೨೮. ಕಪಣಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಅಮ್ಹಾಕಂ ಭಗವತಿ ಪರಿನಿಬ್ಬುತೇ ಬಾರಾಣಸೀನಗರವಾಸೀ ಏಕೋ ದುಗ್ಗತಪುರಿಸೋ ಪರಗೇಹೇ ಭತಿಂಕತ್ವಾ ಜೀವಿಕಂ ಕಪ್ಪೇತಿ, ತಸ್ಮಿಂ ಸಮಯೇ ನಗರವಾಸಿನೋ ಯೇಭುಯ್ಯೇನ ತಸ್ಮಿಂ ತಸ್ಮಿಂ ಠಾನೇ ಮಣ್ಡಪಾದಯೋ ಕಾರಾಪೇತ್ವಾ ಮಹಾದಾನಂ ದೇನ್ತಿ, ತಂ ದಿಸ್ವಾ ದುಗ್ಗತೋ ಏವಂ ಚಿನ್ತೇಸಿ, ಅಹಂ ಪುಬ್ಬೇ ಅಕತಪುಞ್ಞತ್ತಾ ಪರಗೇಹೇ ಭತಿಂ ಕತ್ವಾ ಕಿಚ್ಛೇನ ಕಸಿರೇನ ಜೀವಾಮಿ. ನಿವಾಸನಪಾರುಪನಮ್ಪಿ ವಾಸಟ್ಠಾನಮತ್ತಮ್ಮಿ ದುಕ್ಖತೋ ಲಭಾಮಿ. ಇದಾನಿ ಬುದ್ಧುಪ್ಪಾದೋ ವತ್ತತಿ ಭಿಕ್ಖುಸಙ್ಘೋಪಿ.

ಸಬ್ಬೇ ಇಮೇ ದಾನಂ ದತ್ವಾ ಸಗ್ಗಮಗ್ಗಂ ಸೋಧೇನ್ತಿ. ಮಯಾಪಿ ದಾನಂ ದಾತುಂ ವಟ್ಟತಿ. ತಮ್ಮೇ ದೀಘರತ್ತಂ ಹಿತಾಯ ಸುಖಾಯ ಭವಿಸ್ಸತಿ. ಅಪಿ ಚ ಮಯ್ಹಂ ತಣ್ಡುಲನಾಲಿಮತ್ತಮ್ಪಿ ನತ್ಥಿ, ಅಕತವೀರಿಯೇನ ತಂ ಮತ್ಥಕಂ ಪಾಪೇತುಂ ನ ಸಕ್ಕಾ, ಏತದತ್ಥಾಯಾಹಂ ಉಯ್ಯೋಗಂ ಕತ್ವಾ ದಾನಂ ದಸ್ಸಾಮೀತಿ ಚಿನ್ತೇತ್ವಾ ತತೋ ಪಟ್ಠಾಯ ಭತಿಂ ಪರಿಯೇಸಮಾನೋ ಗನ್ತ್ವಾ ತತ್ಥ ತತ್ಥ ಭತಿಂ ಕತ್ವಾ ಲದ್ಧನಿವಾಪೇ ಚ ಭಿಕ್ಖಾಚರಿಯಾಯ ಲದ್ಧತಿಲತಣ್ಡುಲಾದಯೋ ಚ ಏಕತ್ಥ ಸಂಹರಿತ್ವಾ ಮನುಸ್ಸೇ ಸಮಾದಾಪೇತ್ವಾ ತಸ್ಮಿಂ ಮಣ್ಡಪಂ ಕಾರಾಪೇತ್ವಾ ವನಕುಸಮಾದೀಹಿ ತಂ ಅಲಙ್ಕರಿತ್ವಾ ಭಿಕ್ಖೂ ನಿಮನ್ತೇತ್ವಾ ಮಣ್ಡಪೇ ನಿಸೀದಾಪೇತ್ವಾ ಸಬ್ಬೇಸಂ ಪಾಯಸಂ [ಪಾಯಾಸಂ ಇತಿಸಬ್ಬತ್ಥ] ಪಟಿಯಾದೇತ್ವಾ ಭೋಜೇಸಿ. ಅಥ ಸೋ ಮರಣಕಾಲೇ ಅತ್ತನಾ ಕತಂ ತಂ ದಾನವರಂ ಅನುಸ್ಸರಿ. ಸೋ ತೇನ ಕುಸಲಕಮ್ಮೇನ ಸುತ್ತಪ್ಪಬುದ್ಧೋ ವಿಯ ದೇವಲೋಕೇ ನಿಬ್ಬತ್ತಿ. ತಸ್ಮಿಂ ತೇನ ಕತಪುಞ್ಞಾನುರೂಪಂ ಮಹನ್ತಂ ಕನಕವಿಮಾನಂ ನಿಬ್ಬತ್ತಿ. ಸಮನ್ತಾ ತಿಗಾವುತಟ್ಠಾನೇ ದೇವತಾ ನಾನಾ ವಿಧಾನಿ ತುರಿಯಾನಿ ಗಹೇತ್ವಾ ಉಪಹಾರಂ ಕರೋನ್ತಿ. ನಿಚ್ಚಂ ದೇವಚ್ಛರಾಸಹಸ್ಸಾನಿ [ದೇವಚ್ಛರಾಸಹಸ್ಸಂ ಇತಿಸಬ್ಬತ್ಥ] ತಂ ಪರಿವಾರೇತ್ವಾ ತಿಟ್ಠನ್ತಿ. ಏವಂ ಸೋ ಮಹನ್ತಂ ಸಮ್ಪತ್ತಿಂ ಅನುಭವತಿ. ಅಥೇಕದಿವಸಂ ಸುವಣ್ಣಸೇಲವಿಹಾರವಾಸೀ ಮಹಾಸಙ್ಘರಕ್ಖಿತತ್ಥೇರೋ ಪತ್ತಪಟಿಸಮ್ಭಿದೋ ದೇವಚಾರಿಕಂ ಚರಮಾನೋ ತಂ ದೇವಪುತ್ತಂ ಅನುಪಮಾಯ ದೇವಸಮ್ಪತ್ತಿಯಾ ವಿರೋಚಮಾನಂ ದಿಸ್ವಾ ಉಪಸಙ್ಕಮ್ಮ ಠಿತೋ ತೇನ ಕತಕಮ್ಮಂ ಪುಚ್ಛಿ. ಸೋಪಿಸ್ಸ ಯಥಾಭೂತಂ ಬ್ಯಾಕಾಸಿ, ತೇನತ್ಥ.

೧. ಸಬ್ಬಸೋವಣ್ಣಯೋ ಆಸಿ, ಪಾಸಾದೋ ರತನಾಮಯೋ;

ಸೋಣ್ಣಸಿಙ್ಗಸತಾಕಿಣ್ಣೋ, ದುದ್ದಿಕ್ಖೋ ಚ ಪಭಸ್ಸರೋ.

೨. ಕೂಟಾಗಾರ ಸತಾಕಿಣ್ಣೋ, ಸೋಣ್ಣಮಾಲಾಸಮಾಕುಲೋ;

ಮುತ್ತಾಕಲಾಪಾಲಮ್ಬನ್ತಿ, ತತ್ಥ ತತ್ಥ ಮನೋರಮಾ.

೩. ನೇಕಗಬ್ಭಸತಾಕಿಣ್ಣೋ, ಸಯನಾಸನಮಣ್ಡಿತೋ;

ವಿಭತ್ತೋ ಭಬ್ಬಭಾಗೇಹಿ, ಪುಞ್ಞವಡ್ಢಕಿನಾ ಕತೋ.

೪. ನಚ್ಚನ್ತಿ ಪಮದಾ ತತ್ಥ, ಭೇರಿಮಣ್ಡಲಮಜ್ಝಗಾ;

ಗಾಯನ್ತಿ ಕಾಚಿ ಕೀಳನ್ತಿ, ವಾದೇನ್ತಿ ಕಾಚಿ ತನ್ತಿಯೋ.

೫. ತತೋ ತಿಗಾವುತೇ ಠಾನೇ, ಪಾಸಾದಸ್ಸ ಸಮನ್ತತೋ;

ಸಹಚ್ಛರಾ ದೇವಪುತ್ತಾ, ಗಹೇತ್ವಾ ಆತತಾದಯೋ.

೬. ಮೋದನ್ತಿ ಪರಿವಾರೇತ್ವಾ, ನಚ್ಚಗೀತಾದಿನಾ ಸದಾ;

ಉಲ್ಲಙ್ಘನ್ತಿಚ ಸೇಲೇನ್ತಿ, ಸಿಲಾಘನ್ತಿ ಸಮನ್ತತೋ.

೭. ಏವಂ ಮಹಿದ್ಧಿಕೋ ದಾನಿ, ತುವಂ ವನ್ದೋವ ಭಾಸತಿ;

ಪುಚ್ಛಾಮಿ ತಂ ದೇವಪುತ್ತ, ಕಿಂ ಕಮ್ಮಮಕರೀ ಪುರಾ.

ದೇವಪುತ್ತೋ ಆಹ.

೮. ಅಹೋಸಿಂ ದುಗ್ಗತೋ ಪುಬ್ಬೇ, ಬಾರಾಣಸೀಪುರುತ್ತಮೇ;

ದಾನಂ ದೇನ್ತಿ ನರಾ ತತ್ಥ, ನಿಮನ್ತೇತ್ವಾನ ಭಿಕ್ಖವೋ.

೯. ಜೀವನ್ತೋ ಭತಿಯಾ ಸೋಹಂ, ದಾನಂ ದೇನ್ತೇ ಮಹಾಜನೇ;

ತುಟ್ಠಹಟ್ಠೇ ಪಮುದಿತೇ, ಏವಂ ಚಿನ್ತೇಸಹಂ ತದಾ.

೧೦. ಸಮ್ಪನ್ನವತ್ಥಾಲಙ್ಕಾರಾ, ದಾನಂ ದೇನ್ತಿ ಇಮೇ ಜನಾ;

ಪರತ್ಥಪಿ ಪಹಟ್ಠಾವ, ಸಮ್ಪತ್ತಿಮನುಭೋನ್ತಿ ತೇ.

೧೧. ಬುದ್ಧುಪ್ಪಾದೋ ಅಯಂ ದಾನಿ, ಧಮ್ಮೋ ಲೋಕೇ ಪವತ್ತತಿ;

ಸುಸೀಲಾ ದಾನಿ ವತ್ತನ್ತಿ, ದಕ್ಖಿಣೇಯ್ಯಾ ಜಿನೋರಸಾ.

೧೨. ಅನಾವಟ್ಠಿತೋ [ಅವಟ್ಠಿತೋಚ; ಅನ್ಧಟ್ಠಿತೋಚ ಇತಿಪಿಕತ್ತಚಿ] ಸಂಸಾರೋ, ಅಪಾಯಾ ಖಲು ಪೂರಿತಾ;

ಕಲ್ಯಾಣವಿಮುಖಾ ಸತ್ತಾ, ಕಾಮಂ ಗಚ್ಛನ್ತಿ ದುಗ್ಗತಿಂ.

೧೩. ಇದಾನಿ ದುಕ್ಖಿತೋ ಹುತ್ವಾ, ಜೀವಾಮಿ ಕಸಿರೇನಹಂ;

ದಲಿದ್ದೋ ಕಪಣೋ ದೀನೋ, ಅಪ್ಪಭೋಗೋ ಅನಾಲಯೋ.

೧೪. ಇದಾನಿ ಬೀಜಂ ರೋಪೇಮಿ, ಸುಖೇತ್ತೇ ಸಾಧುಸಮ್ಮತೇ;

ಅಪ್ಪೇವನಾಮ ತೇನಾಹಂ, ಪರತ್ಥ ಸುಖಿತೋ ಸಿಯಾ.

೧೫. ಇತಿ ಚಿನ್ತಿಯ ಭಿಕ್ಖಿತ್ವಾ, ಭತಿಂ ಕತ್ವಾನ ನೇಕಧಾ;

ಮಣ್ಡಪಂ ತತ್ಥ ಕಾರೇತ್ವಾ, ನಿಮನ್ತೇತ್ವಾನ ಭಿಕ್ಖವೋ.

೧೬. ಆಯಾಸೇನ ಅದಾಸಾಹಂ, ಪಾಯಸಂ ಅಮತಾಯ ಸೋ;

ತೇನ ಕಮ್ಮವಿಪಾಕೇನ, ದೇವಲೋಕೇ ಮನೋರಮೇ.

೧೭. ಜಾತೋಮ್ಹಿ ದಿಬ್ಬಕಾಮೇಹಿ, ಮೋದಮಾನೋ ಅನೇಕಧಾ;

ದೀಘಾಯುಕೋ ವಣ್ಣವನ್ತೋ, ತೇಜಸ್ಸೀಚ ಅಹೋಸಹನ್ತಿ.

ಏವಂ ದೇವಪುತ್ತೋ ಅತ್ತನಾ ಕತಪುಞ್ಞಕಮ್ಮಂ ವಿತ್ತಾರೇನ ಕಥೇಸಿ, ಥೇರೋಪಿ ಮನುಸ್ಸಲೋಕಂ ಆಗನ್ತ್ವಾ ಮನುಸ್ಸಾನಂ ಅತ್ತನಾ ಪಚ್ಚಕ್ಖತೋ ದಿಟ್ಠದಿಬ್ಬಸಮ್ಪತ್ತಿಂ ಪಕಾಸೇಸಿ. ತಂ ಸುತ್ವಾ ಮಹಾಜನೋ ಕುಸಲಕಮ್ಮಂ ಕತ್ವಾ ಯೇಭುಯ್ಯೇನ ಸಗ್ಗೇ ನಿಬ್ಬತ್ತೋತಿ.

೧೮. ಅನಾಲಯೋ ದುಗ್ಗತದೀನಕೋಪಿ,

ದಾನಂ ದದನ್ತೋ ಧಿಗತೋ ವಿಸೇಸಂ;

ಸಗ್ಗಾ ಪವಗ್ಗಂ ಯದಿ ಪತ್ಥಯವ್ಹೋ,

ಹನ್ತ್ವಾನ ಮಚ್ಛೇರಮಲಂ ದದಾಥಾತಿ.

ಕಪಣಸ್ಸ ವತ್ಥುಂ ಅಟ್ಠಮಂ.