ನಾಯಕ ಕಣ್ಡ

೨೭೬. ಅನಾಯಕಾ ವಿನಸ್ಸನ್ತಿ, ನಸ್ಸನ್ತಿ ಬಹುನಾಯಕಾ;

ಥೀನಾಯಕಾ ವಿನಸ್ಸನ್ತಿ, ನಸ್ಸನ್ತಿ ಸುಸುನಾಯಕಾ.

೨೭೭. ಗವಂ ಚೇ ತರಮಾನಾನಂ, ಉಜುಂ ಗಚ್ಛತಿ ಪುಙ್ಗವೋ;

ಸಬ್ಬಾ ಗಾವೀ ಉಜುಂ ಯನ್ತಿ, ನೇತ್ತೇ ಉಜುಂ ಗತೇ ಸತಿ.

೨೭೮. ಏವಮೇವ ಮನುಸ್ಸೇಸು, ಯೋ ಹೋತಿ ಸೇಟ್ಠಸಮ್ಮತೋ;

ಸೋ ಸಚೇ ಧಮ್ಮಂ ಚರತಿ, ಪಗೇವ ಇತರಾ ಪಜಾ.

ಗವಂ ಚೇ ತರಮಾನಾನಂ, ಉಜುಂ ಗಚ್ಛತಿ ಪುಙ್ಗವೋ;

ಸಬ್ಬಾ ಗಾವೀ ಉಜುಂಯನ್ತಿ, ನೇತ್ತೇ ಉಜುಂ ಗತೇ ಸತಿ.

ಏವಮೇವ ಮನುಸ್ಸೇಸು, ಯೋ ಹೋತಿ ಸೇಟ್ಠಸಮ್ಮತೋ;

ಸೋ ಸಚೇ ಧಮ್ಮಂ ಚರತಿ, ಪಗೇವ ಇತರಾ ಪಜಾ;

ಸಬ್ಬಂ ರಟ್ಠಂ ಸುಖಂ ಸೇತಿ, ರಾಜಾ ಚೇ ಹೋತಿ ಧಮ್ಮಿಕೋ.

೨೭೯. ನೋದಯಾಹ ವಿನಾಸಾಯ, ಬಹುನಾಯಕತಾ ಭುಸಂ;

ಮಿಲಾಯನ್ತಿ ವಿನಸ್ಸನ್ತಿ, ಪದ್ಮಾನ್ಯಕ್ಕೇಹಿ ಸತ್ತಹಿ.

೨೮೦. ಸುತಾರಕ್ಖೋ ಅಭಿಯೋಗೋ, ಕುಲಾರಕ್ಖೋ ವತ್ತಂ ಭವೇ;

ವಿಜ್ಜಾ ಹಿ ಕುಲಪುತ್ತಸ್ಸ, ನಾಯಕಸ್ಸಾಪಮಾದಕೋ.