೧೫೩. ಹಿಮವತೋ ವಾ ಓ

ಹಿಮವತೋ ಸಿಮ್ಹಿ ನ್ತುಸ್ಸ ಓ ವಾ ಹೋತಿ, ಹಿಮವನ್ತೋ ಹಿಮವಾ. ಸೇಸಂ ಪುರಿಮಸಮಂ.

ಆಯಸ್ಮನ್ತುಸದ್ದೋ ಕಮ್ಮವಾಚಾಯ ಕ್ವಚಿ ಬಹುಲಾಧಿಕಾರಾ ದ್ವಿವಚನೇನ ಆಯಸ್ಮನ್ತಾ, ತಿಣ್ಣಂ ವಚನೇನ ಆಯಸ್ಮನ್ತೋತಿ ದಿಸ್ಸತಿ.

ಏವಂ ಸತಿಮಾ ಧಿತಿಮಾ ಗತಿಮಾ ಮುತಿಮಾ ಮತಿಮಾ ಜುತಿಮಾ ಸಿರಿಮಾ ಹಿರಿಮಾ ಥುತಿಮಾ ರತಿಮಾ ಯತಿಮಾ ಸುಚಿಮಾ ಕಲಿಮಾ ಬಲಿಮಾ ಕಸಿಮಾ ರುಚಿಮಾ ಬುದ್ಧಿಮಾ ಚಕ್ಖುಮಾ ಬನ್ಧುಮಾ ಹೇತುಮಾ ಸೇತುಮಾ ಕೇತುಮಾ ರಾಹುಮಾ ಭಾಣುಮಾ ಖಾಣುಮಾ ವಿಜ್ಜುಮಾ ಇಚ್ಚಾದಯೋ.

ಉಕಾರನ್ತಂ.

ವೇಸ್ಸಭೂ ಸಿಲೋಪೋ. ತೇ ಚ ರಸ್ಸಾಭಾವೋವ ವಿಸೇಸೋ. ‘‘ಏಕವಚನಯೋಸ್ವ+ಘೋನಂ’’ತಿ ರಸ್ಸೇ ‘‘ಲಾ ಯೋನಂ ವೋ ಪುಮೇ’’ತಿ ವೋ, ವೇಸ್ಸಭುವೋ, ‘‘ವೇವೋಸು ಲುಸ್ಸಾ’’ತಿ ವುತ್ತತ್ತಾ ನ ಟಾದೇಸೋ, ‘‘ಲೋಪೋತಿ ಯೋಲೋಪೇ ವೇಸ್ಸಭೂ. ‘‘ಗೇ ವಾ’’ತಿ ವಾ ರಸ್ಸೇ ಭೋ ವೇಸ್ಸಭು ವೇಸ್ಸಭೂ, ವೇಸ್ಸಭುವೋ ವೇಸ್ಸಭೂ. ವೇಸ್ಸಭುಂ, ವೇಸ್ಸಭುವೋ ವೇಸ್ಸಭೂ. ವೇಸ್ಸಭುನಾ ಇಚ್ಚಾದಿ ಭಿಕ್ಖುಸಮಂ. ಏವಂ ಸಯಮ್ಭೂ ಪರಾಭಿಭೂ ಅಭಿಭೂಆದಯೋ. ಗೋತ್ರಭೂ+ಸಹಭೂಸದ್ದೇಹಿ ಪನ ಯೋನಂ ‘‘ಜನ್ತ್ವಾದಿತೋ ನೋ ವಾ’’ತಿ ನೋ, ವೋ ವಾ, ಗೋತ್ರಭುನೋ ಗೋತ್ರಭುವೋ ಗೋತ್ರಭೂ. ಸಹಭುನೋ ಸಹಭುವೋ ಸಹಭೂ, ಸೇಸಂ ವೇಸ್ಸಭೂಸಮಂ.