೯. ಪಟಿಚ್ಛನ್ನಸುತ್ತಂ

೧೩೨. ‘‘ತೀಣಿಮಾನಿ, ಭಿಕ್ಖವೇ, ಪಟಿಚ್ಛನ್ನಾನಿ ಆವಹನ್ತಿ [ವಹನ್ತಿ (ಸೀ. ಸ್ಯಾ. ಕಂ. ಪೀ.)], ನೋ ವಿವಟಾನಿ. ಕತಮಾನಿ ತೀಣಿ? ಮಾತುಗಾಮೋ, ಭಿಕ್ಖವೇ, ಪಟಿಚ್ಛನ್ನೋ ಆವಹತಿ, ನೋ ವಿವಟೋ; ಬ್ರಾಹ್ಮಣಾನಂ, ಭಿಕ್ಖವೇ, ಮನ್ತಾ ಪಟಿಚ್ಛನ್ನಾ ಆವಹನ್ತಿ, ನೋ ವಿವಟಾ; ಮಿಚ್ಛಾದಿಟ್ಠಿ, ಭಿಕ್ಖವೇ, ಪಟಿಚ್ಛನ್ನಾ ಆವಹತಿ, ನೋ ವಿವಟಾ. ಇಮಾನಿ ಖೋ, ಭಿಕ್ಖವೇ, ತೀಣಿ ಪಟಿಚ್ಛನ್ನಾನಿ ಆವಹನ್ತಿ, ನೋ ವಿವಟಾನಿ.

‘‘ತೀಣಿಮಾನಿ, ಭಿಕ್ಖವೇ, ವಿವಟಾನಿ ವಿರೋಚನ್ತಿ, ನೋ ಪಟಿಚ್ಛನ್ನಾನಿ. ಕತಮಾನಿ ತೀಣಿ? ಚನ್ದಮಣ್ಡಲಂ, ಭಿಕ್ಖವೇ, ವಿವಟಂ ವಿರೋಚತಿ, ನೋ ಪಟಿಚ್ಛನ್ನಂ; ಸೂರಿಯಮಣ್ಡಲಂ, ಭಿಕ್ಖವೇ, ವಿವಟಂ ವಿರೋಚತಿ, ನೋ ಪಟಿಚ್ಛನ್ನಂ; ತಥಾಗತಪ್ಪವೇದಿತೋ ಧಮ್ಮವಿನಯೋ, ಭಿಕ್ಖವೇ, ವಿವಟೋ ವಿರೋಚತಿ, ನೋ ಪಟಿಚ್ಛನ್ನೋ. ಇಮಾನಿ ಖೋ, ಭಿಕ್ಖವೇ, ತೀಣಿ ವಿವಟಾನಿ ವಿರೋಚನ್ತಿ, ನೋ ಪಟಿಚ್ಛನ್ನಾನೀ’’ತಿ. ನವಮಂ.