೮. ದನ್ತಕಟ್ಠಸುತ್ತಂ

೨೦೮. ‘‘ಪಞ್ಚಿಮೇ, ಭಿಕ್ಖವೇ, ಆದೀನವಾ ದನ್ತಕಟ್ಠಸ್ಸ ಅಖಾದನೇ. ಕತಮೇ ಪಞ್ಚ? ಅಚಕ್ಖುಸ್ಸಂ, ಮುಖಂ ದುಗ್ಗನ್ಧಂ ಹೋತಿ, ರಸಹರಣಿಯೋ ನ ವಿಸುಜ್ಝನ್ತಿ, ಪಿತ್ತಂ ಸೇಮ್ಹಂ ಭತ್ತಂ ಪರಿಯೋನನ್ಧತಿ [ಪರಿಯೋನದ್ಧನ್ತಿ (ಸೀ. ಪೀ.), ಪರಿಯೋನದ್ಧತಿ (ಸ್ಯಾ. ಕಂ. ಕ.) ಚೂಳವ. ೨೮೨ ಪಸ್ಸಿತಬ್ಬಂ], ಭತ್ತಮಸ್ಸ ನಚ್ಛಾದೇತಿ. ಇಮೇ ಖೋ, ಭಿಕ್ಖವೇ, ಪಞ್ಚ ಆದೀನವಾ ದನ್ತಕಟ್ಠಸ್ಸ ಅಖಾದನೇ.

‘‘ಪಞ್ಚಿಮೇ, ಭಿಕ್ಖವೇ, ಆನಿಸಂಸಾ ದನ್ತಕಟ್ಠಸ್ಸ ಖಾದನೇ. ಕತಮೇ ಪಞ್ಚ? ಚಕ್ಖುಸ್ಸಂ, ಮುಖಂ ನ ದುಗ್ಗನ್ಧಂ ಹೋತಿ, ರಸಹರಣಿಯೋ ವಿಸುಜ್ಝನ್ತಿ, ಪಿತ್ತಂ ಸೇಮ್ಹಂ ಭತ್ತಂ ನ ಪರಿಯೋನನ್ಧತಿ, ಭತ್ತಮಸ್ಸ ಛಾದೇತಿ. ಇಮೇ ಖೋ, ಭಿಕ್ಖವೇ, ಪಞ್ಚ ಆನಿಸಂಸಾ ದನ್ತಕಟ್ಠಸ್ಸ ಖಾದನೇ’’ತಿ. ಅಟ್ಠಮಂ.