೬. ಕಾಲದಾನಸುತ್ತಂ

೩೬. ‘‘ಪಞ್ಚಿಮಾನಿ, ಭಿಕ್ಖವೇ, ಕಾಲದಾನಾನಿ. ಕತಮಾನಿ ಪಞ್ಚ? ಆಗನ್ತುಕಸ್ಸ ದಾನಂ ದೇತಿ; ಗಮಿಕಸ್ಸ ದಾನಂ ದೇತಿ; ಗಿಲಾನಸ್ಸ ದಾನಂ ದೇತಿ; ದುಬ್ಭಿಕ್ಖೇ ದಾನಂ ದೇತಿ; ಯಾನಿ ತಾನಿ ನವಸಸ್ಸಾನಿ ನವಫಲಾನಿ ತಾನಿ ಪಠಮಂ ಸೀಲವನ್ತೇಸು ಪತಿಟ್ಠಾಪೇತಿ. ಇಮಾನಿ ಖೋ, ಭಿಕ್ಖವೇ, ಪಞ್ಚ ಕಾಲದಾನಾನೀ’’ತಿ.

‘‘ಕಾಲೇ ದದನ್ತಿ ಸಪ್ಪಞ್ಞಾ, ವದಞ್ಞೂ ವೀತಮಚ್ಛರಾ;

ಕಾಲೇನ ದಿನ್ನಂ ಅರಿಯೇಸು, ಉಜುಭೂತೇಸು ತಾದಿಸು.

‘‘ವಿಪ್ಪಸನ್ನಮನಾ ತಸ್ಸ, ವಿಪುಲಾ ಹೋತಿ ದಕ್ಖಿಣಾ;

ಯೇ ತತ್ಥ ಅನುಮೋದನ್ತಿ, ವೇಯ್ಯಾವಚ್ಚಂ ಕರೋನ್ತಿ ವಾ;

ನ ತೇನ [ನ ತೇಸಂ (ಪೀ. ಕ.)] ದಕ್ಖಿಣಾ ಊನಾ, ತೇಪಿ ಪುಞ್ಞಸ್ಸ ಭಾಗಿನೋ.

‘‘ತಸ್ಮಾ ದದೇ ಅಪ್ಪಟಿವಾನಚಿತ್ತೋ, ಯತ್ಥ ದಿನ್ನಂ ಮಹಪ್ಫಲಂ;

ಪುಞ್ಞಾನಿ ಪರಲೋಕಸ್ಮಿಂ, ಪತಿಟ್ಠಾ ಹೋನ್ತಿ ಪಾಣಿನ’’ನ್ತಿ. ಛಟ್ಠಂ;