(೪೨) ೧೦. ಸಬ್ಬಸಂಯೋಜನಪ್ಪಹಾನಕಥಾ

೪೧೩. ಸಬ್ಬಸಂಯೋಜನಾನಂ ಪಹಾನಂ ಅರಹತ್ತನ್ತಿ? ಆಮನ್ತಾ. ಅರಹತ್ತಮಗ್ಗೇನ ಸಬ್ಬೇ ಸಂಯೋಜನಾ ಪಹೀಯನ್ತೀತಿ? ನ ಹೇವಂ ವತ್ತಬ್ಬೇ…ಪೇ….

ಅರಹತ್ತಮಗ್ಗೇನ ಸಬ್ಬೇ ಸಂಯೋಜನಾ ಪಹೀಯನ್ತೀತಿ? ಆಮನ್ತಾ. ಅರಹತ್ತಮಗ್ಗೇನ ಸಕ್ಕಾಯದಿಟ್ಠಿಂ ವಿಚಿಕಿಚ್ಛಂ ಸೀಲಬ್ಬತಪರಾಮಾಸಂ ಪಜಹತೀತಿ? ನ ಹೇವಂ ವತ್ತಬ್ಬೇ…ಪೇ….

ಅರಹತ್ತಮಗ್ಗೇನ ಸಕ್ಕಾಯದಿಟ್ಠಿಂ ವಿಚಿಕಿಚ್ಛಂ ಸೀಲಬ್ಬತಪರಾಮಾಸಂ ಪಜಹತೀತಿ? ಆಮನ್ತಾ. ನನು ತಿಣ್ಣಂ ಸಂಯೋಜನಾನಂ ಪಹಾನಂ ಸೋತಾಪತ್ತಿಫಲಂ ವುತ್ತಂ ಭಗವತಾತಿ? ಆಮನ್ತಾ. ಹಞ್ಚಿ ತಿಣ್ಣಂ ಸಂಯೋಜನಾನಂ ಪಹಾನಂ ಸೋತಾಪತ್ತಿಫಲಂ ವುತ್ತಂ ಭಗವತಾ, ನೋ ಚ ವತ ರೇ ವತ್ತಬ್ಬೇ – ‘‘ಅರಹತ್ತಮಗ್ಗೇನ ಸಬ್ಬೇ ಸಂಯೋಜನಾ ಪಹೀಯನ್ತೀ’’ತಿ.

೪೧೪. ಅರಹತ್ತಮಗ್ಗೇನ ಸಬ್ಬೇ ಸಂಯೋಜನಾ ಪಹೀಯನ್ತೀತಿ? ಆಮನ್ತಾ. ಅರಹತ್ತಮಗ್ಗೇನ ಓಳಾರಿಕಂ ಕಾಮರಾಗಂ ಓಳಾರಿಕಂ ಬ್ಯಾಪಾದಂ ಪಜಹತೀತಿ? ನ ಹೇವಂ ವತ್ತಬ್ಬೇ…ಪೇ….

೪೧೫. ಅರಹತ್ತಮಗ್ಗೇನ ಓಳಾರಿಕಂ ಕಾಮರಾಗಂ ಓಳಾರಿಕಂ ಬ್ಯಾಪಾದಂ ಪಜಹತೀತಿ? ಆಮನ್ತಾ. ನನು ಕಾಮರಾಗಬ್ಯಾಪಾದಾನಂ ತನುಭಾವಂ ಸಕದಾಗಾಮಿಫಲಂ ವುತ್ತಂ ಭಗವತಾತಿ? ಆಮನ್ತಾ. ಹಞ್ಚಿ ಕಾಮರಾಗಬ್ಯಾಪಾದಾನಂ ತನುಭಾವಂ ಸಕದಾಗಾಮಿಫಲಂ ವುತ್ತಂ ಭಗವತಾ, ನೋ ಚ ವತ ರೇ ವತ್ತಬ್ಬೇ – ‘‘ಅರಹತ್ತಮಗ್ಗೇನ ಸಬ್ಬೇ ಸಂಯೋಜನಾ ಪಹೀಯನ್ತೀ’’ತಿ.

ಅರಹತ್ತಮಗ್ಗೇನ ಸಬ್ಬೇ ಸಂಯೋಜನಾ ಪಹೀಯನ್ತೀತಿ? ಆಮನ್ತಾ. ಅರಹತ್ತಮಗ್ಗೇನ ಅಣುಸಹಗತಂ ಕಾಮರಾಗಂ ಅಣುಸಹಗತಂ ಬ್ಯಾಪಾದಂ ಪಜಹತೀತಿ? ನ ಹೇವಂ ವತ್ತಬ್ಬೇ…ಪೇ….

೪೧೬. ಅರಹತ್ತಮಗ್ಗೇನ ಅಣುಸಹಗತಂ ಕಾಮರಾಗಂ ಅಣುಸಹಗತಂ ಬ್ಯಾಪಾದಂ ಪಜಹತೀತಿ? ಆಮನ್ತಾ. ನನು ಕಾಮರಾಗಬ್ಯಾಪಾದಾನಂ ಅನವಸೇಸಪ್ಪಹಾನಂ ಅನಾಗಾಮಿಫಲಂ ವುತ್ತಂ ಭಗವತಾತಿ? ಆಮನ್ತಾ. ಹಞ್ಚಿ ಕಾಮರಾಗಬ್ಯಾಪಾದಾನಂ ಅನವಸೇಸಪ್ಪಹಾನಂ ಅನಾಗಾಮಿಫಲಂ ವುತ್ತಂ ಭಗವತಾ, ನೋ ಚ ವತ ರೇ ವತ್ತಬ್ಬೇ – ‘‘ಅರಹತ್ತಮಗ್ಗೇನ ಸಬ್ಬೇ ಸಂಯೋಜನಾ ಪಹೀಯನ್ತೀ’’ತಿ.

ಅರಹತ್ತಮಗ್ಗೇನ ಸಬ್ಬೇ ಸಂಯೋಜನಾ ಪಹೀಯನ್ತೀತಿ? ಆಮನ್ತಾ. ನನು ರೂಪರಾಗಅರೂಪರಾಗಮಾನಉದ್ಧಚ್ಚಅವಿಜ್ಜಾಯ ಅನವಸೇಸಪ್ಪಹಾನಂ ಅರಹತ್ತಂ ವುತ್ತಂ ಭಗವತಾತಿ? ಆಮನ್ತಾ. ಹಞ್ಚಿ ರೂಪರಾಗಅರೂಪರಾಗಮಾನಉದ್ಧಚ್ಚಅವಿಜ್ಜಾಯ ಅನವಸೇಸಪ್ಪಹಾನಂ ಅರಹತ್ತಂ ವುತ್ತಂ ಭಗವತಾ, ನೋ ಚ ವತ ರೇ ವತ್ತಬ್ಬೇ – ‘‘ಅರಹತ್ತಮಗ್ಗೇನ ಸಬ್ಬೇ ಸಂಯೋಜನಾ ಪಹೀಯನ್ತೀ’’ತಿ.

೪೧೭. ನ ವತ್ತಬ್ಬಂ – ‘‘ಸಬ್ಬಸಂಯೋಜನಾನಂ ಪಹಾನಂ ಅರಹತ್ತ’’ನ್ತಿ? ಆಮನ್ತಾ. ನನು ಅರಹತೋ ಸಬ್ಬೇ ಸಂಯೋಜನಾ ಪಹೀನಾತಿ? ಆಮನ್ತಾ. ಹಞ್ಚಿ ಅರಹತೋ ಸಬ್ಬೇ ಸಂಯೋಜನಾ ಪಹೀನಾ, ತೇನ ವತ ರೇ ವತ್ತಬ್ಬೇ – ‘‘ಸಬ್ಬಸಂಯೋಜನಾನಂ ಪಹಾನಂ ಅರಹತ್ತ’’ನ್ತಿ.

ಸಬ್ಬಸಂಯೋಜನಪ್ಪಹಾನಕಥಾ ನಿಟ್ಠಿತಾ.

ಚತುತ್ಥವಗ್ಗೋ.

ತಸ್ಸುದ್ದಾನಂ –

ಗಿಹಿಸ್ಸ ಅರಹಾ, ಸಹ ಉಪಪತ್ತಿಯಾ ಅರಹಾ, ಅರಹತೋ ಸಬ್ಬೇ ಧಮ್ಮಾ ಅನಾಸವಾ, ಅರಹಾ ಚತೂಹಿ ಫಲೇಹಿ ಸಮನ್ನಾಗತೋ, ಏವಮೇವಂ ಛಹಿ ಉಪೇಕ್ಖಾಹಿ, ಬೋಧಿಯಾ ಬುದ್ಧೋ, ಸಲಕ್ಖಣಸಮನ್ನಾಗತೋ, ಬೋಧಿಸತ್ತೋ ಓಕ್ಕನ್ತನಿಯಾಮೋ ಚರಿತಬ್ರಹ್ಮಚರಿಯೋ, ಪಟಿಪನ್ನಕೋ ಫಲೇನ ಸಮನ್ನಾಗತೋ, ಸಬ್ಬಸಂಯೋಜನಾನಂ ಪಹಾನಂ ಅರಹತ್ತನ್ತಿ.