೨೬. ಚೋರಘಾತಕವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಏಕಸ್ಮಿಂ ಕಿರ ಸಮಯೇ ಅಮ್ಹಾಕಂ ಭಗವಾ ಸಾವತ್ಥಿಯಂ ಉಪನಿಸ್ಸಾಯ ಜೇತವನೇ ವಿಹರತಿ ಧಮ್ಮದೇಸನಾಯ ಮಹಾಜನಸ್ಸ ಸಗ್ಗಮೋಕ್ಖಸಮ್ಪದಂ ದದಮಾನೋ. ತಸ್ಮಿಂಸಮಯೇ ಪಞ್ಚಸತಾ ಚೋರಾ ಅಟವಿತೋ ನಗರಂ ಆಗನ್ತ್ವಾ ರತ್ತಿಭಾಗೇ ಚೋರಕಮ್ಮಂ ಕತ್ವಾ ತೇನ ಪುತ್ತದಾರೇ ಪೋಸೇನ್ತಿ. ಅಥೇಕದಿವಸಂ ಚೋರಾ ಚೋರಕಮ್ಮತ್ಥಾಯ ನಗರಂ ಪವಿಸನ್ತಾ ನಗರದ್ವಾರೇ ಏಕಂ ದುಕ್ಖಿತಂ ಜನಪದಮನುಸ್ಸಂ ಪಸ್ಸಿತ್ವಾ ಹಮ್ಭೋ ಕತ್ಥ ವಸತೀತಿ ಪುಚ್ಛಿಂಸು, ಸೋ ಅತ್ತಜನಾ ಜನಪದವಾಸಿಭಾವಂ ಪಕಾಸೇಸಿ. ಅಥಸ್ಸ ತೇ ಕಸ್ಮಾ ಭೋ ಇಮಿನಾ ದುಕ್ಖವಾಸೇನ ವಸಿಸ್ಸಸಿ, ಏಹಿ ಅಮ್ಹೇಹಿ ಸದ್ಧಿಂ ಚೋರಕಮ್ಮಂ ಕರೋನ್ತೋ ವತ್ಥಾಲಙ್ಕಾರಸಮ್ಪನ್ನೋ ಪುತ್ತದಾರಂ ಪೋಸೇಹಿ. ಇಮಿನಾ ಕಪಣವಾಸೇನ ನ ವಸಾತಿ ಆಹಂಸು. ಸೋ ಪನಿಮೇ ಯುತ್ತಂ ಕಥೇನ್ತೀತಿ ತೇಸಂ ವಚನಂ ಸಮ್ಪಟಿಚ್ಛಿ. ಅಥ ತೇ ಏವಂ ಸತಿ ಅಮ್ಹೇಹಿ ಸದ್ಧಿಂ ಆಗಚ್ಛಾಹೀತಿ ವತ್ವಾ ನಂ ಗಹೇತ್ವಾ ಅನ್ತೋನಗರಂ ಪವಿಟ್ಠಾ ತತ್ಥ ತತ್ಥ ವಿಲುಮ್ಪನ್ತಾ ಚೋರಕಮ್ಮಂ ಅಕಂಸು. ತದಾ ಜಾನಪದಿಕೋ ಲದ್ಧವಿಭವೋ ಇಮಮೇವ ವರತರನ್ತಿ ತೇಹಿ ಸದ್ಧಿಂ ಚೋರಕಮ್ಮಂ ಕರೋನ್ತೋ ಜೀವಿಕಂ ಕಪ್ಪೇಸಿ, ಅಥೇಕದಿವಸಂ ರಾಜಪುರಿಸಾ ಕತಕಮ್ಮೇ ತೇ ಸಬ್ಬೇವ ಗಹೇತ್ವಾ ಪಚ್ಛಾಬಾಹಂ ಗಾಳ್ಹಂ ಬನ್ಧಿತ್ವಾ ಕೋಸಲರಞ್ಞೋ ದಸ್ಸೇಸುಂ, ರಾಜಾ ತೇ ದಿಸ್ವಾ ಏವಮಾಹ, ಭಣೇ ತುಮ್ಹಾಕಂ ಅನ್ತರೇ ಯೋ ಏತೇಸಂ ಮಾರೇತ್ವಾ ಜೀವಿತಕ್ಖಯಂ ಪಾಪೇಸ್ಸತಿ, ತಸ್ಸ ಜೀವಿತದಾನಂ ದಮ್ಮೀತಿ, ತಂ ಸುತ್ವಾ ತೇ ಚೋರಾ ಸಬ್ಬೇ ಅಞ್ಞಮಞ್ಞಞಾತಿಸುಹದಸಮ್ಬನ್ಧಭಾವೇನ ತಂ ನ ಇಚ್ಛಿಂಸು. ಸೋ ಪನ ಜನಪದವಾಸೀ ಮನುಸ್ಸೋ ಅಹಮೇತೇ ಸಬ್ಬೇ ಮಾರೇಸ್ಸಾಮೀತಿ ರಞ್ಞೋ ವತ್ವಾ ತೇನಾನುಞ್ಞಾತೋ ತೇ ಸಬ್ಬೇ ಮಾರೇಸಿ. ತಂ ದಿಸ್ವಾ ತುಟ್ಠೋ ರಾಜಾ ತಸ್ಸ ಚೋರಘಾತಕಮ್ಮಂ ಅದಾಸಿ. ಸೋ ಚೋರೇ ಚ ವಜ್ಝಪ್ಪತ್ತೇ ಚ ಮಾರೇನ್ತೋ ಪಞ್ಚವೀಸತಿವಸ್ಸಾನಿ ವಸನ್ತೋ ಅಪರಭಾಗೇ ಮಹಲ್ಲಕೋ ಅಹೋಸಿ. ಅಥ ಸೋ ಮನ್ದಬಲತ್ತಾ ಕತಿಪಯಪಹಾರೇನಾಪಿ ಚೋರಂ ಮಾರೇತುಂ ನ ಸಕ್ಕೋತಿ, ರಾಜಾ ತಂ ಞತ್ವಾ ಅಞ್ಞಸ್ಸ ಚೋರಘಾತಕಮ್ಮಂ ಅದಾಸಿ. ಅಥ ಸೋ ಚೋರಘಾತಕಮ್ಮಾ [ಚೋರಘಾತಕಮ್ಮ ಇತಿಪಿಕತ್ಥಚಿ] ಪರಿಹೀನೋ ಅತ್ತನೋ ಗೇಹೇ ವಸತಿ. ತದಾ ಅಞ್ಞತರೋ ಮನುಸ್ಸೋ ಮನ್ತಂ ಪರಿವತ್ತೇತ್ವಾ ನಾಸಾವಾತೇನ ಮನುಸ್ಸಮಾರಣಕಮನ್ತಂ ಜಾನಾತಿ. ತಥಾಹಿ ಹತ್ಥಪಾದಕಣ್ಣನಾಸಸೀಸಾದೀಸು ಯಂಕಿಞ್ಚಿ ಛೇಜ್ಜಭೇಜ್ಜಂ ಕತ್ತುಕಾಮೋ ಮನ್ತಂ ಪರಿವತ್ತೇತ್ವಾ ನಾಸಾವಾತಂ ವಿಸ್ಸಜ್ಜೇತಿ. ತಂ ತಂ ಠಾನಂ ಛಿಜ್ಜತಿ ಭಿಜ್ಜತಿ, ಏವಂ ಮಹಾನುಭಾವೋ ಸೋ ಮನ್ತೋ, ಅಥ ಸೋ ತಂ ಪುರಿಸಂ ಉಪಟ್ಠಹಿತ್ವಾ ಮನ್ತಂ ಲಭಿತ್ವಾ ರಞ್ಞೋ ಸಾಸನಂ ಪೇಸೇಸಿ. ಅಹಂ ಇತೋ ಪುಬ್ಬೇ ಮಹಲ್ಲಕತ್ತಾ ಚೋರಾನಂ ಹತ್ಥಪಾದಾದಯೋ ದುಕ್ಖೇನ ಛೇಜ್ಜ ಭೇಜ್ಜಂ ಕರೋಮಿ, ಮಾರೇತಬ್ಬೇಪಿ ದುಕ್ಖೇನ ಮಾರೇಮಿ. ಇದಾನಿ ಪನಾಹಂ ತಥಾ ನ ಕರೋಮಿ, ಮಮ ಮನ್ತಾನುಭಾವೇನ ಛೇಜ್ಜಭೇಜ್ಜಕಮ್ಮಂ ಕರಿಸ್ಸಾಮೀತಿ. ರಾಜಾ ತಂ ಸಾಸನಂ ಸುತ್ವಾ ಸಾಧೂತಿ ತಂ ಪಕ್ಕೋಸಾಪೇತ್ವಾ ಠಾನನ್ತರಂ ತಸ್ಸೇವ ಪಾಕತಿಕ ಮಕಾಸಿ. ಸೋ ತತೋ ಪಟ್ಠಾಯ ತಂ ಕಮ್ಮಂ ಕರೋನ್ತೋ ಪುನ ಪಞ್ಚವಸ್ಸಾನಿ ಅತಿಕ್ಕಾಮೇಸಿ. ಸೋ ಮಹಲ್ಲಕೋ ಖೀಣಾಯುಕೋ ದುಬ್ಬಲೋ ಮರಣಮಞ್ಚಪರಾಯಣೋ ಹುತ್ವಾ ಮರಣವೇದನಾದುಕ್ಖೇನ ಮಹನ್ತೇನ ಭಯಾನಕೇನ ಸದ್ದೇನ ವಿಸ್ಸರಂ ವಿರವನ್ತೋ ನಿಮೀಲಿತೇನ ಚಕ್ಖುನಾ ಭಯಾನಕಂ ನರಕಗ್ಗಿಜಾಲಾಪಜ್ಜಲನ್ತಅಯಕೂಟಮುಗ್ಗರಧರೇ ನಿರಯಪಾಲೇ ಚ ಪಸ್ಸನ್ತೋ ನಿಪನ್ನೋ ಹೋತಿ, ತತೋ ತಸ್ಸ ಪಟಿವಿಸ್ಸಕಗೇಹೇ ಮನುಸ್ಸಾ ತಸ್ಸ ಭಯಾನಕಸದ್ದಸವಣೇನ ಗೇಹಂ ಛಟ್ಟೇತ್ವಾ ಪಲಾಯಿಂಸು. ತಸ್ಮಿಂ ಕಿರ ದಿವಸೇ ಮಹಾಸಾರಿಪುತ್ತತ್ಥೇರೋ ದಿಬ್ಬಚಕ್ಖುನಾ ಲೋಕಂ ಓಲೋಕೇನ್ತಾ ತಂ ಚೋರಘಾತಕಂ ತದಹೇವ ಕಾಲಂಕತ್ವಾ ನಿರಯೇ ನಿಬ್ಬತ್ತಮಾನಂ ದಿಸ್ವಾ ಮಯಿ ತತ್ಥ ಗತೇ ಪನೇಸ ಮಯಿ ಪಸಾದೇನ ಸಗ್ಗೇ ನಿಬ್ಬತ್ತತೀತಿ ಞತ್ವಾ ಅಜ್ಜ ಮಯಾ ತಸ್ಸಾನುಗ್ಗಹಂ ಕಾತುಂ ವಟ್ಟತೀತಿ ಪುಬ್ಬಣ್ಹಸಮಯಂ ನಿವಾಸೇತ್ವಾ ತಸ್ಸ ಘರದ್ವಾರ ಮಗಮಾಸಿ. ಅಥ ಸೋ ಥೇರಂ ದಿಸ್ವಾ ಕುದ್ಧೋ ಕೋಪೇನ ತಟತಟಾಯಮಾನದೇಹೋ ಅಜ್ಜ ತಂ ವಿಜ್ಝಿತ್ವಾ ಫಾಲೇತ್ವಾ ಮಾರೇಸ್ಸಾಮೀತಿ ನಿಪನ್ನೋವ ಮನ್ತಂ ಪರಿವತ್ತೇತ್ವಾ ನಾಸಾವಾತಂ ವಿಸ್ಸಜ್ಜೇಸಿ, ಥೇರೋ ತಸ್ಮಿಂ ಖಣೇ ನಿರೋಧಸಮಾಪನ್ನೋ ನಿರೋಧಾ ವುಟ್ಠಾಯ ಸುರಿಯೋ ವಿಯ ವಿರೋಚಮಾನೋ ಅಟ್ಠಾಸಿ, ಅಥ ಸೋ ಥೇರಸ್ಸ ತಯೋ ವಾರೇ ತಥೇವ ಕತ್ವಾ ಕಿಞ್ಚಿ ಕಾತುಂ ಅಸಕ್ಕೋನ್ತೋ ಅತಿವಿಯ ವಿಮ್ಹಿತಚಿತ್ತೋ ಥೇರೇ ಚಿತ್ತಂ ಪಸಾದೇತ್ವಾ ಅತ್ತನೋ ಪಟಿಯತ್ತಂ ಪಾಯಸಂ ಥೇರಸ್ಸ ದಾಪೇಸಿ, ಥೇರೋ ಮಙ್ಗಲಂ ವಡ್ಢೇತ್ವಾ ವಿಹಾರಮೇವ ಅಗಮಾಸಿ, ಚೋರಘಾತಕೋ ಥೇರಸ್ಸ ದಿನ್ನದಾನಂ ಅನುಸ್ಸರನ್ತೋ ತಸ್ಮಿಂ ಖಣೇ ಕಾಲಂ ಕತ್ವಾ ಸಗ್ಗೇ ನಿಬ್ಬತ್ತಿ. ಅಹೋ ವೀತರಾಗಾನಂ ಬುದ್ಧಪುತ್ತಾನಂ ಆನುಭಾವೋ. ಏವಂ ನರಕೇ ನಿಬ್ಬತ್ತಮಾನೋಪಿಸ್ಸ ಬಲೇನ ಸಗ್ಗೇ ನಿಬ್ಬತ್ತೋತಿ. ತಥಾಹಿ.

೧. ದಾನಂ ತಾಣಂ ಮನುಸ್ಸಾನಂ, ದಾನಂ ದುಗ್ಗತಿವಾರಣಂ;

ದಾನಂ ಸಗ್ಗಸ್ಸ ಸೋಪಾನಂ, ದಾನಂ ಸನ್ತಿಕರಂ ಪರಂ.

೨. ಇಚ್ಛಿತಿಚ್ಛಿತದಾನೇನ, ದಾನಂ ಚಿನ್ತಾಮಣೀ ವಿಯ;

ಕಪ್ಪರುಕ್ಖೋವ ಸತ್ತಾನಂ, ದಾನಂ ಭದ್ದಘಟೋವಿಯ.

೩. ಸೀಲವನ್ತಸ್ಸ ದಾನೇನ, ಚಕ್ಕವತ್ತಿಸಿರಿಮ್ಪಿ ಚ;

ಲಭನ್ತಿ ಸಕ್ಕಸಮ್ಪತ್ತಿಂ, ತಥಾ ಲೋಕುತ್ತರಂ ಸುಖಂ.

೪. ಪಾಪಕಮ್ಮೇಸು ನಿರತೋ, ಠಿತೋಯಂ ನರಕಾಯನೇ [ನರಕಾವನೇ ಇತಿಪಿಕತ್ಥಚಿ];

ಸಾರಿಪುತ್ತಸ್ಸ ಥೇರಸ್ಸ, ಪಿಣ್ಡಪಾತಸ್ಸ ವಾಹಸಾ.

೫. ಅಪಾಯಂ ಪರಿವಜ್ಜೇತ್ವಾ, ನೇಕದುಕ್ಖಸಮಾಕುಲಂ;

ದೇವಸಙ್ಘಪರಿಬ್ಬೂಳ್ಹೋ, ಗತೋ ದೇವಪುರಂ ವರಂ.

೬. ತಸ್ಮಾ ಸುಖೇತ್ತೇ ಸದ್ಧಾಯ, ದೇಥ ದಾನಾನಿ ಕಾಮದಂ;

ದಾನಂ ದೇನ್ತೇಹಿ ಸೀಲಮ್ಪಿ, ಪಾಲನೀಯಂತಿಸುನ್ದರನ್ತಿ [ಪಾಲನಂಚಾತಿಸುನ್ದರಂ ಇತಿಪಿಕತ್ಥಚಿ].

ಅಥ ಭಿಕ್ಖೂ ಧಮ್ಮಸಭಾಯಂ ಸನ್ನಿಪತಿತ್ವಾ ನಿಸಿನ್ನಾ ಭಗವನ್ತಂ ಪುಚ್ಛಿಂಸು, ಕಿಂಭನ್ತೇ ಸೋ ಪಾಪೋ ಚತೂಸು ಅಪಾಯೇಸು ಕತರಸ್ಮಿಂ ನಿಬ್ಬತ್ತೋತಿ. ಅಥ ಸತ್ಥಾ ಅಜ್ಜೇಸ ಭಿಕ್ಖವೇ ಸಾರಿಪುತ್ತಸ್ಸ ದಿನ್ನದಾನಾನುಭಾವೇನ ದೇವಲೋಕೇ ನಿಬ್ಬತ್ತೋ, ತಸ್ಸೇವ ನಿಸ್ಸನ್ದೇನ ಅನಾಗತೇ ಪಚ್ಚೇಕಬುದ್ಧೋ ಭವಿಸ್ಸತೀತಿ ಬ್ಯಾಕಾಸೀತಿ.

೭. ಭೋ ಸಾರಿಪುತ್ತೇ ನಿಹಿತಪ್ಪದಾನಂ,

ಖಣೇನ ಪಾಪೇತಿ ಹಿ ಸಗ್ಗಮಗ್ಗಂ;

ತಸ್ಮಾ ಸುಖೇತ್ತೇಸು ದದಾಥ ದಾನಂ,

ಕಾಮತ್ಥ ಚೇ ಸಗ್ಗಮೋಕ್ಖಂ ಪರತ್ಥ.

ಚೋರಘಾತಕವತ್ಥುಂ ಛಟ್ಠಮಂ.