೪. ಮಚ್ಛರೀಸುತ್ತಂ

೨೨೪. ‘‘ಪಞ್ಚಿಮೇ, ಭಿಕ್ಖವೇ, ಆದೀನವಾ ಅತಿನಿವಾಸೇ. ಕತಮೇ ಪಞ್ಚ? ಆವಾಸಮಚ್ಛರೀ ಹೋತಿ, ಕುಲಮಚ್ಛರೀ ಹೋತಿ, ಲಾಭಮಚ್ಛರೀ ಹೋತಿ, ವಣ್ಣಮಚ್ಛರೀ ಹೋತಿ, ಧಮ್ಮಮಚ್ಛರೀ ಹೋತಿ. ಇಮೇ ಖೋ, ಭಿಕ್ಖವೇ, ಪಞ್ಚ ಆದೀನವಾ ಅತಿನಿವಾಸೇ.

‘‘ಪಞ್ಚಿಮೇ, ಭಿಕ್ಖವೇ, ಆನಿಸಂಸಾ ಸಮವತ್ಥವಾಸೇ. ಕತಮೇ ಪಞ್ಚ? ನ ಆವಾಸಮಚ್ಛರೀ ಹೋತಿ, ನ ಕುಲಮಚ್ಛರೀ ಹೋತಿ, ನ ಲಾಭಮಚ್ಛರೀ ಹೋತಿ, ನ ವಣ್ಣಮಚ್ಛರೀ ಹೋತಿ, ನ ಧಮ್ಮಮಚ್ಛರೀ ಹೋತಿ. ಇಮೇ ಖೋ, ಭಿಕ್ಖವೇ, ಪಞ್ಚ ಆನಿಸಂಸಾ ಸಮವತ್ಥವಾಸೇ’’ತಿ. ಚತುತ್ಥಂ.