೫. ದಾನಾನಿಸಂಸಸುತ್ತಂ

೩೫. ‘‘ಪಞ್ಚಿಮೇ, ಭಿಕ್ಖವೇ, ದಾನೇ ಆನಿಸಂಸಾ. ಕತಮೇ ಪಞ್ಚ? ಬಹುನೋ ಜನಸ್ಸ ಪಿಯೋ ಹೋತಿ ಮನಾಪೋ; ಸನ್ತೋ ಸಪ್ಪುರಿಸಾ ಭಜನ್ತಿ; ಕಲ್ಯಾಣೋ ಕಿತ್ತಿಸದ್ದೋ ಅಬ್ಭುಗ್ಗಚ್ಛತಿ; ಗಿಹಿಧಮ್ಮಾ ಅನಪಗತೋ [ಗಿಹಿಧಮ್ಮಾ ಅನಪೇತೋ (ಸೀ. ಪೀ.), ಗಿಹಿಧಮ್ಮಮನುಪಗತೋ (ಕ.)] ಹೋತಿ; ಕಾಯಸ್ಸ ಭೇದಾ ಪರಂ ಮರಣಾ ಸುಗತಿಂ ಸಗ್ಗಂ ಲೋಕಂ ಉಪಪಜ್ಜತಿ. ಇಮೇ ಖೋ, ಭಿಕ್ಖವೇ, ಪಞ್ಚ ದಾನೇ ಆನಿಸಂಸಾ’’ತಿ.

‘‘ದದಮಾನೋ ಪಿಯೋ ಹೋತಿ, ಸತಂ ಧಮ್ಮಂ ಅನುಕ್ಕಮಂ;

ಸನ್ತೋ ನಂ ಸದಾ ಭಜನ್ತಿ [ಸನ್ತೋ ಭಜನ್ತಿ ಸಪ್ಪುರಿಸಾ (ಸೀ.)], ಸಞ್ಞತಾ ಬ್ರಹ್ಮಚಾರಯೋ.

‘‘ತೇ ತಸ್ಸ ಧಮ್ಮಂ ದೇಸೇನ್ತಿ, ಸಬ್ಬದುಕ್ಖಾಪನೂದನಂ;

ಯಂ ಸೋ ಧಮ್ಮಂ ಇಧಞ್ಞಾಯ, ಪರಿನಿಬ್ಬಾತಿ ಅನಾಸವೋ’’ತಿ. ಪಞ್ಚಮಂ;