೨. ದುತಿಯದೀಘಚಾರಿಕಸುತ್ತಂ

೨೨೨. ‘‘ಪಞ್ಚಿಮೇ, ಭಿಕ್ಖವೇ, ಆದೀನವಾ ದೀಘಚಾರಿಕಂ ಅನವತ್ಥಚಾರಿಕಂ ಅನುಯುತ್ತಸ್ಸ ವಿಹರತೋ. ಕತಮೇ ಪಞ್ಚ? ಅನಧಿಗತಂ ನಾಧಿಗಚ್ಛತಿ, ಅಧಿಗತಾ ಪರಿಹಾಯತಿ, ಅಧಿಗತೇನೇಕಚ್ಚೇನ ಅವಿಸಾರದೋ ಹೋತಿ, ಗಾಳ್ಹಂ ರೋಗಾತಙ್ಕಂ ಫುಸತಿ, ನ ಚ ಮಿತ್ತವಾ ಹೋತಿ. ಇಮೇ ಖೋ, ಭಿಕ್ಖವೇ, ಪಞ್ಚ ಆದೀನವಾ ದೀಘಚಾರಿಕಂ ಅನವತ್ಥಚಾರಿಕಂ ಅನುಯುತ್ತಸ್ಸ ವಿಹರತೋ.

‘‘ಪಞ್ಚಿಮೇ, ಭಿಕ್ಖವೇ, ಆನಿಸಂಸಾ ಸಮವತ್ಥಚಾರೇ. ಕತಮೇ ಪಞ್ಚ? ಅನಧಿಗತಂ ಅಧಿಗಚ್ಛತಿ, ಅಧಿಗತಾ ನ ಪರಿಹಾಯತಿ, ಅಧಿಗತೇನೇಕಚ್ಚೇನ ವಿಸಾರದೋ ಹೋತಿ, ನ ಗಾಳ್ಹಂ ರೋಗಾತಙ್ಕಂ ಫುಸತಿ, ಮಿತ್ತವಾ ಚ ಹೋತಿ. ಇಮೇ ಖೋ, ಭಿಕ್ಖವೇ, ಪಞ್ಚ ಆನಿಸಂಸಾ ಸಮವತ್ಥಚಾರೇ’’ತಿ. ದುತಿಯಂ.