೧೮. ವಾನು

‘‘ಛಟ್ಠಿಯನ್ತಸ್ಸೇ’’ತ್ಯನೇನೇವಾವಿಸೇಸೇನ ವಾನುಬನ್ಧಕಾರಿಯೇಪ್ಯನ್ತಸ್ಸ ಸಿದ್ಧೇ ಕಿಮತ್ಥೋಯಮಾರಮ್ಭೋತ್ಯಾಸಙ್ಕಿಯ ಟಾನುಬನ್ಧಾತ್ಯಾದಿನಾ ವಚನಫಲಮುಪದಸ್ಸೇನ್ತೋ ‘ಬಾಧಕಬಾಧನತ್ಥೋ-ಯಮಾರಮ್ಭೋ’ತಿ-ವದತಿ, ತಥಾಹಿ ‘‘ಛಟ್ಠಿಯನ್ತಸ್ಸೇ’’ತ್ಯಸ್ಸ ಬಾಧಕೋ ‘‘ಟಾನುಬನ್ಧಾನೇಕವಣ್ಣಾ ಸಬ್ಬಸ್ಸೇ’’ತಿ, ತಸ್ಸ ಚ ‘‘ವಾನುಬನ್ಧೋ’’ತ್ಯಯಂ ಯೋಗೋ ಬಾಧಕೋತಿ ಬಾಧಕಬಾಧನತ್ಥೋ ಸಮ್ಪಜ್ಜತೇ, ಅಪಇಚ್ಚಯಮುಪಸಗ್ಗೋ ವಜ್ಜನೇ ನೀವಾರಣೇ, ಪನಯನೇ ವಾ ವತ್ತತೇತಿ ಅಪೋದ್ಯನ್ತೇ ಉಸ್ಸಗ್ಗಲಕ್ಖಣಾನಿ ವಜ್ಜೀಯನ್ತೇ ನೀವಾರೀಯನ್ತೇ ಅಪನೀಯನ್ತೇ ನೇನೇತ್ಯಪವಾದೋ, ಸುತ್ತೇಕದೇಸೇನ ಸುತ್ತಮೇವೋಪಲಕ್ಖಿತನ್ತಿ ಅನ್ತಸ್ಸ‘ಛಟ್ಠಿಯನ್ತಸ್ಸಾ’ತಿ ಸುತ್ತಸ್ಸ ಅಪವಾದೋ ಅನ್ತಾಪವಾದೋ, ಉಸ್ಸಜ್ಜತೇ ನಿವತ್ತೀಯತ್ಯಪವಾದೇನೇತ್ಯುಸ್ಸಗ್ಗೋ, ಉಸ್ಸಗ್ಗಾಪವಾದಕ್ಕಮೋ ಪನೇತ್ಥ ಏವಂ ವೇದಿತಬ್ಬೋ ‘‘ಛಟ್ಠಿಯನ್ತಸ್ಸೇ’’ತ್ಯುಸ್ಸಗ್ಗೋ, ತದಪವಾದಾ ‘‘ಟಾನುಬನ್ಧಾನೇಕವಣ್ಣಾ ಸಬ್ಬಸ್ಸ’’ ‘‘ಉಕಾನುಬನ್ಧಾದ್ಯನ್ತಾ’’ ‘‘ಮಾನುಬನ್ಧೋ ಸರಾ ನಮನ್ತಾ ಪರೋ’’ತಿ, ‘‘ಟಾನುಬನ್ಧಾನೇಕವಣ್ಣಾ ಸಬ್ಬಸ್ಸೇ’’ತ್ಯುಸ್ಸಗ್ಗೋ, ತದ ಪವಾದಾ ‘‘ವಾನುಬನ್ಧೋ’’ ‘‘ಮಾನುಬನ್ಧೋ ಸರಾನಮನ್ತಾ ಪರೋ’’ತಿ.