೨,೨. ಕಮ್ಮೇ ದುತಿಯಾ

ಕರೀಯತಿ ಕತ್ತುಕಿರಿಯಾಯ ಸಮ್ಬನ್ಧೀಯತೀತಿ ಕಮ್ಮಂ, ತಸ್ಮಿಂ ಕಮ್ಮಕಾರಕೇ ದುತಿಯಾವಿಭತ್ತಿ ಹೋತಿ. ತಂ ತಿವಿಧಂ ನಿಬ್ಬತ್ತಿ, ವಿಕತಿ, ಪತ್ತಿ ಭೇದೇನ, ತತ್ಥ ನಿಬ್ಬತ್ತಿಕಮ್ಮೇ ಮಾತಾ ಪುತ್ತಂ ವಿಜಾಯತಿ, ಆಹಾರೋ ಸುಖಂ ಜನಯತಿ, ಕಟಂ ಕರೋತಿ ದತ್ತೋ. ವಿಕತಿಯಂ ಕಟ್ಠ+ಮಙ್ಗಾರಂ ಕರೋತಿ, ಸುವಣ್ಣಂ ಕಟಕಂ ಕರೋತಿ, ವೀಹಯೋ ಲುನಾತಿ. ಪತ್ತಿಯಂ ದತ್ತೋ ಘರಂ ಪವಿಸತಿ, ಆದಿಚ್ಚಂ ಪಸ್ಸತಿ, ಧಮ್ಮಂ ಸುಣಾತಿ, ಪಣ್ಡಿತೇ ಪಯಿರುಪಾಸತಿ.

ವುತ್ತಞ್ಚ –

ನಿಬ್ಬತ್ತಿ+ವಿಕತಿ+ಪತ್ತಿ-ಭೇದಾ ಕಮ್ಮಂ ತಿಧಾ ಮತಂ;

ಕತ್ತುಕ್ರಿಯಾಭಿಗಮ್ಮನ್ತಂ, ಸುಖ+ಮಙ್ಗಾರಂ+ಘರಂ ಯಥಾತಿ.

ಕಟಂ ಕರೋತಿ ವಿಪುಲಂ ದಸ್ಸನೀಯನ್ತಿ ಅತ್ಥೇವ ಗುಣಯುತ್ತಸ್ಸ ಕಮ್ಮತಾ, ವಿಪುಲಂ ಕರೋತಿ, ದಸ್ಸನೀಯಂ ಕರೋತೀತಿ ಕ್ರಿಯಾಯ ಸಮ್ಬನ್ಧಿಯಮಾನತ್ತಾ. ಓದನೋ ಪಚ್ಚತೇತಿ ಓದನಸದ್ದತೋ ಕಮ್ಮತಾ ನಪ್ಪತೀಯತೇ, ಕಿಞ್ಚರಹಿ ಆಖ್ಯಾತತೋ.

ಇಚ್ಛಿತಕಮ್ಮಂ ಯಥಾ-ಗಾವುಂ ಪಯೋ ದೋಹತಿ, ಗೋಮನ್ತಂ ಗಾವಂ ಯಾಚತಿ, ಗಾವ+ಮವ ರುನ್ಧತಿ ವಜಂ, ಮಾಣವಕಂ ಮಗ್ಗಂ ಪುಚ್ಛತಿ, ಗೋಮನ್ತಂ ಗಾವಂ ಭಿಕ್ಖತೇ, ರುಕ್ಖ+ಮವಚಿನಾತಿ ಫಲಾನಿ, ರುಕ್ಖಾತ್ಯತ್ಥೋ. ಸಿಸ್ಸಂ ಧಮ್ಮಂ ಬ್ರೂತೇ. ಏತ್ಥ ಪಯೋ, ಗಾವಂ ಇಚ್ಚಾದಿ ಇಚ್ಛಿತಂ, ಗಾವುಂ, ಗೋಮನ್ತ+ಮಿಚ್ಚಾದಿ ಅನಿಚ್ಛಿತಂ. ಏವ+ಮನಿಚ್ಛಿತೇಪಿ ಕಣ್ಟಕಂ ಮದ್ದತಿ, ವಿಸಂ ಗಿಲತಿ. ಯಂ ನೇವಿ+ಚ್ಛಿತಂ, ನಾಪಿ ಅನಿಚ್ಛಿತಂ, ತತ್ರಾಪಿ ಗಾಮಂ ಗಚ್ಛನ್ತೋ ರುಕ್ಖಮೂಲ+ಮುಪಸಪ್ಪತಿ.

ಆಧಾರೇ ಅಧಿಸಿ+ಠಾ+ಸಾನಂ ಪಯೋಗೇ ಚ, ಪಥವಿಂ ಅಧಿಸೇಸ್ಸತಿ, ಗಾಮ+ಮಧಿತಿಟ್ಠತಿ, ರುಕ್ಖ+ಮಜ್ಝಾಸತೇತಿ. ಏತ್ಥ ಪಥವಿನ್ತಿ ಪಥವಿಯನ್ತಿ ಅತ್ಥೋ. ಏವ+ಮಭಿ, ನಿಪುಬ್ಬವಿಸಸ್ಸಾಪಿ, ಧಮ್ಮ+ಮಭಿನಿವಿಸತೇ, ಧಮ್ಮೇ ವಾ. ತಥಾ ಉಪ, ನ್ವ+ಜ್ಝಾ+ಪುಬ್ಬವಸತಿಸ್ಸ, ಗಾಮ+ಮುಪವಸತಿ, ಗಾಮ+ಮನುವಸತಿ, ವಿಹಾರ+ಮಧಿವಸತಿ, ಗಾಮ+ಮಾವಸತಿ, ಅಗಾರಂ ಅಜ್ಝವಸತಿ, ಏತ್ಥ ಗಾಮನ್ತಿ ಗಾಮೇತ್ಯತ್ಥೋ. ತಥಾ ತಪ್ಪಾನಾ+ಚಾರೇಪಿ, ನದಿಂ ಪಿಬತಿ, ಗಾಮಂ ಚರತಿ, ನದಿಯಂತ್ಯತ್ಥೋ. ಸಚೇ ಮಂ ನಾಲಪಿಸ್ಸತೀತಿ ಮಯಾ ಸದ್ಧಿಂತ್ಯತ್ಥೋ. ವಿಹಿತಾವ ಪಟಿ-ಯೋಗೇಪಿ ದುತಿಯಾ, ಪಟಿಭನ್ತು ತಂ ಚುನ್ದ ಬೋಜ್ಝಙ್ಗಾ, ತಮ್ಪಟಿ ಬೋಜ್ಝಙ್ಗಾ ಭಾಸನ್ತೂತಿ ಅತ್ಥೋ. ಉಪಮಾ ಮಂ ಪತಿಭಾತಿ, ಉಪಮಾ ಮಂ ಉಪಟ್ಠಾತಿತ್ಯತ್ಥೋ. ಧಾತುನಾಯುತ್ತೇ ‘‘ತಸ್ಸ ನಪ್ಪಟಿಭಾತೀ’’ತಿ ಛಟ್ಠೀ.