೩೨. ಗೋಸ್ಸ

ಅನ್ತಾದೇಸತ್ಥೋತಿ ‘‘ಛಟ್ಠಿಯನ್ತಸ್ಸಾ’’ತಿ (೧-೧೭) ಬಾಧಕಸ್ಸ ‘‘ಟಾನುಬನ್ಧಾನೇಕವಣ್ಣಾ ಸಬ್ಬಸ್ಸಾ’’ತಿ (೧-೧೯) ಬಾಧಕೇನ ‘‘ವಾನುಬನ್ಧೋ’’ತಿ (೧-೧೮) ಸುತ್ತೇನ ಅನ್ತಾದೇಸತ್ಥೋ, ತೇನೇವ ವುತ್ತಂ-‘ಬಾಧಕಬಾಧನತ್ಥೋಯಮಾರಮ್ಭೋ’ತಿ, ಅವವಾದೇಸೇ ಪುಬ್ಬಸರಲೋಪೇ ದೀಘೇಚ ಗವಾಸ್ಸಂ, ಗವಚ್ಛನ್ತಿ ನಿಚ್ಚಂ. ಇದಂ ಕಥಂ ಸಿಜ್ಝತೀತಿ ಸಮ್ಬನ್ಧೋ, ಇದನ್ತಿ ಯಥರಿವೇಚ್ಚಾದಿಕಂ, ಕಿಂ ವಿನಾ ಸಿಜ್ಝತೀತಿ ಆಹ-‘ಏವಾದಿಸ್ಸಾ’ತಿಆದಿ, ಏವಸ್ಸ ಆದಿಏಕಾರೋ ಏವಾದಿ, ತಸ್ಸ, ರಿಆದೇಸಮನ್ತರೇನಾತಿ ಸಮ್ಬನ್ಧೋ, ಚಸದ್ದೋ ಅಟ್ಠಾನಪ್ಪಯುತ್ತೋ, ರಸ್ಸವಿಧಾನಞ್ಚಾತಿ ಯೋಜನೀಯೋ, ಕತೇಪಿ ತಸ್ಮಿನ್ತಿ ತಸ್ಮಿಂ ಸುತ್ತೇ ವಿಹಿತೇ ಚ, ನ ಸಿಜ್ಝತೀತಿ ಏವಾದಿಸ್ಸ ರಿಆದೇಸೋ ನ ಕತೋತಿ ಕತ್ವಾ ವುತ್ತಂ, ಭುಸಂ+ಏವಾತಿ (ಪನ) ಠಿತೇ ಮಹಾವುತ್ತಿನಾ ಏವಾದಿಸ್ಸ ಇಆದೇಸೇ ರೂಪಸಿದ್ಧಿ ಹೋತೇವ, ಇಧ ಪನ ಪಕಾರನ್ತರೇನ ‘ಭುಸಾಮಿವೇ’ತಿ ಸಾಧೇತುಮಾಹ ‘ತಮ್ಪಿ’ಚ್ಚಾದಿ.