ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ

ಅಭಿಧಾನಪ್ಪದೀಪಿಕಾ

ಬುದ್ಧಪ್ಪಣಾಮೋ

೧. ತಥಾಗತೋ ಯೋ ಕರುಣಾಕರೋ ಕರೋ,

ಪಯಾತ’ಮೋಸಜ್ಜ ಸುಖಪ್ಪದಂ ಪದಂ;

ಅಕಾ ಪರತ್ಥಂ ಕಲಿಸಮ್ಭವೇ ಭವೇ,

ನಮಾಮಿ ತಂ ಕೇವಲದುಕ್ಕರಂ ಕರಂ.

ಧಮ್ಮಪ್ಪಣಾಮೋ

೨. ಅಪೂಜಯುಂ ಯಂ ಮುನಿಕುಞ್ಜರಾ ಜರಾ,

ರುಜಾದಿಮುತ್ತಾ ಯಹಿಮುತ್ತರೇ ತರೇ;

ಠಿತಾ ತಿವಟ್ಟಮ್ಬುನಿಧಿಂ ನರಾನರಾ,

ತರಿಂಸು ತಂ ಧಮ್ಮಮಘಪ್ಪಹಂ ಪಹಂ.

ಸಙ್ಘಪ್ಪಣಾಮೋ

೩. ಗತಂ ಮುನಿನ್ದೋ’ರಸಸೂನುತಂ ನುತಂ,

ಸುಪುಞ್ಞಖೇತ್ತಂ ಭುವನೇ ಸುತಂ ಸುತಂ;

ಗಣಮ್ಪಿ ಪಾಣೀಕತಸಂವರಂ ವರಂ,

ಸದಾ ಗುಣೋಘೇನ ನಿರನ್ತರ’ನ್ತರಂ.

ಪಟಿಞ್ಞಾ

೪. ನಾಮಲಿಙ್ಗೇಸು ಕೋಸಲ್ಲ, ಮತ್ಥನಿಚ್ಛಯಕಾರಣಂ;

ಯತೋ ಮಹಬ್ಬಲಂ ಬುದ್ಧ, ವಚನೇ ಪಾಟವತ್ಥಿನಂ.

೫. ನಾಮಲಿಙ್ಗಾನ್ಯ’ತೋ ಬುದ್ಧ, ಭಾಸಿತಸ್ಸಾ’ರಹಾನ್ಯ’ಹಂ;

ದಸ್ಸಯನ್ತೋ ಪಕಾಸೇಸ್ಸ, ಮಭಿಧಾನಪ್ಪದೀಪಿಕಂ.

ಪರಿಭಾಸಾ

೬. ಭಿಯ್ಯೋ ರೂಪನ್ತರಾ ಸಾಹ, ಚರಿಯೇನ ಚ ಕತ್ಥಚಿ;

ಕ್ವಚಾ’ ಹಚ್ಚವಿಧಾನೇನ ಞೇಯ್ಯಂ ಥೀಪುನ್ನಪುಂಸಕಂ.

೭. ಅಭಿನ್ನಲಿಙ್ಗಾನಂಯೇವ, ದ್ವನ್ದೋ ಚ, ಲಿಙ್ಗವಾಚಕಾ;

ಗಾಥಾಪಾದನ್ತಮಜ್ಝಟ್ಠಾ, ಪುಬ್ಬಂ ಯನ್ತ್ಯಪರೇ ಪರಂ.

೮. ಪುಮಿತ್ಥಿಯಂ ಪದಂ ದ್ವೀಸು, ಸಬ್ಬಲಿಙ್ಗೇ ಚ ತೀಸ್ವಿತಿ;

ಅಭಿಧಾನನ್ತರಾರಮ್ಭೇ, ಞೇಯ್ಯಂ ತ್ವ’ನ್ತ ಮಥಾದಿ ಚ.

೯. ಭಿಯ್ಯೋ ಪಯೋಗ ಮಾಗಮ್ಮ, ಸೋಗತೇ ಆಗಮೇ ಕ್ವಚಿ;

ನಿಘಣ್ಡು ಯುತ್ತಿ ಞ್ಚಾನೀಯ, ನಾಮಲಿಙ್ಗಂ ಕಥೀಯತೀತಿ.

೧. ಸಗ್ಗಕಣ್ಡ

೧. ಬುದ್ಧೋ ದಸಬಲೋ ಸತ್ಥಾ, ಸಬ್ಬಞ್ಞೂ ದ್ವಿಪದುತ್ತಮೋ;

ಮುನಿನ್ದೋ ಭಗವಾ ನಾಥೋ, ಚಕ್ಖುಮ’ಙ್ಗೀರಸೋ ಮುನಿ.

೨. ಲೋಕನಾಥೋ’ ನಧಿವರೋ, ಮಹೇಸಿ ಚ ವಿನಾಯಕೋ;

ಸಮನ್ತಚಕ್ಖು ಸುಗತೋ, ಭೂರಿಪಞ್ಞೋ ಚ ಮಾರಜಿ.

೩. ನರಸೀಹೋ ನರವರೋ, ಧಮ್ಮರಾಜಾ ಮಹಾಮುನಿ;

ದೇವದೇವೋ ಲೋಕಗರು, ಧಮ್ಮಸ್ಸಾಮೀ ತಥಾಗತೋ.

೪. ಸಯಮ್ಭೂ ಸಮ್ಮಾಸಮ್ಬುದ್ಧೋ, ವರಪಞ್ಞೋ ಚ ನಾಯಕೋ;

ಜಿನೋ, ಸಕ್ಕೋ ತು ಸಿದ್ಧತ್ಥೋ, ಸುದ್ಧೋದನಿ ಚ ಗೋತಮೋ.

೫. ಸಕ್ಯಸೀಹೋ ತಥಾ ಸಕ್ಯ, ಮುನಿ ಚಾದಿಚ್ಚಬನ್ಧು ಚ;

೬. ಮೋಕ್ಖೋ ನಿರೋಧೋ ನಿಬ್ಬಾನಂ, ದೀಪೋ ತಣ್ಹಕ್ಖಯೋ ಪರಂ;

ತಾಣಂ ಲೇಣ ಮರೂಪಞ್ಚ, ಸನ್ತಂ ಸಚ್ಚ ಮನಾಲಯಂ.

೭. ಅಸಙ್ಖತಂ ಸಿವ ಮಮತಂ ಸುದುದ್ದಸಂ,

ಪರಾಯಣಂ ಸರಣ ಮನೀತಿಕಂ ತಥಾ;

ಅನಾಸವಂ ಧುವ ಮನಿದಸ್ಸನಾ’ ಕತಾ,

ಪಲೋಕಿತಂ ನಿಪುಣ ಮನನ್ತ ಮಕ್ಖರಂ.

೮. ದುಕ್ಖಕ್ಖಯೋ ಬ್ಯಾಬಜ್ಝಞ್ಚ [ಬ್ಯಾಪಜ್ಜಂ (ಟೀಕಾ)], ವಿವಟ್ಟಂ ಖೇಮ ಕೇವಲಂ;

ಅಪವಗ್ಗೋ ವಿರಾಗೋ ಚ, ಪಣೀತ ಮಚ್ಚುತಂ ಪದಂ.

೯. ಯೋಗಕ್ಖೇಮೋ ಪಾರ ಮಪಿ, ಮುತ್ತಿ ಸನ್ತಿ ವಿಸುದ್ಧಿಯೋ;

ವಿಮುತ್ಯ’ ಸಙ್ಖತಧಾತು, ಸುದ್ಧಿ ನಿಬ್ಬುತಿಯೋ ಸಿಯುಂ.

೧೦. ಖೀಣಾಸವೋ ತ್ವ’ಸೇಕ್ಖೋ ಚ, ವೀತರಾಗೋ ತಥಾ’ ರಹಾ;

ದೇವಲೋಕೋ ದಿವೋ ಸಗ್ಗೋ [ನಾಕೋ (ಸೀ.)],

ತಿದಿವೋ ತಿದಸಾಲಯೋ.

೧೧. ತಿದಸಾ ತ್ವ’ಮರಾ ದೇವಾ, ವಿಬುಧಾ ಚ ಸುಧಾಸಿನೋ;

ಸುರಾ ಮರೂ ದಿವೋಕಾ ಚಾ, ಮತಪಾ ಸಗ್ಗವಾಸಿನೋ.

೧೨. ನಿಜ್ಜರಾ’ ನಿಮಿಸಾ ದಿಬ್ಬಾ, ಅಪುಮೇ ದೇವತಾನಿ ಚ [ದೇವತಾ ಏವ ದೇವತಾನಿ, ಸಕತ್ಥೇ ನಿಪಚ್ಚಯೋ (ಟೀಕಾ)];

೧೩. ಸಿದ್ಧೋ ಭೂತೋ ಚ ಗನ್ಧಬ್ಬೋ, ಗುಯ್ಹಕೋ ಯಕ್ಖ ರಕ್ಖಸಾ;

ಕುಮ್ಭಣ್ಡೋ ಚ ಪಿಸಾಚಾ’ದೀ, ನಿದ್ದಿಟ್ಠಾ ದೇವಯೋನಿಯೋ.

೧೪. ಪುಬ್ಬದೇವಾ ಸುರರಿಪೂ, ಅಸುರಾ ದಾನವಾ ಪುಮೇ;

ತಬ್ಬಿಸೇಸಾ ಪಹಾರಾದೋ, ಸಮ್ಬರೋ ಬಲಿಆದಯೋ.

೧೫. ಪಿತಾಮಹೋ ಪಿತಾ ಬ್ರಹ್ಮಾ, ಲೋಕೇಸೋ ಕಮಲಾಸನೋ;

ತಥಾ ಹಿರಞ್ಞಗಬ್ಭೋ ಚ, ಸುರಜೇಟ್ಠೋ ಪಜಾಪತಿ.

೧೬. ವಾಸುದೇವೋ ಹರಿ [ಹರೀ (ಟೀಕಾ)] ಕಣ್ಹೋ, ಕೇಸವೋ ಚಕ್ಕಪಾಣ್ಯ’ಥ;

ಮಹಿಸ್ಸರೋ ಸಿವೋ ಸೂಲೀ, ಇಸ್ಸರೋ ಪಸುಪತ್ಯ’ಪಿ.

೧೭. ಹರೋ ವುತ್ತೋ ಕುಮಾರೋ ತು, ಖನ್ಧೋ ಸತ್ತಿಧರೋ ಭವೇ;

೧೮. ಸಕ್ಕೋ ಪುರಿನ್ದದೋ ದೇವ, ರಾಜಾ ವಜಿರಪಾಣಿ ಚ;

ಸುಜಮ್ಪತಿ ಸಹಸ್ಸಕ್ಖೋ, ಮಹಿನ್ದೋ ವಜಿರಾವುಧೋ.

೧೯. ವಾಸವೋ ಚ ದಸಸತ, ನಯನೋ ತಿದಿವಾಧಿಭೂ;

ಸುರನಾಥೋ ಚ ವಜಿರ, ಹತ್ಥೋ ಚ ಭೂತಪತ್ಯ’ಪಿ.

೨೦. ಮಘವಾ ಕೋಸಿಯೋ ಇನ್ದೋ, ವತ್ರಭೂ ಪಾಕಸಾಸನೋ;

ವಿಡೋಜೋ ಥ ಸುಜಾ ತಸ್ಸ [ಸುಜಾತಾ’ಸ್ಸ (ಟೀಕಾ)], ಭರಿಯಾ ಥ ಪುರಂ ಭವೇ.

೨೧. ಮಸಕ್ಕಸಾರಾ [ಮಸಕ್ಕಸಾರೋ (ಸೀ.)] ವಸ್ಸೋಕ, ಸಾರಾ ಚೇವಾ’ ಮರಾವತೀ;

ವೇಜಯನ್ತೋ ತು ಪಾಸಾದೋ,

ಸುಧಮ್ಮಾ ತು ಸಭಾ ಮತಾ.

೨೨. ವೇಜಯನ್ತೋ ರಥೋ ತಸ್ಸ,

ವುತ್ತೋ ಮಾತಲಿ ಸಾರಥಿ;

ಏರಾವಣೋ ಗಜೋ ಪಣ್ಡು, ಕಮ್ಬಲೋ ತು ಸಿಲಾಸನಂ.

೨೩. ಸುವೀರೋಚ್ಚಾದಯೋ ಪುತ್ತಾ, ನನ್ದಾ ಪೋಕ್ಖರಣೀ ಭವೇ;

ನನ್ದನಂ ಮಿಸ್ಸಕಂ ಚಿತ್ತ, ಲತಾ ಫಾರುಸಕಂ ವನಾ.

೨೪. ಅಸನಿ ದ್ವೀಸು ಕುಲಿಸಂ, ವಜಿರಂ ಪುನ್ನಪುಂಸಕೇ;

ಅಚ್ಛರಾಯೋತ್ಥಿಯಂ ವುತ್ತಾ, ರಮ್ಭಾ ಅಲಮ್ಬುಸಾದಯೋ;

ದೇವಿತ್ಥಿಯೋ ಥ ಗನ್ಧಬ್ಬಾ, ಪಞ್ಚಸಿಖೋತಿ ಆದಯೋ.

೨೫. ವಿಮಾನೋ ನಿತ್ಥಿಯಂ ಬ್ಯಮ್ಹಂ, ಪೀಯೂಸಂ ತ್ವಮತಂ ಸುಧಾ;

ಸಿನೇರು ಮೇರು ತಿದಿವಾ, ಧಾರೋ ನೇರು ಸುಮೇರು ಚ.

೨೬. ಯುಗನ್ಧರೋ ಈಸಧರೋ, ಕರವೀಕೋ ಸುದಸ್ಸನೋ;

ನೇಮಿನ್ಧರೋ ವಿನತಕೋ, ಅಸ್ಸಕಣ್ಣೋ ಕುಲಾಚಲಾ.

೨೭. ಮನ್ದಾಕಿನೀ ತಥಾ’ಕಾಸ, ಗಙ್ಗಾ ಸುರನದೀ ಪ್ಯಥ;

೨೮. ಕೋವಿಳಾರೋ ತಥಾ ಪಾರಿ, ಚ್ಛತ್ತಕೋ ಪಾರಿಜಾತಕೋ;

ಕಪ್ಪರುಕ್ಖೋ ತು ಸನ್ತಾನಾ, ದಯೋ ದೇವದ್ದುಮಾ ಸಿಯುಂ.

೨೯. ಪಾಚೀ ಪತೀಝು’ ದೀಚಿ’ತ್ಥೀ, ಪುಬ್ಬ ಪಚ್ಛಿಮ ಉತ್ತರಾ;

ದಿಸಾಥ ದಕ್ಖಿಣಾ’ ಪಾಚೀ, ವಿದಿಸಾ’ನುದಿಸಾ ಭವೇ.

೩೦. ಏರಾವತೋ [ಏರಾವಣೋ (ಸೀ.), ಅಮರಕೋಸೇ ಪನ ಏರಾವತೋ ಏವ ಅತ್ಥಿ] ಪುಣ್ಡರೀಕೋ, ವಾಮನೋ ಕುಮುದೋ’ ಞ್ಜನೋ;

ಪುಪ್ಫದನ್ತೋ ಸಬ್ಬಭುಮ್ಮೋ, ಸುಪ್ಪತೀಕೋ ದಿಸಾಗಜಾ.

೩೧. ಧತರಟ್ಠೋ ಚ ಗನ್ಧಬ್ಬಾ, ಧಿಪೋ, ಕುಮ್ಭಣ್ಡಸಾಮಿ ತು;

ವಿರುಳ್ಹಕೋ, ವಿರೂಪಕ್ಖೋ, ತು ನಾಗಾಧಿಪತೀರಿತೋ.

೩೨. ಯಕ್ಖಾಧಿಪೋ ವೇಸ್ಸವಣೋ, ಕುವೇರೋ ನರವಾಹನೋ;

ಅಳಕಾ [ಅಲಕಾ (ಅಮರಕೋಸ)] ಳಕಮನ್ದಾಸ್ಸ, ಪುರೀ, ಪಹರಣಂ ಗದಾ;

ಚತುದ್ದಿಸಾನ ಮಧಿಪಾ, ಪುಬ್ಬಾದೀನಂ ಕಮಾ ಇಮೇ.

೩೩. ಜಾತವೇದೋ ಸಿಖೀ ಜೋತಿ, ಪಾವಕೋ ದಹನೋ’ ನಲೋ;

ಹುತಾವಹೋ’ ಚ್ಚಿಮಾ ಧೂಮ, ಕೇತ್ವ’ಗ್ಗಿ ಗಿನಿ ಭಾನುಮಾ.

೩೪. ತೇಜೋ ಧೂಮಸಿಖೋ ವಾಯು, ಸಖೋ ಚ ಕಣ್ಹವತ್ತನೀ;

ವೇಸ್ಸಾನರೋ ಹುತಾಸೋ ಥ, ಸಿಖಾಜಾಲ’ಚ್ಚಿ ಚಾಪುಮೇ.

೩೫. ವಿಪ್ಫುಲಿಙ್ಗಂ ಫುಲಿಙ್ಗಞ್ಚ, ಭಸ್ಮಾ [‘ಭಸ್ಮಾ’ ತಿಪದಂ ರಾಜಾದಿಗಣೇ ಪರಿಯಾಪನ್ನಂ (ರೂಪಸಿದ್ಧಿ-ಉಣಾದಿ), ಭಸ್ಮಂ (ಸೀ.)] ತು ಸೇಟ್ಠಿ ಛಾರಿಕಾ;

೩೬. ಕುಕ್ಕುಳೋ ತು’ಣ್ಹಭಸ್ಮಸ್ಮಿ, ಮಙ್ಗಾರೋ’ಲಾತ ಮುಮ್ಮುಕಂ [ತಿಕಂ ದಿತ್ತಕಟ್ಠಾದಿನ್ಧನೇ (ಟೀಕಾ)];

ಸಮಿಧಾ ಇಧುಮಂ ಚೇ’ಧೋ, ಉಪಾದಾನಂ ತಥಿನ್ಧನಂ.

೩೭. ಅಥೋ’ಭಾಸೋ ಪಕಾಸೋ ಚಾ,

'ಲೋಕೋ’ಜ್ಜೋತಾ’ತಪಾ ಸಮಾ;

ಮಾಲುತೋ ಪವನೋ ವಾಯು, ವಾತೋ’ನಿಲ ಸಮೀರಣಾ;

ಗನ್ಧವಾಹೋ ತಥಾ ವಾಯೋ, ಸಮೀರೋ ಚ ಸದಾಗತಿ.

೩೮. ವಾಯುಭೇದಾ ಇಮೇ ಛು’ದ್ಧ, ಙ್ಗಮೋ ಚಾಧೋಗಮೋ ತಥಾ;

ಕುಚ್ಛಿಟ್ಠೋ ಚ ಕೋಟ್ಠಾಸಯೋ, ಅಸ್ಸಾಸಙ್ಗಾನುಸಾರಿನೋ.

೩೯. ಅಥೋ ಅಪಾನಂ ಪಸ್ಸಾಸೋ,

ಅಸ್ಸಾಸೋ ಆನ ಮುಚ್ಚತೇ.

೪೦. ವೇಗೋ ಜವೋ ರಯೋ ಖಿಪ್ಪಂ, ತು ಸೀಘಂ ತುರಿತಂ ಲಹು;

ಆಸು ತುಣ್ಣ ಮರಂ ಚಾವಿ, ಲಮ್ಬಿತಂ ತುವಟಂಪಿ ಚ.

೪೧. ಸತತಂ ನಿಚ್ಚ ಮವಿರತಾ, ನಾರತ ಸನ್ತತ ಮನವರತಞ್ಚ ಧುವಂ;

ಭುಸ ಮತಿಸಯೋ ಚ ದಳ್ಹಂ, ತಿಬ್ಬೇ’ಕನ್ತಾ’ತಿಮತ್ತ, ಬಾಳ್ಹಾನಿ;

ಖಿಪ್ಪಾದೀ ಪಣ್ಡಕೇ ದಬ್ಬೇ, ದಬ್ಬಗಾ ತೇಸು ಯೇ ತಿಸು.

೪೨. ಅವಿಗ್ಗಹೋ ತು ಕಾಮೋ ಚ, ಮನೋಭೂ ಮದನೋ ಭವೇ;

ಅನ್ತಕೋ ವಸವತ್ತೀ ಚ, ಪಾಪಿಮಾ ಚ ಪಜಾಪತಿ.

೪೩. ಪಮತ್ತಬನ್ಧು ಕಣ್ಹೋ ಚ, ಮಾರೋ ನಮುಚಿ, ತಸ್ಸ ತು;

ತಣ್ಹಾ’ರತೀ ರಗಾ ಧೀತೂ, ಹತ್ಥೀ ತು ಗಿರಿಮೇಖಲೋ.

೪೪. ಯಮರಾಜಾ ಚ ವೇಸಾಯೀ, ಯಮೋ’ಸ್ಸ ನಯನಾವುಧಂ;

ವೇಪಚಿತ್ತಿ ಪುಲೋಮೋ ಚ, ಕಿಮ್ಪುರಿಸೋ ತು ಕಿನ್ನರೋ.

೪೫. ಅನ್ತಲಿಕ್ಖಂ ಖ’ಮಾದಿಚ್ಚ, ಪಥೋ’ಬ್ಭಂ ಗಗನ’ಮ್ಬರಂ;

ವೇಹಾಸೋ ಚಾನಿಲಪಥೋ, ಆಕಾಸೋ ನಿತ್ಥಿಯಂ ನಭಂ.

೪೬. ದೇವೋ ವೇಹಾಯಸೋ ತಾರಾ,

ಪಥೋ ಸುರಪಥೋ ಅಘಂ.

೪೭. ಮೇಘೋ ವಲಾಹಕೋ ದೇವೋ, ಪಜ್ಜುನ್ನೋ’ಮ್ಬುಧರೋ ಘನೋ;

ಧಾರಾಧರೋ ಚ ಜೀಮೂತೋ, ವಾರಿವಾಹೋ ತಥಾ’ಮ್ಬುದೋ.

೪೮. ಅಬ್ಭಂ ತೀಸ್ವಥ ವಸ್ಸಞ್ಚ, ವಸ್ಸನಂ ವುಟ್ಠಿ ನಾರಿಯಂ;

ಸತೇರತಾ’ಕ್ಖಣಾ ವಿಜ್ಜು, ವಿಜ್ಜುತಾ ಚಾಚಿರಪ್ಪಭಾ.

೪೯. ಮೇಘನಾದೇ ತು ಧನಿತಂ, ಗಜ್ಜಿತಂ ರಸಿತಾದಿ ಚ;

ಇನ್ದಾವುಧಂ ಇನ್ದಧನು, ವಾತಕ್ಖಿತ್ತಮ್ಬು ಸೀಕರೋ.

೫೦. ಆಸಾರೋ ಧಾರಾ ಸಮ್ಪಾತೋ,

ಕರಕಾ ತು ಘನೋಪಲಂ;

ದುದ್ದಿನಂ ಮೇಘಚ್ಛನ್ನಾಹೇ, ಪಿಧಾನಂ ತ್ವಪಧಾರಣಂ.

೫೧. ತಿರೋಧಾನ’ನ್ತರಧಾನಾ, ಪಿಧಾನ ಛಾದನಾನಿ ಚ;

ಇನ್ದು ಚನ್ದೋ ಚ ನಕ್ಖತ್ತ, ರಾಜಾ ಸೋಮೋ ನಿಸಾಕರೋ.

೫೨. ಓಸಧೀಸೋ ಹಿಮರಂಸಿ, ಸಸಙ್ಕೋ ಚನ್ದಿಮಾ ಸಸೀ;

ಸೀತರಂಸಿ ನಿಸಾನಾಥೋ, ಉಳುರಾಜಾ ಚ ಮಾ ಪುಮೇ.

೫೩. ಕಲಾ ಸೋಳಸಮೋ ಭಾಗೋ, ಬಿಮ್ಬಂ ತು ಮಣ್ಡಲಂ ಭವೇ;

ಅಡ್ಢೋ ತ್ವದ್ಧೋ ಉಪಡ್ಢೋ ಚ, ವಾ ಖಣ್ಡಂ ಸಕಲಂ ಪುಮೇ.

೫೪. ಅದ್ಧಂ ವುತ್ತಂ ಸಮೇ ಭಾಗೇ, ಪಸಾದೋ ತು ಪಸನ್ನತಾ;

ಕೋಮುದೀ ಚನ್ದಿಕಾ ಜುಣ್ಹಾ, ಕನ್ತಿ ಸೋಭಾ ಜುತಿ ಚ್ಛವಿ.

೫೫. ಕಲಙ್ಕೋ ಲಞ್ಛನಂ ಲಕ್ಖಂ, ಅಙ್ಕೋ’ಭಿಞ್ಞಾಣ ಲಕ್ಖಣಂ;

ಚಿಹನಂ ಚಾಪಿ ಸೋಭಾ ತು, ಪರಮಾ ಸುಸಮಾ ಥ ಚ.

೫೬. ಸೀತಂ ಗುಣೇ, ಗುಣಿಲಿಙ್ಗಾ, ಸೀತ ಸಿಸಿರ ಸೀತಲಾ;

ಹಿಮಂ ತುಹಿನ ಮುಸ್ಸಾವೋ, ನೀಹಾರೋ ಮಹಿಕಾ ಪ್ಯಥ.