೫೩. ಸೀಲಾ+ಭಿಕ್ಖಞ್ಞಾ+ವಸ್ಸಕೇಸು ಣೀ

ಕ್ರಿಯತ್ಥಾ ಣೀ ಹೋತಿ ಸೀಲಾದೀಸು. ಸಂಸ=ಪಸಂಸನೇ, ಪಿಯಪುಬ್ಬೋ, ಪಿಯಂ ಪಸಂಸತಿ ಸೀಲೇನಾತಿ ಪಿಯಪಸಂಸೀ ರಾಜಾ. ಅಥ ವಾ ಪಿಯಂ ಪಸಂಸತಿ ಸೀಲೇನ ವಾ ಧಮ್ಮೇನ ವಾ ತಸ್ಮಿಂ ಸಾಧು ವಾತಿ ಪಿಯಪಸಂಸೀ, ಪಿಯಪಸಂಸನೀ, ಪಿಯಪಸಂಸಿ ಕುಲಂ, ಆವುದ್ಧಿಮ್ಹಿ ತಥಾ ಸಚ್ಚವಾದೀ, ಧಮ್ಮವಾದೀ. ಸೀಘಯಾಯೀತಿ ‘‘ಅಸ್ಸಾ+ಣಾಪಿಮ್ಹೀ ಯುಕ’’ ಇತಿ ಯುಕ. ಪಾಪಕಾರೀ, ಮಾಲಕಾರೀ ಇಚ್ಚಾದಿ. ಉಣ್ಹಂ ಭುಞ್ಜತಿ ಸೀಲೇನಾತಿ ಉಣ್ಹಭೋಜೀ, ‘‘ಲಹುಸ್ಸುಪನ್ತಸ್ಸಾ’’ತಿ ಓಕಾರೋ.

ಆಭಿಕ್ಖಞ್ಞೇ-ಪುನಪ್ಪುನ ಖೀರಂ ಪಿವತೀತಿ ಖೀರಪಾಯೀ, ಯುಕ. ಅವಸ್ಸಂ ಕರೋತೀತಿ ಅವಸ್ಸಕಾರೀ. ‘‘ಸ್ಯಾದಿ ಸ್ಯಾದಿನೇ+ಕತ್ಥಂ’’ತಿ ಸಮಾಸೇ ವಿಭತ್ತಿಲೋಪೇ ಚ ಕತೇ ‘‘ಲೋಪೋ’’ತಿ ನಿಗ್ಗಹೀತಲೋಪೋ. ಸತನ್ದಾಯೀತಿ ಏತ್ಥ ಬಹುಲಂವಿಧಾನಾ ವಿಭತ್ತಿಅಲೋಪೇ ಅಮಾದಿಸಮಾಸಪಟಿಸೇಧೇ ಚ ಕತೇ ವಗ್ಗನ್ತಂ.

ಅಞ್ಞಸ್ಮಿಂ ಅತ್ಥೇಪಿ ‘‘ಣೀ’’ತಿ ಯೋಗವಿಭಾಗೇನ ಸಿದ್ಧಂ. ಸಾಧುಕಾರೀ, ಬ್ರಹ್ಮಚಾರೀ, ಅಸ್ಸದ್ಧಭೋಜೀ. ಪಣ್ಡಿತಂ ಅತ್ತಾನಂ ಮಞ್ಞತೀತಿ ಪಣ್ಡಿತಮಾನೀ, ಬಹುಸ್ಸುತಧಾರೀ ಇಚ್ಚಾದಿ.

ಸಾಧುಕರಣಂ ಸಾಧುಕಾರೋ, ಸೋ ಅಸ್ಸ ಅತ್ಥೀತಿ ಸಾಧುಕಾರೀತಿ ಘಣನ್ತಾ ಈ.