೭. ನಪ್ಪಿಯಸುತ್ತಂ

೮೭. ತತ್ರ ಖೋ ಭಗವಾ ಕಾಲಙ್ಕತಂ ಭಿಕ್ಖುಂ [ಕಲನ್ದಕಂ ಭಿಕ್ಖುಂ (ಸೀ.), ಕಾಳಕಭಿಕ್ಖುಂ (ಸ್ಯಾ.)] ಆರಬ್ಭ ಭಿಕ್ಖೂ ಆಮನ್ತೇಸಿ – ‘‘ಭಿಕ್ಖವೋ’’ತಿ. ‘‘ಭದನ್ತೇ’’ತಿ ತೇ ಭಿಕ್ಖೂ ಭಗವತೋ ಪಚ್ಚಸ್ಸೋಸುಂ. ಭಗವಾ ಏತದವೋಚ –

‘‘ಇಧ, ಭಿಕ್ಖವೇ, ಭಿಕ್ಖು ಅಧಿಕರಣಿಕೋ ಹೋತಿ, ಅಧಿಕರಣಸಮಥಸ್ಸ ನ ವಣ್ಣವಾದೀ. ಯಮ್ಪಿ, ಭಿಕ್ಖವೇ, ಭಿಕ್ಖು ಅಧಿಕರಣಿಕೋ ಹೋತಿ ಅಧಿಕರಣಸಮಥಸ್ಸ ನ ವಣ್ಣವಾದೀ, ಅಯಮ್ಪಿ ಧಮ್ಮೋ ನ ಪಿಯತಾಯ ನ ಗರುತಾಯ ನ ಭಾವನಾಯ ನ ಸಾಮಞ್ಞಾಯ ನ ಏಕೀಭಾವಾಯ ಸಂವತ್ತತಿ.

‘‘ಪುನ ಚಪರಂ, ಭಿಕ್ಖವೇ, ಭಿಕ್ಖು ನ ಸಿಕ್ಖಾಕಾಮೋ ಹೋತಿ, ಸಿಕ್ಖಾಸಮಾದಾನಸ್ಸ [ಸಿಕ್ಖಾಕಾಮಸ್ಸ (ಕ.)] ನ ವಣ್ಣವಾದೀ. ಯಮ್ಪಿ, ಭಿಕ್ಖವೇ, ಭಿಕ್ಖು ನ ಸಿಕ್ಖಾಕಾಮೋ ಹೋತಿ ಸಿಕ್ಖಾಸಮಾದಾನಸ್ಸ ನ ವಣ್ಣವಾದೀ, ಅಯಮ್ಪಿ ಧಮ್ಮೋ ನ ಪಿಯತಾಯ ನ ಗರುತಾಯ ನ ಭಾವನಾಯ ನ ಸಾಮಞ್ಞಾಯ ನ ಏಕೀಭಾವಾಯ ಸಂವತ್ತತಿ.

‘‘ಪುನ ಚಪರಂ, ಭಿಕ್ಖವೇ, ಭಿಕ್ಖು ಪಾಪಿಚ್ಛೋ ಹೋತಿ, ಇಚ್ಛಾವಿನಯಸ್ಸ ನ ವಣ್ಣವಾದೀ. ಯಮ್ಪಿ, ಭಿಕ್ಖವೇ, ಭಿಕ್ಖು ಪಾಪಿಚ್ಛೋ ಹೋತಿ ಇಚ್ಛಾವಿನಯಸ್ಸ ನ ವಣ್ಣವಾದೀ, ಅಯಮ್ಪಿ ಧಮ್ಮೋ ನ ಪಿಯತಾಯ ನ ಗರುತಾಯ ನ ಭಾವನಾಯ ನ ಸಾಮಞ್ಞಾಯ ನ ಏಕೀಭಾವಾಯ ಸಂವತ್ತತಿ.

‘‘ಪುನ ಚಪರಂ, ಭಿಕ್ಖವೇ, ಭಿಕ್ಖು ಕೋಧನೋ ಹೋತಿ, ಕೋಧವಿನಯಸ್ಸ ನ ವಣ್ಣವಾದೀ. ಯಮ್ಪಿ, ಭಿಕ್ಖವೇ, ಭಿಕ್ಖು ಕೋಧನೋ ಹೋತಿ ಕೋಧವಿನಯಸ್ಸ ನ ವಣ್ಣವಾದೀ, ಅಯಮ್ಪಿ ಧಮ್ಮೋ ನ ಪಿಯತಾಯ ನ ಗರುತಾಯ ನ ಭಾವನಾಯ ನ ಸಾಮಞ್ಞಾಯ ನ ಏಕೀಭಾವಾಯ ಸಂವತ್ತತಿ.

‘‘ಪುನ ಚಪರಂ, ಭಿಕ್ಖವೇ, ಭಿಕ್ಖು ಮಕ್ಖೀ ಹೋತಿ, ಮಕ್ಖವಿನಯಸ್ಸ ನ ವಣ್ಣವಾದೀ. ಯಮ್ಪಿ, ಭಿಕ್ಖವೇ, ಭಿಕ್ಖು ಮಕ್ಖೀ ಹೋತಿ ಮಕ್ಖವಿನಯಸ್ಸ ನ ವಣ್ಣವಾದೀ, ಅಯಮ್ಪಿ ಧಮ್ಮೋ ನ ಪಿಯತಾಯ ನ ಗರುತಾಯ ನ ಭಾವನಾಯ ನ ಸಾಮಞ್ಞಾಯ ನ ಏಕೀಭಾವಾಯ ಸಂವತ್ತತಿ.

‘‘ಪುನ ಚಪರಂ, ಭಿಕ್ಖವೇ, ಭಿಕ್ಖು ಸಠೋ ಹೋತಿ, ಸಾಠೇಯ್ಯವಿನಯಸ್ಸ ನ ವಣ್ಣವಾದೀ. ಯಮ್ಪಿ, ಭಿಕ್ಖವೇ, ಭಿಕ್ಖು ಸಠೋ ಹೋತಿ ಸಾಠೇಯ್ಯವಿನಯಸ್ಸ ನ ವಣ್ಣವಾದೀ, ಅಯಮ್ಪಿ ಧಮ್ಮೋ ನ ಪಿಯತಾಯ ನ ಗರುತಾಯ ನ ಭಾವನಾಯ ನ ಸಾಮಞ್ಞಾಯ ನ ಏಕೀಭಾವಾಯ ಸಂವತ್ತತಿ.

‘‘ಪುನ ಚಪರಂ, ಭಿಕ್ಖವೇ, ಭಿಕ್ಖು ಮಾಯಾವೀ ಹೋತಿ, ಮಾಯಾವಿನಯಸ್ಸ ನ ವಣ್ಣವಾದೀ. ಯಮ್ಪಿ, ಭಿಕ್ಖವೇ, ಭಿಕ್ಖು ಮಾಯಾವೀ ಹೋತಿ ಮಾಯಾವಿನಯಸ್ಸ ನ ವಣ್ಣವಾದೀ, ಅಯಮ್ಪಿ ಧಮ್ಮೋ ನ ಪಿಯತಾಯ ನ ಗರುತಾಯ ನ ಭಾವನಾಯ ನ ಸಾಮಞ್ಞಾಯ ನ ಏಕೀಭಾವಾಯ ಸಂವತ್ತತಿ.

‘‘ಪುನ ಚಪರಂ, ಭಿಕ್ಖವೇ, ಭಿಕ್ಖು ಧಮ್ಮಾನಂ ನ ನಿಸಾಮಕಜಾತಿಕೋ ಹೋತಿ, ಧಮ್ಮನಿಸನ್ತಿಯಾ ನ ವಣ್ಣವಾದೀ. ಯಮ್ಪಿ, ಭಿಕ್ಖವೇ, ಭಿಕ್ಖು ಧಮ್ಮಾನಂ ನ ನಿಸಾಮಕಜಾತಿಕೋ ಹೋತಿ ಧಮ್ಮನಿಸನ್ತಿಯಾ ನ ವಣ್ಣವಾದೀ, ಅಯಮ್ಪಿ ಧಮ್ಮೋ ನ ಪಿಯತಾಯ ನ ಗರುತಾಯ ನ ಭಾವನಾಯ ನ ಸಾಮಞ್ಞಾಯ ನ ಏಕೀಭಾವಾಯ ಸಂವತ್ತತಿ.

‘‘ಪುನ ಚಪರಂ, ಭಿಕ್ಖವೇ, ಭಿಕ್ಖು ನ ಪಟಿಸಲ್ಲೀನೋ ಹೋತಿ, ಪಟಿಸಲ್ಲಾನಸ್ಸ ನ ವಣ್ಣವಾದೀ. ಯಮ್ಪಿ, ಭಿಕ್ಖವೇ, ಭಿಕ್ಖು ನ ಪಟಿಸಲ್ಲೀನೋ ಹೋತಿ ಪಟಿಸಲ್ಲಾನಸ್ಸ ನ ವಣ್ಣವಾದೀ, ಅಯಮ್ಪಿ ಧಮ್ಮೋ ನ ಪಿಯತಾಯ ನ ಗರುತಾಯ ನ ಭಾವನಾಯ ನ ಸಾಮಞ್ಞಾಯ ನ ಏಕೀಭಾವಾಯ ಸಂವತ್ತತಿ.

‘‘ಪುನ ಚಪರಂ, ಭಿಕ್ಖವೇ, ಭಿಕ್ಖು ಸಬ್ರಹ್ಮಚಾರೀನಂ ನ ಪಟಿಸನ್ಥಾರಕೋ [ಪಟಿಸನ್ಧಾರಕೋ (ಕ.)] ಹೋತಿ, ಪಟಿಸನ್ಥಾರಕಸ್ಸ ನ ವಣ್ಣವಾದೀ. ಯಮ್ಪಿ, ಭಿಕ್ಖವೇ, ಭಿಕ್ಖು ಸಬ್ರಹ್ಮಚಾರೀನಂ ನ ಪಟಿಸನ್ಥಾರಕೋ ಹೋತಿ ಪಟಿಸನ್ಥಾರಕಸ್ಸ ನ ವಣ್ಣವಾದೀ, ಅಯಮ್ಪಿ ಧಮ್ಮೋ ನ ಪಿಯತಾಯ ನ ಗರುತಾಯ ನ ಭಾವನಾಯ ನ ಸಾಮಞ್ಞಾಯ ನ ಏಕೀಭಾವಾಯ ಸಂವತ್ತತಿ.

‘‘ಏವರೂಪಸ್ಸ, ಭಿಕ್ಖವೇ, ಭಿಕ್ಖುನೋ ಕಿಞ್ಚಾಪಿ ಏವಂ ಇಚ್ಛಾ ಉಪ್ಪಜ್ಜೇಯ್ಯ – ‘ಅಹೋ ವತ ಮಂ ಸಬ್ರಹ್ಮಚಾರೀ ಸಕ್ಕರೇಯ್ಯುಂ ಗರುಂ ಕರೇಯ್ಯುಂ [ಗರುಕರೇಯ್ಯುಂ (ಸೀ. ಸ್ಯಾ.)] ಮಾನೇಯ್ಯುಂ ಪೂಜೇಯ್ಯು’ನ್ತಿ, ಅಥ ಖೋ ನಂ ಸಬ್ರಹ್ಮಚಾರೀ ನ ಚೇವ ಸಕ್ಕರೋನ್ತಿ ನ ಗರುಂ ಕರೋನ್ತಿ [ಗರುಕರೋನ್ತಿ (ಸೀ. ಸ್ಯಾ.)] ನ ಮಾನೇನ್ತಿ ನ ಪೂಜೇನ್ತಿ. ತಂ ಕಿಸ್ಸ ಹೇತು? ತಥಾಹಿಸ್ಸ, ಭಿಕ್ಖವೇ, ವಿಞ್ಞೂ ಸಬ್ರಹ್ಮಚಾರೀ ತೇ ಪಾಪಕೇ ಅಕುಸಲೇ ಧಮ್ಮೇ ಅಪ್ಪಹೀನೇ ಸಮನುಪಸ್ಸನ್ತಿ.

‘‘ಸೇಯ್ಯಥಾಪಿ, ಭಿಕ್ಖವೇ, ಅಸ್ಸಖಳುಙ್ಕಸ್ಸ ಕಿಞ್ಚಾಪಿ ಏವಂ ಇಚ್ಛಾ ಉಪ್ಪಜ್ಜೇಯ್ಯ – ‘ಅಹೋ ವತ ಮಂ ಮನುಸ್ಸಾ ಆಜಾನೀಯಟ್ಠಾನೇ ಠಪೇಯ್ಯುಂ, ಆಜಾನೀಯಭೋಜನಞ್ಚ ಭೋಜೇಯ್ಯುಂ, ಆಜಾನೀಯಪರಿಮಜ್ಜನಞ್ಚ ಪರಿಮಜ್ಜೇಯ್ಯು’ನ್ತಿ, ಅಥ ಖೋ ನಂ ಮನುಸ್ಸಾ ನ ಚೇವ ಆಜಾನೀಯಟ್ಠಾನೇ ಠಪೇನ್ತಿ ನ ಚ ಆಜಾನೀಯಭೋಜನಂ ಭೋಜೇನ್ತಿ ನ ಚ ಆಜಾನೀಯಪರಿಮಜ್ಜನಂ ಪರಿಮಜ್ಜನ್ತಿ. ತಂ ಕಿಸ್ಸ ಹೇತು? ತಥಾಹಿಸ್ಸ, ಭಿಕ್ಖವೇ, ವಿಞ್ಞೂ ಮನುಸ್ಸಾ ತಾನಿ ಸಾಠೇಯ್ಯಾನಿ ಕೂಟೇಯ್ಯಾನಿ ಜಿಮ್ಹೇಯ್ಯಾನಿ ವಙ್ಕೇಯ್ಯಾನಿ ಅಪ್ಪಹೀನಾನಿ ಸಮನುಪಸ್ಸನ್ತಿ. ಏವಮೇವಂ ಖೋ, ಭಿಕ್ಖವೇ, ಏವರೂಪಸ್ಸ ಭಿಕ್ಖುನೋ ಕಿಞ್ಚಾಪಿ ಏವಂ ಇಚ್ಛಾ ಉಪ್ಪಜ್ಜೇಯ್ಯ – ‘ಅಹೋ ವತ ಮಂ ಸಬ್ರಹ್ಮಚಾರೀ ಸಕ್ಕರೇಯ್ಯುಂ ಗರುಂ ಕರೇಯ್ಯುಂ ಮಾನೇಯ್ಯುಂ ಪೂಜೇಯ್ಯು’ನ್ತಿ, ಅಥ ಖೋ ನಂ ಸಬ್ರಹ್ಮಚಾರೀ ನ ಚೇವ ಸಕ್ಕರೋನ್ತಿ ನ ಗರುಂ ಕರೋನ್ತಿ ನ ಮಾನೇನ್ತಿ ನ ಪೂಜೇನ್ತಿ. ತಂ ಕಿಸ್ಸ ಹೇತು? ತಥಾಹಿಸ್ಸ, ಭಿಕ್ಖವೇ, ವಿಞ್ಞೂ ಸಬ್ರಹ್ಮಚಾರೀ ತೇ ಪಾಪಕೇ ಅಕುಸಲೇ ಧಮ್ಮೇ ಅಪ್ಪಹೀನೇ ಸಮನುಪಸ್ಸನ್ತಿ.

‘‘ಇಧ ಪನ, ಭಿಕ್ಖವೇ, ಭಿಕ್ಖು ನ ಅಧಿಕರಣಿಕೋ ಹೋತಿ, ಅಧಿಕರಣಸಮಥಸ್ಸ ವಣ್ಣವಾದೀ. ಯಮ್ಪಿ, ಭಿಕ್ಖವೇ, ಭಿಕ್ಖು ನ ಅಧಿಕರಣಿಕೋ ಹೋತಿ ಅಧಿಕರಣಸಮಥಸ್ಸ ವಣ್ಣವಾದೀ, ಅಯಮ್ಪಿ ಧಮ್ಮೋ ಪಿಯತಾಯ ಗರುತಾಯ ಭಾವನಾಯ ಸಾಮಞ್ಞಾಯ ಏಕೀಭಾವಾಯ ಸಂವತ್ತತಿ.

‘‘ಪುನ ಚಪರಂ, ಭಿಕ್ಖವೇ, ಭಿಕ್ಖು ಸಿಕ್ಖಾಕಾಮೋ ಹೋತಿ, ಸಿಕ್ಖಾಸಮಾದಾನಸ್ಸ ವಣ್ಣವಾದೀ. ಯಮ್ಪಿ, ಭಿಕ್ಖವೇ, ಭಿಕ್ಖು ಸಿಕ್ಖಾಕಾಮೋ ಹೋತಿ ಸಿಕ್ಖಾಸಮಾದಾನಸ್ಸ ವಣ್ಣವಾದೀ, ಅಯಮ್ಪಿ ಧಮ್ಮೋ ಪಿಯತಾಯ ಗರುತಾಯ ಭಾವನಾಯ ಸಾಮಞ್ಞಾಯ ಏಕೀಭಾವಾಯ ಸಂವತ್ತತಿ.

‘‘ಪುನ ಚಪರಂ, ಭಿಕ್ಖವೇ, ಭಿಕ್ಖು ಅಪ್ಪಿಚ್ಛೋ ಹೋತಿ, ಇಚ್ಛಾವಿನಯಸ್ಸ ವಣ್ಣವಾದೀ. ಯಮ್ಪಿ, ಭಿಕ್ಖವೇ, ಭಿಕ್ಖು ಅಪ್ಪಿಚ್ಛೋ ಹೋತಿ ಇಚ್ಛಾವಿನಯಸ್ಸ ವಣ್ಣವಾದೀ, ಅಯಮ್ಪಿ ಧಮ್ಮೋ…ಪೇ… ಏಕೀಭಾವಾಯ ಸಂವತ್ತತಿ.

‘‘ಪುನ ಚಪರಂ, ಭಿಕ್ಖವೇ, ಭಿಕ್ಖು ಅಕ್ಕೋಧನೋ ಹೋತಿ, ಕೋಧವಿನಯಸ್ಸ ವಣ್ಣವಾದೀ. ಯಮ್ಪಿ, ಭಿಕ್ಖವೇ, ಭಿಕ್ಖು ಅಕ್ಕೋಧನೋ ಹೋತಿ ಕೋಧವಿನಯಸ್ಸ ವಣ್ಣವಾದೀ, ಅಯಮ್ಪಿ ಧಮ್ಮೋ…ಪೇ… ಏಕೀಭಾವಾಯ ಸಂವತ್ತತಿ.

‘‘ಪುನ ಚಪರಂ, ಭಿಕ್ಖವೇ, ಭಿಕ್ಖು ಅಮಕ್ಖೀ ಹೋತಿ, ಮಕ್ಖವಿನಯಸ್ಸ ವಣ್ಣವಾದೀ. ಯಮ್ಪಿ, ಭಿಕ್ಖವೇ, ಭಿಕ್ಖು ಅಮಕ್ಖೀ ಹೋತಿ ಮಕ್ಖವಿನಯಸ್ಸ ವಣ್ಣವಾದೀ, ಅಯಮ್ಪಿ ಧಮ್ಮೋ…ಪೇ… ಏಕೀಭಾವಾಯ ಸಂವತ್ತತಿ.

‘‘ಪುನ ಚಪರಂ, ಭಿಕ್ಖವೇ, ಭಿಕ್ಖು ಅಸಠೋ ಹೋತಿ, ಸಾಠೇಯ್ಯವಿನಯಸ್ಸ ವಣ್ಣವಾದೀ. ಯಮ್ಪಿ, ಭಿಕ್ಖವೇ, ಭಿಕ್ಖು ಅಸಠೋ ಹೋತಿ ಸಾಠೇಯ್ಯವಿನಯಸ್ಸ ವಣ್ಣವಾದೀ, ಅಯಮ್ಪಿ ಧಮ್ಮೋ…ಪೇ… ಏಕೀಭಾವಾಯ ಸಂವತ್ತತಿ.

‘‘ಪುನ ಚಪರಂ, ಭಿಕ್ಖವೇ, ಭಿಕ್ಖು ಅಮಾಯಾವೀ ಹೋತಿ, ಮಾಯಾವಿನಯಸ್ಸ ವಣ್ಣವಾದೀ. ಯಮ್ಪಿ, ಭಿಕ್ಖವೇ, ಭಿಕ್ಖು ಅಮಾಯಾವೀ ಹೋತಿ ಮಾಯಾವಿನಯಸ್ಸ ವಣ್ಣವಾದೀ, ಅಯಮ್ಪಿ ಧಮ್ಮೋ…ಪೇ… ಏಕೀಭಾವಾಯ ಸಂವತ್ತತಿ.

‘‘ಪುನ ಚಪರಂ, ಭಿಕ್ಖವೇ, ಭಿಕ್ಖು ಧಮ್ಮಾನಂ ನಿಸಾಮಕಜಾತಿಕೋ ಹೋತಿ, ಧಮ್ಮನಿಸನ್ತಿಯಾ ವಣ್ಣವಾದೀ. ಯಮ್ಪಿ, ಭಿಕ್ಖವೇ, ಭಿಕ್ಖು ಧಮ್ಮಾನಂ ನಿಸಾಮಕಜಾತಿಕೋ ಹೋತಿ ಧಮ್ಮನಿಸನ್ತಿಯಾ ವಣ್ಣವಾದೀ, ಅಯಮ್ಪಿ ಧಮ್ಮೋ…ಪೇ… ಏಕೀಭಾವಾಯ ಸಂವತ್ತತಿ.

‘‘ಪುನ ಚಪರಂ, ಭಿಕ್ಖವೇ, ಭಿಕ್ಖು ಪಟಿಸಲ್ಲೀನೋ ಹೋತಿ, ಪಟಿಸಲ್ಲಾನಸ್ಸ ವಣ್ಣವಾದೀ. ಯಮ್ಪಿ, ಭಿಕ್ಖವೇ, ಭಿಕ್ಖು ಪಟಿಸಲ್ಲೀನೋ ಹೋತಿ ಪಟಿಸಲ್ಲಾನಸ್ಸ ವಣ್ಣವಾದೀ, ಅಯಮ್ಪಿ ಧಮ್ಮೋ…ಪೇ… ಏಕೀಭಾವಾಯ ಸಂವತ್ತತಿ.

‘‘ಪುನ ಚಪರಂ, ಭಿಕ್ಖವೇ, ಭಿಕ್ಖು ಸಬ್ರಹ್ಮಚಾರೀನಂ ಪಟಿಸನ್ಥಾರಕೋ ಹೋತಿ, ಪಟಿಸನ್ಥಾರಕಸ್ಸ ವಣ್ಣವಾದೀ. ಯಮ್ಪಿ, ಭಿಕ್ಖವೇ, ಭಿಕ್ಖು ಸಬ್ರಹ್ಮಚಾರೀನಂ ಪಟಿಸನ್ಥಾರಕೋ ಹೋತಿ ಪಟಿಸನ್ಥಾರಕಸ್ಸ ವಣ್ಣವಾದೀ, ಅಯಮ್ಪಿ ಧಮ್ಮೋ ಪಿಯತಾಯ ಗರುತಾಯ ಭಾವನಾಯ ಸಾಮಞ್ಞಾಯ ಏಕೀಭಾವಾಯ ಸಂವತ್ತತಿ.

‘‘ಏವರೂಪಸ್ಸ, ಭಿಕ್ಖವೇ, ಭಿಕ್ಖುನೋ ಕಿಞ್ಚಾಪಿ ನ ಏವಂ ಇಚ್ಛಾ ಉಪ್ಪಜ್ಜೇಯ್ಯ – ‘ಅಹೋ ವತ ಮಂ ಸಬ್ರಹ್ಮಚಾರೀ ಸಕ್ಕರೇಯ್ಯುಂ ಗರುಂ ಕರೇಯ್ಯುಂ ಮಾನೇಯ್ಯುಂ ಪೂಜೇಯ್ಯು’ನ್ತಿ, ಅಥ ಖೋ ನಂ ಸಬ್ರಹ್ಮಚಾರೀ ಸಕ್ಕರೋನ್ತಿ ಗರುಂ ಕರೋನ್ತಿ ಮಾನೇನ್ತಿ ಪೂಜೇನ್ತಿ. ತಂ ಕಿಸ್ಸ ಹೇತು? ತಥಾಹಿಸ್ಸ, ಭಿಕ್ಖವೇ, ವಿಞ್ಞೂ ಸಬ್ರಹ್ಮಚಾರೀ ತೇ ಪಾಪಕೇ ಅಕುಸಲೇ ಧಮ್ಮೇ ಪಹೀನೇ ಸಮನುಪಸ್ಸನ್ತಿ.

‘‘ಸೇಯ್ಯಥಾಪಿ, ಭಿಕ್ಖವೇ, ಭದ್ದಸ್ಸ ಅಸ್ಸಾಜಾನೀಯಸ್ಸ ಕಿಞ್ಚಾಪಿ ನ ಏವಂ ಇಚ್ಛಾ ಉಪ್ಪಜ್ಜೇಯ್ಯ – ‘ಅಹೋ ವತ ಮಂ ಮನುಸ್ಸಾ ಆಜಾನೀಯಟ್ಠಾನೇ ಠಪೇಯ್ಯುಂ, ಆಜಾನೀಯಭೋಜನಞ್ಚ ಭೋಜೇಯ್ಯುಂ, ಆಜಾನೀಯಪರಿಮಜ್ಜನಞ್ಚ ಪರಿಮಜ್ಜೇಯ್ಯು’ನ್ತಿ, ಅಥ ಖೋ ನಂ ಮನುಸ್ಸಾ ಆಜಾನೀಯಟ್ಠಾನೇ ಚ ಠಪೇನ್ತಿ ಆಜಾನೀಯಭೋಜನಞ್ಚ ಭೋಜೇನ್ತಿ ಆಜಾನೀಯಪರಿಮಜ್ಜನಞ್ಚ ಪರಿಮಜ್ಜನ್ತಿ. ತಂ ಕಿಸ್ಸ ಹೇತು? ತಥಾಹಿಸ್ಸ, ಭಿಕ್ಖವೇ, ವಿಞ್ಞೂ ಮನುಸ್ಸಾ ತಾನಿ ಸಾಠೇಯ್ಯಾನಿ ಕೂಟೇಯ್ಯಾನಿ ಜಿಮ್ಹೇಯ್ಯಾನಿ ವಙ್ಕೇಯ್ಯಾನಿ ಪಹೀನಾನಿ ಸಮನುಪಸ್ಸನ್ತಿ.

‘‘ಏವಮೇವಂ ಖೋ, ಭಿಕ್ಖವೇ, ಏವರೂಪಸ್ಸ ಭಿಕ್ಖುನೋ ಕಿಞ್ಚಾಪಿ ನ ಏವಂ ಇಚ್ಛಾ ಉಪ್ಪಜ್ಜೇಯ್ಯ – ‘ಅಹೋ ವತ ಮಂ ಸಬ್ರಹ್ಮಚಾರೀ ಸಕ್ಕರೇಯ್ಯುಂ ಗರುಂ ಕರೇಯ್ಯುಂ ಮಾನೇಯ್ಯುಂ ಪೂಜೇಯ್ಯು’ನ್ತಿ, ಅಥ ಖೋ ನಂ ಸಬ್ರಹ್ಮಚಾರೀ ಸಕ್ಕರೋನ್ತಿ ಗರುಂ ಕರೋನ್ತಿ ಮಾನೇನ್ತಿ ಪೂಜೇನ್ತಿ. ತಂ ಕಿಸ್ಸ ಹೇತು? ತಥಾಹಿಸ್ಸ, ಭಿಕ್ಖವೇ, ವಿಞ್ಞೂ ಸಬ್ರಹ್ಮಚಾರೀ ತೇ ಪಾಪಕೇ ಅಕುಸಲೇ ಧಮ್ಮೇ ಪಹೀನೇ ಸಮನುಪಸ್ಸನ್ತೀ’’ತಿ. ಸತ್ತಮಂ.