೧. ಪಾತುಭಾವಸುತ್ತಂ

೯೬. ‘‘ಛನ್ನಂ, ಭಿಕ್ಖವೇ, ಪಾತುಭಾವೋ ದುಲ್ಲಭೋ ಲೋಕಸ್ಮಿಂ. ಕತಮೇಸಂ ಛನ್ನಂ? ತಥಾಗತಸ್ಸ ಅರಹತೋ ಸಮ್ಮಾಸಮ್ಬುದ್ಧಸ್ಸ ಪಾತುಭಾವೋ ದುಲ್ಲಭೋ ಲೋಕಸ್ಮಿಂ, ತಥಾಗತಪ್ಪವೇದಿತಸ್ಸ ಧಮ್ಮವಿನಯಸ್ಸ ದೇಸೇತಾ ಪುಗ್ಗಲೋ ದುಲ್ಲಭೋ ಲೋಕಸ್ಮಿಂ, ಅರಿಯಾಯತನೇ ಪಚ್ಚಾಜಾತಿ ದುಲ್ಲಭಾ [ಪಚ್ಚಾಜಾತೋ ದುಲ್ಲಭೋ (ಸ್ಯಾ.)] ಲೋಕಸ್ಮಿಂ, ಇನ್ದ್ರಿಯಾನಂ ಅವೇಕಲ್ಲತಾ ದುಲ್ಲಭಾ ಲೋಕಸ್ಮಿಂ, ಅಜಳತಾ ಅನೇಳಮೂಗತಾ ದುಲ್ಲಭಾ ಲೋಕಸ್ಮಿಂ, ಕುಸಲೇ ಧಮ್ಮೇ ಛನ್ದೋ [ಕುಸಲಧಮ್ಮಚ್ಛನ್ದೋ (ಸೀ. ಸ್ಯಾ. ಪೀ.)] ದುಲ್ಲಭೋ ಲೋಕಸ್ಮಿಂ. ಇಮೇಸಂ ಖೋ, ಭಿಕ್ಖವೇ, ಛನ್ನಂ ಪಾತುಭಾವೋ ದುಲ್ಲಭೋ ಲೋಕಸ್ಮಿ’’ನ್ತಿ. ಪಠಮಂ.