೨೫. ಕವೀರಪಟ್ಟನ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಜಮ್ಬುದೀಪೇ ಕಿರ ಚೋಳರಟ್ಠೇ ಕಾವೀರಪಟ್ಟನಂ ನಾಮ ಅಹೋಸಿ. ತತ್ಥ ಮಾಹಿಸ್ಸರಿಕಾ ಬಹೂ ಮಿಚ್ಛಾದಿಟ್ಠಿಕಾ ವಸನ್ತಿ. ತತ್ಥೇಕಸ್ಮಿಂ ದೇವಾಲಯೇ ಚಿತ್ತಕಮ್ಮಂ ಕರೋನ್ತಾ ಏಕಸ್ಮಿಂ ಫಲಕೇ ಇಸ್ಸರಸ್ಸ ಓನಮಿತ್ವಾ ವನ್ದನಾಕಾರಂ ಭಗವತೋ ರೂಪಂ ಅಕಂಸು. ತಸ್ಮಿಂ ಸಮಯೇ ತತ್ಥ ಬಹೂ ಉಪಾಸಕಾ ತಂ ದೇವಕುಲಂ ಗನ್ತ್ವಾ ತತ್ಥ ತತ್ಥ ಚಿತ್ತಕಮ್ಮಾನಿ ಓಲೋಕೇನ್ತಾ ತಸ್ಮಿಂ ಫಲಕೇ ತಂ ಚಿತ್ತಕಮ್ಮಂ ಅದ್ದಸಂಸು. ದಿಸ್ವಾನ ತೇ ಅಹೋ ಅಮ್ಹೇಹಿ ಅಪಸ್ಸಿತಬ್ಬಂ ಪಸ್ಸಿತಂ. ಸದೇವಕೇ ಲೋಕೇ ಸಮಾರಕೇ ಸಬ್ರಹ್ಮಕೇ ಸಸ್ಸಮಣಬ್ರಾಹ್ಮಣಿಯಾಸದೇವಮನುಸ್ಸಾಯ ಪಜಾಯ ಚ ಅಪರಿಮಾಣೇಸು ಚಕ್ಕವಾಳೇಸು ಭಗವತೋ ಉತ್ತರಿತರಂ ಠಪೇತ್ವಾ ಸಮಸಮೋಪಿ ನತ್ಥಿ. ಸಕಲೇಹಿ ಸತ್ತನಿಕಾಯೇಹಿ ವನ್ದನೀಯೋ ಪೂಜನೀಯೋ ಭಗವಾ. ಅನನುರೂಪಂ ತಸ್ಸ ಏತೇಹಿ ಕತಂತಿ ರೋದನ್ತಾ ಪರಿದೇವನ್ತಾ ರಾಜದ್ವಾರಂ ಗನ್ತ್ವಾ ಉಗ್ಘೋಸೇಸುಂ, ತಂ ಸುತ್ವಾ ರಾಜಾ ತೇ ಪಕ್ಕೋಸಾಪೇತ್ವಾ ಕಸ್ಮಾ ತುಮ್ಹೇ ಉಗ್ಘೋಸೇಥಾತಿ ಪುಚ್ಛಿ, ತೇ ಏವ ಮಾಹಂಸು. ದೇವ ಅಮ್ಹಾಕಂ ಭಗವಾ ದೇವಾತಿದೇವೋ ಸಕ್ಕಾತಿಸಕ್ಕೋ ಬ್ರಹ್ಮಾತಿಬ್ರಹ್ಮಾ ಮೇರುವ ಅಚಲೋ ಸಾಗರೋ ಗಮ್ಭೀರೋ ಆಕಾಸೋವ ಅನನ್ತೋ ಪಥವೀವ ಪತ್ಥಟೋತಿಆದೀಹಿ ಭಗವತೋ ಗುಣಂ ವಣ್ಣೇಸುಂ. ತೇನ ವುತ್ತಂ ಅಪದಾನೇ.

೧. ಬತ್ತಿಂಸಲಕ್ಖಣಧರೋ, ಸುನಕ್ಖತ್ತೋವ ಚನ್ದಿಮಾ;

ಅನುಬ್ಯಞ್ಜನಸಮ್ಪನ್ನೋ, ಸಾಲರಾಜಾವ ಫುಲ್ಲಿತೋ.

೨. ರಂಸಿಜಾಲಪರಿಕ್ಖಿತ್ತೋ, ದಿತ್ತೋವ ಕನಕಾಚಲೋ;

ಬ್ಯಾಮಪ್ಪಭಾಪರಿವುತೋ, ಸತರಂಸಿ ದಿವಾಕರೋ.

೩. ಸೋಣ್ಣಾ ನನೋ ಜಿನವರೋ, ಸಮಣೀವ ಸಿಲುಚ್ಚಯೋ;

ಕರುಣಾಪುಣ್ಣಹದಯೋ, ವಿವಟ್ಟೋ ವಿಯ ಸಾಗರೋ.

೪. ಲೋಕವಿಸ್ಸುತಕಿತ್ತೀವ, ಸಿನೇರುವ ನಗುತ್ತಮೋ;

ಯಸಸಾ ವಿತತೋ ಧೀರೋ, ಆಕಾಸಸದಿಸೋ ಮುನಿ.

೫. ಅಸಙ್ಗಚಿತ್ತೋ ಸಬ್ಬತ್ಥ, ಅನಿಲೋ ವಿಯ ನಾಯಕೋ;

ಪತಿಟ್ಠಾ ಸಬ್ಬಭೂತಾನಂ, ಮಹೀವ ಮುನಿಸುತ್ತಮೋ.

೬. ಅನೂಪಲಿತ್ತೋ ಲೋಕೇನ, ತೋಯೇನ ಪದುಮಂ ಯಥಾ;

ಕುವಾದಗಚ್ಛದಹನೋ, ಅಗ್ಗಿಕ್ಖನ್ಧೋವ ಸೋಭತಿ.

೭. ಅಗದೋ ವಿಯ ಸಬ್ಬತ್ಥ, ಕಿಲೇಸವಿಸನಾಸಕೋ;

ಗನ್ಧಮಾದನಸೇಲೋವ, ಗುಣಗನ್ಧವಿಭೂಸಿತೋ.

೮. ಗುಣಾನಂ ಆಕರೋ ಧೀರೋ, ರತನಾನಂವ ಸಾಗರೋ;

ಸಿನ್ಧೂವ ವನರಾಜೀನಂ, ಕಿಲೇಸಮಲಹಾರಕೋ.

೯. ವಿಜಯೀವ ಮಹಾಯೋಧೋ, ಮಾರಸೇನಪ್ಪಮದ್ದನೋ;

ಚಕ್ಕವತ್ತೀವ ಸೋ ರಾಜಾ, ಬೋಜ್ಝಙ್ಗರತನಿಸ್ಸರೋ.

೧೦. ಮಹಾಭಿಸಕ್ಕಸಙ್ಕಾಸೋ, ದೋಸಬ್ಯಾಧಿತಿಕಿಚ್ಛಕೋ;

ಸಲ್ಲಕತ್ತೋ ಯಥಾ ವೇಜ್ಜಾ, ದಿಟ್ಠಿಗಣ್ಡವಿಫಾಲಕೋ.

೧೧. ಸತ್ಥಾ ನೋ ಭಗವಾ ದೇವ, ಮಹಾಬ್ರಹ್ಮೇಹಿ ವನ್ದಿತೋ;

ದೇವಿನ್ದಸುರಸಿದ್ಧೇಹಿ, ವನ್ದನೀಯೋ ಸದಾ ದರಾ.

೧೨. ಸಬ್ಬೇಸು ಚಕ್ಕವಾಳೇಸು, ಯೇ ಅಗ್ಗಾ ಯೇ ಚ ಪೂಜಿತಾ;

ತೇಸಮಗ್ಗೋ ಮಹಾರಾಜ, ಭಗವಾ ನೋ ಪತಾಪವಾತಿ.

ಅಯುತ್ತಂ ದೇವ ದೇವಕುಲೇಹಿ ಕತಂತಿ ಆಹಂಸು. ತಂ ಸುತ್ವಾ ರಾಜಾ ಭೋ ಸಬ್ಬೇಪಿ ಮನುಸ್ಸಾ ಅತ್ತನೋ ಅತ್ತನೋ ದೇವತಾನಂ ಮಹನ್ತಭಾವಂ ಕಥೇನ್ತಿ. ತುಮ್ಹಾಕಂ ಪನ ಸತ್ಥುನೋ ಮಹನ್ತಭಾವಂ ಕಥಂ ಅಮ್ಹಾಕಂ ಜಾನಾಪೇಥಾತಿ, ಉಪಾಸಕಾ ನ ಗರು ತ್ವಂ ಮಹಾರಾಜ ಫಲಕಂ ಆಹರಾಪೇತ್ವಾ ಸುದ್ಧವತ್ಥೇನ ವೇಠೇತ್ವಾ ತಂ ಅತ್ತನೋ ಮುದ್ದಿಕಾಯ ಲಞ್ಛಿತ್ವಾ ಸುರಕ್ಖಿತಸುಗೋಪಿತೇ ಏಕಸ್ಮಿಂ ದೇವಕುಲೇ ಠಪೇತ್ವಾ ಸತ್ತಾಹಚ್ಚಯೇನ ಆಹರಾಪೇತ್ವಾ ತಂ ಓಲೋಕೇಥ, ತದಾ ನೋ ಸತ್ಥುನೋ ಮಹನ್ತಾನುಭಾವಂ ಜಾನಾಥಾತಿ ಆಹಂಸು, ಅಥ ರಾಜಾ ತೇಸಂ ವುತ್ತನಿಯಾಮೇನೇವ ಕಾರಾಪೇತ್ವಾ ಅನ್ತೋದೇವಕುಲೇ ಠಪೇತ್ವಾ ಸಬ್ಬದ್ವಾರಾನಿ ಪಿದಹಿತ್ವಾ ಲಞ್ಛೇತ್ವಾ ರಕ್ಖೇಯ್ಯಾಥಾತಿ ನಿಯೋಜೇಸಿ. ತತೋ ತೇ ಉಪಾಸಕಾ ಸಬ್ಬೇ ಸನ್ನಿಪತಿತ್ವಾ ಸತ್ತಾಹಂ ದಾನಂ ದೇನ್ತಾ ಸೀಲಂ ರಕ್ಖನ್ತಾ ಉಪೋಸಥಕಮ್ಮಂ ಕರೋನ್ತಾ ಸಬ್ಬಸತ್ತೇಸು ಮೇತ್ತಿಂ ಭಾವೇನ್ತಾ ಸಬ್ಬಸತ್ತಾನಂ ಅತ್ತನಾ ಕತಪುಞ್ಞೇಸು ಪತ್ತಿಂ ದೇನ್ತಾ ತಿಣ್ಣಂ ರತನಾನಂ ಪೂಜಂ ಕರೋನ್ತಾ ಏವಂ ಉಗ್ಘೋಸೇಸುಂ. ಅಮ್ಹಾಕಂ ಕತಕುಸಲನಿಸ್ಸನ್ದೇನ ಲೋಕೇ ಮಹಿದ್ಧಿಕಾ ಮಹಾನುಭಾವಾ ಸಬ್ಬೇ ದೇವಾ ಚ ಲೋಕಂ ಪಾಲೇನ್ತಾ ಚತ್ತಾರೋ ಮಹಾರಾಜಾನೋ ಚ ಅಮ್ಹಾಕಂ ಸತ್ಥುನೋ ಉಪಟ್ಠಾನಾಯ [ಉಪಟ್ಠಾಯ ಇತಿಸಬ್ಬತ್ಥ] ಠಿತಭಾವಂ ದಸ್ಸೇನ್ತೂತಿ ಸಚ್ಚಕಿರಿಯಂ ಅಕಂಸು. ಅಥ ತೇಸಂ ಪುಞ್ಞಾನುಭಾವೇನ ತಸ್ಮಿಂ ಖಣೇ ಸಕ್ಕಸ್ಸ ದೇವರಞ್ಞೋ ಪಣ್ಡುಕಮ್ಬಲಸಿಲಾಸನಂ ಉಣ್ಹಾಕಾರಂ ದಸ್ಸೇಸಿ. ತತೋ ಸೋ ಮನುಸ್ಸಲೋಕಂ ಓಲೋಕೇನ್ತೋ ಮಿಚ್ಛಾದಿಟ್ಠೀಹಿ ಕತಂ ತಂ ವಿಪ್ಪಕಾರಂ ದಿಸ್ವಾ ಸಂವಿಗ್ಗೋ ಆಗನ್ತ್ವಾ ಇಸ್ಸರಂ ಭಗವತೋ ಪಾದೇ ವನ್ದಿತ್ವಾ ಸಯಿತಾಕಾರಂ ಕತ್ವಾ ತಂ ಪವತ್ತಿಂ ಉಪಾಸಕಾನಂ ಕಥೇತ್ವಾ ಸಕಟ್ಠಾನಮೇವ ಅಗಮಾಸಿ. ತತೋ ಸತ್ತಮೇ ದಿವಸೇಪಾತೋವ ತೇ ಸಬ್ಬೇಪಿ ರಞ್ಞೋ ಸನ್ತಿಕಂ ಗನ್ತ್ವಾ ವನ್ದಿತ್ವಾ ಏವಮಾಹಂಸು. ದೇವ ಇಸ್ಸರೋ ಅಮ್ಹಾಕಂ ಭಗವತೋ ಪಾದೇ ಸಿರಸಾ ವನ್ದಿತ್ವಾ ನಿಪನ್ನೋತಿ. ಅಥ ರಾಜಾ ತೇಸಂ ಕಥಂ ಸುತ್ವಾ ನಗರೇ ಭೇರಿಂ ಚರಾಪೇತ್ವಾ ಮಹಾಜನೇ ಸನ್ನಿಪಾತೇತ್ವಾ ತೇಹಿ ಪರಿವುತೋ ದೇವಕುಲಂ ಗನ್ತ್ವಾ ಲಞ್ಛಂ ಭಿನ್ದಾಪೇತ್ವಾ ದ್ವಾರಂ ವಿವರಿತ್ವಾ ಫಲಕಂ ಆಹರಾಪೇತ್ವಾ ವೇಠಿತಸಾಟಕೇ ಮೋಚಾಪೇಸಿ. ಅಥ ರಾಜಾ ಚ ಮಹಾಜನೋ ಚ ತಂ ಮಹನ್ತಂ ಪಾಟಿಹಾರಿಯಂ ದಿಸ್ವಾ ಮಿಚ್ಛಾದಿಟ್ಠಿಂ ಪಹಾಯ ಸಬ್ಬೇ ಸತ್ಥುನೋ ಸರಣ ಮಗಮಂಸು. ಅಥ ರಾಜಾ ತಂ ದೇವಕುಲಂ ಭಿನ್ದಾಪೇತ್ವಾ ಮಹನ್ತಂ ರಮಣೀಯಂ ವಿಹಾರಂ ಕಾರಾಪೇತ್ವಾ ಯಾವಜೀವಂ ಪುಞ್ಞಕಮ್ಮಂ ಕತ್ವಾ ದೇವಲೋಕೇ ನಿಬ್ಬತ್ತಿ.

೧೩. ಅನಬ್ಭುತಂ ಸತ್ಥು ಧರೀಯಮಾನೇ,

ಕರೋನ್ತಿ ದಿಸ್ವಾ ಕುಸಲಾನಿ ಇದ್ಧಿಂ;

ಯೇ ತಂ ಮುನಿನ್ದೇ ಪರಿನಿಬ್ಬುತಮ್ಹಿ,

ಕರೋನ್ತಿ ಪುಞ್ಞಾನಿ ಮಹಬ್ಭೂತಂ ಯೇತಿ.

ಕಾವೀರಪಟ್ಟನವತ್ಥುಂ ಪಞ್ಚಮಂ.