ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ

ಕವಿದಪ್ಪಣನೀತಿ

ಮಾತಿಕಾ

ಯಥಾಧಮ್ಮಿಕರಾಜೂನಂ, ಅಮಚ್ಚಾ ಚ ಪುರೋಹಿತಾ;

ನೀತಿಸತ್ಥಂ ಸುನಿಸ್ಸಾಯ, ನಿಚ್ಛಯನ್ತಿ ವಿನಿಚ್ಛಯಂ.

ಅಙ್ಗಾನಿ ವೇದಾ ಚತ್ತಾರೋ, ಮೀಮಂಸಾನ್ಯಾಯ ವಿತ್ಥಾರೋ;

ಧಮ್ಮಸತ್ಥಂ ಪುರಾಣಞ್ಚ, ವಿಜ್ಜಾ ಹೇತಾ ಚತುದ್ದಸ.

ಆಯುಬ್ಬೇದೋ ಮನುಬ್ಬೇದೋ, ಗನ್ಧಬ್ಬೋ ಚೇತಿ ತೇ ತಯೋ;

ಅತ್ಥಸತ್ಥಂ ಚತುತ್ಥಞ್ಚ, ವಿಜ್ಜಾಹ್ಯಾಟ್ಠರಸ ಮತಾ.

ಸುತಿಸಮುತಿಸಙ್ಖ್ಯಾ ಚ, ರೋಗಾನೀತಿ ವಿಸೇಸಕಾ;

ಗನ್ಧಬ್ಬಾ ಗಣಿಕಾ ಚೇವ, ಧನುಬ್ಬೇದಾ ಚ ಪೂರಣಾ.

ತಿಕಿಚ್ಛಾ ಇತಿಹಾಸೋ ಚ, ಜೋತಿಮಾಯಾ ಚ ಛನ್ದತಿ;

ಕೇತುಮನ್ತಾ ಚ ಸದ್ದಾ ಚ, ಸಿಪ್ಪಾಟ್ಠಾರಸಕಾ ಇಮೇ.

ದಮೋ ದಣ್ಡೋ ಇತಿಖ್ಯಾತೋ, ತಟ್ಠಾದಣ್ಡೋ ಮಹೀಪತಿ;

ತಸ್ಸ ನೀತಿ ದಣ್ಡನೀತಿ, ನಯನಾನೀತಿ ವುಚ್ಚತಿ.

ದಣ್ಡೇನ ನೀಯತೇ ಚೇದಂ, ದಣ್ಡಂ ನಯತಿ ವಾ ಪುನ;

ದಣ್ಡನೀತಿ ಇತಿಖ್ಯಾತೋ, ತಿಲೋಕಾ ನತಿ ವತ್ತತೇ.

ನಾನಾಸತ್ಥೋದ್ಧತಂ ವಕ್ಖೇ, ರಾಜನೀತಿ ಸಮುಚ್ಚಯಂ;

ಸಬ್ಬಬೀಜಮಿದುಂ ಸತ್ಥಂ, ಚಾಣಕ್ಯ ಸಾರಸಙ್ಗಹಂ.

ಮೂಲಸುತ್ತಂ ಪವಕ್ಖಾಮಿ, ಚಾಣಕ್ಯೇನ ಯಥೋದಿತಂ;

ಯಸ್ಸಂ ವಿಞ್ಞಾತಮತ್ತೇನ, ಮೂಳ್ಹೋ ಭವತಿ ಪಣ್ಡಿತೋ.

ಮಿತ್ತಲಾಭೋ ಸುಹದಭೇದೋ, ವಿಗ್ಗಹೋ ಸನ್ಧಿರೇವ ಚ;

ಪಞ್ಚತನ್ದ್ರಾ ತಥಾಞ್ಞಸ್ಮಾ, ಗನ್ಥಾ ಕಸ್ಸಿಯಲಿಖ್ಯತೇ.

ಲೋಕನೀತಿಮ್ಹಾ –

(೧) ಪಣ್ಡಿತಕಣ್ಡ. (೨) ಸುಜನಕಣ್ಡ. (೩) ಬಾಲದುಜ್ಜನ ಕಣ್ಡ. (೪) ಮಿತ್ತಕಣ್ಡ. (೫) ಇತ್ಥಿಕಣ್ಡ. (೬) ರಾಜಕಣ್ಡ. (೭) ಪಕಿಣ್ಣಕ ಕಣ್ಡ-

ಲೋಕನೀತಿ –

ಪಣ್ಡಿತೋ ಸುಜನೋ ಕಣ್ಡೋ, ದುಜ್ಜನೋ ಮಿತ್ತಇತ್ಥೀ ಚ;

ರಾಜಪಕಿಣ್ಣಕೋ ಚಾತಿ, ಸತ್ತಕಣ್ಡೇ ವಿಭೂಸಿನೋ.

ಚಕ್ಕಿನ್ದಾಭಿಸಿರಿನಾಯಂ, ಸೋಧಿತೋ ಕಾಸಿಕೇ ಸಾಕೇ;

ಛನೋತ್ಯಂ ದುತಿಯಾಸಳ್ಹೇ, ಕಾಳಸತ್ತಮ ಆದಿಹೇ.

ಲೋಕನೀತಿಂ ಪವಕ್ಖಾಮಿ, ನಾನಾಸತ್ಥಸಮುದ್ಧಟಂ;

ಮಾಗಧೇನೇವ ಸಙ್ಖೇಪಂ, ವನ್ದಿತ್ವಾ ರತನತ್ತಯಂ.

ನೀತಿ ಲೋಕೇ ಪುರಿಸಸ್ಸ ಸಾರೋ,

ಮಾತಾ ಪಿತಾ ಆಚರಿಯೋ ಮಿತ್ತೋ;

ತಸ್ಮಾ ಹಿ ನೀತಿಂ ಪುರಿಸೋ ವಿಜಞ್ಞಾ,

ಞಾಣೀಮಹಾ ಹೋತಿ ಬಹುಸ್ಸುತೋ.

ಮಹಾರಹನೀತಿ –

(೧) ಪಣ್ಡಿತಕಥಾ. (೨) ಸಮ್ಭೇದಕಥಾ. (೩) ಮಿತ್ತಕಥಾ. (೪) ನಾಯಕ ಕಥಾ. (೫) ಇತ್ಥಿಕಥಾ

ಮಹಾರಹ ರಹಂಸಕ್ಯ-ಮುನಿಂ ನೀವರಣಾ ತಣ್ಹಾ;

ಮುತ್ತಂ ಮುತ್ತಂ ಸುದಸ್ಸನಂ, ವನ್ದೇ ಬೋಧಿವರಂ ವರಂ.

ನೀತಿಧ ಜನ್ತೂನಂ ಸಾರೋ, ಮಿತ್ತಾಚರಿಯಾ ಚ ಪಿತರೋ;

ನೀತಿಮಾ ಸುಬುದ್ಧಿಬ್ಯತ್ತೋ, ಸುತವಾ ಅತ್ಥದಸ್ಸಿಮಾ.

ಧಮ್ಮನೀತಿ –

(೧) ಆಚರಿಯಕಥಾ (೨) ಸಿಪ್ಪಕಥಾ (೩) ಪಞ್ಞಾಕಥಾ (೪) ಸುತಕಥಾ (೫) ಕಥಾನಕಥಾ (೬) ಧನಕಥಾ (೭) ದೇಸಕಥಾ (೮) ನಿಸ್ಸಯಕಥಾ (೯) ಮಿತ್ತಕಥಾ (೧೦) ದುಜ್ಜನಕಥಾ (೧೧) ಸುಜನಕಥಾ (೧೨) ಬಲಕಥಾ (೧೩) ಇತ್ಥಿಕಥಾ (೧೪) ಯುತ್ತಕಥಾ (೧೫) ದಾಸಕಥಾ (೧೬) ಘರಾವಾಸಕಥಾ (೧೭) ಕಾತಬ್ಬಕಥಾ (೧೮) ಅಕಾತಬ್ಬಕಥಾ (೧೯) ಞಾತಬ್ಬಕಥಾ (೨೦) ಅಲಙ್ಕಾರಕಥಾ (೨೧) ರಾಜಧಮ್ಮಕಥಾ (೨೨) ಉಪಸೇವಕಕಥಾ (೨೩) ದುಕ್ಖಾದಿಮಿಸ್ಸಕಕಥಾ (೨೪) ಪಕಿಣ್ಣಕಕಥಾ

ಚಕ್ಕಾತಿಚಕ್ಕಚಕ್ಕಿನ್ದೋ, ದೇವಾತಿದೇವಾದೇವಿನ್ದೋ,

ಬ್ರಹ್ಮಾತಿ ಬ್ರಹ್ಮಬ್ರಹ್ಮಿನ್ದೋ, ಜಿನೋ ಪೂರೇತು ಮೇ ಭಾವಂ.

ಚಿರಂ ತಿಟ್ಠತು ಲೋಕಮ್ಹಿ, ಧಂಸಕಂ ಸಬ್ಬಪಾಣಿನಂ;

ಮಹಾಮೋಹತಮಂ ಜಯಂ, ಜೋತನ್ತಂ ಜಿನಸಾಸನಂ.

ವನ್ದಿತ್ವಾ ರತನಂ ಸೇಟ್ಠಂ, ನಿಸ್ಸಾಯ ಪುಬ್ಬಕೇ ಗರು;

ನೀತಿಧಮ್ಮಂ ಪವಕ್ಖಾಮಿ, ಸಬ್ಬಲೋಕ ಸುಖಾವಹಂ.

ಆಚರಿಯೋ ಚ ಸಿಪ್ಪಞ್ಚ, ಪಞ್ಞಾಸುತಕಥಾಧನಂ;

ದೇಸಞ್ಚ ನಿಸ್ಸಯೋ ಮಿತ್ತಂ, ದುಜ್ಜನೋ ಸುಜನೋ ಬಲಂ.

ಇತ್ಥೀ ಪುತ್ತೋ ಚ ದಾಸೋ ಚ, ಘರಾವಾಸೋ ಕತಾಕತೋ;

ಞಾತಬ್ಬೋ ಚ ಅಲಙ್ಕಾರೋ, ರಾಜಧಮ್ಮಾ ಪಸೇವಕೋ;

ದುಕ್ಖಾದಿಮಿಸ್ಸಕೋ ಚೇವ, ಪಕಿಣ್ಣಕಾತಿ ಮಾತಿಕಾ.

ರಾಜನೀತಿ –

ಸೀಹಾ ಏಕಂ ಬಕಾ ಏಕಂ, ಸಿಕ್ಖೇ ಚತ್ತಾರಿ ಕುಕ್ಕುಟಾ;

ಪಞ್ಚ ಕಾಕಾ ರಾಜಾ ನಾಮ, ಛ ಸುನಕ್ಖಾ ತೀಣಿ ಗದ್ರಭಾ.

೧. ಮಹಾಕಮ್ಮಂ ಖುದ್ದಕಂ ವಾ, ಯಂ ಕಮ್ಮಂ ಕಾತುಮಿಚ್ಛತಿ;

ಸಬ್ಬಾರಮ್ಭೇನ ಕಾತಬ್ಬಂ, ಸೀಹಾ ಏಕಂ ತದಾ ಭವೇ.

೨. ಇನ್ದ್ರಿಯಾನಿ ಸುಸಂಯಮ, ಬಕೋವ ಪಣ್ಡಿತೋ ಭವೇ;

ದೇಸಕ ಲೋಮಪನ್ನಾನಿ, ಸಬ್ಬಕಮ್ಮಾನಿ ಸಾಧಯೇ.

೩. ಪುಬ್ಬಟ್ಠಾನಞ್ಚ ಯುದ್ಧಞ್ಚ, ಸಂವಿಭಾಗಞ್ಚ ಬನ್ಧು ಹಿ;

ಥಿಯಾ ಅಕ್ಕಮ್ಮ ಭುತ್ತಞ್ಚ, ಸಿಕ್ಖೇ ಚತ್ತಾರಿ ಕುಕ್ಕುಟೋ.

೪. ಗುಯ್ಹೇ ಮೇಥುನಂ ಪೇಕ್ಖಿತ್ವಾ, ಭೋಜನಂ ಞಾತಿಸಙ್ಗಹೋ;

ವಿಲೋಕಾ ಪೇಕ್ಖನಾಲಸ್ಯಂ, ಪಞ್ಚ ಸಿಕ್ಖೇಯ್ಯ ವಾಯಸಾ.

೫. ಅನಾಲಸ್ಸಂತಿಸವನ್ತಾಸೋ, ಸುನಿದ್ಧಾ ಸುಪ್ಪಬೋಧನಾ;

ದಳ್ಹಭತ್ತಿ ಚ ಸೂರಞ್ಚ, ಛ ಏತೇಸ್ವಾನತೋ ಗುಣೋ.

೬. ಖಿನ್ನೋವ ವಹತೇ ಭಾರಂ, ಸೀತುಣ್ಹಞ್ಚ ನ ಚಿನ್ತಯೀ;

ಸನ್ತುಟ್ಠೋ ಚ ಭವೇ ನಿಚ್ಚಂ, ತೀಣಿ ಸಿಕ್ಖೇಯ್ಯ ಗದ್ರಭಾ.

೭. ವೀಸತಿ ತಾನಿ ಗುಣಾನಿ, ಚರೇಯ್ಯ ಇಹ ಪಣ್ಡಿತೋ;

ವಿಜೇಯ್ಯ ರಿಪೂ ಸಬ್ಬೇಪಿ, ತೇಜಸ್ಸೀ ಸೋ ಭವಿಸ್ಸತಿ.

(೧) ಪಣ್ಡಿತಕಣ್ಡ (೨) ಸುಜನಕಣ್ಡ (೩) ಬಾಲದುಜ್ಜನಕಣ್ಡ (೪) ಮಿತ್ತಕಣ್ಡ (೫) ರಾಜಕಣ್ಡ (೬) ನಾಯಕಕಣ್ಡ (೭) ಪುತ್ತಕಣ್ಡ (೮) ವೇಜ್ಜಾಚರಿಯಕಣ್ಡ (೯) ದಾಸಕಕಣ್ಡ (೧೦) ಇತ್ಥಿಕಣ್ಡ (೧೧) ಪಕಿಣ್ಣಕಕಣ್ಡ

ಕವಿದಪ್ಪಣನೀತಿಂಯೋ, ವಾಚುಗ್ಗತಂ ಕರೋತಿ ಚೇ;

ಭುವನಮಜ್ಝೇ ಏಸೋ ಹಿ, ವಿಞ್ಞೂ ಪಣ್ಡಿತಜಾತಿಕೋ.

ಕವಿದಪ್ಪಣನೀತಿ

ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ

ರತನತ್ತಯಪಣಾಮ

೧. ಮಹಾಕವಿವರಂ ಬುದ್ಧಂ, ಧಮ್ಮಞ್ಚ ತೇನ ಸೇವಿತಂ;

ಸಙ್ಘಂ ನಿರಙ್ಗಣಞ್ಚಾಪಿ, ವನ್ದಾಮಿ ಸಿರಸಾ ದರಂ.

೨. ಕರಿಸ್ಸಾಮಿ ಸಮಾಸೇನ, ನಾನಾಸತ್ಥ ಸಮುದ್ಧಟಂ;

ಹಿತಾಯ ಕವಿನಂ ನೀತಿಂ, ಕವಿದಪ್ಪಣನಾಮಕಂ.

ಪಣ್ಡಿತಕಣ್ಡ

೩. ನೀತಿ ಸಾರೋ ಮನುಸ್ಸಾನಂ, ಮಿತ್ತೋ ಆಚರಿಯೋಪಿ ಚ;

ಮಾತಾ ಪಿತಾ ಚ ನೀತಿಮಾ, ಸುತವಾ ಗನ್ಥಕಾರಕೋ.

೪. ಅಲಸಸ್ಸ ಕುತೋ ಸಿಪ್ಪಂ, ಅಸಿಪ್ಪಸ್ಸ ಕುತೋ ಧನಂ;

ಅಧನಸ್ಸ ಕುತೋ ಮಿತ್ತಂ, ಅಮಿತ್ತಸ್ಸ ಕುತೋ ಸುಖಂ;

ಅಸುಖಸ್ಸ ಕುತೋ ಪುಞ್ಞಂ, ಅಪುಞ್ಞಸ್ಸ ಕುತೋ ವರಂ.

೫. ಸುಚಿನ್ತಿತಚಿನ್ತೀ ಚೇವ, ಸುಭಾಸಿತಭಾಸೀಪಿ ಚ;

ಸುಕತಕಮ್ಮಕಾರೀ ಚ, ಪಣ್ಡಿತೋ ಸಾಧುಮಾನುಸೋ.

೬. ಕವಿಹೇರಞ್ಞಕಾ ಕತ್ವಾ, ಉತ್ತತ್ತಂ ಸತ್ಥಕಞ್ಚನಂ;

ಭೂಸನಂ ಗಜ್ಜಪಜ್ಜಾದಿಂ, ಕರೋನ್ತಿ ಚ ಮನೋಹರಂ.

೭. ಬಹುಂ ಲಹುಞ್ಚ ಗಹಣಂ, ಸಮ್ಮೂಪಧಾರಣಮ್ಪಿ ಚ;

ಗಹಿತ ಅಸಮ್ಮುಸ್ಸನಂ, ಏತಂ ಸುವಿಞ್ಞುಲಕ್ಖಣಂ.

೮. ಅಜರಾಮರಂವ ಪಞ್ಞೋ, ವಿಜ್ಜಮತ್ಥಞ್ಚ ಚಿನ್ತಯೇ;

ಗಹಿತೋ ಇವ ಕೇಸೇಸು, ಮಚ್ಚುನಾ ಧಮ್ಮಮಾಚರೇ.

೯. ಸಿಪ್ಪಸಮಂ ಧನಂ ನತ್ಥಿ, ಸಿಪ್ಪಂ ಚೋರಾ ನ ಗಣ್ಹರೇ;

ಇಧ ಲೋಕೇ ಸಿಪ್ಪಂ ಮಿತ್ತಂ, ಪರಲೋಕೇ ಸುಖಾವಹಂ.

೧೦. ಭುಞ್ಜನತ್ಥಂ ಕಥನತ್ಥಂ, ಮುಖಂ ಹೋತೀತಿ ನೋ ವದೇ;

ಯಂ ವಾತಂ ವಾ ಮುಖಾರುಳ್ಹಂ, ವಚನಂ ಪಣ್ಡಿತೋ ನರೋ.

೧೧. ದುಮ್ಮೇಧೇಹಿ ಪಸಂಸಾ ಚ, ವಿಞ್ಞೂಹಿ ಗರಹಾ ಚ ಯಾ;

ಗರಹಾವ ಸೇಯ್ಯೋ ವಿಞ್ಞೂಹಿ, ಯಞ್ಚೇ ಬಾಲಪ್ಪಸಂಸನಾ.

೧೨. ಅಚಿನ್ತಿಯೇ ಸಾಟ್ಠಕಥೇ, ಪಣ್ಡಿತೋ ಜಿನಭಾಸಿತೇ;

ಉಪದೇಸಂ ಸದಾ ಗಣ್ಹೇ, ಗರುಂ ಸಮ್ಮಾ ಉಪಟ್ಠಹಂ.

ತಸ್ಮಾ ಸಾಟ್ಠಕಥೇ ಧೀರೋ, ಗಮ್ಭೀರೇ ಜಿನಭಾಸಿತೇ;

ಉಪದೇಸಂ ಸದಾ ಗಣ್ಹೇ, ಗರುಂ ಸಮ್ಮಾ ಉಪಟ್ಠಹಂ.

೧೩. ಗರೂಪದೇಸಹೀನೋ ಹಿ, ಅತ್ಥಸಾರಂ ನ ವಿನ್ದತಿ;

ಅತ್ಥಸಾರವಿಹೀನೋ ಸೋ, ಸದ್ಧಮ್ಮಾ ಪರಿಹಾಯತಿ.

೧೪. ಗರೂಪದೇಸಲಾಭೀ ಚ, ಅತ್ಥಸಾರಸಮಾಯುತೋ;

ಸದ್ಧಮ್ಮಂ ಪರಿಪಾಲೇನ್ತೋ, ಸದ್ಧಮ್ಮಸ್ಮಾ ನ ಹಾಯತಿ.

೧೫. ಸಬ್ಬದಬ್ಬೇಸು ವಿಜ್ಜೇವ, ದಬ್ಬಮಾಹು ಅನುತ್ತರಂ;

ಅಹಾರತ್ತಾ ಅನಗ್ಘತ್ತಾ, ಅಕ್ಖಯತ್ತಾ ಚ ಸಬ್ಬದಾ.

೧೬. ಅಪ್ಪಕೇನಪಿ ಮೇಧಾವೀ, ಪಾಭತೇನ ವಿಚಕ್ಖಣೋ;

ಸಮುಟ್ಠಾಪೇತಿ ಅತ್ತಾನಂ, ಅಣುಂ ಅಗ್ಗಿಂವ ಸನ್ಧಮಂ.

೧೭. ಪಣ್ಡಿತೇ ಚ ಗುಣಾ ಸಬ್ಬೇ, ಮೂಳ್ಹೇ ದೋಸಾ ಹಿ ಕೇವಲಂ;

ತಸ್ಮಾ ಮೂಳ್ಹಸಹಸ್ಸೇಸು, ಪಞ್ಞೋ ಏಕೋ ವಿಸೇಸಿಯತೇ.

೧೮. ಬಾಲಾ ಇಸ್ಸನ್ತಿ ದುಮ್ಮೇಧಾ, ಗುಣೀ ನಿದ್ದೋಸಕಾರಿನೋ;

ಗರುಕೋ ಪಣ್ಡಿತೋ ಏತಸ-ಮಿಸ್ಸಂ ತೇಹ್ಯವಿದ್ವಾ ಸಮೋ.

೧೯. ಮನುಞ್ಞಮೇವ ಭಾಸೇಯ್ಯ, ನಾಮನುಞ್ಞಂ ಕುದಾಚನಂ;

ಮನುಞ್ಞಂ ಭಾಸಮಾನಸ್ಸ, ಗರುಂ ಭಾರಂ ಉದದ್ಧರಿ;

ಧನಞ್ಚ ನಂ ಅಲಾಭೇಸಿ, ತೇನ ಚತ್ತಮನೋ ಅಹು.

೨೦. ವಿಜ್ಜಾ ದದಾತಿ ವಿನಯಂ, ವಿನಯಾ ಯಾತಿ ಪತ್ತತಂ;

ಪತ್ತತ್ತಾ ಧನಂ ಪಪ್ಪೋತಿ, ಧನಾ ಧಮ್ಮಂ ತತೋ ಸುಖಂ.

೨೧. ಯೇ ವುಡ್ಢಮಪಚಯನ್ತಿ, ನರಾ ಧಮ್ಮಸ್ಸ ಕೋವಿದಾ;

ದಿಟ್ಠೇವ ಧಮ್ಮೇ ಪಾಸಂಸಾ, ಸಮ್ಪರಾಯೇ ಚ ಸುಗ್ಗತಿಂ.

೨೨. ಮಾತರಿವ ಪರದಾರೇಸು, ಪರದಬ್ಬೇಸು ಲೇದ್ದುಂವ;

ಅತ್ತನೀವ ಸಬ್ಬಭೂತೇಸು, ಯೋ ಪಸ್ಸತಿ ಸೋ ಪಣ್ಡಿತೋ.

೨೩. ಆಸೀಸೇಥೇವ ಪುರಿಸೋ, ನ ನಿಬ್ಬಿನ್ದೇಯ್ಯ ಪಣ್ಡಿತೋ;

ಅನವಜ್ಜೇಸು ಕಮ್ಮೇಸು, ಪಸಂಸಿತೇಸು ಸಾಧುಭಿ.

ಆಸೀಸೇಥೇವ ಪುರಿಸೋ, ನ ನಿಬ್ಬಿನ್ದೇಯ್ಯ ಪಣ್ಡಿತೋ;

ಪಸ್ಸಾಮಿ ವೋಹಂ ಅತ್ತಾನಂ, ಯಥಾ ಇಚ್ಛಿಂ ತಥಾ ಅಹು.

೨೪. ವಾಯಮೇಥೇವ ಪುರಿಸೋ, ನ ನಿಬ್ಬಿನ್ದೇಯ್ಯ ಪಣ್ಡಿತೋ;

ಪುಞ್ಞಕ್ರಿಯವತ್ಥೂಸು, ಪಸಂಸಿತೇಸು ವಿಞ್ಞುಭಿ.

೨೫. ಲೋಕೇ ಉಸ್ಸಾಹವನ್ತಾನಂ, ಜನಾನಂ ಕಿಮಸಾಧಿಯಂ;

ಸಾಗರೇಪಿ ಮಹಾಸೇತುಂ, ಕಪಿಯೂಥೇಹಿ ಬನ್ಧತಿ.

೨೬. ಕಿಂ ಕುಲೇನ ವಿಸಾಲೇನ, ಗುಣಹೀನೋ ತು ಯೋ ನರೋ;

ಅಕುಲಿನೋಪಿ ಸತ್ಥಞ್ಞೋ, ದೇವತಾಹಿಪಿ ಪುಜ್ಜತೇ.

೨೭. ಉಕ್ಕಟ್ಠೇ ಸೂರಮಿಚ್ಛನ್ತಿ, ಮನ್ತೀಸು ಅಕುತೂಹಲಂ;

ಪಿಯಞ್ಚ ಅನ್ನಪಾನಮ್ಹಿ, ಅತ್ಥೇ ಜಾತೇ ಚ ಪಣ್ಡಿತಂ.

೨೮. ರೂಪಯೋಬ್ಬನ್ನಸಮ್ಪನ್ನಾ, ವಿಸಾಲಕುಲಸಮ್ಭವಾ;

ವಿಜ್ಜಾಹೀನಾ ನ ಸೋಭನ್ತೇ, ನಿಗ್ಗನ್ಧಾ ಇವ ಕಿಂ ಸುಕಾ.

೨೯. ವುತ್ಯಂ ವಿಸದಞಾಣಸ್ಸ, ಞಾತೋ ಅತ್ಥೋ ತರಸ್ಸನ;

ಸೂರಪ್ಪಭಾಯ ಆದಾಸೋ, ಛಾಯಂ ದಿಸ್ಸೇ ನ ಮಾಕರೇ.

೩೦. ಅವೇಯ್ಯಾಕರಣೋ ತ್ವನ್ಧೋ, ಬಧಿರೋ ಕೋಸವಜ್ಜಿತೋ;

ಸಾಹಿಚ್ಚರಹಿತೋ ಪಙ್ಗು, ಮೂಗೋ ತಕ್ಕವಿವಜ್ಜಿತೋ.

೩೧. ಧೀರೋ ಚ ವಿವಿಧಾನಞ್ಞೂ, ಪರೇಸಂ ವಿವರಾನುಗೂ;

ಸಬ್ಬಾಮಿತ್ತೇ ವಸೀಕತ್ವಾ, ಕೋಸಿಯೋವ ಸುಖೀ ಸಿಯಾ.

೩೨. ಮಹಾತೇಜೋಪಿ ತೇಜೋಯಂ, ಮತ್ತಿಕಂ ನ ಮುದುಂ ಕರೇ;

ಆಪೋ ಆಪೇಸಿ ಮುದುಕಂ, ಸಾಧುವಾಚಾವ ಕಕ್ಖಳಂ.

೩೩. ಕೋತ್ಥೋ ಪುತ್ತೇನ ಜಾತೇನ, ಯೋ ನ ವಿದೂ ನ ಧಮ್ಮಿಕೋ;