೩. ಇಟ್ಠಧಮ್ಮಸುತ್ತಂ

೭೩. ‘‘ದಸಯಿಮೇ, ಭಿಕ್ಖವೇ, ಧಮ್ಮಾ ಇಟ್ಠಾ ಕನ್ತಾ ಮನಾಪಾ ದುಲ್ಲಭಾ ಲೋಕಸ್ಮಿಂ. ಕತಮೇ ದಸ? ಭೋಗಾ ಇಟ್ಠಾ ಕನ್ತಾ ಮನಾಪಾ ದುಲ್ಲಭಾ ಲೋಕಸ್ಮಿಂ; ವಣ್ಣೋ ಇಟ್ಠೋ ಕನ್ತೋ ಮನಾಪೋ ದುಲ್ಲಭೋ ಲೋಕಸ್ಮಿಂ; ಆರೋಗ್ಯಂ ಇಟ್ಠಂ ಕನ್ತಂ ಮನಾಪಂ ದುಲ್ಲಭಂ ಲೋಕಸ್ಮಿಂ; ಸೀಲಂ ಇಟ್ಠಂ ಕನ್ತಂ ಮನಾಪಂ ದುಲ್ಲಭಂ ಲೋಕಸ್ಮಿಂ; ಬ್ರಹ್ಮಚರಿಯಂ ಇಟ್ಠಂ ಕನ್ತಂ ಮನಾಪಂ ದುಲ್ಲಭಂ ಲೋಕಸ್ಮಿಂ; ಮಿತ್ತಾ ಇಟ್ಠಾ ಕನ್ತಾ ಮನಾಪಾ ದುಲ್ಲಭಾ ಲೋಕಸ್ಮಿಂ; ಬಾಹುಸಚ್ಚಂ ಇಟ್ಠಂ ಕನ್ತಂ ಮನಾಪಂ ದುಲ್ಲಭಂ ಲೋಕಸ್ಮಿಂ; ಪಞ್ಞಾ ಇಟ್ಠಾ ಕನ್ತಾ ಮನಾಪಾ ದುಲ್ಲಭಾ ಲೋಕಸ್ಮಿಂ; ಧಮ್ಮಾ ಇಟ್ಠಾ ಕನ್ತಾ ಮನಾಪಾ ದುಲ್ಲಭಾ ಲೋಕಸ್ಮಿಂ; ಸಗ್ಗಾ ಇಟ್ಠಾ ಕನ್ತಾ ಮನಾಪಾ ದುಲ್ಲಭಾ ಲೋಕಸ್ಮಿಂ.

‘‘ಇಮೇಸಂ ಖೋ, ಭಿಕ್ಖವೇ, ದಸನ್ನಂ ಧಮ್ಮಾನಂ ಇಟ್ಠಾನಂ ಕನ್ತಾನಂ ಮನಾಪಾನಂ ದುಲ್ಲಭಾನಂ ಲೋಕಸ್ಮಿಂ ದಸ ಧಮ್ಮಾ ಪರಿಪನ್ಥಾ [ಪರಿಬನ್ಧಾ (ಕ.)] – ಆಲಸ್ಯಂ ಅನುಟ್ಠಾನಂ ಭೋಗಾನಂ ಪರಿಪನ್ಥೋ, ಅಮಣ್ಡನಾ ಅವಿಭೂಸನಾ ವಣ್ಣಸ್ಸ ಪರಿಪನ್ಥೋ, ಅಸಪ್ಪಾಯಕಿರಿಯಾ ಆರೋಗ್ಯಸ್ಸ ಪರಿಪನ್ಥೋ, ಪಾಪಮಿತ್ತತಾ ಸೀಲಾನಂ ಪರಿಪನ್ಥೋ, ಇನ್ದ್ರಿಯಅಸಂವರೋ ಬ್ರಹ್ಮಚರಿಯಸ್ಸ ಪರಿಪನ್ಥೋ, ವಿಸಂವಾದನಾ ಮಿತ್ತಾನಂ ಪರಿಪನ್ಥೋ, ಅಸಜ್ಝಾಯಕಿರಿಯಾ ಬಾಹುಸಚ್ಚಸ್ಸ ಪರಿಪನ್ಥೋ, ಅಸುಸ್ಸೂಸಾ ಅಪರಿಪುಚ್ಛಾ ಪಞ್ಞಾಯ ಪರಿಪನ್ಥೋ, ಅನನುಯೋಗೋ ಅಪಚ್ಚವೇಕ್ಖಣಾ ಧಮ್ಮಾನಂ ಪರಿಪನ್ಥೋ, ಮಿಚ್ಛಾಪಟಿಪತ್ತಿ ಸಗ್ಗಾನಂ ಪರಿಪನ್ಥೋ. ಇಮೇಸಂ ಖೋ, ಭಿಕ್ಖವೇ, ದಸನ್ನಂ ಇಟ್ಠಾನಂ ಕನ್ತಾನಂ ಮನಾಪಾನಂ ದುಲ್ಲಭಾನಂ ಲೋಕಸ್ಮಿಂ ಇಮೇ ದಸ ಧಮ್ಮಾ ಪರಿಪನ್ಥಾ.

‘‘ಇಮೇಸಂ ಖೋ, ಭಿಕ್ಖವೇ, ದಸನ್ನಂ ಧಮ್ಮಾನಂ ಇಟ್ಠಾನಂ ಕನ್ತಾನಂ ಮನಾಪಾನಂ ದುಲ್ಲಭಾನಂ ಲೋಕಸ್ಮಿಂ ದಸ ಧಮ್ಮಾ ಆಹಾರಾ – ಉಟ್ಠಾನಂ ಅನಾಲಸ್ಯಂ ಭೋಗಾನಂ ಆಹಾರೋ, ಮಣ್ಡನಾ ವಿಭೂಸನಾ ವಣ್ಣಸ್ಸ ಆಹಾರೋ, ಸಪ್ಪಾಯಕಿರಿಯಾ ಆರೋಗ್ಯಸ್ಸ ಆಹಾರೋ, ಕಲ್ಯಾಣಮಿತ್ತತಾ ಸೀಲಾನಂ ಆಹಾರೋ, ಇನ್ದ್ರಿಯಸಂವರೋ ಬ್ರಹ್ಮಚರಿಯಸ್ಸ ಆಹಾರೋ, ಅವಿಸಂವಾದನಾ ಮಿತ್ತಾನಂ ಆಹಾರೋ, ಸಜ್ಝಾಯಕಿರಿಯಾ ಬಾಹುಸಚ್ಚಸ್ಸ ಆಹಾರೋ, ಸುಸ್ಸೂಸಾ ಪರಿಪುಚ್ಛಾ ಪಞ್ಞಾಯ ಆಹಾರೋ, ಅನುಯೋಗೋ ಪಚ್ಚವೇಕ್ಖಣಾ ಧಮ್ಮಾನಂ ಆಹಾರೋ, ಸಮ್ಮಾಪಟಿಪತ್ತಿ ಸಗ್ಗಾನಂ ಆಹಾರೋ. ಇಮೇಸಂ ಖೋ, ಭಿಕ್ಖವೇ, ದಸನ್ನಂ ಧಮ್ಮಾನಂ ಇಟ್ಠಾನಂ ಕನ್ತಾನಂ ಮನಾಪಾನಂ ದುಲ್ಲಭಾನಂ ಲೋಕಸ್ಮಿಂ ಇಮೇ ದಸ ಧಮ್ಮಾ ಆಹಾರಾ’’ತಿ. ತತಿಯಂ.