೨೪. ಉತ್ತರಸಾಮಣೇರಸ್ಸ ವತ್ಥುಮ್ಹಿ ಅಯಮಾನುಪುಬ್ಬೀಕಥಾ

ಸೋ ಕಿರ ಪುರಿಮಬುದ್ಧೇಸು [ಪುರಿಮಬುದ್ಧೇ ಇತಿಸಬ್ಬತ್ಥ] ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಂ ಪುಞ್ಞಂ ಉಪಚಿನನ್ತೋ ಸುಮೇಧಸ್ಸ ಭಗವತೋ ಕಾಲೇ ವಿಜ್ಜಾಧರೋ ಹುತ್ವಾ ಹಿಮವತಿ ಪಟಿವಸತಿ. ತದಾ ಸುಮೇಧೋ ನಾಮ ಸಮ್ಮಾಸಮ್ಬುದ್ಧೋ ವಿವೇಕ ಮನುಬ್ರೂಹನ್ತೋ ಹಿಮವನ್ತಂ ಗನ್ತ್ವಾ ರಮಣೀಯೇ ಪದೇಸೇ ಪಲ್ಲಙ್ಕಂ ಆಭುಜಿತ್ವಾ ನಿಸೀದಿ. ತದಾ ವಿಜ್ಜಾಧರೋ ಆಕಾಸೇನ ಗಚ್ಛನ್ತೋ ಛಬ್ಬಣ್ಣರಂಸೀಹಿ ವಿರಾಜಮಾನಂ ಭಗವನ್ತಂ ದಿಸ್ವಾ ತೀಹಿ ಕಣಿಕಾರಪುಪ್ಫೇಹಿ ಪೂಜೇಸಿ, ಪುಪ್ಫಾನಿ ಬುದ್ಧಾನುಭಾವೇನ ಸತ್ಥು ಉಪರಿ ಛತ್ತಾಕಾರೇನ ಅಟ್ಠಂಸು, ಸೋ ತೇನ ಭೀಯ್ಯೋಸೋ ಮತ್ತಾಯ ಪಸನ್ನಚಿತ್ತೋ ಹುತ್ವಾ ಅಪರಭಾಗೇ ಕಾಲಂಕತ್ವಾ ತಾವತಿಂಸಭವನೇ ನಿಬ್ಬತ್ತಿತ್ವಾ ಉಳಾರಂ ದಿಬ್ಬಸಮ್ಪತ್ತಿಮನುಭವನ್ತೋ ಯಾವತಾಯುಕಂ ತತ್ಥ ಠತ್ವಾ ತತೋ ಚುತೋ ದೇವಮನುಸ್ಸೇಸು ಸಂಸರನ್ತೋ ಇಮಸ್ಮಿಂ ಬುದ್ಧುಪ್ಪಾದೇ ರಾಜಗಹನಗರೇ ಬ್ರಾಹ್ಮಣಮಹಾಸಾಲಸ್ಸ ಪುತ್ತೋ ಹುತ್ವಾ ನಿಬ್ಬತ್ತಿ. ಉತ್ತರೋತಿಸ್ಸ ನಾಮಂ ಅಹೋಸಿ. ಸೋ ಉತ್ತಮರೂಪಧರೋ ವಿಞ್ಞುತಂ ಪತ್ತೋ ಬ್ರಾಹ್ಮಣವಿಜ್ಜಾಸು ನಿಪ್ಫತ್ತಿಂ ಪತ್ವಾ ಜಾತಿಯಾ ರೂಪೇನ ವಿಜ್ಜಾಯ ಸೀಲಾಚಾರೇನ ಚ ಲೋಕಸ್ಸ ಮಹನೀಯೋ ಜಾತೋ, ತಸ್ಸ ತಂ ಪಞ್ಞಾಸಮ್ಪತ್ತಿಂದಿಸ್ವಾ ವಸ್ಸಕಾರೋ ಮಗಧಮಹಾಮತ್ತೋ ಅತ್ತನೋ ಧೀತರಂ ದಾತುಕಾಮೋ ಹುತ್ವಾ ಅತ್ತನೋ ಅಧಿಪ್ಪಾಯಂ ಪವೇದೇಸಿ. ಸೋ ನಿಸ್ಸರಣಜ್ಝಾಸಯತಾಯ ತಂ ಪಟಿಕ್ಖಿಪಿತ್ವಾ ಕಾಲೇನಕಾಲಂ ಧಮ್ಮಸೇನಾಪತಿಂ ಪಯಿರುಪಾಸನ್ತೋ ತಸ್ಸ ಸನ್ತಿಕೇ ಧಮ್ಮಂ ಸುತ್ವಾ ಪಟಿಲದ್ಧಸದ್ಧೋ ಪಬ್ಬಜಿತ್ವಾ ವತ್ತಸಮ್ಪನ್ನೋ ಹುತ್ವಾ ಥೇರಂ ಉಪಟ್ಠಹತಿ. ತೇನ ಚ ಸಮಯೇನ ಥೇರಸ್ಸ ಅಞ್ಞತರೋ ಆಬಾಧೋ ಉಪ್ಪನ್ನೋ ಹೋತಿ, ತಸ್ಸ ಭೇಸಜ್ಜತ್ಥಾಯ ಉತ್ತರಸಾಮಣೇರೋ ಪಾತೋವ ಪತ್ತಚೀವರ ಮಾದಾಯ ವಿಹಾರತೋ ನಿಕ್ಖಮ್ಮ ಅನ್ತರಾಮಗ್ಗೇ ತಳಾಕಸ್ಸ ತೀರೇ ಪತ್ತಂ ಠಪೇತ್ವಾ ಉದಕಸಮೀಪಂ ಗನ್ತ್ವಾ ಮುಖಂ ಧೋವತಿ, ತದಾ ಅಞ್ಞತರೋ ಉಮ್ಮಗ್ಗಚೋರೋ ಕತಕಮ್ಮೋ ಆರಕ್ಖಪುರಿಸೇಹಿ ಅನುಬದ್ಧೋ ಅಗ್ಗದ್ವಾರೇನೇವ ನಗರತೋ ನಿಕ್ಖಮಿತ್ವಾ ಪಲಾಯನ್ತೋ ಅತ್ತನಾ ಗಹಿತಂ ರತನಭಣ್ಡಿಕಂ ಸಾಮಣೇರಸ್ಸ ಪತ್ತೇ ಪಕ್ಖಿಪಿತ್ವಾ ಪಲಾಯಿ. ಸೋ ಸಾಮಣೇರೋಪಿ ಪತ್ತಸಮೀಪಂ [ಸತ್ತುಸಮೀಪಂ ಇತಿಪಿ ಕತ್ಥಚಿ] ಉಪಗತೋ ಹೋತಿ, ಚೋರಂ ಅನುಬನ್ಧನ್ತಾ ರಾಜಪುರಿಸಾ ಸಾಮಣೇರಸ್ಸ ಪತ್ತೇ ಭಣ್ಡಿಕಂ ದಿಸ್ವಾ ಅಯಂ ಚೋರೋ, ಇಮಿನಾ ಚೋರಿಯಂ ಕತನ್ತಿ ಸಾಮಣೇರಂ ಪಚ್ಛಾಬಾಹಂ ಬನ್ಧಿತ್ವಾ ವಸ್ಸಕಾರಸ್ಸ ಬ್ರಾಹ್ಮಣಸ್ಸ ದಸ್ಸೇಸುಂ. ವಸ್ಸಕಾರೋ ಚ ತದಾ ರಞ್ಞೋ ವಿನಿಚ್ಛಯೇ ನಿಯುತ್ತೋ ಹುತ್ವಾ ಛೇಜ್ಜಭೇಜ್ಜಂ ಅನುಸಾಸತಿ. ಸೋ ಏಸೋ ಪುಬ್ಬೇ ಮಮ ವಚನಂ ನಾದಿಯಿ. ಸುದ್ಧಪಾಸಣ್ಡಿಯೇಸು ಪಬ್ಬಜೀತಿ ಚ ಬದ್ಧಾಘಾತತ್ತಾ ತಂ ಕಮ್ಮಂ ಅಸೋಧೇತ್ವಾವ ಜೀವನ್ತಮೇವೇತಂ ಸೂಲೇ ಉತ್ತಾಸೇಥಾತಿ ಆಣಾ ಪೇಸಿ, ರಾಜಪುರಿಸಾ ತಂ ನಿಮ್ಬಸೂಲೇ ಉತ್ತಾಸೇಸುಂ. ಸಾಮಣೇರೋ ಸೂಲಗ್ಗೇ ನಿಸಿನ್ನೋ ಉಪಜ್ಝಾಯಸ್ಸ ಮೇ ಕೋ ಭೇಸಜ್ಜಂ ಆಹರಿಸ್ಸತೀತಿ ಸಾರಿಪುತ್ತತ್ಥೇರಂ ಸರಿ. ತತೋ ಥೇರೋ ತಂ ಪವತ್ತಿಂ ಞತ್ವಾ ಸಮ್ಮಾಸಮ್ಬುದ್ಧಸ್ಸ ಕಥೇಸಿ, ಭಗವಾಪಿ ಮಹಾಸಾವಕಪರಿವುತೋ ತಸ್ಸ ಞಾಣಪರಿಪಾಕಂ ಓಲೋಕೇತ್ವಾ ತಂ ಠಾನಮಗಮಾಸಿ. ತತೋ ಭಗವತೋ ನಿಕ್ಖನ್ತಭಾವಾ ಸಕಲನಗರೇ ಕೋಲಾಹಲಂ ಅಹೋಸಿ, ಮಹಾಜನಕಾಯೋ ಸನ್ನಿಪತಿ. ಅಥ ಭಗವಾ ವಿಪ್ಫುರನ್ತಹತ್ಥತಲೇ ನಖಮಣಿಮಯೂಖಸಮ್ಭಿನ್ನಪೀತಾಭಾಸತಾಯ ಪಗ್ಘರನ್ತಜಾತಿಹಿಙ್ಗುಲಕಸುವಣ್ಣರಸಧಾರಾವಿಯ ಜಾಲಾವಗುಣ್ಠಿತಮುದುತಲುನಙ್ಗುಲಂ ಹತ್ಥಂ ಉತ್ತರಸ್ಸ ಸೀಸೇ ಠಪೇತ್ವಾ ಉತ್ತರ ಇದಂ ತೇ ಪುಬ್ಬೇ ಕತಪಾಪಕಮ್ಮಸ್ಸ ಫಲಂ ಉಪ್ಪನ್ನಂ, ತತ್ಥ ತಯಾ ಪಚ್ಚವೇಕ್ಖಣಬಲೇನ ಅಧಿವಾಸನಾ ಕಾತಬ್ಬಾತಿ ಆಹ. ತೇನೇವ ಆಹ.

೧. ಅತೀತೇ ಕಿರ ಏಕಸ್ಮಿಂ, ಗಾಮೇ ತ್ವ ಮಸಿ ದಾರಕೋ;

ದಾರೇಕೇಹಿ ಸಮಾಗಮ್ಮ, ಕೀಳನ್ತೋ ಕೇಳಿಮಣ್ಡಲೇ.

೨. ಗಹೇತ್ವಾ ಸುಖುಮಂ ಸೂಕಂ, ತದಾ ತ್ವಂ ನಿಮ್ಬಜಲ್ಲಿಯಾ;

ಉತ್ತಾಸೇಸಿ ತತ್ಥ ಸೂಲೇ, ಜೀವಮಾನಕಮಕ್ಖಿಕಂ.

೩. ಅಪರಮ್ಪಿ ತೇ ಪಾಪಕಮ್ಮಂ, ಪವಕ್ಖಾಮಿ ಸುಣೋಹಿ ಮೇ;

ಓವದನ್ತಿಂ ಹಿತೇನ ತ್ವಂ, ಅತೀತೇ ಸಕಮಾತರಂ.

೪. ಜೀವಸೂಲೇ ನಿಸೀದಾತಿ, ಕೋಪೇನಾಭಿಸಪೀ ತುವಂ;

ಇಮೇಹಿ ದ್ವೀಹಿ ಪಾಪೇಹಿ, ಸರಂ ಸಂಸಾರಸಾಗರೇ.

೫. ಪಞ್ಚಜಾತಿಸತೇ ಅಚ್ಛಿ, ಜೀವಸೂಲಮ್ಹಿ ನಿಮ್ಬಜೇ;

ಅಯಂ ತೇ ಚರಿಮಾ ಜಾತಿ, ಏತ್ಥಾಪಿಚ ವಿಪಚ್ಚಿ ಸೋತಿ.

ಏವಮಾದಿನಾ ನಯೇನ ತಸ್ಸ ಅಜ್ಝಾಸಯಾನುರೂಪೇನ ಧಮ್ಮಂ ದೇಸೇಸಿ, ಉತ್ತರೋ ಅಮತಾಭಿಸೇಕಸದಿಸೇನ ಸತ್ಥುನೋ ಹತ್ಥಸಮ್ಫಸ್ಸಸಞ್ಜಾತಪಸಾದಸೋಮನಸ್ಸತಾಯ ಉಳಾರಂ ಪೀತಿಪಾಮೋಜ್ಜಂ ಪಟಿಲಭಿತ್ವಾ ಯಥಾಪರಿಚಿತಂ ವಿಪಸ್ಸನಾಮಗ್ಗಂ ಸಮಾರೂಳ್ಹೋ ಞಾಣಸ್ಸ ಪರಿಪಾಕಂ ಗತತ್ತಾ ಸತ್ಥು ದೇಸನಾವಿಲಾಸೇನ ಮಗ್ಗಪಟಿಪಾಟಿಯಾ ಸಬ್ಬಕಿಲೇಸೇ ಖೇಪೇತ್ವಾ ಛಳಭಿಞ್ಞೋ ಅಹೋಸಿ. ಧಮ್ಮಂ ಸುತ್ವಾ ತತ್ಥ ಸಮಾಗತಾನಂ ದೇವಮನುಸ್ಸಾನಂ ಚತುರಾಸೀತಿಪಾಣಸಹಸ್ಸಾನಂ ಧಮ್ಮಾಭಿಸಮಯೋ ಅಹೋಸೀತಿ ವದನ್ತಿ. ಉತ್ತರೋ ಪನ ಛಳಭಿಞ್ಞೋ ಹುತ್ವಾ ಸೂಲತೋ ಉಟ್ಠಹಿತ್ವಾ ಆಕಾಸೇ ಠತ್ವಾ ಪಾಟಿಹಾರಿಯಂ ದಸ್ಸೇಸಿ. ಮಹಾಜನಾ ಅಚ್ಛರಿಯಬ್ಭುತಚಿತ್ತಾ ಜಾತಾ ಅಹೇಸುಂ. ತಾವದೇವಸ್ಸ ವಣೋರುನ್ಧಿ, ಸೋ ಭಿಕ್ಖೂಹಿ ಆವುಸೋ ತಾದಿಸಂ ದುಕ್ಖಂ ಅನುಭವನ್ತೋ ಕಥಂ ತ್ವಂ ವಿಪಸ್ಸನಂ ಅನುಯುಞ್ಜಿತುಂ ಸಕ್ಖೀತಿ ಪುಟ್ಠೋ ಪಗೇವ ಮೇ ಆವುಸೋ ಸಂಸಾರೇ ಆದೀನವೋ ಸಙ್ಖಾರಾನಞ್ಚ ಸಭಾವೋ ಸುದಿಟ್ಠೋ. ತಸ್ಮಾಹಂ ತಾದಿಸಂ ದುಕ್ಖಂ ಅನುಭವನ್ತೋಪಿ ಅಸಕ್ಖಿಂ ವಿಪಸ್ಸನಂ ವಡ್ಢೇತ್ವಾ ವಿಸೇಸಂ ಅಧಿಗನ್ತುಂತಿ ಆಹ. ಅಥಾಪರಭಾಗೇ ಸೋ ಭಿಕ್ಖುಸಙ್ಘಮಜ್ಝೇ ಅತ್ತನೋ ಪುಬ್ಬಚರಿತಾ ಪದಾನಂ ಪಕಾಸೇನ್ತೋ ಇಮಾ ಗಾಥಾ ಅಭಾಸಿ.

೬. ಸುಮೇಧೋ ನಾಮ ಸಮ್ಬುದ್ಧೋ, ದ್ವತ್ತಿಂಸವರಲಕ್ಖಣೋ;

ವಿವೇಕಕಾಮೋ ಸಮ್ಬುದ್ಧೋ, ಹಿಮವನ್ತ ಮುಪಾಗಮಿ.

೭. ಅಜ್ಝೋಗಹೇತ್ವಾ ಹಿಮವನ್ತಂ, ಅಗ್ಗೋ ಕಾರುಣಿಕೋ ಮುನಿ;

ಪಲ್ಲಙ್ಕಂ ಆಭುಜಿತ್ವಾನ, ನಿಸೀದಿ ಪುರಿಸುತ್ತಮೋ.

೮. ವಿಜ್ಜಾಧರೋ ತದಾ ಆಸಿಂ, ಅನ್ತಲಿಕ್ಖಚರೋ ಅಹಂ;

ತಿಸೂಲಂ ಸುಕತಂ ಗಯ್ಹ, ಗಚ್ಛಾಮಿ ಅಮ್ಬರೇ ತದಾ.

೯. ಪಬ್ಬತಗ್ಗೇ ಯಥಾ ಅಗ್ಗಿ, ಪುಣ್ಣಮಾಸೇವ ಚನ್ದಿಮಾ;

ವನಂ ಓಭಾಸತೇ ಬುದ್ಧೋ, ಸಾಲರಾಜಾವ ಫುಲ್ಲಿತೋ.

೧೦. ವನಗ್ಗಾ ನಿಕ್ಖಮಿತ್ವಾನ, ಬುದ್ಧರಂಸೀ ವಿಧಾವರೇ;

ನಲಗ್ಗಿವಣ್ಣಸಙ್ಕಾಸಾ, ದಿಸ್ವಾ ಚಿತ್ತಂ ಪಸಾದಯಿಂ.

೧೧. ವಿಚಿನಂ ಅದ್ದಸಂ ಪುಪ್ಫಂ, ಕಣಿಕಾರಂ ದೇವಗನ್ಧಿಕಂ;

ತೀಣಿ ಪುಪ್ಫಾನಿ ಆದಾಯ, ಬುದ್ಧಸೇಟ್ಠಂ ಅಪೂಜಯಿಂ.

೧೨. ಬುದ್ಧಸ್ಸ ಆನುಭಾವೇನ, ತೀಣಿ ಪುಪ್ಫಾನಿ ಮೇ ತದಾ;

ಉದ್ಧವಣ್ಟಾ ಅಧೋಪತ್ತಾ, ಛಾಯಂ ಕುಬ್ಬನ್ತಿ ಸತ್ಥುನೋ.

೧೩. ತೇನ ಕಮ್ಮೇನ ಸುಕತೇನ, ಚೇತನಾಪಣಿಧೀಹಿಚ;

ಜಹಿತ್ವಾ ಮಾನುಸಂ ದೇಹಂ, ತಾವತಿಂಸಮಗಞ್ಛಹಂ.

೧೪. ತತ್ಥ ಮೇ ಸುಕತಂ ಬ್ಯಮ್ಹಂ, ಕಣಿಕಾರೀತಿ ಞಾಯತಿ;

ಸಟ್ಠಿಯೋಜನ ಮುಬ್ಬೇಧಂ, ತಿಂಸಯೋಜನವಿತ್ಥತಂ.

೧೫. ಸಹಸ್ಸಖಣ್ಡಂ ಸತಭೇಣ್ಡು, ಧಜಾಲು ಹರಿತಾಮಯಂ;

ಸತಸಹಸ್ಸಾನಿ ಬ್ಯೂಹಾನಿ, ಬ್ಯಮ್ಹೇ ಪಾತುರಹಂಸು ಮೇ.

೧೬. ಸೋಣ್ಣಮಯಾ ಮಣಿಮಯಾ, ಲೋಹಿತಙ್ಕಮಯಾ ಪಿಚ;

ಫಲಿಕಾ ಪಿಚ ಪಲ್ಲಙ್ಕಾ, ಯದಿಚ್ಛಕ ಯದಿಚ್ಛಕಾ.

೧೭. ಮಹಾರಹಞ್ಚ ಸಯನಂ, ತೂಲಿಕಂ ವಿಕತೀಯಕಂ;

ಉದ್ದಲೋಮಿಕಏಕನ್ತಂ, ಬಿಮ್ಬೋಹನಸಮಾಯುತಂ.

೧೮. ಭವನಾ ನಿಕ್ಖಮಿತ್ವಾನ, ಚರನ್ತೋ ದೇವಚಾರಿಕಂ;

ಯದಾ ಇಚ್ಛಾಮಿ ಗಮನಂ, ದೇವಸಂಘಪುರಕ್ಖತೋ.

೧೯. ಪುಪ್ಫಸ್ಸ ಹೇಟ್ಠಾ ತಿಟ್ಠಾಮಿ, ಉಪರಿಚ್ಛದನಂ ಮಮ;

ಸಮನ್ತಾ ಯೋಜನಸತಂ, ಕಣಿಕಾರೇಹಿ ಛಾದಿತಂ.

೨೦. ಸಟ್ಠಿತುರಿಯಸಹಸ್ಸಾನಿ, ಸಾಯಂ ಪಾತಂ ಉಪಟ್ಠಹುಂ;

ಪರಿವಾರೇನ್ತಿ ಮಂ ನಿಚ್ಚಂ, ರತ್ತಿನ್ದಿವಮತನ್ದಿತಾ.

೨೧. ತತ್ಥ ನಚ್ಚೇಹಿ ಗೀತೇಹಿ, ತಾಲೇಹಿ ವಾದಿತೇಹಿ ಚ;

ರಮಾಮಿ ಖಿಡ್ಡಾರತಿಯಾ, ಮೋದಾಮಿ ಕಾಮಕಾಮಹಂ.

೨೨. ತತ್ಥ ಭುತ್ವಾ ಚ ಪಿತ್ವಾ ಚ, ಮೋದಾಮಿ ತಿದಸೇ ತದಾ;

ನಾರೀಗಣೇಹಿ ಸಹಿತೋ, ಮೋದಾಮಿ ಬ್ಯಮ್ಹಮುತ್ತಮೇ.

೨೩. ಸತಾನಂ ಪಞ್ಚಕ್ಖತ್ತುಞ್ಚ, ದೇವರಜ್ಜ ಮಕಾರಯಿಂ;

ಸತಾನಂ ತೀಣಿಕ್ಖತ್ತುಂಚ, ಚಕ್ಕವತ್ತೀ ಅಹೋಸಹಂ;

ಪದೇಸರಜ್ಜಂ ವಿಪುಲಂ, ಗಣನಾತೋ ಅಸಂಖಿಯಂ.

೨೪. ಭವಾಭವೇ ಸಂಸರನ್ತೋ, ಮಹಾಭೋಗಂ ಲಭಾಮಹಂ;

ಭೋಗೇ ಮೇ ಊನತಾ ನತ್ಥಿ, ಬುದ್ಧಪೂಜಾಯಿ ದಂ ಫಲಂ.

೨೫. ದ್ವೇ ಮೇ ಭವೇ ಸಂಸರಾಮಿ, ದೇವತ್ತೇ ಅಥ ಮಾನುಸೇ;

ಅಞ್ಞಂ ಗತಿಂ ನ ಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೨೬. ದ್ವೇ ಮೇ ಕುಲೇ ಪಜಾನಾಮಿ, ಖತ್ತಿಯೇ ಚಾಪಿ ಬ್ರಾಹ್ಮಣೇ;

ನೀಚೇ ಕುಲೇ ನ ಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೨೭. ಹತ್ಥಿಯಾನಂ ಅಸ್ಸಯಾನಂ, ಸಿವಿಕಂ ಸನ್ದಮಾನಿಕಂ;

ಲಭಾಮಿ ಸಬ್ಬಮೇವೇ ತಂ, ಬುದ್ಧಪೂಜಾಯಿದಂ ಫಲಂ.

೨೮. ದಾಸೀಗಣಂ ದಾಸಗಣಂ, ನಾರಿಯೋ ಚ ಅಲಙ್ಕತಾ;

ಲಭಾಮಿ ಸಬ್ಬ ಮೇವೇ ತಂ, ಬುದ್ಧಪೂಜಾಯಿದಂ ಫಲಂ.

೨೯. ಕೋಸೇಯ್ಯಕಮ್ಬಲಿಯಾನಿ, ಖೋಮಕಪ್ಪಾಸಿಕಾನಿಚ;

ಲಭಾಮಿ ಸಬ್ಬಮೇವೇತಂ, ಬುದ್ಧಪೂಜಾಯಿದಂ ಫಲಂ.

೩೦. ನವವತ್ಥಂ ನವಫಲಂ, ನವಗ್ಗರಸಭೋಜನಂ;

ಲಭಾಮಿ ಸಬ್ಬಮೇವೇತಂ, ಬುದ್ಧಪೂಜಾಯಿದಂ ಫಲಂ.

೩೧. ಇಮಂ ಖಾದ ಇಮಂ ಭುಞ್ಜ, ಇಮಮ್ಹಿ ಸಯನೇ ಸಯ;

ಲಭಾಮಿ ಸಬ್ಬಮೇವೇತಂ, ಬುದ್ಧಪೂಜಾಯಿದಂ ಫಲಂ.

೩೨. ಸಬ್ಬತ್ಥ ಪೂಜಿತೋ ಹೋಮಿ, ಯಸೋ ಅಚ್ಚುಗ್ಗತೋ ಮಮ;

ಮಹೇಸಕ್ಖೋ ಘದಾ ಹೋಮಿ, ಅಭೇಜ್ಜಪರಿಸೋ ಸದಾ;

ಞಾತೀನಂ ಉತ್ತಮೋ ಹೋಮಿ, ಬುದ್ಧಪೂಜಾಯಿದಂ ಫಲಂ.

೩೩. ಸೀತಂ ಉಣ್ಹಂ ನ ಜಾನಾಮಿ, ಪರಿಳಾಹೋ ನ ವಿಜ್ಜತಿ;

ಅಥೋ ಚೇತಸಿಕಂ ದುಕ್ಖಂ, ಹದಯೇ ಮೇ ನ ವಿಜ್ಜತಿ.

೩೪. ಸುವಣ್ಣವಣ್ಣೋ ಹುತ್ವಾನ, ಸಂಸರಾಮಿ ಭವಾಭವೇ;

ವೇವಣ್ಣಿಯಂ ನ ಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೩೫. ದೇವಲೋಕಾ ಚವಿತ್ವಾನ, ಸುಕ್ಕಮೂಲೇನ ಚೋದಿತೋ;

ಸಾವತ್ಥಿಯಂ ಪುರೇ ಜಾತೋ, ಮಹಾಸಾಲೇ ಸುಅಡ್ಢಕೇ.

೩೬. ಪಞ್ಚಕಾಮಗುಣೇ ಹಿತ್ವಾ, ಪಬ್ಬಜಿಂಅನಗಾರಿಯಂ;

ಜಾತಿಯಾ ಸತ್ತವಸ್ಸೋಹಂ, ಅರಹತ್ತಮಪಾಪುಣಿಂ.

೩೭. ಉಪಸಮ್ಪಾದಯೀ ಬುದ್ಧೋ, ಗುಣಮಞ್ಞಾಯ ಚಕ್ಖುಮಾ;

ತರುಣೋವ ಪೂಜನೀಯೋ ಹಂ, ಬುದ್ಧಪೂಜಾಯಿದಂ ಫಲಂ.

೩೮. ದಿಬ್ಬಚಕ್ಖುಂ ವಿಸುದ್ಧಂ ಮೇ, ಸಮಾಧಿಕುಸಲೋ ಅಹಂ;

ಅಭಿಞ್ಞಾಪಾರಮಿಪ್ಪತ್ತೋ, ಬುದ್ಧಪೂಜಾಯಿದಂ ಫಲಂ.

೩೯. ಪಟಿಸಮ್ಭಿದಾ ಅನುಪ್ಪತ್ತೋ, ಇದ್ಧಿಪಾದೇಸು ಕೋವಿದೋ;

ಸದ್ಧಮ್ಮೇ ಪಾರಮಿಪ್ಪತ್ತೋ, ಬುದ್ಧಪೂಜಾಯಿದಂ ಫಲಂ.

೪೦. ತಿಂಸಕಪ್ಪಸಹಸ್ಸಮ್ಹಿ, ಯಂ ಬುದ್ಧಮಭಿಪೂಜಯಿಂ;

ದುಗ್ಗತಿಂ ನಾಭಿಜಾನಾಮಿ, ಬುದ್ಧಪೂಜಾಯಿದಂ ಫಲಂ.

೪೧. ಕಿಲೇಸಾ ಝಾಪಿತಾ ಮಯ್ಹಂ, ಭವಾ ಸಬ್ಬೇ ಸಮೂಹತಾ;

ನಾಗೋವ ಬನ್ಧನಂ ಛೇತ್ವಾ, ವಿಹರಾಮಿ ಅನಾಸವೋ.

೪೨. ಸ್ವಾಗತಂ ವತ ಮೇ ಆಸಿ, ಬುದ್ಧಸೇಟ್ಠಸ್ಸ ಸನ್ತಿಕಂ;

ತಿಸ್ಸೋ ವಿಜ್ಜಾ ಅನುಪ್ಪತ್ತೋ, ಕತಂ ಬುದ್ಧಸ್ಸ ಸಾಸನಂ.

೪೩. ಪಟಿಸಮ್ಭಿದಾ ಚತಸ್ಸೋ ಚ, ವಿಮೇಕ್ಖಾ ಪಿಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂತಿ;

ತಂ ಸುತ್ವಾ ಬಹೂ ಕುಸಲಕಮ್ಮಪರಾಯಣಾ ಅಹೇಸುಂ.

೪೪. ಸಹೇತುಕಾ ಪಚ್ಛಿಮಿಕಾಪಿ ಸತ್ತಾ,

ಪಾಪಂ ನ ಸಕ್ಕೋನ್ತಿ ಜಹಾತುಮೇವಂ;

ಅನಿಚ್ಛಮಾನೇಹಿ ಜನೇಹಿ ದುಕ್ಖಂ,

ಆರಾವ ಪಾಪಂ ಪರಿವಜ್ಜನೀಯಂತಿ.

ಉತ್ತರಸಾಮಣೇರಸ್ಸ ವತ್ಥುಂ ಚತುತ್ಥಂ.