೭. ತಿಟ್ಠಗ್ವಾದೀನಿ

ತಿಟ್ಠಗುಆದೀನಿ ಅಞ್ಞತ್ಥೇನ ಸಿದ್ಧಾಪಿ ಅಸ್ಮಿಂ ಅಸಂಖ್ಯಸಮಾಸೇ ನಿಪಾತಿಯನ್ತಿ. ತಿಟ್ಠನ್ತಿ ಗಾವೋ ಯಸ್ಮಿಂ ಕಾಲೇತಿ ತಿಟ್ಠನ್ತಸದ್ದ+ಗೋಸದ್ದೇಹಿ ಪಠಮಾಯೋಮ್ಹಿ ಕತೇ ‘‘ವಾ+ನೇಕಞ್ಞತ್ಥೇ’’ತಿ ಸಮಾಸೋ, ಇಮಿನಾ ನಿಪಾತನಾ ಲೋಪೇ ನಪುಂಸಕತ್ಥೇ ಚ ಕತೇ ಸಿಮ್ಹಿ ಗೋಸ್ಸ ‘‘ಗೋಸ್ಸು’’ತಿ ಉಕಾರೇ ‘‘ಪುಬ್ಬಸ್ಮಾ+ಮಾದಿತೋ’’ತಿ ವಿಭತ್ತಿಲೋಪೋ. ಏವಂ ವಹನ್ತೀ ಗಾವೋ ಯಸ್ಮಿಂ ಕಾಲೇತಿ ವಹಗ್ಗು ಇಚ್ಚಾದಿ. ವೇಲಾಪ್ಪಕಾಸಕಪಾತೋಆದೀನಮ್ಪಿ ಏತ್ಥೇವ ಸಙ್ಗಹೋ, ಪಾತೋ ನಹಾನನ್ತಿ ಸತ್ತಮೀಅಮಾದಿಸಮಾಸೇ ಪಾತನಹಾನಂ, ಏವಂ ಸಾಯನಹಾನಂ, ಪಾತಕಾಲಂ, ಸಾಯಕಾಲಂ, ಪಾತಮೇಘಂ, ಸಾಯಮೇಘಂ, ಪಾತಮಗ್ಗಂ, ಸಾಯಮಗ್ಗಂ, ಏತ್ಥ ‘‘ಏಓನ+ಮ ವಣ್ಣೇ’’ತಿ ಅಕಾರೋ, ನಿಗ್ಗಹೀತಸ್ಸ ಲೋಪೋ ಚ ಹೋತಿ.