೭. ಛಳಙ್ಗದಾನಸುತ್ತಂ

೩೭. ಏಕಂ ಸಮಯಂ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ವೇಳುಕಣ್ಡಕೀ [ವೇಳುಕಣ್ಡಕಿಯಾ (ಅ. ನಿ. ೭.೫೩; ೨.೧೩೪; ಸಂ. ನಿ. ೨.೧೭೩)] ನನ್ದಮಾತಾ ಉಪಾಸಿಕಾ ಸಾರಿಪುತ್ತಮೋಗ್ಗಲ್ಲಾನಪ್ಪಮುಖೇ ಭಿಕ್ಖುಸಙ್ಘೇ ಛಳಙ್ಗಸಮನ್ನಾಗತಂ ದಕ್ಖಿಣಂ ಪತಿಟ್ಠಾಪೇತಿ. ಅದ್ದಸಾ ಖೋ ಭಗವಾ ದಿಬ್ಬೇನ ಚಕ್ಖುನಾ ವಿಸುದ್ಧೇನ ಅತಿಕ್ಕನ್ತಮಾನುಸಕೇನ ವೇಳುಕಣ್ಡಕಿಂ ನನ್ದಮಾತರಂ ಉಪಾಸಿಕಂ ಸಾರಿಪುತ್ತಮೋಗ್ಗಲ್ಲಾನಪ್ಪಮುಖೇ ಭಿಕ್ಖುಸಙ್ಘೇ ಛಳಙ್ಗಸಮನ್ನಾಗತಂ ದಕ್ಖಿಣಂ ಪತಿಟ್ಠಾಪೇನ್ತಿಂ. ದಿಸ್ವಾ ಭಿಕ್ಖೂ ಆಮನ್ತೇಸಿ – ‘‘ಏಸಾ, ಭಿಕ್ಖವೇ, ವೇಳುಕಣ್ಡಕೀ ನನ್ದಮಾತಾ ಉಪಾಸಿಕಾ ಸಾರಿಪುತ್ತಮೋಗ್ಗಲ್ಲಾನಪ್ಪಮುಖೇ ಭಿಕ್ಖುಸಙ್ಘೇ ಛಳಙ್ಗಸಮನ್ನಾಗತಂ ದಕ್ಖಿಣಂ ಪತಿಟ್ಠಾಪೇತಿ’’.

‘‘ಕಥಞ್ಚ, ಭಿಕ್ಖವೇ, ಛಳಙ್ಗಸಮನ್ನಾಗತಾ ದಕ್ಖಿಣಾ ಹೋತಿ? ಇಧ, ಭಿಕ್ಖವೇ, ದಾಯಕಸ್ಸ ತೀಣಙ್ಗಾನಿ ಹೋನ್ತಿ, ಪಟಿಗ್ಗಾಹಕಾನಂ ತೀಣಙ್ಗಾನಿ. ಕತಮಾನಿ ದಾಯಕಸ್ಸ ತೀಣಙ್ಗಾನಿ? ಇಧ, ಭಿಕ್ಖವೇ, ದಾಯಕೋ ಪುಬ್ಬೇವ ದಾನಾ ಸುಮನೋ ಹೋತಿ, ದದಂ ಚಿತ್ತಂ ಪಸಾದೇತಿ, ದತ್ವಾ ಅತ್ತಮನೋ ಹೋತಿ. ಇಮಾನಿ ದಾಯಕಸ್ಸ ತೀಣಙ್ಗಾನಿ.

‘‘ಕತಮಾನಿ ಪಟಿಗ್ಗಾಹಕಾನಂ ತೀಣಙ್ಗಾನಿ? ಇಧ, ಭಿಕ್ಖವೇ, ಪಟಿಗ್ಗಾಹಕಾ ವೀತರಾಗಾ ವಾ ಹೋನ್ತಿ ರಾಗವಿನಯಾಯ ವಾ ಪಟಿಪನ್ನಾ, ವೀತದೋಸಾ ವಾ ಹೋನ್ತಿ ದೋಸವಿನಯಾಯ ವಾ ಪಟಿಪನ್ನಾ, ವೀತಮೋಹಾ ವಾ ಹೋನ್ತಿ ಮೋಹವಿನಯಾಯ ವಾ ಪಟಿಪನ್ನಾ. ಇಮಾನಿ ಪಟಿಗ್ಗಾಹಕಾನಂ ತೀಣಙ್ಗಾನಿ. ಇತಿ ದಾಯಕಸ್ಸ ತೀಣಙ್ಗಾನಿ, ಪಟಿಗ್ಗಾಹಕಾನಂ ತೀಣಙ್ಗಾನಿ. ಏವಂ ಖೋ, ಭಿಕ್ಖವೇ, ಛಳಙ್ಗಸಮನ್ನಾಗತಾ ದಕ್ಖಿಣಾ ಹೋತಿ.

‘‘ಏವಂ ಛಳಙ್ಗಸಮನ್ನಾಗತಾಯ, ಭಿಕ್ಖವೇ, ದಕ್ಖಿಣಾಯ ನ ಸುಕರಂ ಪುಞ್ಞಸ್ಸ ಪಮಾಣಂ ಗಹೇತುಂ – ‘ಏತ್ತಕೋ ಪುಞ್ಞಾಭಿಸನ್ದೋ ಕುಸಲಾಭಿಸನ್ದೋ ಸುಖಸ್ಸಾಹಾರೋ ಸೋವಗ್ಗಿಕೋ ಸುಖವಿಪಾಕೋ ಸಗ್ಗಸಂವತ್ತನಿಕೋ ಇಟ್ಠಾಯ ಕನ್ತಾಯ ಮನಾಪಾಯ ಹಿತಾಯ ಸುಖಾಯ ಸಂವತ್ತತೀ’ತಿ. ಅಥ ಖೋ ಅಸಙ್ಖ್ಯೇಯ್ಯೋ [ಅಸಙ್ಖೇಯ್ಯೋ (ಸೀ. ಸ್ಯಾ. ಕಂ. ಪೀ.)] ಅಪ್ಪಮೇಯ್ಯೋ ಮಹಾಪುಞ್ಞಕ್ಖನ್ಧೋತ್ವೇವ ಸಙ್ಖಂ ಗಚ್ಛತಿ.

‘‘ಸೇಯ್ಯಥಾಪಿ, ಭಿಕ್ಖವೇ, ಮಹಾಸಮುದ್ದೇ ನ ಸುಕರಂ ಉದಕಸ್ಸ ಪಮಾಣಂ ಗಹೇತುಂ – ‘ಏತ್ತಕಾನಿ ಉದಕಾಳ್ಹಕಾನೀತಿ ವಾ ಏತ್ತಕಾನಿ ಉದಕಾಳ್ಹಕಸತಾನೀತಿ ವಾ ಏತ್ತಕಾನಿ ಉದಕಾಳ್ಹಕಸಹಸ್ಸಾನೀತಿ ವಾ ಏತ್ತಕಾನಿ ಉದಕಾಳ್ಹಕಸತಸಹಸ್ಸಾನೀ’ತಿ ವಾ. ಅಥ ಖೋ ಅಸಙ್ಖ್ಯೇಯ್ಯೋ ಅಪ್ಪಮೇಯ್ಯೋ ಮಹಾಉದಕಕ್ಖನ್ಧೋತ್ವೇವ ಸಙ್ಖಂ ಗಚ್ಛತಿ. ಏವಮೇವಂ ಖೋ, ಭಿಕ್ಖವೇ, ಏವಂ ಛಳಙ್ಗಸಮನ್ನಾಗತಾಯ ದಕ್ಖಿಣಾಯ ನ ಸುಕರಂ ಪುಞ್ಞಸ್ಸ ಪಮಾಣಂ ಗಹೇತುಂ – ‘ಏತ್ತಕೋ ಪುಞ್ಞಾಭಿಸನ್ದೋ ಕುಸಲಾಭಿಸನ್ದೋ ಸುಖಸ್ಸಾಹಾರೋ ಸೋವಗ್ಗಿಕೋ ಸುಖವಿಪಾಕೋ ಸಗ್ಗಸಂವತ್ತನಿಕೋ ಇಟ್ಠಾಯ ಕನ್ತಾಯ ಮನಾಪಾಯ ಹಿತಾಯ ಸುಖಾಯ ಸಂವತ್ತತೀ’ತಿ. ಅಥ ಖೋ ಅಸಙ್ಖ್ಯೇಯ್ಯೋ ಅಪ್ಪಮೇಯ್ಯೋ ಮಹಾಪುಞ್ಞಕ್ಖನ್ಧೋತ್ವೇವ ಸಙ್ಖಂ ಗಚ್ಛತೀ’’ತಿ.

[ಪೇ. ವ. ೩೦೫ ಪೇತವತ್ಥುಮ್ಹಿಪಿ] ‘‘ಪುಬ್ಬೇವ ದಾನಾ ಸುಮನೋ, ದದಂ ಚಿತ್ತಂ ಪಸಾದಯೇ;

ದತ್ವಾ ಅತ್ತಮನೋ ಹೋತಿ, ಏಸಾ ಯಞ್ಞಸ್ಸ [ಪುಞ್ಞಸ್ಸ (ಕ.)] ಸಮ್ಪದಾ.

‘‘ವೀತರಾಗಾ [ವೀತರಾಗೋ (ಸ್ಯಾ. ಕಂ. ಕ.) ಏವಂ ಅನನ್ತರಪದತ್ತಯೇಪಿ] ವೀತದೋಸಾ, ವೀತಮೋಹಾ ಅನಾಸವಾ;

ಖೇತ್ತಂ ಯಞ್ಞಸ್ಸ ಸಮ್ಪನ್ನಂ, ಸಞ್ಞತಾ ಬ್ರಹ್ಮಚಾರಯೋ [ಬ್ರಹ್ಮಚಾರಿನೋ (ಸ್ಯಾ. ಕಂ.)].

‘‘ಸಯಂ ಆಚಮಯಿತ್ವಾನ, ದತ್ವಾ ಸಕೇಹಿ ಪಾಣಿಭಿ;

ಅತ್ತನೋ ಪರತೋ ಚೇಸೋ, ಯಞ್ಞೋ ಹೋತಿ ಮಹಪ್ಫಲೋ.

[ಅ. ನಿ. ೪.೪೦] ‘‘ಏವಂ ಯಜಿತ್ವಾ ಮೇಧಾವೀ, ಸದ್ಧೋ ಮುತ್ತೇನ ಚೇತಸಾ;

ಅಬ್ಯಾಪಜ್ಜಂ ಸುಖಂ ಲೋಕಂ, ಪಣ್ಡಿತೋ ಉಪಪಜ್ಜತೀ’’ತಿ. ಸತ್ತಮಂ;