೬. ಛಪ್ಪಚ್ಚಯವಿಭಾಗ-ಛಟ್ಠಪರಿಚ್ಛೇದ

೧೨೯. ಪತ್ಥಾರೇ ಸಬ್ಬಗೇ ಪಾದೇ, ಪುಬ್ಬಗಾ’ಧೋ ಲ್ಪ’ರೇ ಸಮಾ;

ಪುಬ್ಬೇ ಗರು ತೇ ಚ ಮಿಮೇ, ಕತ್ತಬ್ಬಾ ಯಾವ ಸಬ್ಬಲಾ.

೧೩೦. ನಟ್ಠಸ್ಸ ಯೋ ಭವೇಯ್ಯ’ಙ್ಕೋ, ತಸ್ಮಿಂ ಲೋ’ದ್ಧಿಕತೇ ಸಮೇ;

ವಿಸಮೇ ತ್ವೇ’ಕಸಹಿತೇ, ಭವೇಯ್ಯ’ದ್ಧಿಕತೇ ಗರು.

೧೩೧. ಏಕಾ’ದಿನುಕ್ಕಮೇನ’ಙ್ಕೇ, ಪುಬ್ಬಾಧೋ ದ್ವಿಗುಣೇ ಲಿಖೇ;

ಮಿಸ್ಸಕೇಹಿ ಲಹುಟ್ಠೇಹಿ, ಸೇ’ಕೇಹು’ದ್ದಿಟ್ಠಕಂ ಭವೇ.

೧೩೨. ವುತ್ತ’ಕ್ಖರ ಸಮಾ ಸಙ್ಖ್ಯಾ, ಲಿಕ್ಖ್ಯ ಸೇಕೋ’ಪರೂ’ಪರಿ;

ಏಕೇಕಹೀನ ಮೇಕಾದಿ, ನು’ಟ್ಠಾನೇ ಸಬ್ಬಗಾದಿಕಂ.

೧೩೩. ಗರುಕ್ರಿಯಾ’ಙ್ಕ ಸನ್ದೋಹೇ, ಭವೇ ಸಙ್ಖ್ಯಾ ವಿಮಿಸ್ಸಿತೇ;

ಉದ್ದಿಟ್ಠ’ಙ್ಕ ಸಮಾಹಾರೋ, ಸೇ’ಕೋ ವೇ’ಮಂ ಸಮಾ’ನಯೇ.

೧೩೪. ಸಙ್ಖ್ಯೇವ ದ್ವಿಗುಣೇ’ಕೂನಾ, ವಿತ್ಥಾರಾ’ಯಾಮಸಮ್ಭವಾ;

ವುತ್ತಸ್ಸ’ದ್ಧ’ನ್ತರಾನಞ್ಚ, ಗರುಲಾನಞ್ಚ ಅಙ್ಗುಲಂ.

ಇತಿ ವುತ್ತೋದಯೇ ಛನ್ದಸಿ ಛಪ್ಪಚ್ಚಯವಿಭಾಗೋ ನಾಮ

ಛಟ್ಠೋ ಪರಿಚ್ಛೇದೋ.

೧೩೫. ಸೇಲ’ನ್ತರಾ’ಯತನ ವಾಸಿಕ ಸೀಲ’ತ್ಥೇರ,

ಪಾದೋ ಗರು ಗ್ಗುಣಗರು ಜ್ಜಯತಂ ಮಮೇ’ಸೋ;

ಯಸ್ಸ ಪ್ಪಭಾವ’ಮವಲಮ್ಬ ಮಯೇ’ದಿಸೋಪಿ,

ಸಮ್ಪಾದಿತೋ’ಭಿಮತ ಸಿದ್ಧಿಕರೋ ಪರತ್ಥೋ.

೧೩೬. ಪರತ್ಥ ಸಮ್ಪಾದನತೋ, ಪುಞ್ಞೇನಾ’ಧಿಗತೇನ’ಹಂ;

ಪರತ್ಥ ಸಮ್ಪಾದನಕೋ, ಭವೇಯ್ಯಂ ಜಾತಿ ಜಾತಿಯಂ.

೧೩೭. ಅವಲೋಕಿತ ಮತ್ತೇನ, ಯಥಾ ಛಪ್ಪಚ್ಚಯಾ ಮಯಾ;

ಸಾಧಿತಾ ಸಾಧಯನ್ತೇ’ವ, ಮಿಚ್ಛಿತತ್ಥಮ್ಪಿ ಪಾಣಿನೋತಿ.

ಇತಿ ಸಙ್ಘರಕ್ಖಿತಮಹಾಸಾಮಿತ್ಥೇರೇನ ವಿರಚಿತಂ

ವುತ್ತೋದಯಪ್ಪಕರಣಂ ಪರಿನಿಟ್ಠಿತಂ.