೨. ದುತಿಯೋ ಕಣ್ಡೋ (ಸ್ಯಾದಿ)

೧. ದ್ವೇ ದ್ವೇ-ಕಾನೇಕೇಸು ನಾಮಸ್ಮಾ ಸಿ ಯೋ, ಅಂ ಯೋ, ನಾ ಹಿ, ಸ ನಂ, ಸ್ಮಾ ಹಿ, ಸ ನಂ, ಸ್ಮಿಂ ಸು.

ಏತೇಸಂ ದ್ವೇ ದ್ವೇ ಹೋನ್ತಿ ಏಕಾನೇಕತ್ಥೇಸು ವತ್ತಮಾನತೋ ನಾಮಸ್ಮಾ. ಮುನಿ ಮುನಯೋ, ಮುನಿಂ ಮುನಯೋ, ಮುನಿನಾ ಮುನೀಹಿ, ಮುನಿಸ್ಸ ಮುನೀನಂ, ಮುನಿಸ್ಮಾ ಮುನೀಹಿ, ಮುನಿಸ್ಸ ಮುನೀನಂ, ಮುನಿಸ್ಮಿಂ ಮುನೀಸು, ಏವಂ ಕುಮಾರೀ ಕುಮಾರಿಯೋ, ಕಞ್ಞಾ ಕಞ್ಞಾಯೋತಿ. ಏತಾನಿ ಸತ್ತ ದುಕಾನಿ ಸತ್ತ ವಿಭತ್ತಿಯೋ ವಿಭಾಗೋ ವಿಭತೀತಿ ಕತ್ವಾ, ಏತ್ಥ ಸಿಅಮಿತೀ-ಕಾರಾ-ಕಾರಾ ‘‘ಕಿಮಂ ಸಿಸು’’ ೨,೨೦೦ ತಿ ಸಂಕೇತತ್ಥಾ.

೨. ಕಮ್ಮೇ ದುತಿಯಾ.

ಕರೀಯತಿ ಕತ್ತು ಕಿರಿಯಾಯಾ-ಭಿಸಮ್ಬನ್ಧೀಯತೀತಿ ಕಮ್ಮಂ, ತಸ್ಮಿಂ ದುತಿಯಾವಿಭತ್ತಿ ಹೋತಂ. ಕಟಂ ಕರೋತಿ, ಓದನಂ ಪಚತಿ, ಆದಿಚ್ಚಂ ಪಸ್ಸತಿ.

‘ಓದನೋ ಪಚ್ಚತೀ’ತಿ ಓದನಸದ್ದತೋ ಕಮ್ಮತಾ ನಪ್ಪತೀಯತೇ, ಕಿಞ್ಚರಹಿ? ಆಖ್ಯಾತತೋ. ‘ಕಟಂ ಕರೋತಿ ವಿಪುಲಂ ದಸ್ಸನೀಯ’ನ್ತಿ ಅತ್ಥೇವ ಗುಣಯುತ್ತಸ್ಸ ಕಮ್ಮತಾ, ಇಚ್ಛಿತೇಪಿ ಕಮ್ಮತ್ತಾವ ದುತಿಯಾ ಸಿದ್ಧಾ ಗಾವುಂ ಪಯೋ ದೋಹತಿ, ಗೋಮನ್ತಂ ಗಾವಂ ಯಾಚತಿ, ಗಾವಮವರುನ್ಧತಿ ವಜಂ, ಮಾಣವಕಂ ಮಗ್ಗಂ ಪುಚ್ಛತಿ, ಗೋಮನ್ತಂ ಗಾವಂ ಭಿಕ್ಖತೇ, ರುಕ್ಖಮವಚಿನಾತಿ ಫಲಾನಿ, ಸಿಸ್ಸಂ ಧಮ್ಮಂ ಬ್ರೂತೇ, ಸಿಸ್ಸಂ ಧಮ್ಮಮನುಸಾಸತೀತಿ. ಏವಂ ಅನಿಚ್ಛಿತೇಪಿ ಅಹಿಂ ಲಙ್ಘಯತಿ, ವಿಸಂ ಭಕ್ಖೇತಿ. ಯಂನೇವಿಚ್ಛಿತಂ ನಾಪಿ ಅನಿಚ್ಛಿತಂ, ತತ್ಥಾಪಿ ದುತಿಯಾ ಸಿದ್ಧಾ. ಗಾಮಂ ಗಚ್ಛನ್ತೋ ರುಕ್ಖಮೂಲಮುಪಸಪ್ಪತಿ.

ಪಥವಿಂ ಅಧಿಸೇಸ್ಸತಿ, ಗಾಮಮಧಿತಿಟ್ಠತಿ, ರುಕ್ಖಮಜ್ಝಾಸತೇತಿಅಧಿಸೀಠಾಸಾನಂಪಯೋಗೇ-ಧಿಕರಣೇ ಕಮ್ಮವಚನಿಚ್ಛಾ, ವತ್ತಿಚ್ಛಾತೋ ಹಿ ಕಾರಕಾನಿ ಹೋನ್ತಿ. ತಂ ಯಥಾ-ವಲಾಹಕಾ ವಿಜ್ಜೋತತೇ, ವಲಾಹಕಸ್ಸ ವಿಜ್ಜೋತತೇ, ವಲಾಹಕೋ ವಿಜ್ಜೋತತೇ, ವಲಾಹಕೇ ವಿಜ್ಜೋತತೇ, ವಲಾಹಕೇನ ವಿಜ್ಜೋತತೇತಿ. ಏವಮಭಿನಿವಿಸಸ್ಸ ವಾ ಧಮ್ಮಮಭಿನಿವಿಸತೇ ಧಮ್ಮೇ ವಾ.

ತಥಾ ಉಪನ್ವಜ್ಝಾವಸಸ್ಸಾಭೋಜನ ನಿವುತ್ತಿವಚನಸ್ಸ ಗಾಮಮುಪವಸತಿ, ಗ, ಮಮನುವಸತಿ, ಪಬ್ಬತಮಧಿವಸತಿ, ಘರಮಾವಸತಿ. ಅಭೋಜನನಿವುತ್ತಿ ವಚನಸ್ಸಾತಿ ಕಿಂ? ಗಾಮೇ ಉಪವಸತಿ, ಭೋಜನನಿವುತ್ತಿಂ ಕರೋತೀತಿ ಅತ್ಥೋ. ತಪ್ಪಾನಾಚಾರೇಪಿ ಕಮ್ಮತ್ತಾವ ದುತಿಯಾ ಸಿಯಾ ನದಿಮ್ಪಿವತಿ, ಗಾಮಂ ಚರತಿ, ಏವಂ ‘ಸಚೇ ಮಂ ಆಲಪಿಸ್ಸತೀ’ತಿಆದೀಸುಪಿ. ವಿಹಿತಾವ ಪತಿಧಯೋಗೇ ದುತಿಯಾ – ‘ಪಟಿಭನ್ತು ತಂ ಚುನ್ದ ಬೋಜ್ಝಙ್ಗಾ’ತಿ. ತಂ ಪತಿ ಬೋಜ್ಝಙ್ಗಾ ಭಾಸನ್ತೂತಿ ಅತ್ಥೋ, ಯದಾತು ಧಾತುನಾಯುತ್ತೋ ಪತಿ, ತದಾ ತೇನಾ-ಯೋಗಾ ಸಮ್ಬನ್ಧೇ ಛಟ್ಠೀವ ‘ತಸ್ಸ ನಪ್ಪಟಿಭಾತೀ’ತಿ. ಅಕ್ಖೇ ದಿಬ್ಬತಿ, ಅಕ್ಖೇಹಿ ದಿಬ್ಬತಿ, ಅಕ್ಖೇಸು ದಿಬ್ಬತೀತಿ ಕಮ್ಮಕರಣಾಧಿಕರಣವಚನಿಚ್ಛಾ.

೩. ಕಾಲದ್ಧಾನಮಚ್ಚನ್ತಸಂಯೋಗೇ.

ಕಿರಿಯಾ, ಗುಣ, ದಬ್ಬೇಹಿ ಸಾಕಲ್ಲೇನ ಕಾಲದ್ಧಾನಂ ಸಮ್ಬನ್ಧೋ ಅಚ್ಚನ್ತಸಂಯೋಗೋ. ತಸ್ಮಿಂ ವಿಞ್ಞಾಯಮಾನೇ ಕಾಲಸದ್ದೇಹಿ ಅದ್ಧಅದ್ದೇಹಿ ಚ ದುತಿಯಾ ಹೋತಿ. ಮಾಸಮಧೀತೇ, ಮಾಸಂ ಕಲ್ಯಾಣಿ, ಮಾಸಂ ಗುಳಧಾನಾ, ಕೋಸಮಧೀತೇ, ಕೋಸಂ ಕುಟಿಲಾ ನದೀ, ಕೋಸಂ ಪಬ್ಬತೋ. ಅಚನ್ತಸಂಯೋಗೇತಿ ಕಿಂ? ಮಾಸಸ್ಸ ದ್ವೀಹಮಧೀತೇ, ಕೋಸಸ್ಸೇಕದೇಸೇ ಪಬ್ಬತೋ.

ಪುಬ್ಬಣ್ಹಸಮಯಂ ನಿವಾಸೇತ್ವಾ, ಏಕಂ ಸಮಯಂ ಭಗವಾ, ಇಮಂ ರತ್ತಿಂ ಚತ್ತಾರೋ ಮಹಾರಾಜಾತಿ ಏವಮಾದೀಸು ಕಾಲವಾಚೀ ಹಿ ಅಚ್ಚನ್ತಸಂಯೋಗತ್ತಾವ ದುತಿಯಾ ಸಿದ್ಧಾ. ವಿಭತ್ತಿವಿಪಲ್ಲಾಸೇನಪಿ ವಾ ಬಹುಲಂವಿಧಾನಾ.

ಫಲಪ್ಪತ್ತಿಯಂ ಕಿರಿಯಾಪರಿಸಮತ್ತ್ಯಪವಗ್ಗೋ, ತಸ್ಮಿಂ ವಿಞ್ಞಾಯಮಾನೇ ಕಾಲದ್ಧಾನಂ ಕಿರಿಯಾಯಾಚ್ಚನ್ತಸಂಯೋಗೇ ತತಿಯಾಭಿಮತಾ, ಸಾಪಿ ಕರಣತ್ತಾವ ಸಿದ್ಧಾ ‘ಮಾಸೇನಾನುವಾಕೋ-ಧೀತೋ, ಕೋಸೇನಾನುವಾಕೋ-ಧೀತೋ’ತಿ. ಅನಪವಗ್ಗೇತು ಅಸಾಧಕತಮತ್ತಾಕರಣತ್ತಾಭಾವೇ ದುತಿಯಾವ ‘ಮಾಸಮಧೀತೋ-ನುವಾಕೋ, ನ ಚಾನೇ ನ ಗಹಿತೋ’ತಿ.

ಕಾರಕಮಜ್ಝೇ ಯೇ ಕಾಲದ್ಧಾನವಾಚಿನೋ, ತತೋ ಸತ್ತಮೀಪಞ್ಚಮಿಯೋ ಅಭಿಮತಾ ‘ಅಜ್ಜ ಭುತ್ವಾ ದೇವದತ್ತೋ ದ್ವಿಹೇ ಭುಞ್ಜಿಸ್ಸತಿ, ದ್ವೀಹಾ ಭುಞ್ಜಿಸ್ಸತಿ, ಅತ್ರಟ್ಠೋ-ಯಮಿಸ್ಸಾಸೋ ಕೋಸೇ ಲಕ್ಖಂ ವಿಜ್ಝತಿ, ಕೋಸಾ ಲಕ್ಖಂ ವಿಜ್ಝತೀ’ತಿ, ತಾಪೀಹ ಸಕಸಕಕಾರಕವಚನಿಚ್ಛಾಯೇವ ಸಿದ್ಧಾ.

೪. ಗತಿ ಬೋಧಾಹಾರ ಸದ್ದತ್ಥಾಕಮ್ಮಕ ಭಜ್ಜಾದೀನಂ ಪಯೋಜ್ಜೇ.

ಗಮನತ್ಥಾನಂ ಬೋಧತ್ಥಾನಂ ಆಹಾರತ್ಥಾನಂ ಸದ್ದತ್ಥಾನಮಕಮ್ಮಕಾನಂ ಭಜ್ಜಾದೀನಞ್ಚ ಪಯೋಜ್ಜೇ ಕತ್ತರಿ ದುತಿಯಾ ಹೋತಿ. ಸಾಮತ್ಥಿಯಾ ಚ ಪಯೋಜಕಬ್ಯಾಪಾರೇನ ಕಮ್ಮತಾವಸ್ಸ ಹೋತೀತಿ ಪತೀಯತೇ. ಗಮಯತಿ ಮಾಣವಕಂ ಗಾಮಂ, ಯಾಪಯತಿ ಮಾಣವಕಂ ಗಾಮಂ, ಬೋಧಯತಿ ಮಾಣವಕಂ ಧಮ್ಮಂ, ವೇದಯತಿ ಮಾಣವಕಂ ಧಮ್ಮಂ, ಭೋಜಯತಿ ಮಾಣ-ವಕಂ ಮೋದಕಂ, ಆಸಯತಿ ಮಾಣವಕಂ ಮೋದಕಂ, ಅಜ್ಝಾಪಯತಿ ಮಾಣವಕಂ ವೇದಂ, ಪಾಠಯತಿ ಮಾಣವಕಂ ವೇದಂ, ಆಸಯತಿ ದೇವದತ್ತಂ, ಸಾಯಯತಿ ದೇವದತ್ತಂ, ಅಞ್ಞಂ ಭಜ್ಜಾಪೇತಿ, ಅಞ್ಞಂ ಕೋಟ್ಟಾಪೇತಿ, ಅಞ್ಞಂ ಸನ್ಥರಾಪೇತಿ. ಏತೇಸಮೇವಾತಿ ಕಿಂ? ಪಾಚೇತಿ ಓದನಂ ದೇವದತ್ತೇನ ಯಞ್ಞದತ್ತೋ. ಪಯೋಜ್ಜೇತಿ ಕಿಂ? ಗಚ್ಛತಿ ದೇವದತ್ತೋ. ಯದಾ ಚರಹಿ ಗಮಯತಿ ದೇವದತ್ತಂ ಯಞ್ಞದತ್ತೋ, ತಮಪರೋ ಪಯೋಜೇತಿ, ತದಾ ಗಮಯತಿ ದೇವದತ್ತಂ ಯಞ್ಞದತ್ತೇನೇತಿ ಭವಿತಬ್ಬಂ … ಗಮಯತಿಸ್ಸಾ-ಗಮನತ್ಥತ್ತಾ.

೫. ಹರಾದೀನಂ ವಾ.

ಹರಾದೀನಂ ಪಯೋಜ್ಜೇ ಕತ್ತರಿ ದುತಿಯಾ ಹೋತಿ ವಾ. ಹಾರೇತಿ ಭಾರಂ ದೇವದತ್ತಂ ದೇವದತ್ತೇನೇತಿ ವಾ, ಅಜ್ಝೋಹಾರೇತಿ ಸತ್ತುಂ ದೇವದತ್ತಂ ದೇವದತ್ತೇನೇತಿ ವಾ, ಕಾರೇತಿ ಕಟಂ ದೇವದತ್ತಂ ದೇವದತ್ತೇನೇತಿ ವಾ ದಸ್ಸಯತೇ ಜನಂ ರಾಜಂ ಜನೇನೇತಿ ವಾ, ಅಭಿವಾದಯತೇ ಗುರುಂ ದೇವದತ್ತಂ ದೇವದತ್ತೇನೇತಿ ವಾ.

೬. ನ ಖಾದಾದೀನಂ.

ಖಾದಾದೀನಂ ಪಯೋಜ್ಜೇ ಕತ್ತರಿ ದುತಿಯಾ ನ ಹೋತಿ. ಖಾದಯತಿ ದೇವದತ್ತೇನ, ಆದಯತಿ ದೇವದತ್ತೇನ, ಅವ್ಹ, ಪಯತಿ ದೇವದತ್ತೇನ, ಸದ್ದಾಯಯತಿ ದೇವದತ್ತೇನ, ಕನ್ದಯತಿ ದೇವದತ್ತೇನ, ನಾಯಯತಿ ದೇವದತ್ತೇನ.

(೧) ವಹಿಸ್ಸಾನಿಯನ್ತುಕೇ. ವಾಹಯತಿ ಭಾರಂ ದೇವದತ್ತೇನ ಅನಿಯನ್ತುಕೇತಿ ಕಿಂ? ವಾಹ-ಯತಿ ಭಾರಂ ಬಲೀಬದ್ದೇ.

(೨) ಭಕ್ಖಿಸ್ಸಾಹಿಂ ಸಾಯಂ. ಭಕ್ಖಯತಿ ಮೋದಕೇ ದೇವದತ್ತೇನ. ಅಹಿಂಸಾಯನ್ತಿ ಕಿಂ? ಭಕ್ಖಯತಿ ಬಲೀಬದ್ದೇ ಸಸ್ಸಂ.

೭. ಝಾದೀಹಿ ಯುತ್ತಾ.

ಧೀಆದೀಹಿ ಯುತ್ತತೋ ದುತಿಯಾ ಹೋತಿ. ಧಿರತ್ಥು ಮಂ ಪೂತಿಕಾಯಂ, ಅನ್ತರಾ ಚ ರಾಜಗಹಂ ಅನ್ತರಾ ಚ ನಾಲನ್ದಂ, ಸಮಾಧಾನಮನ್ತರೇನ, ಮುಚಲಿನ್ದಮಭಿತೋ ಸರಮಿಚ್ಚಾದಿ, ಛಟ್ಠಿಯಾಪವಾದೋ-ಯಂ.

೮. ಲಕ್ಖಣಿತ್ಥಮ್ಭೂತವಿಚ್ಛಾಸ್ವಭಿನಾ.

ಲಕ್ಖಣಾದೀಸ್ವತ್ಥೇಸ್ವಭಿನಾ ಯುತ್ತಮ್ಹಾ ದುತಿಯಾ ಮಹಾತಿ. ರುಕ್ಖಮಭಿ ವಿಜ್ಜೋತತೇ ವಿಜ್ಜು, ಸಾಧು ದೇವದತ್ತೋ ಮಾತರಮಭಿ, ರುಕ್ಖಂ ರುಕ್ಖಮಭಿತಿಟ್ಠತಿ.

೯. ಪತಿಪರೀಹಿ ಭಾಗೇ ಚ.

ಪತಿಪರೀಹಿ ಯುತ್ತಮ್ಹಾ ಲಕ್ಖಣಾದೀಸು ಭಾಗೇ ಚತ್ಥೇ ದುತಿಯಾ ಹೋತಿ. ರುಕ್ಖಂ ಪತಿ ವಿಜ್ಜೋತತೇ ವಿಜ್ಜು, ಸಾಧು ದೇವದತ್ತೋ ಮಾತರಂ ಪತಿ, ರುಕ್ಖಂ ರುಕ್ಖಂ ಪತಿ ತಿಟ್ಠತಿ, ಯದೇತ್ಥ ಮಂ ಪತಿ ಸಿಯಾ. ರುಕ್ಖಂ ಪರಿ ವಿಜ್ಜೋತತೇ ವಿಜ್ಜು, ಸಾಧು ದೇವದತ್ತೋ ಮಾತರಂ ಪರಿ, ರುಕ್ಖಂ ರುಕ್ಖಂ ಪರಿ ತಿಟ್ಠತಿ, ಯದೇತ್ಥ ಮಂ ಪರಿ ಸಿಯಾ.

೧೦. ಅನುನಾ.

ಲಕ್ಖಣಾದೀಸ್ವತ್ಥೇಸ್ವನುನಾ ಯುತ್ತಮ್ಹಾ ದುತಿಯಾ ಹೋತಿ. ರುಕ್ಖಮನು ವಿಜ್ಜೋತತೇ ವಿಜ್ಜು, ಸಚ್ಚಕಿರಿಯಮನು ವುಟ್ಠಿ ಪಾವಸ್ಸಿ, ಹೇತು ಚ ಲಕ್ಖಣಂ ಭವತಿ, ಸಾಧು ದೇವದತ್ತೋ ಮಾತರಮನು, ರುಕ್ಖಂ ರುಕ್ಖಮನು ತಿಟ್ಠತಿ, ಯದೇತ್ಥ ಮಂ ಅನು ಸಿಯಾ.

೧೧. ಸಹತ್ಥೇ.

ಸಹತ್ಥೇ-ನುನಾ ಯುತ್ತಮ್ಹಾ ದುತಿಯಾ ಹೋತಿ. ಪಬ್ಬತಮನು ಸೇನಾ ತಿಟ್ಠತಿ.

೧೨. ಹೀನೇ.

ಹೀನತ್ಥೇ-ನುನಾ ಯುತ್ತಮ್ಹಾ ದುತಿಯಾ ಹೋತಿ. ಅನು ಸಾರಿಪುತ್ತಂ ಪಞ್ಞವನ್ತೋ.

೧೩. ಉಪೇನ.

ಹೀನತ್ಥೇ ಉಪೇನ ಯುತ್ತಮ್ಹಾ ದುತಿಯಾ ಹೋತಿ. ಉಪ ಸಾರಿಪುತ್ತಂ ಪಞ್ಞವನ್ಥೋ.

೧೪. ಸತ್ತಮ್ಯಾಧಿಕ್ಯೇ.

ಆಧಿಕ್ಯತ್ಥೇ ಉಪೇನ ಯುತ್ತಮ್ಹಾ ಸತ್ತಮೀ ಹೋತಿ. ಉಪ ಖಾರಿಯಂ ದೋಣೋ.

೧೫. ಸಾಮಿತ್ತೇ-ಧಿನಾ.

ಸಾಮಿಭಾವತ್ಥೇ-ಧಿನಾ ಯುತ್ತಮ್ಹಾ ಸತ್ತಮೀ ಹೋತಿ. ಅಧಿ ಬ್ರಹ್ಮದತ್ತೇ ಪಞ್ಚಾಲಾ, ಅಧಿ ಪಞ್ಚಾಲೇಸು ಬ್ರಹ್ಮದತ್ತೋ.

೧೬. ಕತ್ತುಕರೇಣೇಸು ತತಿಯಾ.

ಕತ್ತರಿ ಕರಣೇ ಚ ಕಾರಕೇ ತತಿಯಾ ಹೋತಿ. ಪುರಿಸೇನ ಕತಂ, ಅಸಿನಾ ಛಿನ್ದತಿ. ಪಕತಿಯಾ-ಭಿರೂಪೋ, ಗೋತ್ಥೇನ ಗೋತಮೋ, ಸುಮೇಧೋ ನಾಮ ನಾಮೇನ, ಜಾತಿಯಾ ಸತ್ತವಸ್ಸಿಕೋತಿ ಭೂಧಾತುಸ್ಸ ಸಮ್ಭವಾ ಕರಣೇ ಏವ ತತಿಯಾ. ಏವಂ ಸಮೇನ ಧಾವತಿ ವಿಸಮೇನ ಧಾವತಿ, ದ್ವಿದೋಣೇನ ಧಞ್ಞಂ ಕಿಣಾತಿ, ಪಞ್ಚಕೇನ ಪಸವೋ ಕಿಣಾತೀತಿ.

೧೭. ಸಹತ್ಥೇನ.

ಸಹತ್ಥೇನ ಯೋಗೇ ತತಿಯಾ ಸಿಯಾ. ಪುತ್ತೇನ ಸಹ ಗತೋ, ಪುತ್ತೇನ ಸದ್ಧಿಂ ಆಗತೋ, ತತಿಯಾಪಿ ಛಟ್ಠೀವ ಅಪ್ಪಧಾನೇ ಏವ ಭವತಿ.

೧೮. ಲಕ್ಖಣೇ.

ಲಕ್ಖಣೇ ವತ್ತಮಾನತೋ ತತಿಯಾ ಸಿಯಾ. ತಿದಣ್ಡಕೇನ ಪರಿಬ್ಬಾಜಕಮದ್ದಕ್ಖೀ, ಅಕ್ಖಿನಾ ಕಾಣೋ, ತೇನ ಹಿ ಅಙ್ಗೇನ ಅಙ್ಗಿನೋ ವಿಕಾರೋ ಲಕ್ಖೀಯತೇ.

೧೯. ಹೇತುಮ್ಹಿ.

ತಕ್ಕಿರಿಯಾ ಯೋಗ್ಗೇ ತತಿಯಾ ಸಿಯಾ. ಅನ್ನೇನ ವಸತಿ, ವಿಜ್ಜಾಯ ಯಸೋ.

೨೦. ಪಞ್ಚಮೀಣೇ ವಾ.

ಇಣೇ ಹೇತುಮ್ಹಿ ಪಞ್ಚಮೀ ಹೋತಿ ವಾ. ಸತಸ್ಮಾ ಬದ್ಧೋ, ಸತೇನ ವಾ.

೨೧. ಗುಣೇ.

ಪರಙ್ಗಭೂತೇ ಹೇತುಮ್ಹಿ ಪಞ್ಚಮೀ ಹೋತಿ ವಾ. ಜಳತ್ತಾ ಬದ್ಧೋ ಜಳತ್ತೇನ ವಾ, ಪಞ್ಞಾಯ ಮುತ್ತೋ, ಹುತ್ವಾ ಅಭಾವತೋಅನಿಚ್ಚಾ, ಸಙ್ಖಾರನಿರೋಧಾ ವಿಞ್ಞಾಣನಿರೋಧೋ.

೨೨. ಛಟ್ಠೀ ಹೇತ್ವತ್ಥೇಹಿ.

ಹೇತ್ವತ್ಥವಾಚೀಹಿ ಯೋಗೇ ಹೇತುಮ್ಹಿ ಛಟ್ಠೀ ಸಿಯಾ. ಉದರಸ್ಸ ಹೇತು, ಉದರಸ್ಸ ಕಾರಣಾ.

೨೩. ಸಬ್ಬಾದಿತೋ ಸಬ್ಬಾ.

ಹೇತ್ವತ್ಥೇಹಿ ಯೋಗೇ ಸಬ್ಬಾದೀಹಿ ಸಬ್ಬಾ ವಿಭತ್ತಿಯೋ ಹೋನ್ತಿ. ಕೋ ಹೇತು, ಕಂ ಹೇತುಂ, ಕೇನ ಹೇತುನಾ, ಕಸ್ಸ ಹೇತುಸ್ಸ, ಕಸ್ಮಾ ಹೇತುಸ್ಮಾ, ಕಸ್ಸ ಹೇತುಸ್ಸ, ಕಸ್ಮಿಂ ಹೇತುಸ್ಮಿಂ, ಕಿಂ ಕಾರಣಂ, ಕೇನ ಕಾರಣೇನ, ಕಿಂ ನಿಮಿತ್ತಂ, ಕೇನ ನಿಮಿತ್ತೇನ, ಕಿಂ ಪಯೋಜನಂ, ಕೇನ ಪಯೋಜನೇನ ಇಚ್ಚೇವಮಾದಿ. ಹೇತ್ವತ್ಥೇಹೀತ್ವೇವ? ಕೇನ ಕತಂ.

೨೪. ಚತುತ್ಥೀ ಸಮ್ಪದಾನೇ.

ಯಸ್ಸ ಸಮ್ಮಾ ಪದೀಯತೇ ತಸ್ಮಿಂ ಚತುತ್ಥೀ ಸಿಯಾ. ಸಙ್ಘಸ್ಸ ದದಾತಿ. ಆಧಾರವಿವಕ್ಖಾಯಂ ಸತ್ತಮೀಪಿ ಸಿಯಾ ಸಙ್ಘೇ ದೇಹಿ.

೨೫. ತಾದತ್ಥ್ಯೇ.

ತಸ್ಸೇ-ದಂ ತದತ್ಥಂ, ತದತ್ಥಭಾವೇ ಜೋತನೀಯೇ ನಾಮಸ್ಮಾ ಚತುತ್ಥೀ ಸಿಯಾ. ಸೀತಸ್ಸ ಪಟಿಘಾತಾಯ, ಅತ್ಥಾಯ ಹಿತಾಯ (ಸುಖಾಯ) ದೇವಮನುಸ್ಸಾನಂ, ನಾಲಂ ದಾರಭರಣಾಯ, ಯೂಪಾಯ ದಾರು, ಪಾಕಾಯ ವಜತೀತ್ವೇವಮಾದಿ.

ಕಸ್ಸ ಸಾದುಂ ನ ರುಚ್ಚಭಿ, ಮಾ-ಯಸ್ಮನ್ತಾನಮ್ಪಿ ಸಙ್ಘಭೇದೋ ರುಚ್ಚಿತ್ಥ, ಖಮತಿ ಸಙ್ಘಸ್ಸ, ಭತ್ತಮಸ್ಸ ನಚ್ಛಾದೇಸೀತಿ ಛಟ್ಠೀ ಸಮ್ಬನ್ಧವಚನಿಚ್ಛಾಯಂ, ನ ಚೇವಂ ವಿರೋಧೋ ಸಿಯಾ ಸದಿಸರೂಪತ್ತಾ, ಏವಂವಿಧೇಸು ಚ ಸಮ್ಬನ್ಧಸ್ಸ ಸದ್ದಿಕಾನುಮತತ್ತಾ, ಕಸ್ಸ ವಾ ತ್ವಂ ಧಮ್ಮಂ ರೋಚೇಸೀತಿ ಅತ್ಥಮತ್ತೇ ಪಠಮಾ.

ಏವಮಞ್ಞಾಪಿ ವಿಧಞ್ಞಯ್ಯಾ, ಪರತೋಪಿ ಯಥಾಗಮಂ.

ರಞ್ಞೋ ಸತಂ ಧಾರೇತಿ, ರಞ್ಞೋ ಛತ್ತಂ ಧಾರೇತೀತಿ ಸಮ್ಬನ್ಧೇ ಛಟ್ಠೀ, ಏವಂ ರಞ್ಞೋ ಸಿಲಾಘತೇ, ರಞ್ಞೋ ಹನುತೇ, ರಞ್ಞೋ ಉಪತಿಟ್ಠತೇ, ರಞ್ಞೋ ಸಪತೇ, ದೇವಾಪಿ ತಸ್ಸ ಪಿಹಯನ್ತಿ ತಾದಿನೋ, ತಸ್ಸ ಕುಜ್ಝ ಮಹಾವೀರ, ಯದಿಹಂ ತಸ್ಸ ಪಕುಪ್ಪೇಯ್ಯಂ, ದುಹಯತಿ ದಿಸಾನಂ ಮೇಘೋ, ಯೋ ಮಿತ್ತಾನಂ ನ ದೂಭತಿ, ಯೋ ಅಪ್ಪದುಟ್ಠಸ್ಸ ನರಸ್ಸ ದುಸ್ಸತಿ, ಕ್ಯಾಹಂ ಅಯ್ಯಾನಂ ಅಪರಜ್ಝಾಮಿ, ಇಸ್ಸಯನ್ತಿ ಸಮಣಾನಂ ತಿತ್ಥಿಯಾ, ಧಮ್ಮೇನ ನಯಮಾನಾನಂ ಕಾ ಉಸೂಯಾ ರಞ್ಞೋ ಭಾಗ್ಯಮಾರಜ್ಝತಿ, ರಞ್ಞೋ ಭಾಗ್ಯಮಿಕ್ಖತೇ, ತೇನ ಯಾಚಿತೋ ಅಯಾಚಿತೋ ವಾ ತಸ್ಸ ಗಾವೋ ಪಟಿಸುಣಾತಿ, ಗಾವೋ ಆಸುಣಾತಿ, ಭಗವತೋ ಪಚ್ಚಸ್ಸೋಸುಂ, ಹೋತು ಪತಿಗಿಣಾತಿ, ಹೋತ್ವನುಗಿಣಾತಿ, ಆರೋಚಯಾಮಿ ವೋ ಪತಿವೇದಯಾಮಿ ವೋ, ಧಮ್ಮಂ ತೇ ದೇಸೇಸ್ಸಾಮಿ, ಯಥಾ ವೋ ಭಗವಾ ಬ್ಯಾಕರೇಯ್ಯ, ಅಲಂ ತೇ ಇಧ ವಾಸೇನ, ಕಿಂ ತೇ ಜಟಾಹಿ ದುಮ್ಮೇಧ, ಅರಹತಿ ಮಲ್ಲೋ ಮಲ್ಲಸ್ಸಾತಿ.

ಜೀವಿತಂ ತಿಣಾಯಪಿ ನ ಮಞ್ಞಮಾನೋತಿ ತಾದತ್ಥ್ಯ ಚತುತ್ಥೀ, ತಿಣೇನ ಯೋ ಅತ್ಥೋ ತದತ್ಥಾಯಪೀತಿ ಅತ್ಥೋ, ‘‘ಯೋ ಚ ಸೀತಞ್ಚ ಉಣ್ಹಞ್ಚ, ತಿಣಾ ಭಿಯ್ಯೋ ನ ಮಞ್ಞತಿ’’ ತಿಣಮಿವ ಜೀವಿತಂ ಮಞ್ಞಮಾನೋತಿ ಸವಿಸಯಾವ ವಿಭತ್ತಿಯೋ. ಸಗ್ಗಾಯ ಗಚ್ಛತೀತಿ ತಾದತ್ಥ್ಯೇ ಚತುತ್ಥೀ, ಯೋ ಹಿ ಸಗ್ಗಂ ಗಚ್ಛತಿ ತದತ್ಥಂ ತಸ್ಸ ಗಮನನ್ತಿ, ಕಮ್ಮವಚನಿಚ್ಛಾಯನ್ತು ದುತಿಯಾವ ಸಗ್ಗಂ ಗಚ್ಛತೀತಿ.

ಆಯು ಭೋತೋ ಹೋತು, ಚಿರಂ ಜೀವಿತಂ, ಭದ್ದಂ ಕಲ್ಯಾಣಂ ಅತ್ಥಂ ಪಯೋಜನಂ, ಕುಸಲಂ ಅನಾಮಯಂ, ಹಿತಂ ಪಥ್ಯಂ ಸುಖಂ ಸಾತಂ ಭೋತೋ ಹೋತು, ಸಾಧು ಸಮ್ಮುತಿ ಮೇತಸ್ಸ, ಪುತ್ತಸ್ಸಾವಿಕರೇಯ್ಯ ಗುಯ್ಹಮತ್ಥಂ, ತಸ್ಸ ಮೇ ಸಕ್ಕೋ ಪಾತುರಹೋಸಿ, ತಸ್ಸ ಪಹಿಣೇಯ್ಯ, ಭಿಕ್ಖೂನಂ ದುತಂ ಪಾಹೇಸಿ, ಕಪ್ಪತಿ ಸಮಣಾನಂ ಆಯೋಗೋ, ಏಕಸ್ಸ ದ್ವಿನ್ನಂ ತಿಣ್ಣಂ ವಾ ಪಹೋತಿ, ಉಪಮಂ ತೇ ಕರಿಸ್ಸಾಮಿ, ಅಞ್ಜಲಿಂ ತೇ ಪಗ್ಗಣ್ಹಾಮಿ, ತಸ್ಸ ಫಾಸು, ಲೋಕಸ್ಸತ್ಥೋ, ನಮೋ ತೇ ಪುರಿಸಾಜಞ್ಞ, ಸೋತ್ಥಿ ತಸ್ಸ, ಅಲಂ ಮಲ್ಲೋ ಮಲ್ಲಸ್ಸ, ಸಮತ್ಥೋ ಮಲ್ಲೋ ಮಲ್ಲಸ್ಸ, ತಸ್ಸ ಹಿತಂ, ತಸ್ಸ ಸುಖಂ, ಸ್ವಾಗತಂ ತೇ ಮಹಾರಾಜಾತಿ ಸಬ್ಬತ್ಥ ಛಟ್ಠೀ ಸಮ್ಬನ್ಧೇ, ಏವಂವಿಧಮಞ್ಞಮ್ಪೇವ ವಿಞ್ಞೇಯ್ಯಂ ಯಥಾಗಮಂ.

೨೬. ಪಞ್ಚಮ್ಯವಧಿಸ್ಮಾ.

ಪದತ್ಥಾವಧಿಸ್ಮಾ ಪಞ್ಚಮೀವಿಭತ್ತಿ ಹೋತಿ. ಗಾಮಸ್ಮಾ ಆಗಚ್ಛತು, ಏವಂ ಚೋರಸ್ಮಾ ಭಾಯತಿ, ಚೋರಸ್ಮಾ ಉತ್ತಸತಿ, ಓರಸ್ಮಾ ತಾಯತಿ, ಚೋರಸ್ಮಾ ರಕ್ಖತೀತಿ, ಸಚೇ ಭಾಯಥ ದುಕ್ಖಸ್ಸ, ಪಮಾದೇ ಭಯದಸ್ಸಿವಾ, ತಸನ್ತಿ ದಣ್ಡಸ್ಸಾತಿ ಛಟ್ಠೀ ಸತ್ತಮಿಯೋಪಿ ಹೋನ್ತೇವ ಸಮ್ಬನ್ಧಾಧಾರವಚನಿಚ್ಛಾಯಂ.

ಅಜ್ಝೇನಾ ಪರಾಜೇತಿ, ಪಟಿಪಕ್ಖೇ ಪರಾಜೇತೀತಿ ಸವಿಸಯಾವ ವಿಭತ್ತಿಯೋ. ಸಚೇ ಕೇವಟ್ಟಸ್ಸ ಪರಜ್ಜಿಸ್ಸಾಮೀತಿ ಛಟ್ಠೀಪಿ ಹೋತಿ ಸಮ್ಬನ್ಧವಚನಿಚ್ಛಾಯಂ. ಯವೇಹಿ ಗಾವೋ ವಾರೇತಿ, ಪಾಪಾ ಚಿತ್ತಂ ನಿವಾರಯೇ, ಕಾಕೇ ರಕ್ಖತಿ ತಣ್ಡುಲಾತಿ ಸವಿಸಯೇವ ಪಞ್ಚಮೀ. ಚಿತ್ತಂ ರಕ್ಖೇಥ ಮೇಧಾವೀತಿ ದುತಿಯಾವ ದಿಸ್ಸತಿ ಕಮ್ಮತ್ಥೇ. ಉಪಜ್ಝಾಯಾ ಅನ್ತರಧಾಯತಿ, ಉಪಜ್ಝಾಯಾ ಅಧಿತೇ, ಕಾಮತೋ ಜಾಯತೇ ಸೋಕೋತಿ ಸವಿಸಯೇ ಪಞ್ಚಮೀ.

ತತ್ಥೇವ-ನ್ತರಧಾಯಿ ಸು, ನಟಸ್ಸ ಸುಣೋತಿ, ಪದುಮಂ ತತ್ಥ ಜಾಯೇಥಾತಿ ಸತ್ತಮೀಛಟ್ಠಿಯೋಪಿ ಹೋನ್ತೇವ ಸವಿಸಯೇ. ಹಿಮವನ್ತಾ ಪಭವತಿ ಗಙ್ಗಾ, ಪಾಣಾತಿಪಾತಾ ವಿರಮಸ್ಸು ಖಿಪ್ಪಂ, ಅಞ್ಞೋ ದೇವದತ್ತಾ, ಭಿನ್ನೋ ದೇವದತ್ತಾತಿ ಸವಿಸಯೇವ ಪಞ್ಚಮೀ. ಏವಂ ಆರಾ ಸೋ ಆಸವಕ್ಖಯಾ, ಇತರೋ ದೇವದತ್ತಾ, ಉದ್ಧಂ ಪಾದತಲಾ ಅಧೋ ಕೇಸಮತ್ಥಕಾ, ಪುಬ್ಬೋ ಗಾಮಾ, ಪುಬ್ಬೇವ ಸಮ್ಬೋಧಾ, ತತೋ ಪರಂ, ತತೋ ಅಪರೇನ ಸಮಯೇನ, ತತುತ್ತರಿನ್ತಿ. ಸಮ್ಬನ್ಧವಚನಿಚ್ಛಾಯಂ ಛಟ್ಠೀಪಿ ಪುರತೋ ಗಾಮಸ್ಸ, ದಕ್ಖಿಣತೋ ಗಾಮಸ್ಸ, ಉಪರಿ ಪಬ್ಬತಸ್ಸ, ಹೇಟ್ಠಾ ಪಾಸಾದಸ್ಸಾತಿ. ಪಾಸಾದಮಾರುಯ್ಹ ಪೇಕ್ಖತಿ ಪಾಸಾದಾ ಪೇಕ್ಖತಿ, ಆಸನೇ ಉಪವಿಸಿತ್ವಾ ಪೇಕ್ಖತಿ ಆಸನಾ ಪೇಕ್ಖತೀತಿ ಅವಧಿವಚನಿಚ್ಛಾಯಂ ಪಞ್ಚಮೀ.

ಪುಚ್ಛಾನಾಖ್ಯಾನೇಸು ಕುತೋ ಭವಂ? ಪಾತಟಲಿಪುತ್ತಸ್ಮಾತಿ. ತಥಾ ದೇಸಕಾಲಮಾನೇಪಿ ಪಾಟಲಿಪುತ್ತಸ್ಮಾ ರಾಜಗಹಂ ಸತ್ತ ಯೋಜನಾನಿ, ಸತ್ತಸು ಯೋಜನೇಸೂತಿ ವಾ. ಏವಂ ಇತೋ ತಿಣ್ಣಂ ಮಾಸಾನ-ಮಚ್ಚಯೇನಾತಿ, ಕಿಚ್ಛಾಲದ್ಧನ್ತಿ ಗುಣೇ ಪಞ್ಚಮೀ. ಕಿಚ್ಛೇನ ಮೇ ಅಧಿಗತನ್ತಿ ಹೇತುಮ್ಹಿ ಕರಣೇ ವಾ ತತಿಯಾ. ಏವಂ ಥೋಕಾ ಮುತ್ತೋ, ಥೋಕೇನ ಮುತ್ತೋತಿ. ಥೋಕಂ ಚಲತೀತಿ ಕಿರಿಯಾವಿಸೇಸನೇ ಕಮ್ಮನಿ ದುತಿಯಾ.

ದೂರನ್ತಿ ಕತ್ಥಯೋಗೇಪಿ ಸವಿಸಯೇವ ಪಞ್ಚಮೀಛಟ್ಠಿಯೋ ಸಿಯುಂ, ದೂರಂ ಗಾಮಸ್ಮಾ, ಅನ್ತಿಕಂ ಗಾಮಸ್ಮಾ, ದೂರಂ ಗಾಮಸ್ಸ, ಅನ್ತಿಕಂ ಗಾಮಸ್ಸಾತಿ, ದೂರನ್ತಿ ಕತ್ಥೇಹಿ ತು ಸಬ್ಬಾವ ಸವಿಸಯೇ ಸಿಯುಂ ಬಾಧಕಾಭಾವಾ ದೂರೋ ಗಾಮೋ, ಅನ್ತಿಕೋ ಗಾಮೋತ್ವೇವಮಾದಿ.

ಕೇಚಿ ಪನಾಹು ‘ಅಸತ್ತವಚನಹೇತೇಹಿ ಪಾಟಿಪದಿಕತ್ಥೇ ದುತಿಯಾತತಿಯಾಪಞ್ಚಮೀಸತ್ತಮಿಯೋ, ಸತ್ತವಚನೇಹಿ ತು ಸಬ್ಬಾವ ಸವಿಸಯೇ’ತಿ, ತೇ ಪನಞ್ಞೇಹೇವ ಪಟಿಕ್ಖಿತ್ತಾ. ದೂರಂ ಮಗ್ಗೋ, ಅನ್ತಿಕಂ ಮಗ್ಗೋತಿ ಕಿರಿಯಾವಿಸೇಸನಂ… ಭೂಧಾತುಸ್ಸ ಗಮ್ಮಮಾನತ್ತಾ. ವಿಸುದ್ಧೋ ಲೋಭನೀಯೇಹಿ ಧಮ್ಮೇಹಿ, ಪರಿಮುತ್ತೋ ಸೋ ದುಕ್ಖಸ್ಮಾ ವಿವಿಚ್ಚೇವ ಕಾಮೇಹಿ, ಗಮ್ಭೀರತೋ ಚ ಪುಥುಲತೋ ಚ ಯೋಜನಂ, ಆಯಾಮೇನ ಯೋಜನಂ, ತತೋ ಪಭುತಿ, ಯತೋ ಸರಾಮಿ ಅತ್ತಾನನ್ತಿ ಸವಿಸಯೇವ ವಿಭತ್ತಿಯೋ.

೨೭. ಅಪಪರೀಹಿ ವಜ್ಜನೇ.

ವಜ್ಜನೇ ವತ್ತಮಾನೇಹಿ ಅಪಪರೀಹಿ ಯೋಗೇ ಪಞ್ಚಮೀ ಹೋತಿ. ಅಪ ಸಾಲಾಯ ಆಯನ್ತಿ ವಾಣಿಜಾ, ಪರಿ ಸಾಲಾಯ ಆಯನ್ತಿ ವಾಣಿಜಾ, ಸಾಲಂ ವಜ್ಜೇತ್ವಾತಿ ಅತ್ಥೋ. ವಜ್ಜನೇತಿ ಕಿಂ? ರುಕ್ಖಂ ಪರಿವಿಜ್ಜೋತತೇ ವಿಜ್ಜು. ಆಪಾಟಲಿಪುತ್ತಸ್ಮಾ ವಸ್ಸಿ ದೇವೋತಿ ಮರಿಯಾದಾ-ಭಿವಿಧೀಸ್ವವಧಿ ವಿಸಯೇವ ಪಞ್ಚಮೀ, ವಿನಾ ಪಾಟಲಿಪುತ್ತೇನ ಸಹ ವೇತಿ ವಿಸೇಸೋ, ಏವಂ ಯಾವ ಪಾಟಲಿಪುತ್ತಸ್ಮಾ ವಸ್ಸಿ ದೇವೋತಿ.

೨೮. ಪಟಿನಿಧಿಪಟಿದಾನೇಸು ಪತಿನಾ.

ಪಟಿನಿಧಿಮ್ಹಿ ಪಟಿದಾನೇ ಚ ವತ್ತಮಾನೇನ ಪತಿನಾ ಯೋಗೇ ನಾಮಸ್ಮಾ ಪಞ್ಚಮೀ ವಿಭತ್ತಿ ಹೋತಿ. ಬುದ್ಧಸ್ಮಾ ಪತಿ ಸಾರಿಪುತ್ತೋ, ಘತಮಸ್ಸ ತೇಸಸ್ಮಾ ಪತಿ ದದಾತಿ, ಪಟಿನಿಧಿಪಟಿದಾನೇಸೂತಿ ಕಿಂ? ರುಕ್ಖಂ ಪತಿ ವಿಜ್ಜೋತತೇ.

೨೯. ರಿತೇ ದುತಿಯಾ ಚ.

ರಿತೇಸದ್ದೇನ ಯೋಗೇ ನಾಮಸ್ಮಾ ದುತಿಯಾ ಹೋತಿ ಪಞ್ಚಮೀ ಚ. ರಿತೇ ಸದ್ಧಮ್ಮಂ, ರಿತೇ ಸದ್ಧಮ್ಮಾ.

೩೦. ವಿನಾ-ಞ್ಞತ್ರ ತತಿಯಾ ಚ.

ವಿನಾ-ಞ್ಞತ್ರಸದ್ದೇಹಿ ಯೋಗೇ ನಾಮಸ್ಮಾ ತತಿಯಾ ಚ ಹೋತಿ ದುತಿಯಾ ಪಞ್ಚಮಿಯೋ ಚ. ವಿನಾ ವಾತೇನ, ವಿನಾ ವಾತಂ, ವಿನಾ ವಾತಸ್ಮಾ, ಅಞ್ಞತ್ರ ಏಕೇನ ಪಿಣ್ಡಪಾತನೀಹಾರಕೇನ, ಅಞ್ಞತ್ರ ಧಮ್ಮಂ, ಅಞ್ಞತ್ರ ಧಮ್ಮಾ.

೩೧. ಪುಥನಾನಾಹಿ.

ಏತೇಹಿ ಯೋಗೇ ತತಿಯಾ ಹೋತಿ ಪಞ್ಚಮೀ ಚ. ಪುಥಗೇವ ಜನೇನ, ಪುಥಗೇವ ಜನಸ್ಮಾ, ಜನೇನ ನಾನಾ, ಜನಸ್ಮಾ ನಾನಾ.

೩೨. ಸತ್ತಮ್ಯಾಧಾರೇ.

ಕಿರಿಯಾಧಾರ ಭೂತ ಕತ್ತು ಕಮ್ಮಾನಂ ಧಾರಣೇನ ಯೋ ಕಿರಿಯಾಯಾಧಾರೋ ತಸ್ಮಿಂ ಕಾರಕೇ ನಾಮಸ್ಮಾ ಸತ್ತಮೀ ಹೋತಿ. ಕಟೇ ನಿಸೀದತಿ (ದೇವದತ್ತೋ), ಥಾಲಿಯಂ ಓದನಂ ಪಚತಿ, ಆಕಾಸೇ ಸಕುನಾ, ಭಿಲೇಸು ತೇಲಂ, ಗಙ್ಗಾಯಂ ವಜೋ.

೩೩. ನಿಮಿತ್ತೇ.

ನಿಮಿತ್ತತ್ಥೇ ಸತ್ತಮೀ ಹೋತಿ. ಅಜಿನಮ್ಹಿ ಹಞ್ಞತೇ ದೀಪಿ, ಮುಸಾವಾದೇ ಪಾಚಿತ್ಥಿಯಂ.

೩೪. ಯಬ್ಭಾವೋಭಾವಲಕ್ಖಣಂ.

ಯಸ್ಸ ಭಾವೋ ಭಾವನ್ತರಸ್ಸ ಲಕ್ಖಣಂ ಭವತಿ, ತತೋ ಸತ್ತಮೀ ಹೋತಿ. ಗಾವೀಸು ದುಯ್ಹಮಾನಾಸು ಗತೋ, ದುದ್ಧಾಸು ಆಗತೋ. ಭಾವೋತಿ ಕಿಂ? ಯೋ ಜಟಾಹಿ ಸೋ ಭುಞ್ಜತಿ. ಭಾವಲಕ್ಖಣನ್ತಿ ಕಿಂ? ಯೋ ಭುಞ್ಜತಿ ಸೋ ದೇವದತ್ತೋ, ‘‘ಅಕಾಲೇ ವಸ್ಸತಿ ತಸ್ಸ, ತಾಲೇ ತಸ್ಸ ನ ವಸ್ಸತೀ’’ತಿ ವಿಸಯಸತ್ತಮೀ.

೩೫. ಛಟ್ಠೀ ಚಾನಾದರೇ.

ಯಸ್ಸ ಭಾವೋ ಭಾವನ್ತರಸ್ಸ ಲಕ್ಖಣಂ ಭವತಿ, ತತೋ ಛಟ್ಠೀ ಭವತಿ ಸತ್ತಮೀ ಚ ಅನಾದರೇ ಗಮ್ಯಮಾನೇ. ‘‘ಆಕೋಟಯನ್ತೋ ಸೋ ನೇತಿ, ಸಿವಿರಾಜಸ್ಸ ಪೇಕ್ಖತೋ’’, ‘‘ಮಚ್ಚು ಗಚ್ಛತಿ ಆದಾಯ, ಪೇಕ್ಖಮಾನೇ ಮಹಾಜನೇ’’.

ಗುನ್ನಂ ಸಾಮೀತಿ ಸಮ್ಬನ್ಧೇ ಛಟ್ಠೀ, ಗೋಸು ಸಾಮೀತಿ ವಿಸಯಸತ್ತಮೀ, ಏವಂ ಗುನ್ನಮಿಸ್ಸರೋ, ಗೋಸ್ವಿಸ್ಸರೋ, ಗುನ್ನಂ ಅಧಿಪತಿ, ಗೋಸು ಅಧಿಪತಿ, ಗುನ್ನಂ ದಾಯಾದೋ, ಗೋಸು ದಾಹಾದೋ, ದುನ್ನಂ ಸಕ್ಖಿ, ಗೋಸು ಸಕ್ಖಿ, ಗುನ್ನಂ ಪತಿಭೂ, ಗೋಸು ಪತಿಭೂ, ಗುನ್ನಂ ಪಸೂತೋ, ಗೋಸು ಪಸೂತೋ, ಕುಸಲಾ ನಚ್ಚಗೀತಸ್ಸ, ಕುಸಲಾ ನಚ್ಚಗೀತೇ, ಆಯುತ್ತೋ ಕಟಕರಣಸ್ಸ, ಆಯುತ್ತೋ ಕಟಕರಣೇತಿ.

ತಥಾಧಾರವಚನಿಚ್ಛಾಯಂ ಸತ್ತಮೀ, ಭಿಕ್ಖೂಸು ಅಭಿವಾದೇನ್ತಿ, ಮುದ್ಧನಿ ಧುಮ್ಬಿತ್ವಾ, ಬಾಹಾಸು ಗಹೇತ್ವಾ, ಹತ್ಥೇಸು ಪಿಣ್ಡಾಯ ಚರನ್ತಿ, ಪಥೇಸು ಗಚ್ಛನ್ತಿ, ಕದಲೀಸು ಗಜೇ ರಕ್ಖನ್ತೀತಿ. ಞಾಣಸ್ಮಿಂ ಪಸನ್ನೋತಿ ವಿಸಯಸತ್ತಮೀ, ಞಾಣೇನ ಪಸನ್ನೋತಿ ಕರಣೇ ತತಿಯಾ, ಏವಂ ಞಾಣಸ್ಮಿಂ ಉಸ್ಸುಕ್ಕೋ ಞಾಣೇನ ಉಸ್ಸುಕ್ಕೋತಿ.

೩೬. ಯತೋ ನಿದ್ಧಾರಣಂ.

ಜಾತಿಗುಣಕಿರಿಯಾಹಿ ಸಮುದಾಯತೇಕದೇಸಸ್ಸ ಪುಥಕ್ಕರಣಂ ನಿದ್ಧಾರಣಂ. ಯತೋ ತಂ ಕರೀಯತಿ, ತತೋ ಛಟ್ಠೀಸತ್ತಮಿಯೋ ಹೋನ್ತಿ. ಸಾಲಯೋ ಸೂಕಧಞ್ಞಾನಂ ಪಥ್ಯತಮಾ, ಸಾಲಯೋ ಸೂಕಧಞ್ಞೇಸು ಪಥ್ಯತಮಾ, ಕಣ್ಹಾ ಗಾವೀನಂ ಸಮ್ಪನ್ನಖೀರತಮಾ, ಕಣ್ಹಾ ಗಾವೀಸು ಸಮ್ಪನ್ನಖೀರತಮಾ, ಗಚ್ಛತಂ ಧಾವನ್ತೋ ಸೀಘತಮೋ, ಗಚ್ಛನ್ತೇಸು ಧಾವನ್ತೋ ಸೀಘತಮೋ. ಸೀಲಮೇವ ಸುತಾ ಸೇಯ್ಯೋತಿ ಅವಧಿಮ್ಹಿಯೇವ ಪಞ್ಚಮೀ.

೩೭. ಪಠಮಾತ್ಥಮತ್ತೇ.

ನಾಮಸ್ಸಾಭಿಧೇಯ್ಯಮತ್ತೇ ಪಠಮಾವಿಭತ್ತಿ ಹೋತಿ. ರುಕ್ಖೋ. ಇತ್ಥಿ ಪುಮಾ ನಪುಂಸಕನ್ತಿ ಲಿಙ್ಗಮ್ಪಿ ಸದ್ದತ್ಥೋವ, ತಥಾ ದೋಣೋ ಖಾರೀ ಆಳ್ಹಕನ್ತಿ ಪರಿಮಾಣಮ್ಪಿ ಸದ್ದತ್ಥೋವ, ಏಕೋ ದ್ವೇ ಬಹವೋತಿ ಸಙ್ಖ್ಯಾಪಿ ಸದ್ದತ್ಥೋವ.

೩೮. ಆಮನ್ತಣೇ.

ಸತೋ ಸದ್ದೇನಾಭಿಮುಖೀಕರಣಮಾಮನ್ತಣಂ. ತಸ್ಮಿಂ ವಿಸಯೇ ಪಠಮಾ ವಿಭತ್ತಿ ಹೋತಿ. ಭೋಪುರಿಸ, ಭೋಕ್ಕತ್ಥಿ, ಭೋ ನಪುಂಸಕ.

೩೯. ಛಟ್ಠೀ ಸಮ್ಬನ್ಧೇ.

ಕಿರಿಯಾಕಾರಕಸಞ್ಜಾತೋ ಅಸ್ಸೇದಮ್ಭಾವಹೇತುಕೋ ಸಮ್ಬನ್ಧೋ ನಾಮ. ತಸ್ಮಿಂ ಛಟ್ಠೀ ವಿಭತ್ತಿ ಹೋತಿ. ರಞ್ಞೋ ಪುರಿಸೋ, ಸರತಿ ರಜ್ಜಸ್ಸಾತಿ ಸಮ್ಬನ್ಧೇ ಛಟ್ಠೀ, ರಜ್ಜಸಮ್ಬನ್ಧಿನಿಂ ಸತಿಂ ಕರೋತೀತಿ ಅತ್ಥೋ, ಕಮ್ಮವಚನಿಚ್ಛಾರನ್ತು ದುತಿಯಾವ ಸರತಿ ರಜ್ಜಂ. ತಥಾ ರಜಕಸ್ಸ ವತ್ಥಂ ದದಾತಿ, ಪಹರತೋ ಪಿಟ್ಠಿಂ ದದಾತಿ, ಬಾಲೋ ಪೂರತಿ ಪಾಪಸ್ಸ, ಅಮಚ್ಚೇ ತಾತ ಜಾನಾಹಿ, ಧೀರೇ ಅತ್ಥಸ್ಸ ಕೋವಿದೇ, ದಿವಸಸ್ಸ ತಿಕ್ಖತ್ತುಂ, ಸಕಿಂ ಪಕ್ಖಸ್ಸ, ಪೂರಂ ಹಿರಞ್ಞಸುವಣ್ಣಸ್ಸ ಕುಮ್ಭನ್ತ್ವೇವಮಾದಿ.

ಕಿತಕಪ್ಪಯೋಗೇ ಕಕ್ತುಕಮ್ಮೇಸು ಬಹುಲಂ ಸಮ್ಬನ್ಧವಚನಿಚ್ಛಾಯಂ ಛಟ್ಠೀ, ಸಾಧು ಸಮ್ಮತೋ ಬಹುಜನಸ್ಸ, ಸುಪ್ಪಟಿವಿದ್ಧಾ ಬುದ್ಧಾನಂ ಧಮ್ಮಧಾತು, ಧಮ್ಮಸ್ಸ ಗುತ್ತೋ ಮೇಧಾವೀ, ಅಮತಂ ತೇಸಂ ಪರಿಭುತ್ತಂ, ತಸ್ಸ ಭವನ್ತಿ ವತ್ತಾರೋ, ಅವಿಸಂವಾದಕೋ ಲೋಕಸ್ಸ, ಅಲಜ್ಜೀನಂ ನಿಸ್ಸಾಯ, ಚತುನ್ನಂ ಮಹಾಭೂತಾನಂ ಉಪಾದಾಯ ಪಸಾದೋತ್ವೇವಮಾದಿ.

ಕತ್ತುಕಮ್ಮವಚನಿಚ್ಛಾಯನ್ತು ತತಿಯಾ ದುತಿಯಾಯೋ ಚ, ಸಞ್ಚತ್ತೋ ಪಿತರಾ ಅಹಂ, ಸರಸಿ ತ್ವಂ ಏವರೂಪಿಂ ವಾಚಂ ಭಾಸಿತಾ, ಭಗವನ್ತಂ ದಸ್ಸನಾಯತ್ವೇವಮಾದಿ.

೪೦. ತುಲ್ಯತ್ಥೇನ ವಾ ತತಿಯಾ.

ತುಲ್ಯತ್ಥೇನ ಯೋಗೇ ಛಟ್ಠೀ ಹೋತಿ ತತಿಯಾ ವಾ, ತುಲ್ಯೋ ಪಿತು, ತುಲ್ಯೋ ಪಿತರಾ, ಸದಿಸೋ ಪಿತು, ಸದಿಸೋ ಪಿತರಾ, ಇಹ ಕಥಂ ತತಿಯಾ ನ ಹೋತಿ? ಅಜ್ಜುನಸ್ಸ ತುಲಾ ನತ್ಥಿ, ಕೇಸವಸ್ಸುಪಮಾ ನ ಚೇತಿ, ನೇತೇ ತುಲ್ಯತ್ಥಾ, ಕಿಞ್ಜರಹಿ ತುಲ್ಯಾನಮೋಪಮ್ಮತ್ಥಾ.

೪೧. ಅತೋ ಯೋನಂ ಟಾಟೇ.

ಅಕಾರನ್ಥತೋ ನಾಮಸ್ಮಾ ಯೋನಂ ಟಾಟೇ ಹೋನ್ತಿ ಯಥಾಕ್ಕಮಂ, ಟಕಾರಾ ಸಬ್ಬದೇಸತ್ಥಾ, ಬುದ್ಧಾ ಬುದ್ಧೇ, ಅತೋತಿ ಕಿಂ? ಕಞ್ಞಾಯೋ, ಇತ್ಥಿಯೋ, ವಧುಯೋ, ಇಧ ಕಸ್ಮಾ ನ ಭವತಿ ಅಗ್ಗಯೋ. ಅವಿಧಾನಸಾಮತ್ಥಿಯಾ.

೪೨. ನಿನಂ ವಾ.

ಅಕಾರನ್ತತೋ ನಾಮಸ್ಮಾ ನಿನಂ ಟಾಟೇ ವಾ ಹೋನ್ತಿ ಯಥಾಕ್ಕಮಂ. ರೂಪಾ, ರೂಪೇ, ರೂಪಾನಿ, ಅತೋತ್ವೇವ ಅಟ್ಠೀನಿ.

೪೩. ಸ್ಮಾಸ್ಮಿಂನಂ.

ಅಕಾರನ್ತತೋ ನಾಮಸ್ಮಾ ಸ್ಮಾಸ್ಮಿನ್ನಂ ಟಾಟೇ ವಾ ಹೋನ್ತಿ ಯಥಾಕ್ಕಮಂ. ಬುದ್ಧಾ ಬುದ್ಧಸ್ಮಾ, ಬುದ್ಧೇ ಬುದ್ಧಸ್ಮಿಂ, ಅತೋತ್ವೇವ ಅಗ್ಗಿಸ್ಮಾ ಅಗ್ಗಿಸ್ಮಿಂ.

೪೪. ಸಸ್ಸಾಯ ಚತುತ್ಥಿಯಾ.

ಅಕಾರನ್ತತೋ ಪರಸ್ಸ ಸಸ್ಸ ಚತುತ್ಥಿಯಾ ಆಯೋ ಹೋತಿ ವಾ. ಬುದ್ಧಾಯ ಬುದ್ಧಸ್ಸ, ಭಿಯ್ಯೋ ತಾದತ್ಥ್ಯೇಯೇವಾಯಮಾಯೋ ದಿಸ್ಸತೇ, ಕ್ವಚಿದೇವಞ್ಞತ್ಥ, ಅತೋತ್ವೇವ ಇಸಿಸ್ಸ, ಚತುತ್ಥಿಯಾತಿ ಕಿಂ? ಬುದ್ಧಸ್ಸ ಮುಖಂ, ಅತ್ತತ್ಥನ್ತಿ ಅತ್ಥಸದ್ದೇನ ಸಮಾಸೋ.

ಸಬ್ಬಾದಿತೋಪಿ ಸ್ಮಾಸ್ಮಿಂಸಾನಂ ಟಾಟೇಆಯಾ ಹೋನ್ತೇವ… ನಿರುತ್ತಿಕಾರಾನುಮತತ್ತಾ ಬುದ್ಧವಚನೇ ಸನ್ದಸ್ಸನವತೋ ಚ, ತತ್ರೋದಮುದಾಹರಣಂ ‘ಅಸ್ಮಾ ಲೋಕಾ ಪರಮ್ಹಾ ಚ, ಉಭಯಾ ಧಂಸತೇ ನರೋ’, ‘ತ್ಯಾಹಂ ಮನ್ತೇ ಪರತ್ಥದ್ಧೋ’, ‘ಯಾಯೇವ ಖೋ ಪನತ್ಥಾಯ ಆಗಚ್ಛೇಯ್ಯಾಥೋ ತಮೇವತ್ಥಂ ಸಾಧುಕಂ ಮನಸಿಕರೇಯ್ಯಾಥೋ’ತಿ.

೪೫. ಘಪತೇಕಸ್ಮಿಂ ನಾದೀನಂ ಯಯಾ.

ಘಪತೋ ನಾದೀನಮೇಕಸ್ಮಿಂ ಯಯಾ ಹೋನಿ ಯಥಾಕ್ಕಮಂ. ಕಞ್ಞಾಯ, ರತ್ತಿಯಾ, ಇತ್ಥಿಯಾ, ಧೇನುಯಾ, ವಧುಯಾ, ಏಕಸ್ಮಿನ್ತಿ ಕಿಂ? ಕಞ್ಞಾಹಿ, ರತ್ತೀಹಿ.

೪೬. ಸ್ಸಾ ವಾ ತೇತಿಮಾಮೂಹಿ.

ಘಪಸಞ್ಞೇಹಿ ತೇತಿಮಾಮೂಹಿ ನಾದೀನಮೇಕಸ್ಮಿಂಸ್ಸಾ ವಾ ಹೋತಿ, ತಸ್ಸಾ ಕತಂ, ತಸ್ಸಾ ದೀಯತೇ, ತಸ್ಸಾ ನಿಸ್ಸಟಂ, ತಸ್ಸಾ ಪರಿಗ್ಗಹೋ, ತಸ್ಸಾ ಪತಿಟ್ಠಿತಂ, ತಾಯ ವಾ, ಏವಂ ಏತಿಸ್ಸಾ ಏತಾಯ, ಇಮಿಸ್ಸಾ ಇಮಾಯ, ಅಮುಸ್ಸಾ ಅಮುಯಾ, ಏತೇಹೀತಿ ಕಿಂ? ಸಬ್ಬಾಯ, ನಾದೀನಂ ತ್ವೇವ? ಸಾ, ಘಪತೋತ್ವೇವ? ತಾಹಿ ಅಮೂಹಿ.

೪೭. ನಂಮ್ಹಿ ನುಕ ದ್ವಾದೀನಂ ಸತ್ತರಸನ್ನಂ.

ದ್ವಾದೀನಂ ಸತ್ತರಸನ್ನಂ ಸಙ್ಖ್ಯಾನಂ ನುಕ ಹೋತಿ ನಂಮ್ಹಿ ವಿಭತ್ತಮ್ಹಿ, ದ್ವಿನ್ನಂ ಚತುನ್ನಂ, ಪಞ್ಚನ್ನಂ, ಏವಂ ಯಾವ ಅಟ್ಠಾರಸನ್ನಂ, ಉಕಾರೋ ಉಚ್ಚಾರಣತ್ಥೋ, ಕಕಾರೋ ಅನ್ತಾವಯವತ್ಥೋ, ತೇನ ನಂಮ್ಹಿ ನ ದೀಘೋ.

೪೮. ಬಸುಕತಿನ್ನಂ.

ನಂಮ್ಹಿ ಬಹುನೋ ಕತಿಸ್ಸ ಚ ನುಕ ಹೋತಿ, ಬಹುನ್ನಂ, ಕತಿನ್ನಂ.

೪೯. ಣ್ಣಂಣ್ಣನ್ನಂ ತಿತೋ ಝಾ.

ಝಸಞ್ಞಾ ತಿತೋ ನಂವಚನಸ್ಸ ಣ್ಣಂಣ್ಣನ್ನಂ ಹೋತಿ, ತಿಣ್ಣಂ, ತಿಣ್ಣನ್ನಂ, ಝಾತಿ ಕಿಂ ತಿಸ್ಸನ್ನಂ.

೫೦. ಉಭಿನ್ನಂ.

ಉಭಾ ನಂವಚನಸ್ಸ ಇನ್ನಂ ಹೋತಿ, ಉಭಿನ್ನಂ.

೫೧. ಸುಞ ಸಸ್ಸ.

ನಾಮಸ್ಮಾ ಸಸ್ಸ ಸುಞ ಹೋತಿ, ಬುದ್ಧಸ್ಸ, ದ್ವಿಸಕಾರಪಾಠೇನ ಸಿದ್ಧೇ ಲಾಘವತ್ಥಮಿದಂ.

೫೨. ಸ್ಸಂಸ್ಸಾಸ್ಸಾಯೇಸ್ವಿತರೇ ಕಞ್ಞೇಭಿಮಾನಮಿ.

ಸ್ಸಮಾದೀಸ್ವಿತರಾದೀನಮಿ ಹೋತಿ, ಇತರಿಸ್ಸಂ, ಇತರಿಸ್ಸಾ, ಏಕಿಸ್ಸಂ, ಏಕಿಸ್ಸಾ, ಅಞ್ಞಿಸ್ಸಂ, ಅಞ್ಞಿಸ್ಸಾ, ಏತಿಸ್ಸಂ, ಏತಿಸ್ಸಾ, ಏತಿಸ್ಸಾಯ, ಇಮಿಸ್ಸಂ, ಇಮಿಸ್ಸಾ, ಇಮಿಸ್ಸಾಯ, ಏಸ್ವಿತಿ ಕಿಂ? ಇತರಾಯ, ಏಸನ್ತಿ ಕಿಂ? ಸಬ್ಬಸ್ಸಂ, ಸಬ್ಬಸ್ಸಾ.

೫೩. ತಾಯ ವಾ.

ಸ್ಸಮಾದೀಸು ತಸ್ಸಾ ವಾ ಇ ಹೋತಿ, ತಿಸ್ಸಂ ತಸ್ಸಂ, ತಿಸ್ಸಾ ತಸ್ಸಾ, ತಿಸ್ಸಾಯ ತಸ್ಸಾಯ, ಸ್ಸಂಸ್ಸಾಸ್ಸಾಯೇಸ್ವಿತ್ವೇವ? ತಾಯ.

೫೪. ತೇತಿಮಾತೋ ಸಸ್ಸ ಸ್ಸಾಯ.

ತಾಏತಾಇಮಾತೋ ಸಸ್ಸ ಸ್ಸಾಯೋ ಹೋತಿ ವಾ. ತಸ್ಸಾಯ ತಾಯ, ಏತಿಸ್ಸಾಯ ಏತಾಯ, ಇಮಿಸ್ಸಾಯ ಇಮಾಯ.

೫೫. ರತ್ಯಾದೀಹಿ ಟೋ ಸ್ಮಿನೋ.

ರತ್ಯಾದೀಹಿ ಸ್ಮಿನೋ ಟೋ ಹೋತಿ ವಾ, ರತ್ತೋ ರತ್ತಿಯಂ, ಆದೋ ಆದಿಸ್ಮಿಂ.

೫೬. ಸುಹಿಸುಭಸ್ಸೋ.

ಉಭಸ್ಸ ಸುಹಿಸ್ವೋ ಹೋತಿ. ಉಭೋಸು, ಉಭೋಹಿ.

೫೭. ಲ್ತುಪಿತಾದಿನಮಾ ಸಿಮ್ಹಿ.

ಲ್ತುಪ್ಪಚ್ಚಯನ್ತಾನಂ ಪಿತಾದೀನಂ ಚ ಆ ಹೋತಿ ಸಿಮ್ಹಿ. ಕತ್ತಾ, ಪಿತಾ. ಪಿತು, ಮಾತು, ಭಾವು, ಮೀತು, ದುಹಿತು, ಜಾಮಾತು, ನತ್ತು, ಹೋತು, ಪೋತು.

೫೮. ಗೇ ಅ ಚ.

ಲ್ತುಪಿತಾದೀನಂ ಅ ಹೋತಿ ಗೇ ಆ ಚ, ಭೋ ಕತ್ತ, ಭೋ ಕತ್ತಾ, ಭೋ ಪಿತ, ಭೋ ಪಿತಾ.

೫೯. ಅಯುನಂ ವಾ ದೀಘೋ.

ಅ ಇ ಉ ಇಚ್ಚೇಸಂ ವಾ ದೀಘೋ ಹೋತಿ ಗೇ ಪರೇ ತಿಲಿಙ್ಗೇ. ಭೋ ಪುರಿಸಾ, ಭೋ ಪುರಿಸ, ಭೋ ಅಗ್ಗೀ, ಭೋ ಅಗ್ಗಿ, ಭೋ ಭಿಕ್ಖೂ, ಭೋ ಭಿಕ್ಖೂ.

೬೦. ಘಬ್ರಹ್ಮಾದಿತೇ.

ಘತೋ ಬ್ರಹ್ಮಾದಿತೋ ಚ ಗಸ್ಸೇ ವಾ ಹೋತಿ. ಭೋತಿ ಕಞ್ಞೇ, ಭೋತಿ ಕಞ್ಞಾ, ಭೋ ಬ್ರಹ್ಮೇ, ಭೋ ಬ್ರಹ್ಮ, ಭೋ ಖತ್ತೇ, ಭೋ ಖತ್ತ, ಭೋ ಇಸೇ, ಭೋ ಇಸಿ, ಭೋ ಸಖೇ, ಭೋ ಸಖ. ಸಖಿ ಸಖೀತಿ ಇತ್ಥಿಯಂ ಸಿದ್ಧಮೇವ. ಆಕತಿಗಣೋ-ಯಂ, ಏವಮಞ್ಞತ್ರಾಪಿ.

೬೧. ನಮ್ಮಾದೀಹಿ.

ಅಮ್ಮಾದೀಹಿ ಗಸ್ಸೇ ನ ಹೋತಿ. ಭೋತಿ ಅಮ್ಮಾ, ಭೋತಿ ಅನ್ನಾ, ಭೋತಿ ಅಮ್ಬಾ.

೬೨. ರಸ್ಸೋ ವಾ.

ಅಮ್ಮಾದೀನಂ ಗೇ ರಸ್ಸೋ ಹೋತಿ ವಾ. ಭೋತಿ ಅಮ್ಮ, ಭೋತಿ ಅಮ್ಮಾ.

೬೩. ಘೋ ಸ್ಸಂ, ಸ್ಸಾ, ಸ್ಸಾಯಂ ತಿಂಸು.

ಸ್ಸಮಾದೀಸು ಘೋ ರಸ್ಸೋ ಹೋತಿ. ತಸ್ಸಂ, ತಸ್ಸಾ, ತಸ್ಸಾಯ, ತಂ, ಸಭತಿಂ, ಏಸ್ವಿತಿ ಕಿಂ? ತಾಯ, ಸಭಾಯ.