೪. ಸೀಲಾನುಸ್ಸತಿಕಥಾವಣ್ಣನಾ

೧೫೮. ಅಹೋ ವತ ಸೀಲಾನಿ ಅಖಣ್ಡಾನಿ, ಅಹೋ ವತ ಅಚ್ಛಿದ್ದಾನೀತಿ ಏವಂ ಸಬ್ಬತ್ಥ ಯೋಜೇತಬ್ಬಂ. ಅಹೋ ವತಾತಿ ಚ ಸಮ್ಭಾವನೇ ನಿಪಾತೋ. ತೇನಾಹ ‘‘ಅಖಣ್ಡತಾದಿಗುಣವಸೇನಾ’’ತಿ. ಅಖಣ್ಡಭಾವಾದಿಸಮ್ಪತ್ತಿವಸೇನಾತಿ ಅತ್ಥೋ. ಪರಸ್ಸ ಸೀಲಾನಿ ಅನುಸ್ಸರಿಯಮಾನಾನಿ ಪಿಯಮನಾಪಭಾವಾವಹನೇನ ಕೇವಲಂ ಮೇತ್ತಾಯ ಪದಟ್ಠಾನಂ ಹೋನ್ತಿ, ನ ವಿಸುಂ ಕಮ್ಮಟ್ಠಾನನ್ತಿ ಆಹ ‘‘ಅತ್ತನೋ ಸೀಲಾನಿ ಅನುಸ್ಸರಿತಬ್ಬಾನೀ’’ತಿ. ಚಾಗಾದೀಸುಪಿ ಏಸೇವ ನಯೋ.

ಯೇಸನ್ತಿ ಸೀಲಾದೀನಂ. ಪಟಿಪಾಟಿಯಾ ಸಮಾದಾನೇ ಸಮಾದಾನಕ್ಕಮೇನ, ಏಕಜ್ಝಂ ಸಮಾದಾನೇ ಉದ್ದೇಸಕ್ಕಮೇನ ಸೀಲಾನಂ ಆದಿಅನ್ತಂ ವೇದಿತಬ್ಬಂ. ಪರಿಯನ್ತೇ ಛಿನ್ನಸಾಟಕೋ ವಿಯಾತಿ ವತ್ಥನ್ತೇ, ದಸನ್ತೇ ವಾ ಛಿನ್ನವತ್ಥಂ ವಿಯ, ವಿಸದಿಸೂದಾಹರಣಂ ಚೇತಂ. ಏವಂ ಸೇಸಾನಿಪಿ ಉದಾಹರಣಾನಿ. ವಿನಿವೇಧವಸೇನ ಛಿನ್ನಸಾಟಕೋ ವಿನಿವಿದ್ಧಸಾಟಕೋ. ವಿಸಭಾಗವಣ್ಣೇನ ಗಾವೀ ವಿಯಾತಿ ಸಮ್ಬನ್ಧೋ. ಸಬಲರಹಿತಾನಿ ವಾ ಅಸಬಲಾನಿ. ತಥಾ ಅಕಮ್ಮಾಸಾನಿ. ಸತ್ತವಿಧಮೇಥುನಸಂಯೋಗೋ ಹೇಟ್ಠಾ ಸೀಲಕಥಾಯಂ ವುತ್ತೋ ಏವ. ಕೋಧೂಪನಾಹಾದೀಹೀತಿ ಆದಿ-ಸದ್ದೇನ ಮಕ್ಖಪಳಾಸಇಸ್ಸಾಮಚ್ಛರಿಯಮಾಯಾಸಾಠೇಯ್ಯಮಾನಾತಿಮಾನಾದಯೋ ಗಹಿತಾ. ತಾನಿಯೇವ ಅಖಣ್ಡಾದಿಗುಣಾನಿ ಸೀಲಾನಿ. ಸೀಲಸ್ಸ ತಣ್ಹಾದಾಸಬ್ಯತೋ ಮೋಚನಂ ವಿವಟ್ಟೂಪನಿಸ್ಸಯಭಾವಾಪಾದನಂ. ತತೋ ಏವ ತಂಸಮಙ್ಗೀಪುಗ್ಗಲೋ ಸೇರೀ ಸಯಂವಸೀ ಭುಜಿಸ್ಸೋ ನಾಮ ಹೋತಿ. ತೇನಾಹ ‘‘ಭುಜಿಸ್ಸಭಾವಕರಣೇನ ಭುಜಿಸ್ಸಾನೀ’’ತಿ. ‘‘ಇಮಿನಾಹಂ ಸೀಲೇನ ದೇವೋ ವಾ ಭವೇಯ್ಯಂ ದೇವಞ್ಞತರೋ ವಾ, ತತ್ಥ ನಿಚ್ಚೋ ಧುವೋ ಸಸ್ಸತೋ’’ತಿ, ‘‘ಸೀಲೇನ ಸುದ್ಧೀ’’ತಿ ಚ ಏವಮಾದಿನಾ ತಣ್ಹಾದಿಟ್ಠೀಹಿ ಅಪರಾಮಟ್ಠತ್ತಾ ಅಯಂ ತೇ ಸೀಲೇಸು ದೋಸೋತಿ ಚತೂಸು ವಿಪತ್ತೀಸು ಯಾಯ ಕಾಯಚಿ ವಿಪತ್ತಿಯಾ ದಸ್ಸನೇನ ಪರಾಮಟ್ಠುಂ ಅನುದ್ಧಂಸೇತುಂ. ಸಮಾಧಿಸಂವತ್ತನಪ್ಪಯೋಜನಾನಿ ಸಮಾಧಿಸಂವತ್ತನಿಕಾನಿ.

೧೫೯. ಸಿಕ್ಖಾಯ ಸಗಾರವೋತಿ ಸೀಲಧನಂ ನಿಸ್ಸಾಯ ಪಟಿಲದ್ಧಸಮಾದಾನತ್ತಾ ಸಾತಿಸಯಂ ಸಿಕ್ಖಾಯ ಸಗಾರವೋ ಸಪ್ಪತಿಸ್ಸೋ ಹೋತಿ. ಸಭಾಗವುತ್ತೀತಿ ಸಮ್ಪನ್ನಸೀಲೇಹಿ ಸಭಾಗವುತ್ತಿಕೋ, ತಾಯ ಏವ ವಾ ಸಿಕ್ಖಾಯ ಸಭಾಗವುತ್ತಿ. ಯೋ ಹಿ ಸಿಕ್ಖಾಗಾರವರಹಿತೋ, ಸೋ ತಾಯ ವಿಸಭಾಗವುತ್ತಿ ನಾಮ ಹೋತಿ ವಿಲೋಮನತೋ. ಯಥಾ ಪರೇಹಿ ಸದ್ಧಿಂ ಅತ್ತನೋ ಛಿದ್ದಂ ನ ಹೋತಿ, ಏವಂ ಧಮ್ಮಾಮಿಸೇಹಿ ಪಟಿಸನ್ಥರಣಂ ಪಟಿಸನ್ಥಾರೋ. ಸಿಕ್ಖಾಯ ಸಗಾರವತ್ತಾ ಏವ ತತ್ಥ ಅಪ್ಪಮತ್ತೋ ಹೋತಿ. ಅತ್ತಾನುವಾದಭಯಂ ಪರಾನುವಾದಭಯಂ ದಣ್ಡಭಯಂ ದುಗ್ಗತಿಭಯನ್ತಿ ಏವಮಾದೀನಿ ಭಯಾನಿ ಇಮಸ್ಸ ದೂರಸಮುಸ್ಸಾರಿತಾನೀತಿ ಆಹ ‘‘ಅತ್ತಾನುವಾದಾದಿಭಯವಿರಹಿತೋ’’ತಿ. ಸೇಸಂ ಸುವಿಞ್ಞೇಯ್ಯಮೇವ.