೨೩೨. ಅಪಾದಾದೋ ಪದತೇ+ಕವಾಕ್ಯೇತಿ

ಅಧಿಕಾರೋ. ಏತ್ಥ ಪಾದೋ ನಾಮ ಗಾಥಾಯ ಚತುತ್ಥಂಸೋ, ತಸ್ಮಾ ‘‘ತುಮ್ಹೇಹಿ ಪುಞ್ಞಂ ಪಸುತಂ ಅನಪ್ಪಕಂ’’ತಿ ಏತ್ಥ ವೋ ನ ಹೋತಿ. ಏತ್ಥ ಪದನ್ತಿ ವುತ್ತ ಸದ್ದೋ ಸಭಾವತೋ –

ಆಕಾಸವಾಯುಪ್ಪಭವೋ ಸರೀರಾ,

ಸಮುಚ್ಚರಂ ವತ್ತ+ಮುಪೇತಿ ನಾದೋ;

ಠಾನನ್ತರೇ ಸುಪ್ಪಟಿಹಞ್ಞಮಾನೋ,

ವಣ್ಣತ್ತ+ಮಾಗಚ್ಛತಿ ಸೋ ತು ಸದ್ದೋತಿ –

ವುತ್ತತ್ತಾ ಏಕೇಕೋ ವಣ್ಣೋ ಸದ್ದೋ ನಾಮ, ತಬ್ಬಣ್ಣಸಮೂಹೋ ಪದಂ, ತಪ್ಪದಸಮೂಹೋ ವಾಕ್ಯಞ್ಚ. ತಥಾ ಹಿ –

ವಿತತ್ಯನ್ತಂ ಪದಂ ತಸ್ಸ, ಚ ಯೋ ವಾಕ್ಯನ್ತಿ ಮನ್ವಯಂ;

ಉಪಚಾರಾ ವಣ್ಣಸದ್ದ-ವಾಚ್ಚಂ ತಂ ನ ಪರಿಚ್ಚಜೇ.

ತಂ ಪದಞ್ಚ –

ಪದಂ ಚತುಬ್ಬಿಧಂ ವುತ್ತಂ, ನಾಮಾ+ಖ್ಯಾತೋ+ಪಸಗ್ಗಜಂ;

ನಿಪಾತಜಞ್ಚ ತಞ್ಞೂ ಹಿ, ಅಸ್ಸೋ ಖಲ್ವಾ+ಭಿಧಾವತೀತಿ.

ತಂ ವಾಕ್ಯಞ್ಚ –

ಏಕಾಖ್ಯಾತೋ ಪದಚ್ಚಯೋ, ಸಿಯಾ ವಾಕ್ಯಂ ಸಕಾರಕೋತಿ –

ವುತ್ತಂ. ತಸ್ಮಾ ‘‘ವಿಭತ್ಯನ್ತಂ ಪದಂ, ಪದಸಮೂಹೋ ವಾಕ್ಯ’’ನ್ತಿ ಚ ವುಚ್ಚತಿ.