೭. ಭೋಗಸುತ್ತಂ

೨೨೭. ‘‘ಪಞ್ಚಿಮೇ, ಭಿಕ್ಖವೇ, ಆದೀನವಾ ಭೋಗೇಸು. ಕತಮೇ ಪಞ್ಚ? ಅಗ್ಗಿಸಾಧಾರಣಾ ಭೋಗಾ, ಉದಕಸಾಧಾರಣಾ ಭೋಗಾ, ರಾಜಸಾಧಾರಣಾ ಭೋಗಾ, ಚೋರಸಾಧಾರಣಾ ಭೋಗಾ, ಅಪ್ಪಿಯೇಹಿ ದಾಯಾದೇಹಿ ಸಾಧಾರಣಾ ಭೋಗಾ. ಇಮೇ ಖೋ, ಭಿಕ್ಖವೇ, ಪಞ್ಚ ಆದೀನವಾ ಭೋಗೇಸು.

‘‘ಪಞ್ಚಿಮೇ, ಭಿಕ್ಖವೇ, ಆನಿಸಂಸಾ ಭೋಗೇಸು. ಕತಮೇ ಪಞ್ಚ? ಭೋಗೇ ನಿಸ್ಸಾಯ ಅತ್ತಾನಂ ಸುಖೇತಿ ಪೀಣೇತಿ ಸಮ್ಮಾ ಸುಖಂ ಪರಿಹರತಿ, ಮಾತಾಪಿತರೋ ಸುಖೇತಿ ಪೀಣೇತಿ ಸಮ್ಮಾ ಸುಖಂ ಪರಿಹರತಿ, ಪುತ್ತದಾರದಾಸಕಮ್ಮಕರಪೋರಿಸೇ ಸುಖೇತಿ ಪೀಣೇತಿ ಸಮ್ಮಾ ಸುಖಂ ಪರಿಹರತಿ, ಮಿತ್ತಾಮಚ್ಚೇ ಸುಖೇತಿ ಪೀಣೇತಿ ಸಮ್ಮಾ ಸುಖಂ ಪರಿಹರತಿ, ಸಮಣಬ್ರಾಹ್ಮಣೇಸು ಉದ್ಧಗ್ಗಿಕಂ ದಕ್ಖಿಣಂ ಪತಿಟ್ಠಾಪೇತಿ ಸೋವಗ್ಗಿಕಂ ಸುಖವಿಪಾಕಂ ಸಗ್ಗಸಂವತ್ತನಿಕಂ. ಇಮೇ ಖೋ, ಭಿಕ್ಖವೇ, ಪಞ್ಚ ಆನಿಸಂಸಾ ಭೋಗೇಸೂ’’ತಿ. ಸತ್ತಮಂ.