೪. ವಡ್ಢಿಸುತ್ತಂ

೭೪. ‘‘ದಸಹಿ, ಭಿಕ್ಖವೇ, ವಡ್ಢೀಹಿ ವಡ್ಢಮಾನೋ ಅರಿಯಸಾವಕೋ ಅರಿಯಾಯ ವಡ್ಢಿಯಾ ವಡ್ಢತಿ, ಸಾರಾದಾಯೀ ಚ ಹೋತಿ ವರಾದಾಯೀ ಕಾಯಸ್ಸ. ಕತಮೇಹಿ ದಸಹಿ? ಖೇತ್ತವತ್ಥೂಹಿ ವಡ್ಢತಿ, ಧನಧಞ್ಞೇನ ವಡ್ಢತಿ, ಪುತ್ತದಾರೇಹಿ ವಡ್ಢತಿ, ದಾಸಕಮ್ಮಕರಪೋರಿಸೇಹಿ ವಡ್ಢತಿ, ಚತುಪ್ಪದೇಹಿ ವಡ್ಢತಿ, ಸದ್ಧಾಯ ವಡ್ಢತಿ, ಸೀಲೇನ ವಡ್ಢತಿ, ಸುತೇನ ವಡ್ಢತಿ, ಚಾಗೇನ ವಡ್ಢತಿ, ಪಞ್ಞಾಯ ವಡ್ಢತಿ – ಇಮೇಹಿ ಖೋ, ಭಿಕ್ಖವೇ, ದಸಹಿ ವಡ್ಢೀಹಿ ವಡ್ಢಮಾನೋ ಅರಿಯಸಾವಕೋ ಅರಿಯಾಯ ವಡ್ಢಿಯಾ ವಡ್ಢತಿ, ಸಾರಾದಾಯೀ ಚ ಹೋತಿ ವರಾದಾಯೀ ಕಾಯಸ್ಸಾತಿ.

‘‘ಧನೇನ ಧಞ್ಞೇನ ಚ ಯೋಧ ವಡ್ಢತಿ,

ಪುತ್ತೇಹಿ ದಾರೇಹಿ ಚತುಪ್ಪದೇಹಿ ಚ;

ಸ ಭೋಗವಾ ಹೋತಿ ಯಸಸ್ಸಿ ಪೂಜಿತೋ,

ಞಾತೀಹಿ ಮಿತ್ತೇಹಿ ಅಥೋಪಿ ರಾಜುಭಿ.

‘‘ಸದ್ಧಾಯ ಸೀಲೇನ ಚ ಯೋಧ ವಡ್ಢತಿ,

ಪಞ್ಞಾಯ ಚಾಗೇನ ಸುತೇನ ಚೂಭಯಂ;

ಸೋ ತಾದಿಸೋ ಸಪ್ಪುರಿಸೋ ವಿಚಕ್ಖಣೋ,

ದಿಟ್ಠೇವ ಧಮ್ಮೇ ಉಭಯೇನ ವಡ್ಢತೀ’’ತಿ. ಚತುತ್ಥಂ;