೯. ನಿದಾನಸುತ್ತಂ

೩೯. ‘‘ತೀಣಿಮಾನಿ, ಭಿಕ್ಖವೇ, ನಿದಾನಾನಿ ಕಮ್ಮಾನಂ ಸಮುದಯಾಯ. ಕತಮಾನಿ ತೀಣಿ? ಲೋಭೋ ನಿದಾನಂ ಕಮ್ಮಾನಂ ಸಮುದಯಾಯ, ದೋಸೋ ನಿದಾನಂ ಕಮ್ಮಾನಂ ಸಮುದಯಾಯ, ಮೋಹೋ ನಿದಾನಂ ಕಮ್ಮಾನಂ ಸಮುದಯಾಯ. ನ, ಭಿಕ್ಖವೇ, ಲೋಭಾ ಅಲೋಭೋ ಸಮುದೇತಿ; ಅಥ ಖೋ, ಭಿಕ್ಖವೇ, ಲೋಭಾ ಲೋಭೋವ ಸಮುದೇತಿ. ನ, ಭಿಕ್ಖವೇ, ದೋಸಾ ಅದೋಸೋ ಸಮುದೇತಿ; ಅಥ ಖೋ, ಭಿಕ್ಖವೇ, ದೋಸಾ ದೋಸೋವ ಸಮುದೇತಿ. ನ, ಭಿಕ್ಖವೇ, ಮೋಹಾ ಅಮೋಹೋ ಸಮುದೇತಿ; ಅಥ ಖೋ, ಭಿಕ್ಖವೇ, ಮೋಹಾ ಮೋಹೋವ ಸಮುದೇತಿ. ನ, ಭಿಕ್ಖವೇ, ಲೋಭಜೇನ ಕಮ್ಮೇನ ದೋಸಜೇನ ಕಮ್ಮೇನ ಮೋಹಜೇನ ಕಮ್ಮೇನ ದೇವಾ ಪಞ್ಞಾಯನ್ತಿ, ಮನುಸ್ಸಾ ಪಞ್ಞಾಯನ್ತಿ, ಯಾ ವಾ ಪನಞ್ಞಾಪಿ ಕಾಚಿ ಸುಗತಿಯೋ. ಅಥ ಖೋ, ಭಿಕ್ಖವೇ, ಲೋಭಜೇನ ಕಮ್ಮೇನ ದೋಸಜೇನ ಕಮ್ಮೇನ ಮೋಹಜೇನ ಕಮ್ಮೇನ ನಿರಯೋ ಪಞ್ಞಾಯತಿ ತಿರಚ್ಛಾನಯೋನಿ ಪಞ್ಞಾಯತಿ ಪೇತ್ತಿವಿಸಯೋ ಪಞ್ಞಾಯತಿ, ಯಾ ವಾ ಪನಞ್ಞಾಪಿ ಕಾಚಿ ದುಗ್ಗತಿಯೋ. ಇಮಾನಿ ಖೋ, ಭಿಕ್ಖವೇ, ತೀಣಿ ನಿದಾನಾನಿ ಕಮ್ಮಾನಂ ಸಮುದಯಾಯ.

‘‘ತೀಣಿಮಾನಿ, ಭಿಕ್ಖವೇ, ನಿದಾನಾನಿ ಕಮ್ಮಾನಂ ಸಮುದಯಾಯ. ಕತಮಾನಿ ತೀಣಿ? ಅಲೋಭೋ ನಿದಾನಂ ಕಮ್ಮಾನಂ ಸಮುದಯಾಯ, ಅದೋಸೋ ನಿದಾನಂ ಕಮ್ಮಾನಂ ಸಮುದಯಾಯ, ಅಮೋಹೋ ನಿದಾನಂ ಕಮ್ಮಾನಂ ಸಮುದಯಾಯ. ನ, ಭಿಕ್ಖವೇ, ಅಲೋಭಾ ಲೋಭೋ ಸಮುದೇತಿ; ಅಥ ಖೋ, ಭಿಕ್ಖವೇ, ಅಲೋಭಾ ಅಲೋಭೋವ ಸಮುದೇತಿ. ನ, ಭಿಕ್ಖವೇ, ಅದೋಸಾ ದೋಸೋ ಸಮುದೇತಿ; ಅಥ ಖೋ, ಭಿಕ್ಖವೇ, ಅದೋಸಾ ಅದೋಸೋವ ಸಮುದೇತಿ. ನ, ಭಿಕ್ಖವೇ, ಅಮೋಹಾ ಮೋಹೋ ಸಮುದೇತಿ; ಅಥ ಖೋ, ಭಿಕ್ಖವೇ, ಅಮೋಹಾ ಅಮೋಹೋವ ಸಮುದೇತಿ. ನ, ಭಿಕ್ಖವೇ, ಅಲೋಭಜೇನ ಕಮ್ಮೇನ ಅದೋಸಜೇನ ಕಮ್ಮೇನ ಅಮೋಹಜೇನ ಕಮ್ಮೇನ ನಿರಯೋ ಪಞ್ಞಾಯತಿ ತಿರಚ್ಛಾನಯೋನಿ ಪಞ್ಞಾಯತಿ ಪೇತ್ತಿವಿಸಯೋ ಪಞ್ಞಾಯತಿ, ಯಾ ವಾ ಪನಞ್ಞಾಪಿ ಕಾಚಿ ದುಗ್ಗತಿಯೋ. ಅಥ ಖೋ, ಭಿಕ್ಖವೇ, ಅಲೋಭಜೇನ ಕಮ್ಮೇನ ಅದೋಸಜೇನ ಕಮ್ಮೇನ ಅಮೋಹಜೇನ ಕಮ್ಮೇನ ದೇವಾ ಪಞ್ಞಾಯನ್ತಿ, ಮನುಸ್ಸಾ ಪಞ್ಞಾಯನ್ತಿ, ಯಾ ವಾ ಪನಞ್ಞಾಪಿ ಕಾಚಿ ಸುಗತಿಯೋ. ಇಮಾನಿ ಖೋ, ಭಿಕ್ಖವೇ, ತೀಣಿ ನಿದಾನಾನಿ ಕಮ್ಮಾನಂ ಸಮುದಯಾಯಾ’’ತಿ. ನವಮಂ.