನ್ತಾ. ಲಬ್ಭಾ ಅನಾಸವೋ ಧಮ್ಮೋ ಅದ್ದುಬನ್ಧನೇನ ಬನ್ಧಿತುಂ, ರಜ್ಜುಬನ್ಧನೇನ ಬನ್ಧಿತುಂ, ಸಙ್ಖಲಿಕಬನ್ಧನೇನ ಬನ್ಧಿತುಂ, ಗಾಮನಿಗಮನಗರಜನಪದಬನ್ಧನೇನ ಬನ್ಧಿತುಂ, ಕಣ್ಠಪಞ್ಚಮೇಹಿ ಬನ್ಧನೇಹಿ ಬನ್ಧಿತುನ್ತಿ? ನ ಹೇವಂ ವತ್ತಬ್ಬೇ…ಪೇ….

೩೯೨. ಯದಿ ಅರಹಾ ಪುಥುಜ್ಜನಸ್ಸ ಚೀವರಂ ದೇತಿ, ಅನಾಸವಂ ಹುತ್ವಾ ಸಾಸವಂ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ… ಅನಾಸವಂ ಹುತ್ವಾ ಸಾಸವಂ ಹೋತೀತಿ? ಆಮನ್ತಾ. ತಞ್ಞೇವ ಅನಾಸವಂ ತಂ ಸಾಸವನ್ತಿ? ನ ಹೇವಂ ವತ್ತಬ್ಬೇ…ಪೇ… ತಞ್ಞೇವ ಅನಾಸವಂ ತಂ ಸಾಸವನ್ತಿ? ಆಮನ್ತಾ. ಮಗ್ಗೋ ಅನಾಸವೋ ಹುತ್ವಾ ಸಾಸವೋ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ… ಫಲಂ… ಸತಿಪಟ್ಠಾನಂ… ಸಮ್ಮಪ್ಪಧಾನಂ… ಇದ್ಧಿಪಾದೋ… ಇನ್ದ್ರಿಯಂ… ಬಲಂ… ಬೋಜ್ಝಙ್ಗೋ ಅನಾಸವೋ ಹುತ್ವಾ ಸಾಸವೋ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

ಯದಿ ಅರಹಾ ಪುಥುಜ್ಜನಸ್ಸ ಪಿಣ್ಡಪಾತಂ ದೇತಿ, ಸೇನಾಸನಂ ದೇತಿ, ಗಿಲಾನಪಚ್ಚಯಭೇಸಜ್ಜಪರಿಕ್ಖಾರಂ ದೇತಿ, ಅನಾಸವೋ ಹುತ್ವಾ ಸಾಸವೋ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ… ಅನಾಸವೋ ಹುತ್ವಾ ಸಾಸವೋ ಹೋತೀತಿ? ಆಮನ್ತಾ. ತಞ್ಞೇವ ಅನಾಸವಂ ತಂ ಸಾಸವನ್ತಿ? ನ ಹೇವಂ ವತ್ತಬ್ಬೇ…ಪೇ… ತಞ್ಞೇವ ಅನಾಸವಂ ತಂ ಸಾಸವನ್ತಿ? ಆಮನ್ತಾ. ಮಗ್ಗೋ ಅನಾಸವೋ ಹುತ್ವಾ ಸಾಸವೋ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ… ಫಲಂ… ಸತಿಪಟ್ಠಾನಂ… ಸಮ್ಮಪ್ಪಧಾನಂ… ಇದ್ಧಿಪಾದೋ… ಇನ್ದ್ರಿಯಂ… ಬಲಂ… ಬೋಜ್ಝಙ್ಗೋ ಅನಾಸವೋ ಹುತ್ವಾ ಸಾಸವೋ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

ಯದಿ ಪುಥುಜ್ಜನೋ ಅರಹತೋ ಚೀವರಂ ದೇತಿ, ಸಾಸವಂ ಹುತ್ವಾ ಅನಾಸವಂ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ… ಸಾಸವಂ ಹುತ್ವಾ ಅನಾಸವಂ ಹೋತೀತಿ? ಆಮನ್ತಾ. ತಞ್ಞೇವ ಸಾಸವಂ ತಂ ಅನಾಸವನ್ತಿ? ನ ಹೇವಂ ವತ್ತಬ್ಬೇ…ಪೇ… ತಞ್ಞೇವ ಸಾಸವಂ ತಂ ಅನಾಸವನ್ತಿ? ಆಮನ್ತಾ. ರಾಗೋ ಸಾಸವೋ ಹುತ್ವಾ ಅನಾಸವೋ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ… ದೋಸೋ…ಪೇ… ಮೋಹೋ…ಪೇ… ಅನೋತ್ತಪ್ಪಂ ಸಾಸವಂ ಹುತ್ವಾ ಅನಾಸವಂ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

ಯದಿ ಪುಥುಜ್ಜನೋ ಅರಹತೋ ಪಿಣ್ಡಪಾತಂ ದೇತಿ, ಸೇನಾಸನಂ ದೇತಿ, ಗಿಲಾನಪಚ್ಚಯಭೇಸಜ್ಜಪರಿಕ್ಖಾರಂ ದೇತಿ, ಸಾಸವೋ ಹುತ್ವಾ ಅನಾಸವೋ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ… ಸಾಸವೋ ಹುತ್ವಾ ಅನಾಸವೋ ಹೋತೀತಿ? ಆಮನ್ತಾ. ತಞ್ಞೇವ ಸಾಸವಂ ತಂ ಅನಾಸವನ್ತಿ? ನ ಹೇವಂ ವತ್ತಬ್ಬೇ…ಪೇ… ತಞ್ಞೇವ ಸಾಸವಂ ತಂ ಅನಾಸವನ್ತಿ? ಆಮನ್ತಾ. ರಾಗೋ ಸಾಸವೋ ಹುತ್ವಾ ಅನಾಸವೋ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ… ದೋಸೋ…ಪೇ… ಮೋಹೋ…ಪೇ… ಅನೋತ್ತಪ್ಪಂ ಸಾಸವಂ ಹುತ್ವಾ ಅನಾಸವಂ ಹೋತೀತಿ? ನ ಹೇವಂ ವತ್ತಬ್ಬೇ…ಪೇ….

ನ ವತ್ತಬ್ಬಂ – ‘‘ಅರಹತೋ ಸಬ್ಬೇ ಧಮ್ಮಾ ಅನಾಸವಾ’’ತಿ? ಆಮನ್ತಾ. ನನು ಅರಹಾ ಅನಾಸವೋತಿ? ಆಮನ್ತಾ. ಹಞ್ಚಿ ಅರಹಾ ಅನಾಸವೋ, ತೇನ ವತ ರೇ ವತ್ತಬ್ಬೇ – ‘‘ಅರಹತೋ ಸಬ್ಬೇ ಧಮ್ಮಾ ಅನಾಸವಾ’’ತಿ.

ಅನಾಸವಕಥಾ ನಿಟ್ಠಿತಾ.