೮. ಅತ್ತಕಾರೀಸುತ್ತಂ

೩೮. ಅಥ ಖೋ ಅಞ್ಞತರೋ ಬ್ರಾಹ್ಮಣೋ ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವತಾ ಸದ್ಧಿಂ ಸಮ್ಮೋದಿ. ಸಮ್ಮೋದನೀಯಂ ಕಥಂ ಸಾರಣೀಯಂ ವೀತಿಸಾರೇತ್ವಾ ಏಕಮನ್ತಂ ನಿಸೀದಿ. ಏಕಮನ್ತಂ ನಿಸಿನ್ನೋ ಖೋ ಸೋ ಬ್ರಾಹ್ಮಣೋ ಭಗವನ್ತಂ ಏತದವೋಚ – ‘‘ಅಹಞ್ಹಿ, ಭೋ ಗೋತಮ, ಏವಂವಾದೀ ಏವಂದಿಟ್ಠಿ – ‘ನತ್ಥಿ ಅತ್ತಕಾರೋ, ನತ್ಥಿ ಪರಕಾರೋ’’’ತಿ. ‘‘ಮಾಹಂ, ಬ್ರಾಹ್ಮಣ, ಏವಂವಾದಿಂ ಏವಂದಿಟ್ಠಿಂ ಅದ್ದಸಂ ವಾ ಅಸ್ಸೋಸಿಂ ವಾ. ಕಥಞ್ಹಿ ನಾಮ ಸಯಂ ಅಭಿಕ್ಕಮನ್ತೋ, ಸಯಂ ಪಟಿಕ್ಕಮನ್ತೋ ಏವಂ ವಕ್ಖತಿ – ‘ನತ್ಥಿ ಅತ್ತಕಾರೋ, ನತ್ಥಿ ಪರಕಾರೋ’’’ತಿ!

‘‘ತಂ ಕಿಂ ಮಞ್ಞಸಿ, ಬ್ರಾಹ್ಮಣ, ಅತ್ಥಿ ಆರಬ್ಭಧಾತೂ’’ತಿ? ‘‘ಏವಂ, ಭೋ’’. ‘‘ಆರಬ್ಭಧಾತುಯಾ ಸತಿ ಆರಬ್ಭವನ್ತೋ ಸತ್ತಾ ಪಞ್ಞಾಯನ್ತೀ’’ತಿ? ‘‘ಏವಂ, ಭೋ’’. ‘‘ಯಂ ಖೋ, ಬ್ರಾಹ್ಮಣ, ಆರಬ್ಭಧಾತುಯಾ ಸತಿ ಆರಬ್ಭವನ್ತೋ ಸತ್ತಾ ಪಞ್ಞಾಯನ್ತಿ, ಅಯಂ ಸತ್ತಾನಂ ಅತ್ತಕಾರೋ ಅಯಂ ಪರಕಾರೋ’’.

‘‘ತಂ ಕಿಂ ಮಞ್ಞಸಿ, ಬ್ರಾಹ್ಮಣ, ಅತ್ಥಿ ನಿಕ್ಕಮಧಾತು…ಪೇ… ಅತ್ಥಿ ಪರಕ್ಕಮಧಾತು… ಅತ್ಥಿ ಥಾಮಧಾತು… ಅತ್ಥಿ ಠಿತಿಧಾತು… ಅತ್ಥಿ ಉಪಕ್ಕಮಧಾತೂ’’ತಿ? ‘‘ಏವಂ, ಭೋ’’. ‘‘ಉಪಕ್ಕಮಧಾತುಯಾ ಸತಿ ಉಪಕ್ಕಮವನ್ತೋ ಸತ್ತಾ ಪಞ್ಞಾಯನ್ತೀ’’ತಿ? ‘‘ಏವಂ, ಭೋ’’. ‘‘ಯಂ ಖೋ, ಬ್ರಾಹ್ಮಣ, ಉಪಕ್ಕಮಧಾತುಯಾ ಸತಿ ಉಪಕ್ಕಮವನ್ತೋ ಸತ್ತಾ ಪಞ್ಞಾಯನ್ತಿ, ಅಯಂ ಸತ್ತಾನಂ ಅತ್ತಕಾರೋ ಅಯಂ ಪರಕಾರೋ’’.

‘‘ಮಾಹಂ, ಬ್ರಾಹ್ಮಣ [ತಂ ಕಿಂ ಮಞ್ಞಸಿ ಬ್ರಾಹ್ಮಣ ಮಾಹಂ (ಕ.)], ಏವಂವಾದಿಂ ಏವಂದಿಟ್ಠಿಂ ಅದ್ದಸಂ ವಾ ಅಸ್ಸೋಸಿಂ ವಾ. ಕಥಞ್ಹಿ ನಾಮ ಸಯಂ ಅಭಿಕ್ಕಮನ್ತೋ ಸಯಂ ಪಟಿಕ್ಕಮನ್ತೋ ಏವಂ ವಕ್ಖತಿ – ‘ನತ್ಥಿ ಅತ್ತಕಾರೋ ನತ್ಥಿ ಪರಕಾರೋ’’’ತಿ.

‘‘ಅಭಿಕ್ಕನ್ತಂ, ಭೋ ಗೋತಮ…ಪೇ… ಅಜ್ಜತಗ್ಗೇ ಪಾಣುಪೇತಂ ಸರಣಂ ಗತ’’ನ್ತಿ! ಅಟ್ಠಮಂ.