೨೭. ಸದ್ಧೋಪಾಸಕಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಅತೀತೇ ಕಿರ ಕಸ್ಸಪದಸಬಲಸ್ಸ ಕಾಲೇ ಏಕೋ ಪುರಿಸೋ ಸದ್ಧೋ ರತನತ್ತಯೇಸು ಪಸನ್ನೋ ಉಚ್ಛುಯನ್ತಕಮ್ಮೇನ ಜೀವಿಕಂ ಕಪ್ಪೇನ್ತೋ ಪಟಿವಸತಿ. ಅಥ ಸೋ ಏಕಂ ಗಿಲಾನಭಿಕ್ಖುಂ ದಿಸ್ವಾ ತಸ್ಸ ಉಳುಙ್ಕಮತ್ತಂ ಸಪ್ಪಿಂ ಅದಾಸಿ, ತಥೇವೇಕಸ್ಸ ಭಿಕ್ಖುಸ್ಸ ಏಕಂ ಗುಳಪಿಣ್ಡಂ ಅದಾಸಿ, ಅಥಾಪರಸ್ಮಿಂದಿವಸೇ ಏಕಂ ಛಾತಜ್ಝತ್ತಂ ಸುನಖಂ ದಿಸ್ವಾ ತಸ್ಸ ಭತ್ತಪಿಣ್ಡೇನ ಸಙ್ಗಹ ಮಕಾಸಿ, ಅಥೇಕಸ್ಸ ಇಣಟ್ಠಕಸ್ಸ ಏಕಂ ಕಹಾಪಣಂ ಅದಾಸಿ, ಅಥೇಕದಿವಸಂ ಧಮ್ಮಂ ಸುಣಮಾನೋ ಧಮ್ಮದೇಸಕಸ್ಸ ಭಿಕ್ಖುಸ್ಸ ಸಾಟಕಂ ಪೂಜೇಸಿ, ಸೋ ಏತ್ತಕಂ ಪುಞ್ಞಕಮ್ಮಂ ಕತ್ವಾ ಭವೇಸು ಚರಮಾನೋಹಂ ಸಮುದ್ದಪಬ್ಬತಾದೀಸುಪಿ ಯಂ ಯಂ ಇಚ್ಛಾಮಿ. ತಂ ತಂ ಸಮಿಜ್ಝತೂತಿ ಪತ್ಥನಂ ಅಕಾಸಿ, ಸೋ ಅಪರಭಾಗೇ ಕಾಲಂ ಕತ್ವಾ ತೇಹೇವ ಕುಸಲಮೂಲೇಹಿ ಸುತ್ತಪ್ಪಬುದ್ಧೋ ವಿಯ ದೇವಲೋಕೇ ನಿಬ್ಬತ್ತಿತ್ವಾ ತತ್ಥ ಮಹನ್ತಂ ದಿಬ್ಬಸಮ್ಪತ್ತಿಂ ಅನುಭವಿತ್ವಾ ತತೋ ಚುತೋ ಅಮ್ಹಾಕಂ ಭಗವತೋ ಕಾಲೇ ಸಾವತ್ಥಿಯಂ ಮಹದ್ಧನೇ ಮಹಾಸಾಲಕುಲೇ ನಿಬ್ಬತ್ತಿತ್ವಾ ತತೋ ಸೋ ವಿಞ್ಞುತಂ ಪತ್ತೋ ಕಾಲೇನ ಕಾಲಂ ಧಮ್ಮಂ ಸುಣನ್ತೋ ಘರಾವಾಸೇ ಆದೀನವಂ ಪಬ್ಬಜ್ಜಾಯ ಚ ಆನಿಸಂಸಂ ಸುತ್ವಾ ಪಬ್ಬಜಿತೋ ನ ಚಿರೇನೇವ ಅರಹತ್ತಂ ಪಾಪುಣಿ. ಸೋ ಅಪರಭಾಗೇ ಸತ್ಥಾರಂ ವನ್ದಿತ್ವಾ ಪಞ್ಚಸತಭಿಕ್ಖುಪರಿವಾರೋ ಉಗ್ಗನಗರಂ ಅಗಮಾಸಿ, ತತ್ಥ ಸೇಟ್ಠಿನೋ ಭರಿಯಾ ಸದ್ಧಾ ಅಹೋಸಿ ಪಸನ್ನಾ. ಸಾ ಥೇರಂ ಪಞ್ಚಹಿ ಭಿಕ್ಖುಸತೇಹಿ ಸದ್ಧಿಂ ಭಿಕ್ಖಾಯ ಚರನ್ತಂ ದಿಸ್ವಾ ತುರಿತತುರಿತಾ ಗನ್ತ್ವಾ ಥೇರಸ್ಸ ಪತ್ತಂ ಗಹೇತ್ವಾ ಸದ್ಧಿಂ ಪಞ್ಚಸತೇಹಿ ಭಿಕ್ಖೂಹಿ ಭೋಜೇತ್ವಾ ಥೇರಂ ತತ್ಥ ನಿಬದ್ಧವಾಸತ್ಥಂ ಯಾಚಿತ್ವಾ ಪಞ್ಚಸತಕೂಟಾಗಾರಾನಿ ಕಾರಾಪೇತ್ವಾ ಅಲಙ್ಕರಿತ್ವಾ ಪಞ್ಚಸತಭಿಕ್ಖೂ ತತ್ಥ ವಾಸೇನ್ತೀ ನಿಬದ್ಧಂ ಚತುಪಚ್ಚಯೇಹಿ ಉಪಟ್ಠಾನಮಕಾಸಿ. ತತೋ ಥೇರೋ ತಂ ಪಞ್ಚಸು ಸೀಲೇಸು ಪತಿಟ್ಠಾಪೇತ್ವಾ ತತ್ಥ ಯಥಾಭಿರನ್ತಂ ವಿಹರಿತ್ವಾ ಅಞ್ಞತ್ತ ಗನ್ತುಕಾಮೋ ಅನುಪುಬ್ಬೇನ ಪಟ್ಟನಗಾಮಂ ಅಗಮಾಸಿ, ತತ್ಥ ವಸಿತ್ವಾ ತತೋ ನಾವಂ ಅಭಿರುಯ್ಹ ಪಞ್ಚಸತಭಿಕ್ಖೂಹಿ ಪರಿವುತೋ ಸಮುದ್ದಪಿಟ್ಠೇನ ಗಚ್ಛತಿ, ಸಮುದ್ದಂ ತರನ್ತಸ್ಸ ತಸ್ಸ ಸಾಗರಮಜ್ಝೇ ಉದರವಾತೋ ಸಮುಟ್ಠಹಿತ್ವಾ ಪೀಳೇತಿ, ತಂ ದಿಸ್ವಾ ಭಿಕ್ಖೂ ಭನ್ತೇ ಇದಂ ಪುಬ್ಬೇ ಕೇನ ವೂಪಸಮೇಸ್ಸತೀತಿ ಪುಚ್ಛಿಂಸು, ಥೇರೋ ಪುಬ್ಬೇ ಮೇ ಆವುಸೋ ಉಲುಙ್ಕಮತ್ತೇ ಸಪ್ಪಿಪೀತೇ ರೋಗೋ ವೂಪಸಮ್ಮತೀತಿ ಆಹ, ಭಿಕ್ಖೂ ಭನ್ತೇ ಸಮುದ್ದಪಿಟ್ಠೇ ಕಥಂ ಸಪ್ಪಿಂ ಲಭಿಸ್ಸಾಮ, ಅಧಿವಾಸೇಥಾತಿ ಆಹಂಸು, ತಂ ಸುತ್ವಾ ಥೇರೇನ [ಥೇರೋನನೋಆಯಸ್ಮನ್ತಾ ಇತಿಸಬ್ಬತ್ಥ] ನ ನೋ ಆಯಸ್ಮನ್ತಾ ಸಪ್ಪಿ ದುಲ್ಲಭಾ, ಮಮ ಪತ್ತಂ ಗಹೇತ್ವಾ ಸಮುದ್ದೋದಕಂ ಉದ್ಧರಿತ್ವಾ ಆನೇಥಾತಿ ವುತ್ತೇ ಭಿಕ್ಖೂ ತಥಾ ಅಕಂಸು. ಉದ್ಧಟಮತ್ತಮೇವ ತಂಉದಕಂ ಪರಿವತ್ತೇತ್ವಾ ಸಪ್ಪಿ ಅಹೋಸಿ, ಅಥ ಭಿಕ್ಖೂ ತಂ ದಿಸ್ವಾ ಅಚ್ಛರಿಯಬ್ಭುತಚಿತ್ತಾ ಜಾತಾ ಥೇರಸ್ಸ ಸಪ್ಪಿಂ ಉಪನಾಮೇಸುಂ, ಥೇರೇನ ಸಪ್ಪಿನೋ [ಸಪ್ಪಿನಾ ಇತಿಸಬ್ಬತ್ಥ] ಪೀತಮತ್ತೇ ಸೋ ಆಬಾಧೋ ವೂಪಸಮಿ, ಅಥಸ್ಸ ಭಿಕ್ಖೂಹಿ ಕಿ ಮೇತಂ ಭನ್ತೇ ಅಚ್ಛರಿಯಂ, ನ ನೋ ಇತೋ ಪುಬ್ಬೇ ಏವರೂಪಂ ದಿಟ್ಠಪುಬ್ಬಂತಿ ವುತ್ತೇ ಥೇರೋ ತೇನಹಿ ಕತಪುಞ್ಞಾನಂ ಪುಞ್ಞವಿಪಾಕಂ ಪಸ್ಸಿಸ್ಸಥಾತಿ ವತ್ವಾ ಸಮುದ್ದಂ ಓಲೋಕೇಸಿ ಇದಂ ಸಪ್ಪಿ ಹೋತೂತಿ. ಅಥಸ್ಸ ಚಕ್ಖುಪಥೇ ಸಮುದ್ದೇ ಸಬ್ಬೋದಕಂ ಪರಿವತ್ತೇತ್ವಾ ಸಪ್ಪಿ ಅಹೋಸಿ. ಅಥಸ್ಸ ಭಿಕ್ಖೂ ಅಬ್ಭುತಚಿತ್ತಾ ಅಞ್ಞಮ್ಪಿ ಈದಿಸಂ ಪುಞ್ಞಂ ಅತ್ಥಿ ಭನ್ತೇತಿ ಪುಚ್ಛಿಂಸು, ತತೋ ಥೇರೋ ತೇನಹಿ ಪಸ್ಸಥಾಯಸ್ಮನ್ತಾ ಮಮ ಪುಞ್ಞನ್ತಿ ವತ್ವಾ ಸಮನ್ತಾ ತತ್ಥ ತತ್ಥ ಘನಸೇಲಪಬ್ಬತೇ ಓಲೋಕೇಸಿ, ಸಬ್ಬಾನಿ ತಾನಿ ಗುಳಪಿಣ್ಡಾನಿ ಅಹೇಸುಂ, ತತೋ ಚಕ್ಖುಪಥೇ ಸಮನ್ತಾ ಭತ್ತಭಾಜನಾನಿ ದಸ್ಸೇಸಿ ಸಬ್ಯಞ್ಜನಂ ಸೋಪಕರಣಂ. ತತೋ ಹಿಮವನ್ತಂ ಓಲೋಕೇಸಿ, ಸಬ್ಬಂ ತಂ ಸುವಣ್ಣಮಯಂ ಅಹೋಸಿ. ಅಥಾಭಿಮುಖಟ್ಠಾನೇ ಮಹನ್ತಂ ವನಸಣ್ಡಂ ಓಲೋಕೇಸಿ, ಸಕಲವನಸಣ್ಡಂನಾನಾವಿರಾಗವತ್ಥೇಹಿ ಸಞ್ಛನ್ನಂ ಅಹೋಸಿ, ಭಿಕ್ಖೂ ತಂ ತಂ ಪಾಟಿಹಾರಿಯಂ ದಿಸ್ವಾ ಅತೀವ ವಿಮ್ಹಿತಾ ಭನ್ತೇ ಕೇನ ತೇ ಪುಞ್ಞಕಮ್ಮೇನ ಏತಾದಿಸಾನಿ ಪಾಟಿಹಾರಿಯಾನಿ ಭವಿಸ್ಸನ್ತೀತಿ ಪುಚ್ಛಿಂಸು, ಥೇರೋ ಕಸ್ಸಪದಸಬಲಸ್ಸ ಕಾಲೇ ಅತ್ತನಾ ಕತಂ ಸಬ್ಬಂ ತಂ ಕುಸಲಂ ಪಕಾಸೇಸಿ. ತೇನೇತ್ಥ.

೧. ಇಮಸ್ಮಿಂ ಭದ್ದಕೇ ಕಪ್ಪೇ, ಕಸ್ಸಪೋ ನಾಮ ನಾಯಕೋ;

ಸಬ್ಬಲೋಕಹಿತತ್ಥಾಯ, ಲೋಕೇ ಉಪ್ಪಜ್ಜಿ ಚಕ್ಖುಮಾ.

೨. ತದಾಹಂ ಉಚ್ಛುಯನ್ತಮ್ಹಿ, ನಿಯುತ್ತೋ ಗುಳಕಾರಕೋ;

ತೇನ ಕಮ್ಮೇನ ಜೀವಾಮಿ, ಪೋಸೇನ್ತೋ ಪುತ್ತದಾರಕೇ.

೩. ಕಿಲನ್ತಿನ್ದ್ರಿಯಮದ್ದಕ್ಖಿಂ, ಭಿಕ್ಖುಂ ರೋಗಾತುರಂ ತದಾ;

ಭಿಕ್ಖಾಚಾರಕವತ್ತೇನ, ಘತತ್ಥಂ [ಘತಮತ್ತಮುಪಾಗತಂ ಇತಿಸಬ್ಬತ್ಥ] ಸಮುಪಾಗತಂ.

೪. ಉಲುಙ್ಕಮತ್ತಂ ಸಪ್ಪಿಸ್ಸ, ಅದದಂ ತಸ್ಸ ಭಿಕ್ಖುನೋ;

ಸದ್ದಹನ್ತೋ ದಾನಫಲಂ, ದಯಾಯು ದಗ್ಗಮಾನಸೋ.

.೫

ತೇನ ಕಮ್ಮೇನ ಸಂಸಾರೇ, ಸಂಸರನ್ತೋ ಭವಾಭವೇ;

ಯತ್ಥಿಚ್ಛಾಮಿ ಘತಂ ತತ್ಥ, ಉಪ್ಪಜ್ಜತಿ ಅನಪ್ಪಕಂ.

೬. ಇಚ್ಛಾಮಹಂ ಸಮುದ್ದಸ್ಮಿಂ, ಫಲಮ್ಪಿ ಘತಮತ್ತನೋ;

ತಂ ತಂ ಸಬ್ಬಂ ಘತಂ ಹೋತಿ, ಘತದಾನಸ್ಸಿದಂ ಫಲಂ.

೭. ಸುಣಾಥ ಮಯ್ಹಂ ಅಞ್ಞಮ್ಪಿ, ಪುಞ್ಞಕಮ್ಮಂ ಮನೋರಮಂ;

ತದಾ ದಿಸ್ವಾನಹಂ ಭಿಕ್ಖುಂ, ರೋಗೇನ ಪರಿಪೀಳಿತಂ.

೮. ಗುಳಪಿಣ್ಡಂ ಗಹೇತ್ವಾನ, ಪತ್ತೇ ತಸ್ಸ ಸಮಾಕಿರಿಂ;

ತೇನ ಸೋ ಸುಖಿತೋ ಆಸಿ, ರೋಗಂ ಬ್ಯಪಗತಂ ತದಾ.

೯. ತೇನ ಮೇ ಗುಳದಾನೇನ, ಸಂಸರಂ ದೇವಮಾನುಸೇ;

ಯತ್ಥತ್ಥೋಸ್ಮಿ ಗುಳೇನಾಹಂ, ತತ್ಥ ತಂ ಸುಲಭಂ ಮಮ.

೧೦. ಸೇಲಾಚ ವಿಪುಲಾ ಮಯ್ಹಂ, ಹೋನ್ತಿ ಚಿತ್ತಾನುವತ್ತಕಾ;

ಮಹನ್ತಗುಳಪಿಣ್ಡಾವ, ಗುಳದಾನೇ ಇದಂ ಫಲಂ.

೧೧. ಅಥಾಪಿ ಮೇ ಕತಂ ಪುಞ್ಞಂ, ಸುಣಾಥ ಸಾಧು ಭಿಕ್ಖವೋ;

ಛಾತಜ್ಝತ್ತಂ ಫನ್ದಮಾನಂ, ದಿಸ್ವಾನ ಸುನಖಂ ತದಾ.

೧೨. ಭತ್ತಪೀಣ್ಡೇನ ಸಙ್ಗಣ್ಹಿಂ, ತಮ್ಪಿ ದಾನಂ ಫಲಾವಹಂ;

ತತೋ ಪಟ್ಠಾಯ ನಾಹೋಸಿ, ಅನ್ನಪಾನೇನ ಊನತಾ.

೧೩. ಸುಲಭನ್ನಪಾನೋ ಸುಖಿತೋ, ಅಹೋಸಿಂಜಾತಿಜಾತಿಯಂ;

ಅಜ್ಜಾಪಿ ಯದಿ ಇಚ್ಛಾಮಿ, ಭೋಜನೇನ ಪಯೋಜನಂ.

೧೪. ಚಕ್ಖುಪಥೇ ಸಮನ್ತಾ ಮೇ, ಜಾಯನ್ತುಕ್ಖಲಿಯೋ ಬಹೂ;

ಅಥಾಪರಮ್ಪಿ ಕುಸಲಂ, ಅಕಾಸಿಂತಂ ಸಣಾಥ ಮೇ.

೧೫. ಇಣಟ್ಠಕಸ್ಸ ಪೋಸಸ್ಸ, ಅದಾಸೇಕಂ ಕಹಾಪಣಂ;

ತೇನ ಮೇ ಪುಞ್ಞಕಮ್ಮೇನ, ಅನೋಮಭವಸಮ್ಪದಂ.

೧೬. ಪಚುರಂ ಜಾತರೂಪಞ್ಚ, ಲಭಾಮಿ ಜಾತಿಜಾತಿಯಂ;

ಸಚಜ್ಜ ಧನಕಾಮೋಹಂ, ಘನಸೇಲೋಪಿ ಪಬ್ಬತೋ;

ಹೋತಿ ಹೇಮಮಯಂ ಸಬ್ಬಂ, ಇಣತೋ ಮೋಚನೇ ಫಲಂ.

೧೭. ಅಞ್ಞಮ್ಪಿ ಮಮ ಪುಞ್ಞಂ ಭೋ, ಸುಣಾಥ ಸುತಿಸೋಭನಂ;

ಕಸ್ಸಪಸ್ಸ ಭಗವತೋ, ಸಾಸನೇಕಂ ಬಹುಸ್ಸುತಂ.

೧೮. ದೇಸೇನ್ತಂ ಮುನಿನೋ ಧಮ್ಮಂ, ಸುತ್ವಾ ಪೀಣಿತಮಾನಸೋ;

ಪೂಜೇಸಿಂಸಾಟಕಂ ಮಯ್ಹಂ, ಧಮ್ಮಸ್ಸ ಧಮ್ಮಸಾಮಿನೋ.

೧೯. ತೇನಾಹಂ ಪುಞ್ಞಕಮ್ಮೇನ, ಸಂಸರಂ ದೇವಮಾನುಸೇ;

ಲಭಾಮಿ ಪಚುರಂ ವತ್ಥಂ, ಯಂ ಲೋಕಸ್ಮಿಂ ವರಂ ಪರಂ.

೨೦. ಇಚ್ಛಮಾನೋ ಸಚೇ ಅಜ್ಜ [ಜಾನಮಾನೋಪಹಂಅಜ್ಜ; ಜಾನಧಾನೋಚಹಂಅಜ್ಜ ಇತಿಕತ್ಥಚಿ], ಹಿಮವನ್ತಮ್ಪಿ ಪಬ್ಬತಂ;

ನಾನಾವಿರಾಗವತ್ಥೇಹಿ, ಛಾದಯಿಸ್ಸಂ ಸಮನ್ತತೋ.

೨೧. ಸಚೇ ಇಚ್ಛಾಮಿ ಅಜ್ಜೇವ, ವತ್ಥೇನಚ್ಛಾದಯಾ ಮಿತೇ;

ಜನ್ತವೋ ಚತುದೀಪಸ್ಮಿಂ, ವತ್ಥದಾನಸ್ಸಿದಂ ಫಲಂ.

೨೨. ಏತೇಸಂ ಪುಞ್ಞಕಮ್ಮಾನಂ, ವಾಹಸಾ ಕಾಮಭೂಮಿಯಂ;

ಸಮ್ಪತ್ತಿ ಮನುಭುತ್ವಾನ, ಸಾವತ್ಥಿಪುರ ಮುತ್ತಮೇ.

೨೩. ಜಾತೋ ಕುಲೇ ಮಹಾಭೋಗೇ,

ವುದ್ಧಿಪ್ಪತ್ತೋ ಸುಖೇಧಿತೋ;

ತಸ್ಸ ಧಮ್ಮಂ ಸುಣಿತ್ವಾನ,

ಪಬ್ಬಜಿತ್ವಾನ ಸಾಸನೇ.

೨೪. ಲೋಕುತ್ತರಂ ಅಗ್ಗರಸಂ, ಭುಞ್ಚನ್ತೋ ಮುನಿವಾಹಸಾ;

ಕಿಲೇಸೇ ಪಜಹಿತ್ವಾನ, ಅರಹತ್ತಮಪಾಪುಣಿಂ.

೨೫. ಕುಸಲಂ ನಾ ವಮನ್ತಬ್ಬಂ, ಖುದ್ದಕನ್ತಿ ಕದಾಚಿಪಿ;

ಅನನ್ತಫಲದಂ ಹೋತಿ, ನಿಬ್ಬಾಣಮ್ಪಿ ದದಾತಿ ತಂ.

ಅಥಸ್ಸ ಧಮ್ಮದೇಸನಂ ಸುತ್ವಾ ಭಿಕ್ಖೂ ಚ ಮಹಾಜನೋ ಚ ದಾನಾದಿಕುಸಲಕಮ್ಮಂ ಕತ್ವಾ ಯೇಭುಯ್ಯೇನ ಸಗ್ಗಪರಾಯಣಾ ಅಹೇಸುಂತಿ.

೨೬. ಮನೋಪಸಾದೇನಪಿ ಅಪ್ಪಪುಞ್ಞಂ,

ಏವಂ ಮಹನ್ತಂ ಭವತೀತಿ ಞತ್ವಾ;

ಮಾ ಅಪ್ಪಪುಞ್ಞನ್ತಿ ಪಮಜ್ಜಥಮ್ಭೋ;

ಸರಾಥ ದೇವಿಂ ಇಧ ಲಾಜದಾಯಿಂ.

ಸದ್ಧೋಪಾಸಕಸ್ಸ ವತ್ಥುಂ ಸತ್ತಮಂ.